Duman fu a Wortu fu Gado E Feni Koloku

„Wi e si a kongres disi leki ete wan tra seti fu Yehovah fu sreka wi fu du moro sani gi a Kownukondre.” Disi na san wan fu den takiman ben taki na a bigin fu a „Duman fu a Wortu fu Gado” Distrikt Kongres fu Yehovah Kotoigi. A ben taki moro fara: „Wi sreka wisrefi fu kisi leri fu koloku osofamiri libi, fu kisi deki-ati fu tan krosibei na Yehovah en organisâsi, fu tan de nanga faya gi a Kownukondre diniwroko, èn fu memre taki a de fanowdu fu tan na ai.”

SENSI a lasti pisi fu mei 2000, milyunmilyun duman fu a wortu fu Gado makandra nanga den mati fu den ben go ipi-ipi na dusundusun fu den presi na heri grontapu fu kisi tumusi prenspari Bijbel leri. San den ben leri den dri dei na a kongres disi?

A Fosi Dei​—No Frigiti den Sani Di Yehovah Du

Ini a fosi lezing, a fesiman ben gi den arkiman wan kari fu ondrofeni den blesi di wi e kisi fu di wi e anbegi Yehovah na ini wánfasi te wi de na den kongres. Ala den arkiman di ben drape ben kisi a dyaranti taki a bribi fu den ben o kon moro bigi èn taki a matifasi di den abi nanga Yehovah ben o kon moro bun.

„A koloku Gado”, sabi san wi abi fanowdu fu de koloku (1 Timoteus 1:11). Fu dati ede, a lezing „Te Wi E Du San Gado Wani, Wi Sa De Koloku” ben poti krakti na tapu taki Yehovah en Wortu, Bijbel, e fruteri wi san na a moro bun fasi fu libi (Yohanes 13:17). Wan tu interview fu sma di de Kotoigi fu Yehovah langa ten kaba ben sori fa wi kan kisi wan moro bun marki na ini a libi te wi e du a wani fu Gado na ini difrenti situwâsi. A tra lezing di ben kon na baka ben nen „Prisiri Pasa Marki Nanga Yehovah En Bun-ati”. A ben poti krakti na tapu taki, leki „sma di e waka baka na eksempre fu Gado”, Kresten wani abi „ibri bunfasi” na ini den libi (Efeisesma 5:1, 9). Wan kefalek moi fasi fu du dati na te wi e gi yesi na a komando fu preiki a bun nyunsu èn fu meki disipel.​—Psalm 145:7.

A lezing di nen „Tan Stanfaste Neleki Yu E Si a Sma Di Wi No Kan Si” ben leri wi fa wan tranga bribi e yepi wi fu „si” a Gado di sma no man si. A takiman ben sori fa sma di e si sani na yeye fasi, e frustan sortu eigifasi Gado abi, èn so srefi taki Gado man sabi srefi san wi e denki (Odo 5:21). Den sma di a takiman ben interview ben fruteri san den du fu kisi wan moro tranga bribi, èn san den du fu poti yeye afersi na a fosi presi na ini den libi.

A mamanten programa ben tapu nanga a thema taki: „Prèise Yehovah​—A Duman fu Wondru Wroko”. A lezing ben yepi den arkiman fu frustan taki o moro wi e leri fu Yehovah, o moro reide wi e si fu prèise En leki a Duman fu wondru wroko. A takiman ben taki: „Te wi e prakseri dipi fu den kefalek moi wroko di Gado meki,  makandra nanga ala den sani di a e du gi wi nownow, dan disi e naki wi ati fu prèise en. Te wi e prakseri dipi fu den kefalek moi sani di Yehovah ben du gi en pipel na ini a ten di pasa, dan wi wani prèise en. Èn te wi e prakseri dipi fu den wondru sani di Yehovah e pramisi fu du ete, dan dati so srefi e meki wi suku fasi fu sori taki wi e warderi en.”

