„Wan Dresi gi Yu Kumba”

SMA e taki dati furu fu den siki fu a libisma famiri abi fu du nanga firi fu sma soleki frede, sari, dyarusu, atibron, bita-ati fasi èn konsensi fonfon. Te wi e luku den sani disi, dan den Bijbel wortu di e taki dati ’a frede gi Yehovah’ na „wan dresi gi yu kumba èn wan kowru-ati gi yu bonyo”, na wortu di e trowstu sma srefisrefi.​—Odo 3:7, 8.

Den bonyo fu wan sma e hori a skin na wan. Fu dati ede, Bijbel e gebroiki a wortu „bonyo” na wan agersi fasi te a e taki fu a fasi fa wan sma de — spesrutu te dipi firi abi krakti tapu a sma. Ma fa a frede gi Yehovah na „wan dresi gi yu kumba”?

Bijbel sabiman no e agri nanga makandra fu a reide fu san ede a wortu „kumba” kari na ini a pisi disi. Wan ondrosukuman e taki dati, a kan taki a kumba e prenki ala den prenspari pisi fu a skin, bika a „kumba” de na „a mindri pisi fu a skin”. Wan tra sabiman e taki dati kande a wortu „kumba” wani taki a kumba titei, soleki fa den e kari dati na ini Esekièl 16:4. Efu disi de tru, dan a kan taki Odo 3:8 e poti krakti na tapu taki wi abi Gado fanowdu srefisrefi, neleki fa wan yongu beibi na ini en mamabere di no man du notinoti, trutru abi en mama fanowdu fu sorgu en. Ma wan tra sani di den e prakseri na taki dyaso, a wortu „kumba” kan sori go na den titei na ini a skin. Na ini a kontekst fu a vers disi, dan a kan taki den pisi disi e sori a difrenti nanga den „bonyo” — den moro tranga pisi fu a skin.

Awinsi san a wortu wani taki soifri, wan sani de seiker: A de wan koni sani fu sori taki wi abi a soifri frede gi Yehovah. Te wi e libi akruderi den markitiki fu Gado, dan dati sa meki taki nownow kaba, wi kan de gosontu. San moro prenspari srefi na taki a kan meki Yehovah feni wi bun. Disi o meki taki wi o kisi têgo libi na tapu a nyun grontapu fu Gado di sa kon, pe a skin fu wi nanga den firi fu wi sa de volmaakti dorodoro.​—Yesaya 33:24; Openbaring 21:4; 22:2.

[Sma di abi a reti fu a prenki na tapu bladzijde 32]

Dr. G. Moscoso/SPL/Photo Researchers