Feni Seikerfasi na ini wan Grontapu Di Lai Kefar

EFU yu e waka na ini presi pe landmijn de, dan yu kan lasi yu libi. A no ben sa yepi yu fu abi wan karta di e sori yu ala den presi pe den landmijn de? Boiti dati, kon meki wi taki dati yu leri sabi ala den difrenti landmijn. A de krin, taki efu yu abi a sabi dati, dan a tyans e kon moro pikin srefisrefi taki yu kisi mankeri noso lasi yu libi.

Wi kan agersi Bijbel nanga a karta dati èn so srefi nanga a leri di yu e kisi fu kon sabi den landmijn. Bijbel abi koni na ini di sma no man feni na no wan tra presi; dati na koni ini a tori fu wai pasi gi kefar èn fu lusu den problema di e kon na ini a libi.

Luku a pramisi disi di e gi wi deki-ati èn di wi kan feni na Odo 2:10, 11: „Te koni e kon na ini yu ati èn sabi srefi e tron wan prisiri sani gi yu eigi sili, dan a krakti fu man denki srefi sa hori wakti gi yu, a koni fu si sani krin srefi sa kibri yu.” A koni nanga a koni fu si sani krin, di kari dyaso, no komoto na libisma, ma komoto fu Gado. „Ini a tori fu a wan di e arki [a koni fu Gado], a sa tan na ini seikerfasi èn frede gi rampu no sa bruya en” (Odo 1:33). Meki wi luku fa Bijbel kan meki wi abi moro seikerfasi èn fa a kan yepi wi wai pasi gi furu problema.

Wai Pasi gi den Ongoloku Di Kan Kiri Sma

No so langa pasa a Grontapu Gosontu Organisâsi (WHO) ben tyari raportu kon na doro di e sori taki na heri grontapu so wan 1.171.000 sma lasi den libi na strati. So wan 40 milyun tra sma e kisi mankeri te den rèi na strati, èn pikin moro 8 milyun sma e kon malengri fu dati.

Ala di wi no kan kibri wisrefi gi ala kefar te wi e rèi wagi, toku wi kan de seiker taki sani sa waka moro bun gi wi te wi e rèi na strati, efu wi e gi yesi na den wet di de. Den lanti tirimakti e poti den wet di wi musu hori te wi e rèi na strati èn den e sorgu taki sma e hori densrefi na den wet disi; Bijbel ben taki fu den lanti tirimakti disi: „Meki ibri sili saka ensrefi na ondro den hei tirimakti” (Romesma 13:1). Te sma di e rèi wagi, e hori densrefi na a Bijbel rai disi, dan a tyans moro pikin taki den sa kisi mankeri. Furutron dati abi leki bakapisi taki hebi mankeri feni presi.

Wan tra sani di e gi wi deki-ati fu rèi sondro fu de wan kefar gi trawan nanga wisrefi, na a lespeki di wi abi gi a libi. Bijbel e taki fu Yehovah Gado: „Yu na a Sma fu pe a libi komopo” (Psalm 36:9). So bun, libi na wan kado di wi kisi fu Gado. Fu dati ede, wi no abi reti fu teki a kado dati fu wan tra sma noso fu no abi lespeki gi a libi, so srefi wi eigi libi.​—Genesis 9:5, 6.

A no de fu taki dati lespeki gi libisma libi abi fu du tu nanga a sorgu di wi e sorgu taki wi wagi nanga wi oso no de wan kefar gi trawan nanga wisrefi. Na ini Israèl fu owruten, a ben de prenspari tapu ala kontren fu a libi fu sorgu taki sani no de, di de wan kefar gi trawan nanga wisrefi. Fu eksempre, te wan sma ben bow wan oso, dan Gado Wet  ben taki dati a sma musu meki wan daki di ben abi wan pikin skotu. Na tapu a daki na osofamiri ben du furu sani makandra. „Yu musu meki wan pikin skotu gi a daki fu yu tu, so taki yu no poti brudu-paiman na tapu yu oso, fu di wan sma . . . ben sa kan fadon komoto na a daki” (Deuteronomium 22:8). Efu wan sma ben fadon fu di na eiginari no ben hori ensrefi na a wet disi di e kibri sma libi, dan Gado ben hori en frantwortu gi san ben pasa. Sondro tweifri, efu den ben o gebroiki a lobi-ati gronprakseri fu a wet disi, dan moro mendri mankeri ben o feni presi na wrokopresi noso srefi te den ben o abi prisiriten.