A bakadina programa ben bigin nanga a lezing „Fu Dini Yehovah na wan Tyalensi Di E Meki Taki Wi Musu Horidoro”. A lezing disi ben memre den arkiman taki den problema fu a grontapu disi e sori taki a kaba de krosibei (2 Timoteus 3:1). Ma fu di wi tan du san bun, meki wi e sori taki wi „na den sma di abi bribi, san e meki a sili tan na libi”.​—Hebrewsma 10:39.

Sortu Bijbel rai fu na osofamiri libi ben gi? A fosi symposium fu a kongres di ben nen „Gi Yesi na a Wortu fu Gado”, ben bigin nanga a pisi „Te Yu E Suku wan Trowpatna”. Wan fu den moro seryusu bosroiti di sma e teki, na fu teki wan trowpatna. Fu dati ede, Kresten wani wakti teleki den lepi fu trow, èn den musu trow „soso na ini Masra” (1 Korentesma 7:39). A tra pisi fu a symposium ben taki dati Yehovah wani trutru taki ala Kresten osofamiri musu de tranga osofamiri di abi yeyefasi, èn a takiman ben fruteri san na wan tu bun fasi fu du dati. A lasti pisi ben memre papa nanga mama taki te den e leri den pikin fu lobi Gado, dan densrefi musu bigin fu leri lobi En.

Den penti di ben tyari kon na fesi na ini a lezing „Luku Bun Nanga Takitaki èn Nanga Konkru” ben yepi ala sma fu si taki ala di fruwondru sani e pasa, toku wi musu waka nanga koni. Te wi e yere span nyunsu, wi no musu bribi ala sani. A ben o de moro bun taki wan Kresten e taki fu a sani di a sabi taki a tru — a bun nyunsu fu a Kownukondre. Furu sma ben feni taki a tra lezing di ben kon baka dati ben de wan di ben gi trowstu nanga deki-ati. A lezing dati ben nen „Feti Nanga ’wan Maka na ini a Skin’”. A ben yepi den fu si taki ala di wi abi fu du nanga tesi di e go nanga langa, toku Yehovah e gi wi krakti nanga yepi fu en santa yeye, en Wortu, nanga a Kresten bradafasi fu wi. Den arkiman ben kisi furu deki-ati fu den sani di na apostel Paulus srefi ben ondrofeni ini a tori disi.​—2 Korentesma 12:7-10; Filipisma 4:11, 13.

A fosi dei ben tapu nanga a lezing di nen „Tan Skinskin Nanga Yehovah En Organisâsi”. Prakseri ben poti na dri kontren pe na organisâsi go na fesi spesrutu. Den kontren disi na: (1) wi e frustan a yeye leti fu Yehovah krin moro nanga moro, (2) a diniwroko di wi  kisi fu Yehovah, èn (3) a kenki di na organisâsi e kenki a fasi fu du sani na a yoisti ten. Dan a takiman ben taki nanga overtoigi: „Wi e firi bun fu den sani di de na wi fesi e kon.” A ben aksi: „Wi musu tweifri fu tan abi a fasti overtoigi di wi ben abi na a bigin, te na a kaba?” (Hebrewsma 3:14) A piki de krin. Dati ben meki taki wan nyun brochure di nen Yu Kan De Gado Mati! ben tyari kon na doro. A o de wan krakti yepisani di o yepi sma di no kisi nofo skoro noso di no man leisi so bun fu leri sabi fu Yehovah.

