De Lepi Sma Di Abi Wan Tranga Bribi

„Wan Kefalek Koni Sani Di Sma Meki”

KOTOIGI fu Yehovah sori frukufruku kaba na ini a disiten historia fu den, taki den poti ala den prakseri na wan fu den profeititori fu Yesus: „A bun nyunsu disi fu a kownukondre sa preiki na heri grontapu pe sma e libi, leki wan kotoigi gi ala nâsi, èn dan a kaba sa kon” (Mateus 24:14). Di a yari 1914 — a bigin fu „den lasti dei” — ben kon moro krosibei, dan getrow Bijbel Ondrosukuman di ben abi tranga bribi, bigin nanga wan bigi leriwroko na heri grontapu. A leriwroko disi di noiti bifo ben du, ben abi en fondamenti tapu den Santa Buku fu Bijbel.​—2 Timoteus 3:1.

Fu man meki a bun nyunsu bekènti na heri grontapu, den futuboi disi fu Yehovah ben gebroiki wan fasi fu preiki di ben nyun, di ben de wan tyalensi, èn di ben tyari a boskopu na wan krin fasi. Fu kon sabi moro fu a sani disi, dan kon meki wi luku fa sani ben de fosi.

Wan Nyun Fasi fu Meki a Bun Nyunsu Bekènti

Wi de na ini yanuari 1914. Prakseri taki yu e sidon makandra nanga 5000 tra sma na ini wan dungru zaal na ini New York City. Na yu fesi wan bigi felemduku de. Wan weti-wiwiri man di e weri wan langa dyakti, de fu si now na tapu a duku. Yu si fositen felem kaba pe sma no e taki, ma a man disi e taki, èn yu kan yere den wortu fu en. Disi na a fosi leisi di sowan felem e sori. A sani disi na wan heri nyun teknik, èn a abi wan aparti boskopu. A man di e taki, na Charles Taze Russell, a fosi presidenti fu a Waktitoren Genootschap, èn a felem nen „Photo-Drama der Schepping”.

C. T. Russell ben sabi taki nanga yepi fu felem, den ben o man tyari a bun nyunsu go na ipi-ipi sma. Fu dati ede, a bigin meki a „Photo-Drama der Schepping” na ini 1912. Te fu kaba, a kon tron wan programa fu aiti yuru di meki fu felem nanga atosigi na ini kloru so srefi. Yu ben man yere so srefi san sma ben taki na ini a felem.

A „Photo-Drama der Schepping” di ben abi fo pisi, ben sori sma den tori di ben abi fu du nanga a meki di Gado meki sani. Moro fara a ben sori difrenti sani di pasa na ini a libisma historia te go miti a heimarki fu a prakseri di Yehovah Gado abi gi grontapu èn gi a libisma famiri, na a kaba fu a Dusun Yari Tiri fu Krestes. Furu yari ben o pasa bifo sma ben o man gebroiki a srefi teknik disi nanga bun bakapisi fu meki furu moni. Ma milyunmilyun sma ben si a „Photo-Drama der Schepping” sondro taki den ben pai moni fu luku en!

Den brada ben sreka den moro moi poku èn so srefi 96 lezing di ben poti tapu grammofoonplaat, gi a „Photo-Drama der Schepping”. Na wan tumusi koni fasi, sma ben meki prenki fu skedrei na tapu aparti atosigi. Den prenki na tapu den atosigi disi ben moksi kon makandra èn den ben sori sma sani di ben abi fu du nanga grontapu historia. A ben de fanowdu so srefi fu meki hondrohondro tra skedrei nanga prenki. Brada nanga sisa srefi ben teki furu ten nanga pasensi fu ferfi den kloru prenki na tapu wan tu fu den atosigi èn na tapu den pisi fu felem. Èn den ben du a sani disi furu leisi baka makandra, teleki, te fu kaba, den ben meki 20 fu a ’Photo-Drama” disi di ben abi fo pisi. Now den ben man sori a „Photo-Drama der Schepping” na ini 80 difrenti foto tapu iniwan dei di den ben wani!

 Den Sani Di Sma No Ben Si

San na den sani di sma no ben si na a ten di a „Photo-Drama der Schepping” ben e sori? Wan Bijbel Ondrosukuman di nen Alice Hoffman ben taki: „A Drama ben bigin nanga wan felem fu Brada Russell.” „Te a ben kon na tapu a felemduku, dan en mofobuba ben bigin buweigi, wan gramofoonplaat ben bigin drai . . . èn wi ben e prisiri fu arki en sten.”

