Tan Skinskin Nanga Yehovah En Organisâsi

„Meki a de so, taki a Gado fu vrede . . . e gi unu ala sani di bun fu du en wani.”​—HEBREWSMA 13:20, 21.

1. Omeni sma e libi na grontapu, èn omeni sma de memre fu spesrutu kerki?

NA INI a yari 1999, siksi milyard sma ben libi na grontapu! The World Almanac e sori taki fu den sma disi, 1.165.000.000 na Moslimsma; 1.030.000.000 na Lomsu; 762.000.000 na Hindusma; 354.000.000 na Budasma; 316.000.000 na Protestantsma; èn 214.000.000 na memre fu Orthodox kerki.

2. Fa a situwâsi fu den kerki de na ini a ten disi?

² Te wi e luku a bruya nanga pratifasi na ini den kerki, dan a de so taki den milyunmilyun sma disi e handri akruderi a wani fu Gado? Nôno, „bika Gado a no wan Gado fu bruya, ma fu vrede” (1 Korentesma 14:33). Na a tra sei, fa a de nanga a bradafasi fu futuboi fu Yehovah na heri grontapu? (1 Petrus 2:17). Te wi e go ondrosuku en bun, dan wi sa si taki ’a Gado fu vrede e gi den ala sani di bun fu du en wani’.​—Hebrewsma 13:20, 21.

3. San ben pasa na ini Yerusalem na a Pinksterfesa fu 33 G.T., èn fu san ede?

³ A no de fu taki, a no a nomru fu sma di de Kotoigi fu Yehovah e meki taki Gado feni den bun; noso a no a kon di a grupu sma dati e kon moro bigi e meki taki Gado feni den bun. Yehovah no ben teki Israèl fu di den „ben abi moro furu sma” leki den tra folku. Fu taki en leti, den ben de „a moro pikinwan” fu den folku (Deuteronomium 7:7). Ma fu di Israèl no ben de getrow na Gado, meki na a Pinksterfesa fu 33 G.T., Yehovah ben puru en bun-ati na den èn a ben teki a nyun gemeente fu den bakaman fu Yesus Krestes. Den ben de sma di salfu nanga Yehovah en santa yeye èn den ben wroko fayafaya fu meki a waarheid fu Gado nanga Krestes bekènti na trawan.​—Tori fu den Apostel 2:41, 42.

Den Tan Go na Fesi

4. Fu san ede yu ben sa taki dati a fosi Kresten gemeente ben tan go na fesi?

⁴ Na ini a fosi yarihondro, a Kresten gemeente ben tan go na fesi, a ben preiki na ini nyun kontren, ben meki disipel, èn a ben kon frustan moro bun san Gado abi na prakseri. Den fosi Kresten ben tan skinskin nanga a leti na yeye fasi, di ben skèin moro nanga moro fu di den ben kisi brifi di Gado ben meki sma skrifi na ondro a krakti fu santa yeye. Den ben kisi deki-ati te den apostel nanga tra sma ben kon na den, èn dati meki den ben man du a diniwroko fu den na wan bun fasi.  Ala den sani disi skrifi na ini den Kresten Griki Buku fu Bijbel.​—Tori fu den Apostel 10:21, 22; 13:46, 47; 2 Timoteus 1:13; 4:5; Hebrewsma 6:1-3; 2 Petrus 3:17, 18.

5. Fu san ede Gado en organisâsi e go na fesi na ini a ten disi, èn fu san ede wi musu tan skinskin nanga dati?

⁵ Neleki den fosi yarihondro Kresten, den disiten Kotoigi fu Yehovah ben bigin leki wan pikin grupu èn baka dati den gro kon moro bigi (Sakaria 4:8-10). Fu sensi a kaba fu a di fu 19 yarihondro, krinkrin buweisi de taki Gado en yeye de nanga en organisâsi. Fu di wi no frutrow tapu libisma krakti ma ben meki santa yeye tiri wi, dati meki wi man frustan den Buku fu Bijbel moro bun èn man du soifri san Gado wani (Sakaria 4:6). Now di wi de na ini „den lasti dei”, dan a de prenspari srefisrefi fu wi tan skinskin nanga Gado en organisâsi di e tan go na fesi (2 Timoteus 3:1-5). Efu wi e du disi, dan a sa yepi wi fu meki wi howpu tan libilibi. A sa yepi wi so srefi fu gi kotoigi tu fu Gado Kownukondre di seti kaba, bifo a seti fu sani disi e kon na en kaba.​—Mateus 24:3-14.

6, 7. Wi sa poti prakseri na sortu dri kontren pe na organisâsi fu Yehovah go na fesi?