Feti Nanga Takru Gwenti Di Sma No Man Libi èn Di Kan Kiri Den

Soleki fa a WHO e taki, dan moro leki wan milyard smokoman de na ini grontapu now, èn so wan fo milyun sma di e dede ibri yari, e dede fu tabaka ede. Sabiman e fruwakti taki a nomru disi sa kren èn taki so wan 10 milyun sma sa dede fu dati ede na ini den 20 te go miti 30 yari di e kon. Milyunmilyun tra smokoman, èn so srefi sma di e gebroiki drugs gi „prisiri ten”, sa pori a gosontu nanga a bun libi fu den, fu di den no man libi a tabaka nanga drugs.

Ala di Gado Wortu no e taki spesrutu fu gebroiki tabaka noso drugs, toku den gronprakseri fu en kan kibri wi fu no du den sani disi. Fu eksempre, 2 Korentesma 7:1 e gi leki rai: „Meki wi krin wisrefi fu ibri doti fu a skin èn fu a yeye.” Sondro tweifri tabaka nanga drugs e pori, noso e doti, a skin nanga furu sani di kan kiri wan sma. Boiti dati, Gado wani taki wi skin musu de „santa”, dati wani taki a skin musu de soifri èn krin (Romesma 12:1). Yu no e agri taki efu wan sma fiti den gronprakseri disi, dan a kefar no bigi so moro taki en libi de na ini kefar?

Tapu Nanga Gwenti Di De wan Kefar

Furu sma e nyan èn e dringi tumusi furu. Te wan sma e nyan tumusi furu, dan dati kan gi en sukru-siki, kanker, nanga ati siki. Te wan sma e dringi tumusi furu sopi, dan dati e gi tra problema baka. A sma kan tron wan sopiman, a kan siki na en lefre, a kan tyari pratifasi kon na ini en osofamiri, èn a kan kisi ongoloku te a e rèi na strati. Na a tra sei baka, te wan sma no wani nyan srefisrefi, dan dati kan du tra ogri so srefi; wan sma di no e nyan bun kan kisi a kefalek siki di den e kari anorexia nervosa.

Ala di Bijbel no de wan datra buku, toku a e taki langalanga taki a de fanowdu fu no nyan tumusi èn fu no dringi tumusi. „Yu, o mi manpikin, yere èn kon koni, èn tyari yu ati go na tapu a pasi. No kon na mindri sma di e dringi win pasa marki, na mindri den wan di e nyan meti na wan gridi fasi. Bika wan drunguman nanga wan sma di e nyan tumusi furu, sa kon pôti” (Odo 23:19-21). Toku, Bijbel e taki dati nyanyan nanga dringi musu gi wi prisiri. „Ibriwan sma musu nyan èn dringi trutru èn si a bun fu ala en tranga wroko. A de a presenti fu Gado.”​—Preikiman 3:13.

Bijbel e gi deki-ati tu fu si sani na wan yoisti fasi ini a tori fu sport; a e sori taki „na oefen di wan sma e oefen a skin, bun gi pikinso sani”. Ma Bijbel e taki moro fara tu: „A gi di wan sma e gi ensrefi na ini a dini fu Gado, bun gi ala sani, fu di a abi wan pramisi gi a disiten libi èn a libi di musu kon ete” (1 Timoteus 4:8). Kande yu kan aksi yusrefi: ’Fa a gi di wan sma e gi ensrefi na ini a dini fu Gado, kan abi winimarki nownow kaba?’ A abi winimarki na furu fasi kaba. A e yepi wan sma luku sani na yeye fasi na ini en libi; boiti dati, dan a gi di wan sma e gi ensrefi na ini a dini fu Gado, e meki a sma kisi moi eigifasi soleki lobi, prisiri nanga vrede. A e meki a man dwengi ensrefi tu; ala den sani disi e yepi a sma si sani na wan bun fasi èn a bun gi en gosontu tu.​—Galasiasma 5:22, 23.

