Opziener Nanga Dinari ini a Diniwroko Poti na Wroko na wan Theokrasia Fasi

„Poti prakseri na unsrefi èn na a heri ipi, di santa yeye ben poti unu fu wroko leki opziener na den mindri.”​—TORI FU DEN APOSTEL 20:28.

1, 2. Fa Yesaya 60:22 e kon tru?

WAN langa ten pasa kaba, Yehovah ben taki na fesi taki wan tumusi aparti sani ben o pasa na ini a ten fu a kaba. Nanga yepi fu a profeiti Yesaya, a ben taki: „A pikinwan srefi sa tron wan dusun, èn a pikinwan sa tron wan makti nâsi. Misrefi, Yehovah, sa meki a go moro esi na ini en eigi ten.”​—Yesaya 60:22.

² Buweisi de di e sori taki a profeititori disi e kon tru na ini a ten disi? Iya, buweisi de! Na ini den yari na mindri 1870 nanga 1880, Yehovah en pipel ben opo wán gemeente na Allegheny, Pennsylvania, na Amerkankondre. Den ben bigin so pikin, ma baka dati den seti tin dusundusun gemeente na heri grontapu di e waka heri bun. Milyunmilyun Kownukondre preikiman — wan makti nâsi — e kon makandra now na ini moro leki 91.000 gemeente na ini 235 kondre na heri grontapu. A de krin fu si taki Yehovah e meki a wroko go na fesi moro esi fu tyari tru anbegiman kon na wan bifo a „bigi banawtu” e broko, èn dati de so krosibei now.​—Mateus 24:21; Openbaring 7:9-14.

3. San a wani taki fu dopu ’na ini a nen fu a Tata, a Manpikin, nanga a santa yeye’?

³ Baka di ibriwan fu den milyunmilyun sma disi teki a bosroiti fu gi densrefi abra na Yehovah, dan den teki dopu „na ini a nen fu a Tata èn fu a Manpikin èn fu a santa yeye” soleki fa Yesus ben gi a komando (Mateus 28:19). Te wan sma dopu „na ini a nen fu a Tata”, dan dati wani taki dati den sma disi di gi densrefi abra na Yehovah, e erken taki Yehovah na a hemel Tata fu den èn so srefi a Sma di e gi den libi, èn den e saka densrefi na ondro en makti leki a Soeverein. Dopu ’na ini a nen fu a Manpikin’ wani taki dati den e teki Yesus Krestes leki a Sma di ben gi a lusu-paiman, leki a Fesiman fu den, nanga a Kownu fu den. Den e erken so srefi o prenspari Gado en santa yeye de, noso en wroko krakti, fu tiri den na ini den libi. Dati e sori taki den teki dopu ’na ini a nen fu a santa yeye’.

4. Fa Kresten dinari e kisi den wroko leki dinari?

⁴ Te nyun disipel teki dopu, dan den e kisi a wroko leki dinari fu Yehovah Gado. Suma e gi den a wroko? Den wortu fu 2 Korentesma 3:5 abi fu du nanga den so srefi te a e taki: „Taki wi koni nofo [leki dinari], e kon fu Gado.” Den no ben kan abi wan moro bigi grani leki fu kisi a wroko disi fu Yehovah Gado srefi! Baka di den dopu, den sa tan gro na yeye fasi leki dinari fu a „bun nyunsu” so langa den e saka densrefi na ondro a tiri fu Gado en yeye èn e tan du san en Wortu e taki.​—Mateus 24:14; Tori fu den Apostel 9:31.

Den No Poti na Wroko na wan Demokrasia Fasi ma na wan Theokrasia Fasi

5. Kresten opziener nanga dinari ini a diniwroko e poti na wroko na wan demokrasia fasi? Fruklari dati.

⁵ Opziener nanga dinari ini a diniwroko de fanowdu fu sorgu na wan bun fasi gi den yeye nowtu fu den fayafaya dinari di e kon moro furu. Den opziener disi musu de brada di doro den markitiki fu teki fesi èn den dinari ini a diniwroko musu man yepi den opziener bun (Filipisma 1:1). Fa den brada disi di tranga na yeye fasi, e poti na wroko? Den no e poti na wroko soleki  fa sma na ini Krestenhèit e du dati. Fu eksempre, Kresten opziener no e poti na wroko na wan demokrasia fasi. Dati wani taki dati den no e poti na wroko fu di moro furu sma fu a gemeente e stem tapu den. Na presi fu dati, den opziener e poti na wroko na wan theokrasia fasi. San dati wani taki?