⁶ Na wi mindri, wi abi den wan di ben bigin wroko makandra nanga Yehovah en organisâsi na ini den yari fu 1920 te go miti 1950. Te wi e luku san ben pasa na ini den yari dati, suma fu unu ben kan denki taki na organisâsi ben o gro kon so bigi èn ben o go na fesi so kefalek teleki a dei fu tide? Prakseri fu den heimarki di wi doro na ini a ten fu wi! A e gi wi deki-ati trutru te wi e prakseri san Yehovah du nanga yepi fu en pipel di orga na wan theokrasia fasi.

⁷ Den wondru wroko fu Yehovah ben naki na ati fu David fu fositen, di a ben prakseri dipi fu den. „Te mi ben sa wani fu fruteri èn taki fu den”, na so a ben taki, dan „den tron kefalek furu, moro leki mi man fruteri” (Psalm 40:5). Neleki David wi no man kari ala den wondru wroko di Yehovah du na ini a ten disi èn di trutru de fu prèise. Ma toku, meki wi poti prakseri na dri kontren pe na organisâsi fu Yehovah go na fesi: (1) wi kon frustan sani na yeye fasi moro krin, (2) wi e du wi diniwroko na wan moro bun fasi èn na moro presi, èn (3) na a yoisti ten, kenki tyari kon na ini a fasi fa sani seti na ini na organisâsi.

Wi De Nanga Tangi na Ati Taki Wi Kon Frustan Sani na Yeye Fasi Moro Krin

8. San wi kon frustan ini a tori fu a Kownukondre fu di a leti na yeye fasi skèin krin soleki fa Odo 4:18 e taki?

⁸ Den wortu na Odo 4:18 e sori taki a leti na yeye fasi e skèin moro krin trutru. Drape a e taki: „A pasi fu den regtfardikiwan de leki a brenki leti di e kon krin moro nanga moro, teleki a dei poti kon steifi.” Fa wi de nanga tangi na ati taki wi si fa a leti na yeye fasi skèin moro krin! Na ini 1919 na a kongres fu Cedar Point, Ohio, den brada ben poti spesrutu prakseri na Gado Kownukondre. Yehovah e gebroiki a Kownukondre fu santa en nen èn fu seti a reti di A abi fu tiri. Te yu e luku en bun, dan a leti na yeye fasi meki wi kon si krin taki fu Genesis te go miti Openbaring, Bijbel e taki krinkrin fu a prakseri fu Yehovah fu meki en nen kon santa nanga yepi fu a Kownukondre nanga en Manpikin leki tiriman. Na dati e gi howpu na ala sma di lobi du san reti.​—Mateus 12:18, 21.

9, 10. San den brada ben kon sabi na ini den yari 1920 te nanga 1930 fu a Kownukondre èn fu den tu organisâsi di e feti nanga makandra? Fa disi yepi wi?

⁹ Na a kongres na Cedar Point na ini 1922,  dan Brada Rutherford, a prenspari takiman drape ben gi den arkiman na a kongres a deki-ati fu „preiki, preiki, preiki, fu a Kownu nanga en kownukondre”. Wan artikel di nen „The Birth of a Nation” (A Geborte fu wan Nâsi) ben tyari kon na doro na ini The Watch Tower fu 1 maart 1925. Na artikel dati ben meki sma poti prakseri na a frustan di den ben kon frustan den profeititori di ben sori taki Gado Kownukondre ben seti na ini a yari 1914. Na ini den yari dati, den brada ben si krin tu taki tu organisâsi e feti nanga makandra, di fu Yehovah nanga di fu Satan. Den tu organisâsi disi e feti now, èn wi sa de na a sei fu na organisâsi di e wini, soso te wi e tan skinskin nanga Yehovah en organisâsi.

¹⁰ Fa a frustan di wi kon frustan sani na yeye fasi moro krin, de wan yepi gi wi? Fu di Gado Kownukondre nanga a Kownu Yesus Krestes no de wan pisi fu grontapu, meki wi tu no kan de wan pisi fu grontapu. Fu di wi e hori wisrefi aparti fu grontapu, meki wi e sori taki wi de na a sei fu a waarheid (Yohanes 17:16; 18:37). Te wi e luku ala den frekti problema di e trobi na ogri sistema disi, dan fu tru, wi de nanga tangi na ati taki wi no de wan pisi fu Satan en organisâsi! Na wan bigi grani fu tru, taki wi abi seikerfasi na yeye fasi na ini Yehovah en organisâsi!

