Fa a Tiri Skin E Difrenti fu wan Korporâsi

DEN alayari konmakandra fu a Watch Tower Bible and Tract Society of Pennsylvania e hori sensi yanuari fu a yari 1885. Na a ten di den salfu Kresten ben tyari kon na wan na ini a lasti pisi fu a di fu 19 yarihondro, dan den memre fu a bestuur fu a korporâsi disi ben abi a howpu fu go na hemel. Fu taki leti, na so a ben de pikinmoro ala ten.

Wán memre fu a bestuur no ben abi a howpu fu libi na hemel. Na ini 1940, Hayden C. Covington ben de na afkati raiman fu a Genootschap èn so srefi wan memre fu den „tra skapu” di ben abi a howpu fu libi na grontapu. Na a ten dati den stem fu poti a brada disi leki wan memre fu a bestuur fu a Genootschap (Yohanes 10:16). A ben dini leki vice-presidenti fu a Genootschap, fu 1942 te kon miti 1945. Na a ten dati Brada Covington saka a wroko di a ben du leki wan memre fu a bestuur. A ben du dati fu ben man handri akruderi san den ben si leki a wani fu Yehovah na a ten dati, taki ala den memre fu a Pennsylvania-korporâsi ben musu de salfu Kresten. Lyman A. Swingle tron wan memre fu a bestuur na ini a presi fu Hayden C. Convington, èn den brada stem poti Frederick W. Franz leki vice-presidenti.

Fu san ede den futuboi fu Yehovah ben bribi taki ala den memre fu a bestuur fu a Watchtower Bible and Tract Society of Pennsylvania ben musu de salfu Kresten? Fu di na a ten dati den memre fu a bestuur fu a Pennsylvania-korporâsi ben de so srefi memre fu a Tiri Skin fu Yehovah Kotoigi. Ala ten den memre fu a Tiri Skin ben musu de salfu man.

Wan Tumusi Prenspari Alayari Konmakandra

Tapu na alayari konmakandra di ben hori tapu 2 oktober 1944 na ini Pittsburgh, den memre fu a Pennsylvania-korporâsi ben teki siksi resolutie. Den resolutie disi ben tyari kenki kon na den wet nanga den markitiki fu a korporâsi. Soleki fa den wet ben de fosi, dan sma di ben e gi bijdrage fu horibaka gi a wroko fu a Genootschap, ben abi a reti fu stem. A di fu dri kenki di kon na ini den wet nanga den markitiki, tyari wan kaba kon na a sani dati. Wan raportu fu na alayari konmakandra dati, ben taki: „Feifi hondro sma nomo kan tron memre fu a Genootschap . . . Iniwan fu den sma di ben o tron memre ben musu de wan dinari na ini a furuten wroko fu a Genootschap noso wan dinari di ben du pisi ten wroko gi wan kompani [gemeente] fu Yehovah Kotoigi. Den sma disi musu sori so srefi a yeye fu Masra.”

Baka di a sani disi ben meki bekènti, dan soso sma di trutru ben de getrow na Yehovah ben musu stem fu poti memre fu a bestuur fu a Genootschap. A no ben abi trobi omeni moni den sma disi ben gi leki bijdrage fu horibaka gi a Kownukondre wroko. A sani disi ben kruderi nanga Yesaya 60:17 di e taki na fesi fu den bun kenki di ben o kon pikinsopikinso. Wi e leisi drape: „Na presi fu kopro, mi sa tyari gowtu kon, èn na presi fu isri, mi sa tyari solfru kon, èn na presi fu udu, kopro, èn na presi fu ston, isri, èn mi wani poti vrede leki opziener gi un, èn regtfardikifasi leki den sma di e gi unu wroko fu du.” Fu di a profeititori disi e taki fu „opziener” nanga „sma di e gi [trawan] wroko” dan a e sori go na den bun kenki di ben o kon na a fasi fa sani orga na mindri a pipel fu Yehovah.

A prenspari kenki disi di ben meki taki na organisâsi ben kon tron wan theokratis organisâsi, ben kon na a kaba fu den „tu dusun dri hondro neti nanga mamanten”, di skrifi na Danièl 8:14. Na a ten dati, „a santa presi” ben „kon na ini en yoisti situwâsi”.