6. (a) San na wan trutru theokrasia? (b) Fu san ede a fasi fa den opziener nanga den dinari ini a diniwroko e poti na wroko, de na wan theokrasia fasi?

⁶ Fu taki en makriki, wan trutru theokrasia na wan tiri pe Gado na a tiriman. Kotoigi fu Yehovah e saka densrefi na ondro en tiri sondro taki sma e dwengi den èn den e wroko makandra so taki den kan du a wani fu Gado (Psalm 143:10; Mateus 6:9, 10). Kresten opziener nanga dinari ini a diniwroko e poti na wroko na wan theokrasia fasi. Disi de so, bika a fasi fa den e rikomanderi èn e poti den frantwortu man disi na wroko, de akruderi a seti fu Gado soleki fa skrifi na ini den Santa Buku fu Bijbel. Èn leki na „edeman fu ala sani”, a no de fu taki dati Yehovah abi a reti fu bosroiti fa en organisâsi di wi kan si, musu waka.​—1 Kroniki 29:11; Psalm 97:9.

7. Fa Yehovah Kotoigi e kisi tiri?

⁷ Tra fasi leki furu kerki grupu na ini Krestenhèit, Yehovah Kotoigi no abi wan sistema pe densrefi e bosroiti fa sani musu waka na ini na organisâsi fu den. Den seryusu Kresten disi e meki muiti fu hori densrefi na den markitiki fu Yehovah. Den opziener fu den no e poti na wroko nanga yepi fu wan sortu kerki tiri pe beskopu noso tra kerki fesiman e teki bosroiti. Yehovah en pipel no e meki a fasi fa grontapu e denki abi krakti na den tapu kwetikweti te den e poti sma na wroko, bika den e tan hori densrefi na den markitiki fu Gado. Na wan getrow fasi, den e tan hori densrefi na a denki di den apostel na ini a fosi yarihondro ben abi èn di ben taki so moi: „Wi musu gi yesi na Gado leki tiriman moro leki na libisma” (Tori fu den Apostel 5:29). So bun, den Kotoigi e saka densrefi na ondro Gado na ini ala sani (Hebrewsma 12:9; Yakobus 4:7). Te wan sma e hori ensrefi na den markitiki fu a theokrasia, dan dati sa meki taki Gado sa feni en bun.

8. Sortu difrenti de na mindri a demokrasia nanga a theokrasia fasi fu du sani?

⁸ Leki futuboi fu a Gran Theokraat, Yehovah, a bun te wi e hori na prakseri sortu difrenti de na mindri a demokrasia nanga a theokrasia fasi fu du sani. Na ini demokrasia afersi, ibri sma abi a reti fu stem gi wan sma di sa teki presi gi den. Furutron, den sma disi di sa teki presi gi den e meki propaganda so taki moro furu sma stem tapu den fu man kisi a posisi dati. Den sortu sani disi no e pasa te wan brada e poti na wroko na wan theokrasia fasi. Den bosroiti no e kon fu libisma noso fu wan korporâsi. A sori leki Paulus ben taki fu ensrefi leki wan man di Yesus nanga Yehovah ben poti na wroko leki „wan apostel fu den nâsi”, di a ben fruteri den Galasiasma taki a ben poti na wroko ’no fu di libisma noso wan man poti en, ma nanga yepi fu Yesus èn Gado a Tata, di ben opo Yesus baka fu dede’.​—Romesma 11:13; Galasiasma 1:1.

Den Poti na Wroko Nanga Yepi fu Santa Yeye

9. San Tori fu den Apostel 20:28 e taki fu a poti di Kresten opziener e poti na wroko?

⁹ Paulus ben memre den opziener di ben libi na Efeise taki Gado ben poti den na wroko nanga yepi fu santa yeye. A ben taki: „Poti prakseri na unsrefi èn na a heri ipi, di santa yeye ben poti unu fu wroko leki opziener na den mindri, fu wei a gemeente fu Gado, di a ben bai nanga a brudu fu en eigi Manpikin” (Tori fu den Apostel 20:28). Den Kresten opziener dati ben musu tan meki santa yeye tiri den te den ben du den plekti fu den leki skapuman fu na ipi fu Gado. Efu wan man di ben poti na wroko fu tyari frantwortu, no ben doro den markitiki fu Gado moro, dan baka wan pisi ten, santa yeye ben o wroko fu puru en na en frantwortu wroko.