11. Sortu nen di de akruderi Bijbel, Gado en pipel teki na ini 1931?

¹¹ Na a kongres fu Columbus, Ohio, na ini 1931, den brada ben fiti den wortu fu Yesaya 43:10-12 na a yoisti fasi. Den Bijbel Ondrosukuman ben teki a nen Yehovah Kotoigi. Fu tru, a de wan bigi grani fu meki a nen fu Gado bekènti so taki trawan kan kari a nen dati èn kisi frulusu!​—Psalm 83:18; Romesma 10:13.

12. San wi ben kon frustan krin ini a tori fu a bigi ipi, na ini 1935?

¹² Na ini den yari fosi a yari 1930, furu fu Gado en pipel no ben sabi seiker sortu howpu gi libi den ben abi gi a tamara. Wan tu fu den ben prakseri fu wan libi na ini hemel, ma na a srefi ten den ben feni a Bijbel leri fu wan paradijs grontapu kefalek moi tu. Na a kongres fu Washington, D.C., na ini 1935, den ben kisi fu yere a span nyunsu taki a bigi grupu, noso a bigi ipi fu Openbaring kapitel 7 na wan grupu sma di abi a howpu fu libi na grontapu. Sensi a ten dati, dan a bigi ipi tyari kon na wan, moro esi leki bifo. Wi no de nanga tangi na ati taki a no de wan dangra tori gi wi suma na a „bigi ipi”? Fu di wi e si taki bun furu sma trutru e tyari kon na wan fu ala nâsi, lo, nanga tongo, meki wi e kisi deki-ati fu wroko moro tranga, ala di wi e tan skinskin nanga Yehovah en organisâsi.

13. Tapu sortu bigi strei di de den brada ben poti krakti na a kongres fu St. Louis na ini 1941?

¹³ Na ini 1941, na a kongres fu St. Louis, Missouri, den brada ben poti krakti na tapu a bigi strei di libisma musu poti furu prakseri na dati. A abi fu du nanga a strei ini a tori fu a moro heiwan di abi a reti fu tiri. Disi na a strei di musu lusu heri esi, èn dati o pasa na ini a bigi èn frede dei di e kon gawgaw! Wan tra sani di ben poti krakti na tapu tu na ini 1941, ben abi fu du nanga a hori di wi musu hori wi soifri retifasi bika a abi fu du nanga a strei dati. Te ibriwan fu wi e du dati, dan wi e sori sortu bosroiti wi teki ini a tori fu a reti di Gado abi fu tiri wi leki libisma.

14. San den arkiman na a internationaal kongres fu 1950 ben kon sabi fu den granman di kari na Yesaya 32:1, 2?

¹⁴ Na a internationaal kongres fu 1950 na ini New York City, den brada ben sori soifri suma na den granman fu Yesaya 32:1, 2. A ben de wan momenti di ben seki den sma drape, di Brada Frederick Franz ben taki fu a tori. Brada Franz ben tyari kon na krin taki wan tu fu den granman dati fu a nyun grontapu ben de na wi mindri. Na a kongres dati èn na den kongres baka dati, a leti na yeye fasi ben skèin furu (Psalm 97:11). Fa wi de nanga tangi na ati taki wi pasi „de leki a brenki leti di e kon krin moro nanga moro”!

Wi Go na Fesi na ini Wi Diniwroko

15, 16. (a) Fa wi go na fesi na ini wi diniwroko na ini den yari 1920 te go miti 1940? (b) Sortu publikâsi di wi kisi, gi wi deki-ati fu du a Kresten diniwroko na ini den lasti someni tenti yari?

¹⁵ Wan di fu tu fasi fa na organisâsi fu Yehovah  go na fesi, abi fu du nanga a moro prenspari wroko fu wi, namku fu preiki a Kownukondre èn fu meki disipel (Mateus 28:19, 20; Markus 13:10). Fu man du a wroko disi, na organisâsi poti krakti doronomo tapu o prenspari a de fu du moro na ini a diniwroko fu wi. Na ini a yari 1922, ala sma ben kisi a tranga fu abi wan prati na a preikiwroko. Ibri sma ben musu tyari en eigi frantwortu fu meki en leti skèin èn fu dati ede a ben musu abi wan prati fu gi kotoigi fu a waarheid (Mateus 5:14-16). Na ini 1927, den brada ben seti sani so fu teki sonde leki wan velddienst dei. Bigin nanga februari 1940, a ben de wan gewoon sani fu si den Kotoigi na den strati pe furu wenkri de, e prati The Watchtower nanga Consolation (now Ontwaakt!).