Den Ogri Bakapisi fu Hurudu

Na ini a ten disi, milyunmilyun sma no e libi moro akruderi bun gwenti nanga gronprakseri. A panya di AIDS e panya go na ala sei, na wan fu den bakapisi fu dati ede. Soleki fa a WHO e sori, dan moro leki 16 milyun sma dede sensi di AIDS bigin panya ensrefi; èn noyaso, so wan 34 milyun sma abi HIV, a virus di e meki sma kisi AIDS. Furu sma di abi AIDS, kisi a siki disi fu di den e libi wan yayo seks libi, fu di den e gebroiki doti nanai di sma di  no man tapu nanga drugs e gebroiki fu spoiti densrefi, noso fu di den kisi wan brudutransfusie di abi HIV na ini.

Tra bakapisi fu a yayo fasi fa sma e libi na den siki soleki herpes, droipi, hepatitis B nanga C, nanga sifilis. Ala di Bijbel no ben gebroiki den datra wortu disi, toku den pisi fu a skin di e kisi son siki di sma gi trawan nanga yepi fu seks, ben de wan sani di sma ben sabi na ini Bijbel ten. Fu eksempre, Odo 7:23 e taki fu a takru bakapisi fu hurudu leki ’wan peiri di e priti wan sma en lefre opo’. Soleki fa sma sabi now, dan sifilis nanga hepatitis e du ogri na a lefre. Iya, fu tru a Bijbel rai ’fu tan farawe fu brudu èn fu hurudu’ na trutru lobi-ati rai di e kon na a reti ten!​—Tori fu den Apostel 15:28, 29.

A Trapu te wan Sma Lobi Moni

Furu sma di e meki muiti fu kon gudu esi-esi, e teki bigi risikow nanga a moni fu den. Na wan sari, taki te sma e teki den sortu risikow disi, dan furutron den sma dati e lasi moni, noso den e lasi ala sani srefi. Ma Bijbel e taigi a futuboi fu Gado: „Meki a go wroko tranga, fu di a e du bun wroko nanga en anu, so taki a kan abi wan sani fu prati nanga wan sma di de ini nowtu “ (Efeisesma 4:28). A tru taki a no ala ten a sma di e wroko tranga e kon gudu. Ma toku a abi a vrede fu yeye, a abi lespeki gi ensrefi, èn kande a abi moni srefi di a kan gi so taki trawan gebroiki dati gi wan bun sani.

Bijbel e warskow: „Den sma di abi a fasti bosroiti fu kon gudu, e kon ini wan tesi èn wan trapu èn furu don èn takru lostu, di e meki sma fadon go na ini pori. Bika a lobi gi moni na wan rutu fu ala sortu takru sani, èn fu di sonwan e feti na baka a lobi disi, meki . . . den sutu densrefi na den heri  skin nanga furu pen” (1 Timoteus 6:9, 10). A no de fu taki dati furu sma di „abi a fasti bosroiti fu kon gudu”, e kon gudu fu tru. Ma san den musu pai fu kon gudu? A no de so taki a gosontu nanga a yeye fasi fu den e go na baka fu dati ede? A no de so taki na osofamiri fu den e firi dati? Èn a no de so taki den sma disi di „abi a fasti bosroiti fu kon gudu”, no man sribi bun moro srefi?​—Preikiman 5:12.

Wan koni sma e frustan taki „a libi fu en no e kon fu den sani di a abi” (Lukas 12:15). Moni nanga wan tu sani de fanowdu na ini furu libimakandra. Fu taki en leti, Bijbel e taki dati „moni e kibri sma”, ma Bijbel e taki moro fara taki „a wini di sabi e gi na, taki koni srefi e hori den sma di abi en na libi” (Preikiman 7:12). Heri tra fasi leki moni, dan a yoisti sabi nanga koni kan yepi na ini ala afersi, ma spesrutu den afersi di abi fu du nanga wi eigi libi.​—Odo 4:5-9.

Te Koni Wawan Sa Kibri Wi

Heri esi a trutru koni sa ’hori den sma di abi dati na libi’ na wan aparti fasi — a sa kibri den fu pasa a „bigi banawtu” di e kon esi-esi, te Gado sa pori den ogriwan (Mateus 24:21). Na a ten dati sma sa trowe den moni fu den na tapu strati leki wan „tegu sani”, soleki fa Bijbel e taki. Fu san ede den sa du dati? Fu di na wan tranga fasi den sa leri taki gowtu nanga solfru no kan bai libi gi den na ini a pisi ten fu „a dei fu na ati-bron fu Yehovah” (Esekièl 7:19). Na a tra sei, „wan bigi ipi” di na wan koni fasi ’tyari gudu kon makandra gi densrefi na hemel’ sa kisi wini fu a trutru gudu disi di den kibri. Disi sa de so, fu di den ben poti yeye afersi na a fosi presi na ini den libi, èn dati meki den sa kisi têgo libi na tapu wan paradijs na grontapu.​—Openbaring 7:9, 14; 21:3, 4; Mateus 6:19, 20.

