Vrede O De na ini a Nyun Pisi Ten fu Dusun Yari?

TAPU 14 september 1999 na idea fu na internationaal yari fu kweki vrede ben bigin na ini Parijs nanga a foto New York City”. Na Algemene Konmakandra fu den Verenigde Nâsi ben meki bekènti taki den o gi a yari 2000 a nen dati. Frederico Mayor, di fosi ben de driktoro fu UNESCO, ben aksi sma na wan seryusu fasi „fu meki den kondre na heri grontapu kweki vrede èn fu tapu nanga ogridu”.

UNESCO abi wan odo e taki dati „fu di orloku e bigin na ini a denki fu sma, meki sma musu suku fu abi vrede na ini den denki fosi”. Akruderi a sani disi, na organisâsi e suku fu kweki vrede, fu di den e gi sma deki-ati fu „teki leri, fu kenki prakseri nanga makandra èn fu wroko makandra nanga trawan”. Masra Mayor ben taki dati a no nofo taki wi de sma di „lobi vrede, noso taki wi de sma di no lobi feti, ma wi musu de sma di e suku fu abi vrede”.

Na wan sari sani taki pikinmoro vrede no ben de na ini a yari 2000. A disiten historia — so srefi sani di pasa na ini a yari 2000 — sori krinkrin taki awansi o opregti den muiti de di libisma e meki, toku den no man sorgu taki feti no e broko noso taki ogridu no e pasa.

Ma toku a prenspari fu si taki den e taki dati vrede abi fu du nanga a teki di sma musu teki leri. So wan 2700 yari pasa a profeiti Yesaya ben taki na fesi, taki: „Ala den manpikin fu yu sa de sma di Yehovah gi leri, èn a vrede fu den manpikin fu yu sa de pasa marki” (Yesaya 54:13). A srefi profeiti ben si na fesi taki wan ten ben o kon te sma fu ala nâsi ben o go na a soifri anbegi fu Yehovah fu leri sabi den pasi fu En. San ben o de a bakapisi? „Den sa musu naki den feti-owru fu den kon tron prugu èn den lansri fu den kon tron grasi-nefi. Nâsi no sa opo feti-owru fu feti nanga nâsi, so srefi den no sa leri orloku moro” (Yesaya 2:2-4). Akruderi a profeititori disi, Yehovah Kotoigi e gi sma na heri grontapu leri èn den yepi milyunmilyun sma kaba fu no lobi den eigi kondre pasa marki, èn fu no desko tra sma ras. Den takru firi disi na a rutu fu furu feti.

Te fu kaba orloku no o de moro te Gado Kownukondre e tiri. A Kownukondre disi o tyari vrede nanga seikerfasi kon fu ala ten na grontapu (Psalm 72:7; Danièl 2:44). Dan den wortu fu a psalm skrifiman o kon tru: „Luku den wroko fu Yehovah, fa a poti fruwondru sani di pasa, na grontapu. A e meki feti kon na wan kaba te na a moro farawe presi fu grontapu.”​—Psalm 46:8, 9.