10. Fu san ede wi kan taki dati santa yeye de so prenspari te sma e poti na wroko na wan theokrasia fasi?

¹⁰ Fu san ede wi kan taki dati santa yeye de so wan prenspari sani ini a tori disi? Na a fosi presi, a buku di e sori den markitiki gi sma di musu gi tiri na yeye fasi, ben skrifi na ondro a krakti fu santa yeye. Na ini den brifi di Paulus ben  skrifi gi Timoteus nanga Titus, dan a ben sori san na den markitiki di opziener nanga dinari ini a diniwroko musu doro. Ala nanga ala, a ben kari so wan 16 difrenti markitiki. Fu eksempre, den opziener ben musu de bescheiden na ini gwenti, den musu gosontu fu frustan, den musu waka na wan fasi di fiti, den musu lobi fu teki sma na ini oso, den musu abi a koni fu gi bun leri èn den musu de wan bun eksempre leki osofamiri edeman. Den no ben musu dringi furu sopi, den no ben musu de wan sma di lobi moni, èn den ben musu man dwengi densrefi. Na a srefi fasi, den man di ben du muiti fu tron dinari ini a diniwroko, ben musu doro hei markitiki tu.​—1 Timoteus 3:1-10, 12, 13; Titus 1:5-9.

11. San na wan tu markitiki di brada musu doro te den e suku fu kisi frantwortu na ini a gemeente?

¹¹ Te wi e luku den markitiki disi, dan wi e kon si taki den wan di e teki fesi na ini na anbegi fu Yehovah, musu de wan eksempre na ini a fasi fa wan Kresten musu tyari ensrefi. Den man di e suku fu kisi frantwortu na ini a gemeente musu handri na wan fasi di e sori taki santa yeye e wroko na den tapu (2 Timoteus 1:14). A musu de krin fu si taki Gado en yeye e meki a froktu fu a yeye gro na ini den, soleki „lobi, prisiri, vrede, langa pasensi, switifasi, bun-ati, bribi, safri-atifasi, a dwengi di wan sma e dwengi ensrefi” (Galasiasma 5:22, 23). A froktu disi ben o de fu si te den e handri nanga tra bribiman èn nanga tra sma. A no de fu taki dati son wan kande e sori wan tu froktu fu a yeye moro bun, ala di trawan kande e doro tra markitiki gi opziener na wan moro bun fasi. Ma ala den brada di e howpu fu kisi a wroko leki opziener noso dinari ini a diniwroko, musu sori na ini a heri waka nanga libi fu den, taki den de man di tranga na yeye fasi, man di e du soleki fa Gado Wortu e aksi.

12. Fu suma wi kan taki dati den poti na wroko nanga yepi fu santa yeye?

¹² Di Paulus ben frumane trawan fu waka na en baka, dan a ben kan taki dati sondro degedege bika ensrefi ben waka baka Yesus Krestes, di ben ’libi gi wi wan eksempre fu waka soifri na ini en futustap’ (1 Petrus 2:21; 1 Korentesma 11:1). Fu dati ede wi kan taki dati den wan di doro den Bijbel markitiki, ben poti na wroko nanga yepi fu santa yeye na a ten di den poti leki opziener noso dinari ini a diniwroko.

13. Fa santa yeye e yepi den wan di e rikomanderi brada fu dini na ini a gemeente?

¹³ Ete wan sani de di e sori fa santa yeye e wroko te den owruman e rikomanderi èn e poti brada na wroko leki opziener. Yesus ben taki dati „a Tata di de na hemel, sa gi santa yeye na den wan di e aksi en fu dati” (Lukas 11:13). So bun, te den owruman na ini wan gemeente e kon makandra fu rikomanderi brada fu den kisi frantwortu na ini a gemeente, dan den e begi Gado fu man kisi a tiri fu en yeye. Den e luku fosi san Gado Wortu di skrifi nanga yepi fu santa yeye, e taki fu a tori bifo den e rikomanderi wan brada, èn santa yeye e meki den si krin efu a sma di den e rikomanderi, e doro den Bijbel markitiki. Den owruman di e rikomanderi fu poti sma na wroko no musu gi pasi meki a fesi fu a sma, a skoroleri di a ben kisi, noso sani di a sma srefi man du bun, abi krakti na den tapu na wan fasi di no fiti. A moro prenspari sani di den musu luku na efu a de wan sma di tranga na yeye fasi èn efu tra sma fu a gemeente no ben o draidrai fu go na en te den abi rai fanowdu na yeye fasi.