Fa wi kan kisi a seikerfasi disi na ini a ten di e kon? Yesus e piki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). Milyunmilyun sma feni a sabi disi na ini Gado Wortu, Bijbel. Boiti taki den wan disi abi wan moi howpu gi a ten di e kon, ma so srefi now kaba den e ondrofeni vrede nanga seikerfasi. A de neleki fa a psalm skrifiman ben taki dati: „Na ini vrede mi wani didon èn sribi tu, bika yu, iya, yu wawan, o Yehovah, e meki mi tan na ini seikerfasi.”​—Psalm 4:8.

Yu kan prakseri fu wan tra fasi di kan yepi yu fu meki a kefar fu yu gosontu nanga yu libi kon moro pikin soleki fa Bijbel e yepi wi? No wan tra buku abi krakti leki Bijbel, èn no wan tra buku kan yepi yu feni tru seikerfasi na ini a grontapu fu tide di lai nanga kefar. Fu san ede yu no e ondrosuku Bijbel moro fara?

[Faki/Prenki na tapu bladzijde 6]

Wan Moro Bun Gosontu èn wan Moro Seiker Libi​—Nanga Yepi fu Bijbel

Wan yongu uma di den e kari Jane * no ben wani si den problema fu a libi na ai. Dati meki a ben bigin gebroiki marwana, tabaka, côca, amfetamine, LSD, nanga tra drugs. A ben e dringi sopi hebihebi tu. Soleki fa Jane e taki, dan a masra fu en ben de na ini a srefi situwâsi tu. A tamara fu den ben luku takru srefisrefi. Ne Jane kon miti nanga Kotoigi fu Yehovah. A bigin fisiti den Kresten konmakandra. A bigin leisi A Waktitoren nanga a tra tijdschrift Ontwaakt!, èn a ben e fruteri en masra fu den sani disi. Den ala tu ben bigin studeri Bijbel nanga den Kotoigi. Di den ben kisi moro warderi gi den hei markitiki fu Yehovah, dan den ben tapu nanga ala den sani di den no ben man libi fosi. San ben de a bakapisi? „Wi ben prisiri so furu nanga a nyun libi di wi feni”, na so Jane ben skrifi wan tu yari na baka. „Mi de Yehovah grantangi srefisrefi gi a krakti di en Wortu abi fu krin sma, èn gi a fri di wi kon fri fu den hebi fu a libi èn gi a moro gosontu libi di wi abi now.”

Wan moi eksempre di e sori o warti a de fu de wan eerlijk wrokoman, na a eksempre fu Kurt di ben abi leki wroko fu sorgu gi den computer sistema. Nyun wrokosani ben de fanowdu, èn a wrokobasi fu Kurt ben gi en a wroko fu bai den wrokosani disi gi wan bun prijs. Kurt ben feni wan bun presi di ben o seni den wrokosani dati go, èn a ben agri tu nanga a moni di ben musu pai gi den sani dati. Ma a seriman fu a presi di ben o seni den wrokosani go, ben skrifi wan fowtu sani na tapu a papira. A moni na tapu a papira ben de so wan 40.000 Amerkan dala moro lagi. Di Kurt ben si a fowtu disi, dan a ben bel a presi di ben seni den wrokosani kon. A basi fu drape ben taki dati na ini den 25 yari di a e wroko leki basi, noiti ete a miti nanga so wan eerlijk sma. Kurt ben fruteri a basi taki Bijbel ben meki a konsensi fu en de so. A bakapisi ben de taki a basi ben aksi 300 eksemplaar fu na Ontwaakt! di ben taki fu eerlijkfasi na ini bisnis tori so taki a ben kan gi den na den tra wrokoman fu en. Fa a ben waka nanga Kurt? We, na eerlijkfasi fu en ben meki taki a ben kisi wan moro bigi frantwortu na en wrokopresi.

[Futuwortu]

[Prenki na tapu bladzijde 7]

„Mi, Yehovah, na yu Gado, a Sma di e leri yu fu gi yusrefi wini.”​—YESAYA 48:17