Ma baka a tumusi prenspari alayari konmakandra fu 1944, wan trutru prenspari aksi ben musu kisi piki ete. Fu di den seibi memre fu a bestuur fu a Pennsylvania-korporâsi ben de so srefi  memre fu a Tiri Skin, dan dati ben wani taki dati a Tiri Skin noiti ben o man abi moro leki seibi salfu Kresten? Moro fara, fu di den memre fu a korporâsi e stem tapu brada fu poti den leki memre fu a bestuur, dan a ben de so taki ibri yari na den alayari konmakandra den memre fu a korporâsi ben musu stem fu poti brada fu a Tiri Skin? A de so taki den memre fu a bestuur fu a Watchtower Bible and Tract Society fu Pennsylvania na so srefi den memre fu a Tiri Skin, noso den e difrenti fu makandra?

Wan Tra Prenspari Alayari Konmakandra di Wi No Man Frigiti

Den aksi disi ben kisi piki tapu na alayari konmakandra di ben hori tapu 1 oktober 1971. Na a konmakandra dati, wan fu den takiman sori taki a tiri skin fu a „getrow èn koni srafu” ben de kaba, hondrohondro yari bifo a Watchtower Bible and Tract Society of Pennsylvania (Mateus 24:45-47). Wan tiri skin ben seti na a Pinksterfesa fu 33 G.T., moro leki 18 hondro yari bifo a Pennsylvania korporâsi kon de. Fosi, a tiri skin no ben abi seibi man, ma 12 apostel. Soleki fa a sori, dan moro sma ben tron memre fu a tiri skin baka ten, fu di „den apostel nanga den owruman na Yerusalem” ben e teki fesi.​—Tori fu den Apostel 15:2.

Na ini 1971 a srefi takiman fruteri taki den memre fu a Waktitoren Genootschap no ben man stem fu poti memre fu a salfu Tiri Skin. Fu san ede? A brada ben taki: „Fu di no wan libisma e poti a tiri skin fu a ’srafu’ grupu na wroko. Yesus Krestes di de na Edeman fu a tru Kresten gemeente nanga a Masra fu a ’getrow èn koni srafu’ grupu, e poti a tiri skin na wroko. Fu dati ede, a krin fu si taki den memre fu den korporâsi no kan stem fu poti den leki memre fu a Tiri Skin.

Moro fara, a takiman taki wan prenspari sani: „A tiri skin no abi memre fu wan bestuur soleki fa a Bestuursraad fu a Genootschap abi memre soleki presidenti, vice-presidenti, sekretarsi-penningmeester nanga ondro sekretarsi-penningmeester. A tiri skin abi soso wan fesiman.” Furu yari langa, a presidenti fu a Pennsylvania korporâsi ben de so srefi a moro prenspari memre fu a Tiri Skin. A sani disi no ben o de so moro. Ala di den memre fu a Tiri Skin no ben abi a srefi ondrofeni èn ala di den alamala no ben man du den srefi sani, toku den ben o abi a srefi frantwortu. A takiman ben taki so srefi: „Fu dati ede iniwan memre fu a tiri skin kan tron fesiman sondro taki a de presidenti fu a . . . Genootschap na srefi ten . . . A sani disi abi fu du nanga a sortu sistema di a tiri skin abi di e sori suma musu de fesiman na a momenti dati.”

Na a prenspari alayari konmakandra dati fu 1971, a krinkrin difrenti na mindri den salfu memre fu a Tiri Skin nanga den memre fu a bestuur fu a Pennsylvania korporâsi ben tyari kon na fesi. Toku, memre fu a Tiri Skin ben tan dini leki memre fu a bestuur fu a Genootschap. Ma na ini a ten disi, sma kan aksi densrefi: Bijbel e sori taki den memre fu a bestuur fu a Watchtower Bible and Tract Society of Pennsylvania musu de memre fu a Tiri Skin?