A Di fu Tu Dei​—Tan Fruteri fu den Wondru Wroko fu Gado

Baka di den taki fu a deitekst na a di fu tu dei fu a kongres, den ben go moro fara nanga a symposium „Dinari fu a Wortu fu Gado”. A fosi pisi ben sori o bun a e go nanga wi preikiwroko na heri grontapu. Bun furu sma di no wani arki a Kownukondre boskopu, e tyalensi wi te wi e horidoro. Wan tu preikiman di e preiki wan langa pisi ten kaba ben fruteri fa den tan abi prisiri na ini a preikiwroko. Den ben sorgu taki den prakseri nanga den ati de srekasreka fu kakafutu gi sma di abi wan mi-no-ke fasi noso sma di e gens den. A di fu tu pisi ben memre den arkiman na a kongres taki Yehovah Kotoigi e meki muiti fu miti sma na ibri presi, fu di den go fu preiki oso fu oso èn fu di den e gi okasi preiki. A lasti pisi ben taki san na den furu difrenti fasi fa ala Kresten kan du moro na ini a diniwroko fu den. A takiman ben poti krakti na tapu taki wi kan du disi, te wi e meki muiti fu gi Gado Kownukondre a moro prenspari presi na ini wi libi, srefi efu dati wani taki dati wi e kisi problema noso taki wi no man du ala ten san wi wani.​—Mateus 6:19-21.

Wi e libi na ini wan grontapu di no sabi Gado, wan grontapu pe furu sma gridi kefalek fu kisi gudu. Dati meki a lezing di nen „Leri fu Dini Gado Nanga Tevredefasi”, ben kon na a reti ten. A takiman ben gebroiki wan tu pisi fu 1 Timoteus 6:6-10, 18, 19, di a ben poti krakti na tapu taki efu Kresten e gi densrefi abra fu dini Gado, dan dati o yepi den fu no lobi moni; so wan lobi kan meki den lasi pasi èn a kan meki den kisi furu pen. A brada ben poti krakti tu na tapu taki awansi o gudu noso o pôti wi de, wi sabi taki koloku e anga fu wi matifasi nanga Yehovah èn a go di sani e go bun nanga wi  na yeye fasi. Wan sani di ben naki na ati fu furu sma ben de den penti di ben tyari kon na fesi na ini a lezing „No Du Sani Di E Gi Gado Syen”. Krakti ben poti na tapu a tru tori taki noiti Yehovah e frigiti den getrow Kotoigi fu en. A moro bigi eksempre fu Yesus Krestes — di „de a srefi sma esde, tide èn fu têgo” — o yepi furu sma fu go doro fu lon a streilon ala di den e horidoro.​—Hebrewsma 13:8.

A mamanten programa ben tapu nanga a dopu lezing — ala ten disi na wan heimarki fu den bigi konmakandra fu Yehovah Kotoigi. A ben de wan prisiri srefisrefi fu si nyunwan di gi densrefi abra na Gado, e waka na ini den futustap fu Yesus fu di den teki dopu na ini watra! (Mateus 3:13-17) Ala sma di teki a bosroiti disi du furu kaba leki duman fu a wortu fu Gado. Boiti dati, te den teki dopu, dan den sa tron wan fu den dinari fu a bun nyunsu, di e prisiri furu fu di den sabi taki den e prisiri na ati fu Yehovah èn taki den e santa en nen tu.​—Odo 27:11.

Wan tu prenspari rai ben gi na ini a lezing di nen „Wi Musu De Lepi Sma ’fu Man Si Krin San Bun èn San Ogri’”. A sari taki grontapu markitiki di e sori san bun èn san ogri, no bun kwetikweti. Fu dati ede, wi musu frutrow tapu den markitiki fu Yehovah (Romesma 12:2). Ala sma ben kisi deki-ati fu meki furu muiti fu frustan soifri san na den markitiki fu Gado èn fu gro kon tron wan lepi sma. Dan te wi e „oefen” a koni fu wi fu man si sani krin, dan wi e leri wisrefi „fu man si krin san bun èn san ogri”.​—Hebrewsma 5:11-14.