14. San wi e leri fu Tori fu den Apostel 6:1-3?

¹⁴ Komte fu owruman makandra nanga opziener di e rèis, e rikomanderi brada fu dini leki owruman èn leki dinari ini a diniwroko, ma den brada disi e poti na wroko trutru soleki fa den ben du dati na ini a fosi yarihondro. Na wán okasi, brada di lepi na yeye fasi ben de fanowdu fu sorgu gi wan prenspari wroko. A tiri skin ben gi a komando disi: „Suku seibi man na un mindri di abi wan bun nen, èn di furu nanga yeye èn nanga koni, so taki wi kan poti den na wroko fu luku a prenspari afersi disi” (Tori fu den Apostel 6:1-3). Den brada di ben abi langalanga fu du nanga a situwâsi, ben rikomanderi spesrutu brada fu kisi a frantwortu, ma den sma di ben poti den brada na wroko trutru, ben de den man drape na Yerusalem di ben kisi a frantwortu fu poti sma na wroko. Den brada na ini a ten disi e handri na wan srefi sortu fasi.

15. San a Tiri Skin abi fu du nanga a tori fu poti brada na wroko?

 ¹⁵ A Tiri Skin fu Yehovah Kotoigi srefi e poti ala den memre fu den Bijkantoro Komte na wroko. Te a Tiri Skin e teki a bosroiti suma a sa teki fu man tyari so wan bigi frantwortu, dan a abi den wortu fu Yesus na prakseri: „Ibri sma di ben kisi furu sani, sma sa aksi furu fu en baka; èn a sma di poti leki fesiman fu furu sani, sma sa aksi moro fu en baka” (Lukas 12:48). Boiti taki a Tiri Skin e poti memre fu den Bijkantoro Komte na wroko, a e poti Bethel owruman nanga opziener di e reis na wroko tu. Ma den e gi brada di den e frutrow, a wroko fu teki presi gi den fu poti tra sma na wroko. Bijbel e gi wi wan eksempre tu fu disi?

’Poti Sma na Wroko, Soleki fa Mi Ben Gi Yu Komando’

16. Fu san ede Paulus ben libi Titus na Kreta, èn san disi e sori fu a fasi fa brada e poti na wroko na wan theokrasia fasi na ini a ten disi?

¹⁶ Paulus ben fruteri Titus di ben wroko makandra nanga en: „Fu disi ede mi ben libi yu na Kreta, so taki yu ben kan meki den sani kon reti baka, di no ben bun èn so taki yu ben sa kan poti owruman na wroko na ini a wán foto baka a trawan, soleki fa mi ben gi yu komando” (Titus 1:5). Baka dati, Paulus ben kari den markitiki di mansma musu doro fu man kisi frantwortu, èn Titus ben musu luku efu mansma ben de di doro den markitiki disi so taki a ben man poti den na wroko. Fu dati ede na ini a ten disi, a Tiri Skin e poti brada na wroko na den bijkantoro. Den brada disi doro den markitiki fu teki presi gi a Tiri Skin fu poti brada na wroko leki owruman nanga dinari ini a diniwroko. A Tiri Skin e sorgu taki den wan di e teki presi gi en e frustan krin den markitiki fu poti sma na wroko, èn den musu hori densrefi na den markitiki dati fu Bijbel te den e poti sma na wroko. So bun, brada di doro den markitiki èn di poti na wroko fu dini na ini den gemeente fu Yehovah Kotoigi na heri grontapu, e poti na wroko na ondro a tiri fu a Tiri Skin.

17. San den bijkantoro e du te den e kisi brifi di e rikomanderi fu poti brada na wroko leki opziener nanga dinari ini a diniwroko?

¹⁷ Te den bijkantoro fu a Waktitoren Genootschap e kisi brifi di e rikomanderi fu poti spesrutu brada na wroko leki opziener nanga dinari ini a diniwroko, dan man di abi ondrofeni e frutrow tapu Gado en yeye fu tiri den te den e  poti brada na wroko. Den man disi e firi taki den de frantwortu na Gado; den e erken taki den no musu poti no wan sma tumusi esi fu dini, bika efu den ben o du dati, dan den ben o abi prati na den sondu fu en.​—1 Timoteus 5:22.

18, 19. (a) Fa wan tu sma kan poti na wroko? (b) Fa a heri wroko fu rikomanderi èn poti brada na wroko e waka?

¹⁸ Son sma kan poti na wroko nanga yepi fu wan brifi di abi na officieel stempel fu wan korporâsi. Den brada kan gebroiki so wan brifi fu poti moro leki wán brada na wroko na ini a gemeente.

