Yu Kan Kakafutu te wan Sani E Meki Yu Lasi-ati!

WAN leisi, wan koniman ben skrifi: „Yu sori taki yu lasi-ati tapu a dei fu banawtu? A krakti fu yu sa de pikinso nomo” (Odo 24:10). Efu oiti yu lasi-ati, dan yu sa agri taki den sani di a koniman ben taki, de so trutru.

No wan sma kan taki dati a no e firi den bakapisi te a e lasi-ati. Wán noso tu dei a kan de so taki wi e lasi-ati pikinso, ma baka dati a firi dati e gowe. Ma a problema no sa gowe so esi te wan sani pasa di hati den firi fu wi, noso te wi mandi srefisrefi. Wan tu Kresten di tan getrow someni yari kaba, lasi-ati sote taki den no e go na gemeente konmakandra moro èn no e teki prati na a preikiwroko tu.

Efu yu lasi-ati, yu no musu brokosaka! Getrow futuboi na ini a ten di pasa ben lasi-ati, ma den ben man du wan sani na dati èn den ben du dati nanga yepi fu Gado. Yu kan du dati tu.

Te Tra Sma Du Sani Di E Hati Yu

Yu no kan fruwakti taki tra sma no sa hati yu nanga sani di den e taki noso e du sondro fu denki. Ma yu kan sorgu taki na onvolmaaktifasi fu trawan no e meki yu tapu nanga yu diniwroko gi Yehovah. Te wan sma du wan sani di e hati yu, dan kande yu sa feni en wan bun sani fu prakseri fa Hana, a mama fu Samuèl, ben handri di a ben de na ini wan situwâsi di ben meki en lasi-ati.

Hana ben angri fu abi pikin, ma a no ben man kisi pikin. Penina, a di fu tu wefi fu en masra, ben kisi manpikin nanga umapikin kaba. Na presi taki Penina ben sari nanga Hana taki a no ben man kisi pikin, dan Penina ben si Hana leki wan gensman èn a ben handri na so wan fasi nanga en taki Hana „ben krei èn no ben man nyan”.​—1 Samuèl 1:2, 4-7.

Wan dei, Hana ben go na a tabernakel fu begi. Eli, a granpriester fu Israèl, ben si taki den mofobuba fu en ben buweigi. A no ben sabi taki Hana ben e begi, fu dati ede a ben prakseri taki a ben drungu. „O langa yu sa du leki wan drunguman?”, na so Eli ben aksi en. „Yu no musu dringi win moro” (1 Samuèl 1:12-14). Yu man prakseri fa Hana ben firi? A ben kon na a tabernakel fu kisi deki-ati. A no ben fruwakti srefisrefi taki wan fu den moro barinen man fu Israèl ben o krutu en fu wan sani di a no ben du!

A situwâsi disi ben sa kan meki Hana lasi-ati srefisrefi. Hana ben kan libi a tabernakel wantewante. A ben kan sweri taki a no ben o kon baka so langa Eli ben dini drape leki granpriester. Ma a de krin taki Hana ben si en matifasi nanga Yehovah, leki wan warti sani. Fu dati ede a ben sabi taki Yehovah no ben o feni dati bun. A tabernakel ben de a moro prenspari presi fu tru anbegi. Yehovah ben poti en nen drape. Eli no ben de volmaakti, ma Yehovah ben teki en leki a sma di ben musu teki presi gi en.

A fasi fa Hana ben gi wan piki tapu a krutu di Eli ben krutu en, e sori taki a de wan heri bun eksempre fu wan sma di ben gi Gado grani. Hana no ben libi a tori so, meki Eli krutu en fu wan sani di a no ben du, ma a ben piki en nanga lespeki. „Nôno, mi masra!”, a ben piki. „Mi na wan uma di de nanga sari na ini mi ati; mi no dringi win noso sopi, ma mi fruteri Yehovah ala san ben de tapu mi ati. Yu no musu teki yu umasrafu leki wan uma di no warti noti, bika teleki now mi ben taki fu di mi e broko mi ede, èn fu di wan sani e trobi mi.”​—1 Samuèl 1:15, 16.