 Baka dati, a symposium ben kon di nen „Wroko Tranga fu Gro na Yeye Fasi”. Tru Kresten e erken o prenspari a de fu meki muiti fu kweki yeyefasi èn fu tan abi dati. Disi wani taki dati wi musu du bun furu muiti fu leisi, studeri èn fu denki dipi san wi ben leisi (Mateus 7:13, 14; Lukas 13:24). Sma di abi yeyefasi, e horidoro na ini „ibri fasi fu begi nanga tranga begi” (Efeisesma 6:18). Wi e kon frustan taki den begi fu wi e sori o bigi a bribi fu wi de èn o furu wi e gi wisrefi fu dini Gado. Den e sori so srefi o tranga wi yeyefasi de èn sortu sani wi e si leki „den moro prenspari sani” (Filipisma 1:10). A de prenspari fu kweki wan switi, lobi matifasi nanga Yehovah, neleki a matifasi di wan pikin di e gi yesi, abi nanga wan papa di abi switifasi. A sani no de nomo taki wi abi wan kerki — awansi dati na a tru bribi — ma wi musu wani fu bow wan tranga bribi ’neleki wi e si Gado’.​—Hebrewsma 11:6, 27.

A tori disi ben taki moro fara na ini a lezing di nen „Meki Sma Si Taki Yu E Go na Fesi”. Moro fara den ben poti prakseri na dri sani: (1) kisi moro sabi, frustan sani moro bun, èn kon moro koni, (2) meki a froktu fu Gado en yeye, èn (3) du den frantwortu di wi abi leki sma di de memre fu wan osofamiri.

Na a kaba fu a lasti lezing „Waka na ini a Leti fu a Wortu fu Gado Di E Kon na Krin Moro Nanga Moro”, den arkiman fu a kongres ben prisiri fu di den kisi a nyun buku di nen A Profeititori fu Yesaya​—Leti gi a Heri Libisma Famiri I. Disi na a fosiwan fu tu fu den buku di e taki fu ibri kapitel fu a Bijbel buku Yesaya. „A buku Yesaya abi wan boskopu gi wi tide”, na so a takiman ben taki. A ben taki moro fara: „Iya, furu fu den profeititori fu a buku ben kon tru na ini den dei fu Yesaya. . . . Ma furu fu den profeititori fu Yesaya e kon tru na ini a ten disi, èn son wan fu den sa kon tru na ini a nyun grontapu di Gado pramisi.”

A Di fu Dri Dei​—De Duman fu a Wortu fu Yehovah

A lasti dei fu a kongres ben bigin nanga wan takimakandra fu a deitekst. Baka dati wan symposium ben kon di ben abi leki nen „A Prenspari Profeititori fu Sefania gi Den Wan Di E Du Gado Wani”. Den dri lezing fu a symposium ben sori taki, neleki fa Yehovah ben du na ini a ten fu a tranga-ede Yuda, na so a sa tyari banawtu kon gi den wan di no wani gi yesi now na a warskow fu en. Fu di den e sondu teige Gado, den sa waka leki breni sma di no man yepi densrefi, sma di no man feni frulusu. Ma efu tru Kresten e tan suku Yehovah getrow, dan A sa kibri den na a dei fu Gado en atibron. Boiti dati, wi sa kisi furu blesi nownow kaba. Den abi a blesi fu di den kisi na okasi fu taki fu a „soifri tongo” fu Bijbel waarheid (Sefania 3:9). A takiman ben  taki: „Fu taki a soifri tongo no wani taki wawan dati wi e bribi a waarheid èn e leri tra sma a waarheid, ma a fasi fa wi e tyari wisrefi musu kruderi nanga den wet nanga den gronprakseri fu Gado tu.”