A piki na nono. A Pennsylvania korporâsi no de a wan-enkri korporâsi di Yehovah Kotoigi e gebroiki. Trawan de. Wan fu den na a Watchtower Bible and Tract Society of New York, Incorporated. Na korporâsi disi e meki taki a wroko fu wi na Amerkankondre e waka na wan makriki fasi. A blesi fu Yehovah trutru de tapu a korporâsi dati, ala di den memre fu a bestuur fu a korporâsi dati moro furu na sma di de fu den „tra skapu”. Ingrisikondre e gebroiki na International Bible Students Association. Yehovah Kotoigi e gebroiki tra korporâsi fu luku den Kownukondre afersi na tra kondre. Ala den korporâsi e yepi na ini wánfasi fu sorgu taki a bun nyunsu e preiki na heri grontapu, èn den alamala de fanowdu fu du a wroko disi. Awansi pe den korporâsi de noso awansi sortu sma den abi leki memre fu a bestuur, a Tiri skin e tiri èn so srefi e gebroiki den korporâsi disi na wan theokratis fasi. Fu dati ede, den korporâsi disi kisi wroko fu du di musu meki Kownukondre afersi waka bun.

Wi e kisi winimarki fu di wi abi korporâsi. Na so fasi wi e hori wisrefi na den wet fu a foto noso a kondre pe a korporâsi de, soleki fa a Wortu fu Gado wani taki wi du (Yeremia 32:11; Romesma 13:1). Den korporâsi e meki taki a wroko di wi e du fu prati a Kownukondre boskopu, e waka na wan makriki fasi. Wi e du a wroko disi nanga yepi fu Bijbel, buku, tijdschrift, brochure, nanga tra  sani di a Genootschap e druk. Den sortu korporâsi disi e seti tori so srefi di abi fu du nanga den sani di a Genootschap abi, nanga wroko di abi fu du nanga sma di de na ini nowtu, nanga kontrakti fu man gebroiki presi fu hori kongres, èn go so moro fara. Wi e warderi a wroko di den korprasi disi e du.

A Nen fu Yehovah E Kon Tapu a Fosi Presi

Na ini 1944, Artikel II fu den wet nanga den markitiki fu a Watchtower Bible and Tract Society of Pennsylvania ben kenki, so taki krakti ben man poti tapu den marki fu a korporâsi disi. Soleki fa den wet nanga den markitiki e sori, dan a Genootschap abi a prenspari marki disi: „Fu preiki a bun nyunsu fu Gado en Kownukondre ondro Krestes Yesus na ala nasi, leki wan kotoigi gi a nen, a wortu nanga a heimakti fu na Almakti Gado YEHOVAH.”

Sensi 1926 ’a getrow èn koni srafu’ meki a nen fu Yehovah kon tapu a fosi presi. Wan spesrutu yari di prenspari fu kari ben de a yari 1931, di den Bijbel Ondrosukuman teki a nen Yehovah Kotoigi (Yesaya 43:10-12). Publikâsi fu a Genootschap di ben poti krakti tapu a nen fu Gado na den buku Jehovah (1934), „Uw naam worde geheiligd” (1963), nanga „De natien zullen weten dat ik Jehovah ben” ​— Hoe? (1972).

Wi musu taki spesrutu fu a Nieuwe-Wereldvertaling van de Heilige Schrift. Na ini 1960, a heri buku disi tyari kon na doro na ini Ingrisitongo. A abi a nen fu Yehovah tapu ibri presi pe a Tetragrammaton de fu si na ini den Hebrew Buku fu Bijbel. A vertaling disi abi so srefi a nen fu Gado na 237 presi na ini den Kresten Griki Buku fu Bijbel. Baka di den brada ondrosuku sani finifini, den kon si taki a nen musu tanapu na den presi disi. Wi breiti srefisrefi taki na difrenti fasi, Yehovah gi a „srafu” nanga a Tiri Skin a primisi fu gebroiki den publikâsi nanga den korporâsi fu den fu meki sma na heri grontapu kon sabi a nen fu en!

