Kotoigi Fu Yehovah E Go na Fesi Nanga wan Tranga Bribi!

Alayari Konmakandra Raportu

NA INI a ten disi pe furu sma e tweifri, Kotoigi fu Yehovah e sori krinkrin taki den na Kresten di abi wan tranga bribi. A tori disi ben tyari kon na krin tapu na alayari konmakandra fu a Watchtower Bible and Tract Society of Pennsylvania. A konmakandra disi hori tapu satra 7 oktober 2000, na ini a kongreshal fu Yehovah Kotoigi na ini Jersey City na New Jersey. *

John E. Barr, wan memre fu a Tiri Skin fu Yehovah Kotoigi èn a fesiman fu a konmakandra, bigin a lezing fu en nanga den wortu disi: „Fu ala den milyardmilyard sma di de na grontapu, wi leki Kotoigi fu Yehovah sabi èn wi e bribi taki Yehovah en lobi Manpikin, Yesus Krestes, na Kownu now na ini hemel, èn a e tiri na mindri den feanti fu en.” Siksi tumusi moi boskopu fu kondre na ala sei fu grontapu, ben gi a buweisi fu a tranga bribi disi.

Sma E Kon Fri fu Afkodrei na ini Haiti Nanga Yepi fu Bijbel Waarheid

Furu sma na ini Haiti e du afkodrei. „Furutron sma sa du fodu, fu kibri densrefi fu ogri”, na so a fesiman fu a Bijkantoro Komte, John Norman ben fruteri. Wán bonuman bigin tweifri di a lasi wan futu, fu di a ben kisi mankeri. ’Fa a sani disi ben kan pasa nanga mi efu yeye e kibri mi gi ogri?’ a ben aksi ensrefi. Neleki furu tra sma, a man disi kon leri sabi a waarheid nanga yepi fu Yehovah Kotoigi èn dati yepi en fu broko nanga afkodrei. Tapu 19 april 2000, fo tron so furu sma leki a nomru fu Kownukondre preikiman na ini a kondre dati, ben de na a Memrefesa fu Krestes en dede. A sani disi e sori taki moro sma kan kon ete na ini waarheid na Haiti.

Kotoigi E Preiki Fayafaya na ini a Bigi Kontren fu Korea

Na ini Korea, 40 procent fu den Kotoigi fu Yehovah de na ini a furuten diniwroko. A fesiman fu a Bijkantoro Komte, Milton Hamilton ben taki: „A bigi legre disi fu preikiman, e wroko a kontren fu wi di abi moro leki 47 milyun sma, pikinmoro wan leisi na ini a mun. A moi fu si taki den gemeente di e gebroiki gebaartongo (gemeente fu sma di babaw èn di dofu) e gro srefisrefi. Na ini wán kring pe gemeente de di e gebroiki gebaartongo, den Kotoigi e hori 800 bijbelstudie. Dati wani taki, dati wán preikiman e hori wán studie noso moro. A sari fu si taki Lanti e sroto den yongu brada fu wi ete, fu di den no wani feti na ini a legre. Ma Lanti e handri bun nanga den getrow Kresten disi di de na strafu-oso, èn furutron den  brada e kisi wroko di yu kan gi soso na sma di yu e frutrow.

Sorgu gi Sani Di Nyun Sma Abi Fanowdu na ini Meksikow

Wan heimarki fu 533.665 Kownukondre preikiman gi den preikiwroko raportu na ini augustus 2000 na Meksikow. Moro leki dri tron so furu sma ben de na a Memrefesa. „Wi wani bow ete 240 Kownukondre zaal a yari disi”, na so a fesiman fu a Bijkantoro Komte, Robert Tracy ben taki. A ben taki go moro fara: „Ma wi abi moro furu leki dati fanowdu.”

Den yonguwan na mindri den Kotoigi fu Yehovah na Meksikow e gi wan bun eksempre. Wan Lomsu priester ben taki fu wan yongu sma: „Mi ben winsi taki mi abi wán sma nomo leki en na mindri den bakaman fu mi. Mi e lespeki den sma disi fu di den e du a wroko fu den nanga den heri ati, èn fu di den e gebroiki a Bijbel nanga koni. Den opo taki gi a bun fu Gado, awansi den ben kan lasi den libi srefi fu dati ede.”