Nanga bun furu span den sma di ben kon na a kongres ben wakti a drama di nen „Eksempre Di De wan Warskow gi a Ten fu Wi”. A drama disi pe ala den preiman ben weri fositen krosi, ben sori fa dusundusun fu den Israèlsma ben lasi den libi di den ben de fu go na ini a Pramisi Kondre, bika den ben frigiti Yehovah èn heiden umasma ben kori den fu go du hurudu nanga falsi anbegi. Wan fu den moro prenspari sma ini a drama ben de Yamin. Biginbigin a ben muilek gi en fu no broko kindi di den uma fu Moab ben wani kori en èn a ben muilek tu fu tan loyaal na Yehovah. A fowtu fasi fa a godelowsu Simri ben rideneri ben kon krin na fesi, neleki a bribi fu Pinehas nanga na anbegi fu en. A kefar fu bumui nanga sma di no lobi Yehovah, ben kon krinkrin na fesi tu.

A drama ben opo a pasi gi a lezing di ben o kon na baka di ben nen „No Tron Sma Di E Frigiti San Den Yere”. Di a takiman ben e luku 1 Korentesma 10:1-10 finifini, a ben sori taki Yehovah e tesi wi fu si efu wi e gi yesi, so taki a kan sabi efu wi warti fu libi na ini a nyun grontapu. Srefi now di wi de fu go ini a nyun grontapu, dan gi sonwan, den lostu fu a skin kan teki a presi fu den marki na yeye fasi di wi wani doro. Ala sma ben kisi a deki-ati fu no misi na okasi fu ’go na ini a rostu fu Yehovah’.​—Hebrewsma 4:1.

A publikitaki ben abi leki nen „Fu San Ede Wi Musu Poti Prakseri na den Wondru Wroko fu Gado”. Den „wondru wroko” fu Yehovah e sori a koni fu en nanga a makti di a abi tapu ala den sani di A meki èn di de lontu wi (Yob 37:14). Yehovah ben poti wan lo dangra aksi gi Yob di ben nofo fu meki a makti di na almakti Mekiman abi naki Yob ati. Yehovah o du „wondru wroko” tu na ini a ten di e kon fu a bun fu den getrow futuboi fu en ede. A takiman ben tapu nanga den wortu disi: „A de krin, taki wi abi bun furu reide fu poti prakseri na Yehovah en wondru wroko — den sani di a ben du na ini a ten di pasa, san wi e si taki a e du nownow nanga den sani di a meki, èn san a pramisi fu du na ini a ten di e kon heri-esi.”

Baka di wi luku a Waktitoren-studie fu a wiki syatu, dan wi ben yere a lasti lezing fu a kongres di ben nen „Abi Furu Warderi gi a Grani Di Wi Abi Leki Duman fu a Wortu fu Gado”. A lezing disi di ben gi wi deki-ati ben poti krakti na tapu a tori taki a de wan grani fu de duman fu Gado wortu (Yakobus 1:22). A lezing ben memre den arkiman taki a grani disi na wan kefalek moi wan, èn o moro langa wi abi a grani disi, o moro wi e warderi en. Ala sma di ben de drape ben kisi a deki-ati fu sori taki den wani de trutru duman fu Gado wortu fu di a distrikt kongres disi gi den a tranga fu du dati. Dati na a wan-enkri fasi fu abi a moro bigi sortu koloku di de.

[Faki/Prenki na tapu bladzijde 25]

Yu Kan De Gado Mati!

Wan nyun brochure di nen Yu Kan De Gado Mati! ben tyari kon na doro freida bakadina. Na ini furu pisi fu grontapu a de fanowdu trutru taki Bijbel leri e gi na wan makriki fasi, èn a brochure disi sa yepi fu du dati. A o de wan bigi blesi gi sma di no kisi nofo skoro èn gi den wan di no man leisi so bun.

[Faki/Prenki na tapu bladzijde 26]

A Profeititori fu Yesaya​—Leti gi a Heri Libisma Famiri

Den wan di ben kon na a kongres ben prisiri srefisrefi fu kisi a fosi wan fu den tu pisi fu A Profeititori fu Yesaya​—Leti gi a Heri Libisma Famiri. Na ini a buku disi den ben poti krakti na tapu den sani di a profeititori fu Yesaya e leri wi na ini a ten disi.