Yehovah Kotoigi E Prati a Wortu fu Gado Nanga Sma

A pipel fu Yehovah tan gi kotoigi doronomo fu a nen fu Gado èn den hori en Wortu hei. Den du dati, fu di den tyari milyunmilyun Bijbel publikâsi kon na doro. Den prati den Bijbel publikâsi disi èn den prati Bijbel srefi. Na a bigin fu a di fu 19 yarihondro, a Waktitoren Genootschap kisi auteursrecht tapu The Emphatic Diaglott (a reti fu tyari a buku disi kon na doro), a Griki-Ingrisi interleneair uitgave fu den Kresten Griki Buku fu Bijbel. Benjamin Wilson ben skrifi a buku disi. A Genootschap tyari a King James Version fu den Bijbel Ondrosukuman kon na doro, èn a buku disi abi wan appendix fu 500 bladzijde. Na ini 1942, a Genootschap tyari a King James Version kon na doro nanga verwijstekst. Baka dati, na ini 1944, a Genootschap bigin druk na American Standard Version fu 1901, di abi a nen fu Gado. A buku The Bible in Living English, di Stephen T. Byington ben skrifi, abi a nen fu Yehovah tu. A Genootschap tyari a buku disi kon na doro na ini 1972.

Den korporâsi di Yehovah Kotoigi e gebroiki, yepi fu druk èn fu prati ala den Bijbel vertaling disi. Ma wan tumusi prenspari sani na a krosibei wrokomakandra na mindri a Waktitoren Genootschap nanga a grupu fu salfu Kotoigi fu Yehovah di de memre fu a Vertaal Komte fu a Nieuwe-Wereldvertaling. Wi e prisiri taki, moro leki 106 milyun kopi fu a vertaling disi, efu na a heri Bijbel noso wan pisi fu en, druk na ini 38 tongo. A Watchtower Bible and Tract Society of Pennsylvania na trutru wan Bijbel genootschap!

’A masra’ poti ’a getrow èn koni srafu fu luku ala den gudu fu en.’ Den gudu disi na den gebow fu na edekantoro na ini New York na Amerkankondre, èn so srefi den 110 bijkantoro na heri grontapu di e sorgu gi a wroko na ini a ten disi.  Den memre fu a srafu grupu sabi taki Yesus o aksi fa den gebroiki den gudu di a ben gi den (Mateus 25:14-30). Ma dati no e tapu a ’srafu’ fu gi den lepi opziener di de na mindri den „tra skapu”, na okasi fu sorgu gi den papira wroko di abi fu du nanga wan korporâsi. Fu taki en leti, a sani disi e gi den memre fu a Tiri Skin na okasi fu gi densrefi dorodoro „na begi èn na a preiki fu a wortu”.​—Tori fu den Apostel 6:4.

So langa leki grontapu e gi Kotoigi fu Yehovah na okasi fu gebroiki korporâsi, a Tiri Skin, di e wroko na ini a nen fu „a getrow èn koni srafu”, sa du dati. Den korporâsi disi e du bun wroko, ma a no de so taki Yehovah Kotoigi no sa man wroko sondro den. Efu wan tirimakti tapu wan korporâsi, dan toku a preikiwroko sa go doro. Srefi na ini a ten disi, Kotoigi fu Yehovah e meki a Kownukondre boskopu bekènti, den e meki disipel, èn a theokrasia e tan gro moro nanga moro na kondre pe a wroko tapu èn pe a Genootschap no e gebroiki korporâsi. Den sani disi e pasa fu di Yehovah Kotoigi e prani èn so srefi e gi watra, èn ’Gado e meki den sani di den prani gro doronomo’.​—1 Korentesma 3:6, 7.

Te wi e luku a ten di de na wi fesi, dan wi e frutrow na tapu taki Yehovah sa sorgu gi den sani di en pipel abi fanowdu na skin fasi èn so srefi na materia sei. En nanga en Manpikin, Yesus Krestes, sa go doro fu gi wi a tumusi bun tiri nanga a yepi di wi abi fanowdu fu klari a Kownukondre preikiwroko. A no de fu taki dati iniwan sani di wi man du leki futuboi fu Gado no e du ’nanga yepi fu wan srudati legre, no nanga yepi fu krakti, ma nanga yepi fu a yeye fu Yehovah’ (Sakaria 4:6). Fu dati ede wi e begi Gado fu yepi wi, fu di wi sabi taki nanga a krakti di Yehovah e gi, wi sa man klari a wroko di a gi wi fu du na ini a ten disi fu a kaba!