¹⁹ Yehovah na a Sma di e poti sma na wroko nanga yepi fu en Manpikin èn a kanaal fu en na grontapu, namku „a getrow èn koni srafu” nanga a Tiri Skin fu en (Mateus 24:45-47). Den brada di e rikomanderi èn e poti brada na wroko e du dati ondro a tiri fu santa yeye. Disi de so bika den markitiki skrifi na ini Gado Wortu di skrifi nanga yepi fu santa yeye, èn a sma di poti na wroko musu sori taki a abi a froktu fu a yeye dati. Fu dati ede, te wan sma poti na wroko, dan wi musu si dati leki wan sani di a santa yeye ben du. Soleki fa den opziener nanga dinari ini a diniwroko ben poti na wroko na wan theokrasia fasi na ini a fosi yarihondro, na so den e poti na wroko tu na ini a ten disi.

Wi De Nanga Tangi na Ati Taki Yehovah E Tiri Wi

20. Fu san ede wi wani taki a srefi sani di David ben taki na Psalm 133:1?

²⁰ Na ini a ten disi pe wi e go na fesi na yeye fasi èn pe a Kownukondre preikiwroko e gro, wi de nanga tangi na ati taki na Yehovah na a fosi presi, e poti opziener nanga dinari ini a diniwroko na wroko. A seti disi di e kruderi nanga Bijbel, e yepi wi leki Yehovah Kotoigi fu tan hori wisrefi na Gado en hei markitiki fu regtfardikifasi. Boiti dati, a Kresten denki di den man disi e sori èn a tranga muiti di den e du, e yepi furu tu taki wi leki futuboi fu Yehovah abi vrede nanga wánfasi. Dati meki wi wani taki a srefi sani leki a psalm skrifiman David di ben taki: „Luku! O bun èn o switi a de te brada e libi makandra na ini wánfasi!”​—Psalm 133:1.

21. Fa Yesaya 60:17 e kon tru na ini a ten disi?

²¹ Fa wi de nanga tangi na ati taki Yehovah e tiri wi nanga en Wortu èn nanga en santa yeye! Èn den wortu di skrifi na Yesaya 60:17 trutru wani taki furu. Drape skrifi: „Na presi fu kopro, mi sa tyari gowtu kon, èn na presi fu isri, mi sa tyari solfru kon, èn na presi fu udu, kopro, èn na presi fu ston, isri, èn mi wani poti vrede leki opziener gi unu, èn regtfardikifasi leki den sma di e gi unu wroko fu du.” Fu di Yehovah Kotoigi moro nanga moro go du sani èn teki bosroiti na wan theokrasia fasi, meki wi kisi den blesi disi na ini a heri organisâsi fu Gado na grontapu.

22. San meki taki wi de trutru nanga tangi na ati, èn san musu de wi fasti bosroiti?

²² Wi de nanga tangi na ati trutru taki den theokrasia seti, e wroko bun na wi mindri. Wi trutru e warderi den opziener nanga den dinari ini a diniwroko di poti na wroko na wan theokrasia fasi èn di e du wroko di tranga ma di e gi satisfaksi. Wi e prèise wi hemel Tata nanga wi heri ati. Na En meki taki wi go na fesi na yeye fasi èn a gi wi so furu blesi (Odo 10:22). Fu dati ede, meki wi abi a fasti bosroiti fu tan skinskin nanga Yehovah en organisâsi. Meki wi go doro spesrutu nanga a dini di wi e dini nanga makandra na ini wánfasi, èn na so fasi e gi Yehovah grani, e prèise En èn e gi glori na en bigi nanga santa nen.

San Yu Ben Sa Piki?

• Fu san ede wi kan taki dati opziener nanga dinari ini a diniwroko no poti na wroko na wan demokrasia fasi ma na wan theokrasia fasi?

• Fa Kresten man di sabi tyari frantwortu, e poti na wroko nanga yepi fu santa yeye?

• San a Tiri Skin abi fu du nanga a poti na wroko fu brada leki opziener nanga dinari ini a diniwroko?

• Fu san ede wi musu de nanga tangi na ati taki Yehovah gi a seti fu poti brada na wroko na wan theokrasia fasi?

[Aksi fu a tori disi]

[Prenki na tapu bladzijde 15]

Owruman nanga dinari ini a diniwroko abi a bigi grani fu dini leki sma di poti na wroko na wan theokrasia fasi