¹⁶ Na ini 1937, a pikin buku Model Study (Model fu Studeri) ben tyari kon na doro. Den ben poti krakti na tapu a go di wi musu go baka na den wan di wani sabi moro so taki den kan leri a waarheid. Na ini den yari baka dati, den brada ben poti furu krakti na tapu a bijbelstudie-wroko. Den ben gi deki-ati fu du a wroko disi di a buku “Let God Be True” ben tyari kon na doro na ini 1946 èn baka dati a buku The Truth That Leads to Eternal Life na ini 1968. Nownowde, wi e gebroiki a buku Sabi di e tjari joe go na têgo libi. Te wi e studeri a buku disi nanga sma, dan dati e meki taki den abi wan bun fondamenti fu tron disipel.

Wi Go na Fesi fu di Sani E Seti Moro Bun

17. Fa Yehovah en organisâsi go na fesi, akruderi san Yesaya 60:17 e taki?

¹⁷ A di fu dri fasi fa Yehovah en organisâsi go na fesi, abi fu du nanga a fasi fa na organisâsi seti sani moro bun. Soleki fa a skrifi na Yesaya 60:17, dan Yehovah ben pramisi: „Na presi fu kopro, mi sa tyari gowtu kon, èn na presi fu isri, mi sa tyari solfru kon, èn na presi fu udu, kopro, èn na presi fu ston, isri, èn mi wani poti vrede leki opziener gi unu, èn regtfardikifasi leki den sma di e gi unu wroko fu du.” Fu du soifri san a profeititori disi e taki, dan sani ben seti fu tiri a Kownukondre wroko èn fu luku den skapu fu na ipi moro bun.

18, 19. Sortu sani na ini na organisâsi ben seti moro bun na ini den yari di pasa?

¹⁸ Na ini 1919, a Genootschap ben poti wan diniwroko fesiman na ini ibri gemeente di ben aksi a Genootschap fu orga sani gi a velddienst. A nyun seti disi ben gi wi deki-ati fu du a preikiwroko. Na ini 1932 den brada ben tapu fu hori verkiezing gi owruman nanga diaken. Na so den ben tapu fu du sani na wan demokrasia fasi. Na ini 1938 den brada ben doro wan tra heimarki, di a Genootschap ben bigin poti ala futuboi na ini a gemeente na wroko na wan theokrasia fasi, di de moro akruderi a fasi fa den ben du dati na ini a fosi Kresten gemeente (Tori fu den Apostel 14:23; 1 Timoteus 4:14). Na ini 1972, den owruman nanga dinari ini a diniwroko ben poti na wroko fu du diniwroko, neleki den ben du dati na mindri den fosi Kresten. Na presi fu wán man nomo e dini leki na opziener fu wan gemeente, dan Filipisma 1:1 nanga tra bijbeltekst e sori taki den wan di e doro den Bijbel markitiki gi owruman, makandra e meki wan skin fu owruman.​—Tori fu den Apostel 20:28; Efeisesma 4:11, 12.

¹⁹ Na ini 1975 a Genootschap bigin nanga wan seti, taki komte fu a Tiri Skin fu Yehovah Kotoigi e tiri a wroko fu Yehovah en organisâsi na heri grontapu. Bijkantoro Komte ben poti na wroko fu tiri a wroko na ini den kontren fu den. Sensi a ten dati, den brada ben suku fu meki a wroko na a edekantoro èn na den bijkantoro fu a Waktitoren Genootschap kon moro makriki, so taki den „kan kon sabi seiker san na den moro prenspari sani” (Filipisma 1:9, 10). Den ondro-skapuman fu Krestes kisi a frantwortu fu teki fesi na ini a preikiwroko, so srefi fu gi leri na ini a gemeente, èn fu luku na ipi fu Gado bun leki skapuman.​—1 Timoteus 4:16; Hebrewsma 13:7, 17; 1 Petrus 5:2, 3.

Yesus E Teki Fesi Nanga Faya

20. San wi musu erken fu Yesus en wroko leki edeman efu wi wani tan skinskin nanga Yehovah en organisâsi?

²⁰ Efu wi wani tan skinskin nanga Yehovah en  organisâsi di e go na fesi, dan wi musu erken a wroko di Gado gi Yesus Krestes leki „edeman fu a gemeente” (Efeisesma 5:22, 23). A prenspari tu fu prakseri fu Yesaya 55:4 di e taigi wi: „Luku! Mi [Yehovah] gi en leki wan kotoigi gi den nâsi, leki wan fesiman nanga kapten gi den nâsi”. Yesus trutru sabi fa fu teki fesi. A sabi den skapu fu en tu, èn so srefi den sani di den e du. Fu taki en leti, di Yesus ben ondrosuku den seibi gemeente na Pikin Asia, dan feifi tron a ben taki: „Mi sabi den du fu yu” (Openbaring 2:2, 19; 3:1, 8, 15). Neleki Yehovah, en Tata, Yesus sabi tu san wi abi fanowdu. Syatu bifo Yesus ben gi a Modelbegi (a begi pe a sori sma fa den musu begi), dan a ben taki: „Gado un Tata sabi sortu sani unu abi fanowdu bifo unu aksi en srefi.”​—Mateus 6:8-13.