Zola Hoffman e sori go na a teknik pe fowtow fu a srefi sani e meki wan syatu pisi ten baka makandra, so taki a gersi leki den sani di e sori na tapu den e buweigi te den fowtow disi e sori heri esi baka makandra. A e memre: „Mi ben sidon drape e luku den sani di a felem ben sori fu a ten di sani ben meki, èn mi no ben man bribi. Yu ben man si nanga yu eigi ai fa leli bromki ben e opo safrisafri.”

Wan lobiman fu poku, Karl F. Klein fu a Tiri Skin fu Yehovah Kotoigi, e taki go moro fara: „Na a srefi ten di a felem ben sori, dan yu ben man yere so srefi switi poku, soleki Narcissus nanga Humoroske (disi na klassiek poku), di fu tru na moi poku.”

Tra aparti sani ben pasa so srefi. Clayton J. Woodworth Jr. e memre: „Son ten sani no ben waka bun, èn den sani dati ben gi fu lafu.” „Wan leisi a poku ’Flee as a Bird to Your Mountain’ (Frei Neleki wan Fowru Go na a Bergi fu Yu) ben e prei, èn na tapu a duku wan bigi sortu dinosaurus ben de fu si. A bun bigi meti disi ben libi na grontapu na a ten bifo a Frudu”!

Boiti a „Photo-Drama der Schepping”, di den brada ben gwenti fu sori, dan no langa baka dati, den brada meki so srefi wan tu set fu wan tra drama di ben nen „Eureka Drama”. (Luku a faki.) Wan fu den ben abi den lezing èn so srefi poku di ben poti na tapu gramofoonplaat. A trawan ben abi den grammofoonplaat disi di ben drai lezing nanga poku, makandra nanga den atosigi. Ala di na „Eureka Drama” no ben abi felem, toku a ben tyari bun bakapisi kon te den brada ben sori en na ini kontren pe no so furu sma ben tan.

Wan Krakti Yepisani fu Du Kotoigiwroko

Na a kaba fu 1914, moro leki 9.000.000 sma na ini Noord-Amerika, Europa, nanga Australia, ben si a „Photo-Drama”. Ala di a grupu fu Bijbel Ondrosukuman ben pikin, toku den no ben mankeri a tranga bribi di ben de fanowdu fu meki a bun nyunsu bekènti nanga a nyun yepisani disi. Den Bijbel Ondrosukuman ben breiti srefisrefi fu gi bijdrage fu yepi pai a yuru fu presi di ben fiti, so taki den ben man sori sma a „Photo-Drama” disi. Na so a „Photo-Drama der Schepping” ben yepi na wan tumusi bun fasi fu meki sma kon sabi a Wortu fu Gado èn so srefi den sani di Yehovah abi na prakseri gi grontapu.

Wan brifi di wan sma ben skrifi go gi C. T. Russell ben taki: „A fosi leisi di mi go luku a Drama fu yu, dan dati meki mi tyari bigi kenki kon na ini mi libi; noso, fu taki en moro bun, a ben kenki a fasi fa mi ben frustan Bijbel.” Wan tra sma ben taki: „Pikinmoro mi ben lasi bribi fu di mi ben bruya èn mi ben lasi pasi, ma mi feni taki a ’Photo-Drama der Schepping” di den sori dyaso a zomer di pasa, tyari mi kon baka na tapu a reti pasi. . . . Now mi abi a korostu firi di grontapu no man gi mi èn mi no ben sa wani lasi dati, srefi te mi ben o kisi ala den gudu na grontapu.”

Demetrius Papageorge, di langaten ben de wan fu den wrokoman na a edekantoro fu a Genootschap, ben taki: „Te wi e luku fa a grupu fu Bijbel Ondrosukuman ben pikin èn so srefi a pikinso moni di den ben abi, dan wi e si taki a ’Photo-Drama’ ben de wan kefalek koni sani di den brada ben meki. A yeye fu Yehovah ben horibaka gi a ’Photo-Drama’ fu tru!”

[Faki/Prenki na tapu bladzijde 8, 9]

Na „Eureka Drama”

Aiti mun baka a fosi leisi di a „Photo-Drama” ben sori, dan a Genootschap kon si taki a ben de fanowdu fu meki wan tra drama, èn a drama disi ben nen „Eureka Drama”. Ala di den brada ben tan sori ala den fo pisi fu a „Photo-Drama’ na ini den bigi foto, na „Eureka Drama” ben tyari a srefi prenspari boskopu na ini dorpu èn na den boitipresi. Sma ben taki dati wan fu den pisi fu na „Eureka Drama„ ben gi „den sisa wan tumusi moi okasi” fu preiki. Fu san ede? Fu di a dosu nanga grammofoonplaat ben wegi 14 kilogram nomo. A no de fu taki, dati te den ben gebroiki en fu sori sma na ini a preikiwroko, dan den ben musu tyari wan gramofon so srefi.