Kotoigi E Sori Soifri Retifasi ala di Dyugudyugu De na ini Sièra Leon

Dusundusun sma lasi libi, kisi mankeri, noso lasi wan pisi fu den skin, sensi wan borgu orloku bigin na ini Sièra Leon na ini april 1991. „Feti nanga problema kenki den sma srefisrefi”, na so Bill Cowan, a fesiman fu a Bijkantoro Komte ben taki. „Furu fu den sma di no ben wani poti prakseri na a boskopu fu wi, e arki now fu di den wani sabi moro. A e pasa so srefi taki sma e kon na ini wi Kownukondre zaal fu de na wan konmakandra a fosi leisi sondro taki den ben kisi kari fu du dati. Furutron, sma e tapu den brada na strati fu aksi den wan bijbelstudie.” Ala di dyugudyugu de ete na ini a kondre, toku furu sma e teki a waarheid na ini Sièra Leon.

Wan Bigi Bow Programa na ini Zuid-Afrika

Nownowde, dusundusun Kownukondre zaal de fanowdu na ini a kontren di a bijkantoro na ini Zuid-Afrika e sorgu. Den brada bow hondrohondro zaal kaba. „Na presi taki den brada nanga sisa fu wi e kon makandra na ini wan broko-oso noso na ondro wan bon, soleki fa den ben gwenti bifo, den man kon makandra now na ini wan bun presi di abi bun sturu”, na so John Kikot, wan memre fu a Bijkantoro Komte ben taki. „Ala di furu fu den Kownukondre zaal disi no abi furu pranpran, toku a de so taki furutron den zaal disi na den moro bun gebow na ini a kontren drape. Na son presi, den brada kon si taki a yari baka di den bow wan Kownukondre zaal, a gemeente e gro kon tron tu tron moro bigi.

Wan Nyun Grupu fu Kotoigi na ini Ukraini

Na a ten fu a dienstyari 2000, a kondre disi ben abi wan heimarki fu 112.720 preikiman. Moro leki 50.000 fu den sma disi leri sabi Bijbel waarheid na ini den feifi yari di pasa. „Fu tru, Yehovah opo wan nyun grupu fu yongu Kotoigi fu meki en nen bekènti!”, na so John Didur, fesiman fu a Bijkantoro Komte ben taki. A taki go moro fara: „Na ini den tu yari di pasa, wi prati moro leki 50 milyun tijdschrift — dati na a srefi leki a nomru fu sma di e libi na ini a kondre. Ibri mun wi e kisi wan sani fu wán dusun brifi fu sma di wani sabi moro.”

Tra Sani fu a Programa Di Naki Sma Ati

Daniel Sydlik, wan memre fu a Tiri Skin, hori wan lezing di ben hari a prakseri fu sma. Na artikel „Fa a Tiri Skin E Difrenti fu wan Korporâsi”, di e kon na ini a tijdschrift disi, teki puru fu a lezing dati di meki sma kon sabi moro fu a tori disi.

Theodore Jaracz fu a Tiri Skin ben hori wan lezing di trutru ben hari a prakseri fu sma. A lezing ben nen: „Opziener Nanga Dinari ini a Diniwroko Poti na Wroko na wan Theokrasia Fasi.” Wan fu den artikel di e kon na ini a tijdschrift disi e taki fu a tori dati.

David Splane di de wan memre fu a Tiri Skin, ben hori wan moi lezing so srefi tapu na alayari konmakandra. A lezing disi ben abi fu du nanga a yaritekst gi a yari 2001. A yaritekst di teki puru fu den wortu fu Paulus, na disi: ’Unu musu de lepi sma di abi wan tranga bribi na ini ala sani di Gado wani’ (Kolosesma 4:12). Kotoigi fu Yehovah na heri grontapu abi a fasti bosroiti fu du dati, ala di den e preiki a bun nyunsu fu Gado en Kownukondre na wan getrow fasi na heri grontapu.​—Mateus 24:14.

[Futuwortu]