21. Fa Yesus e sori taki en na a edeman na ini a Kresten gemeente?

²¹ Fa Yesus e sori taki en na a edeman? Wan fasi fa a e du dati, na fu di a e poti Kresten opziener di de leki „presenti ini libisma” (Efeisesma 4:8). Openbaring 1:16 e sori taki den salfu opziener de na ini a reti-anu fu Krestes, den de na ondro en makti. Na ini a ten disi, Yesus e tiri a seti disi fu owruman, awansi den man disi abi a howpu fu libi na hemel noso na grontapu. Soleki fa a fosi artikel ben fruklari, dan den owruman e poti na wroko nanga yepi fu santa yeye akruderi Bijbel markitiki (1 Timoteus 3:1-7; Titus 1:5-9). Na ini a fosi yarihondro, wan grupu fu owruman na ini Yerusalem makandra ben meki wan tiri skin di ben tiri den gemeente èn a Kownukondre preikiwroko na ala presi. Na ini a ten disi, Yehovah en organisâsi e wroko na a srefi fasi.

Tan Skinskin!

22. Sortu yepi a Tiri Skin e gi?

²² „A getrow èn koni srafu” kisi a frantwortu fu sorgu gi Kownukondre afersi na grontapu èn a Tiri Skin fu Yehovah Kotoigi e teki presi gi den (Mateus 24:45-47). A Tiri Skin e broko en ede moro furu nanga a gi di a musu gi tiri nanga leri na yeye fasi na a Kresten gemeente (Tori fu den Apostel 6:1-6). Ma te naturu rampu miti wi brada, dan a Tiri Skin e aksi wán noso moro korporâsi, fu gi yepi èn fu meki den oso nanga den Kownukondre zaal di ben broko. Te sma e du ogri na son Kresten noso e frufolgu den, dan a Tiri Skin e seti en so fu den brada disi kisi deki-ati na yeye fasi. Èn „na ini muilek ten”, a Tiri Skin e meki ala muiti fu meki a Kownukondre preikiwroko tan go doro.​—2 Timoteus 4:1, 2.

23, 24. San Yehovah e tan gi en pipel, awansi sortu sani e kon na den tapu, èn san musu de wi fasti bosroiti?

²³ Awansi sortu sani e kon na tapu Yehovah en pipel, Yehovah e gi den nyanyan na yeye fasi doronomo èn a e gi den a tiri di den abi fanowdu. Gado e gi koni tu na brada di sabi tyari frantwortu, èn a e meki den frustan sani krin, so taki den kan de srekasreka fu meki a theokrasia organisâsi tan go na fesi èn fu seti sani moro bun (Deuteronomium 34:9; Efeisesma 1:16, 17). Sondro misi, Yehovah e gi wi san wi abi fanowdu, so taki wi man du a wroko di wi kisi fu meki disipel èn man du wi diniwroko na heri grontapu.​—2 Timoteus 4:5.

²⁴ Wi e bribi trutru taki Yehovah noiti no sa drai en baka gi en getrow pipel; a sa frulusu den, a sa meki den pasa a „bigi banawtu” libilibi (Openbaring 7:9-14; Psalm 94:14; 2 Petrus 2:9). Wi abi ala reide fu hori fasti na a frutrow di wi ben abi na a bigin te na a kaba (Hebrewsma 3:14). Fu dati ede, meki wi abi a fasti bosroiti fu tan skinskin nanga Yehovah en organisâsi.

San Yu Ben Sa Piki?

• Fu san ede wi kan taki dati Yehovah en organisâsi e tan go na fesi?

• Sortu buweisi de taki a leti na yeye fasi e skèin krin moro nanga moro gi Gado en pipel?

• Na sortu fasi sani seti moro bun fu meki a Kresten diniwroko go na fesi?

• Sortu kenki den futuboi fu Yehovah tyari kon na a yoisti ten na ini na organisâsi?

[Aksi fu a tori disi]

[Prenki na tapu bladzijde 17]

Neleki David, wi no man fruteri fu ala den wondru wroko fu Yehovah

[Prenki na tapu bladzijde 18]

Na ipi fu Gado kisi wini fu di na a yoisti ten, kenki tyari kon na ini a fasi fa sani seti na ini na organisâsi