Hana ben meki a granpriester frustan fu san ede a ben handri na so wan fasi? Iya. Ma a ben taki nanga Eli nanga takt. Hana no ben prefuru fu krutu Eli fu di a ben krutu en fu wan sani di a no ben du. Eli fu en sei, ben piki Hana na wan switi fasi. A ben taki: „Go ini vrede. Meki a de so taki a Gado fu Israèl sa gi yu san yu ben aksi en  na ini begi.” Di den kaba lusu a problema, dan Hana „ben gowe èn ben nyan, èn en fesi no ben sori moro taki a ben broko en ede nanga en situwâsi”.​—1 Samuèl 1:17, 18.

San wi e leri fu a tori disi? Hana ben handri wantewante fu meki den kon frustan makandra bun baka, ma a ben du dati na wan lespeki fasi. Dati meki a ben man tan abi wan bun matifasi nanga Yehovah èn nanga Eli. A tru taki furutron, bun komunikâsi nanga wan pikinso takt kan meki taki pikin problema no e tron bigi problema!

Wi musu frustan taki te wi wani lusu kesekese di wi abi nanga trawan, dan wi musu abi sakafasi èn wi èn a tra sma tu musu de klariklari fu kenki a denki fu en te a de fanowdu. Efu wan tra bribiman no e du noti fu lusu a problema ala di yu e meki furu muiti, dan kande yu sa abi fu libi na afersi na ini Yehovah anu. Yu musu abi a frutrow taki Yehovah sa du wan sani na a problema na wan ten èn na wan fasi di a feni bun.

Yu Lasi wan Grani na ini a Diniwroko?

Wan tu sma di ben abi wan grani na ini a diniwroko fu Gado, brokosaka fu di den no abi a grani dati moro di den trutru e si leki wan warti sani. Den ben prisiri fu dini den brada fu den, èn di den ben lasi a grani, dan den ben firi leki den no ben man du noti moro gi Yehovah, noso gi en organisâsi. Efu yu e firi so wan fasi, dan yu kan frustan sani moro bun te yu e luku na eksempre fu a Bijbel skrifiman Markus, di den ben kari Yohanes Markus tu.​—Tori fu den Apostel 12:12.

Markus ben go makandra nanga Paulus èn nanga Barnabas fu du den fosi preikiwaka. Den no ben kaba nanga a preikiwaka ete, dan Markus libi den, a drai go baka na Yerusalem (Tori fu den Apostel 13:13). Baka ten, Barnabas ben wani teki Markus go nanga den fu du wan tra preikiwaka. Ma Bijbel e taki: „Paulus ben feni taki a no ben sa de bun fu teki en nanga den, fu di a ben libi den na Pamfilia, èn a no ben go nanga den fu du a wroko.” Barnabas no ben agri. „Tapu disi”, na so a tori e taki moro fara, „wan bigi atibron ben kon, so taki [Paulus nanga Barnabas] ben gowe fu makandra; èn Barnabas ben teki Markus go nanga en èn den ben waka nanga boto go na Siprus. Paulus ben teki Silas èn a ben gowe”.​—Tori fu den Apostel 15:36-40.

A ben musu tranga gi Markus di a ben kon sabi taki na apostel Paulus, di someni sma ben lespeki, no ben wani wroko nanga en. A ben musu tranga gi en tu taki Paulus nanga Barnabas ben kisi trobi nanga makandra fu di den no ben agri efu a ben lepi nofo fu teki waka nanga den. Ma disi a no ala.

Paulus nanga Silas ben abi wan sma fanowdu ete fu wroko makandra nanga den. Di den doro na Listra, dan den ben feni wan sma di ben o kon na ini a presi fu Markus. Dati ben de wan yonkuman di nen Timoteus. We, kande Timoteus ben dopu tu noso dri yari nomo di den ben teki en. Na a tra sei, Markus ben de na ini a Kresten gemeente sensi a bigin — moro langa leki Paulus srefi, fu taki en leti. Toku Timoteus ben kisi a grani fu wroko makandra nanga den.​—Tori fu den Apostel 16:1-3.

San Markus ben du di a ben kon sabi taki den ben poti wan man na ini en presi di ben yongu moro en èn di no ben abi so furu ondrofeni? Bijbel no e fruteri wi dati. Ma toku, a e sori taki Markus ben tan du a diniwroko fu Yehovah. A ben prisiri fu teki tra okasi di a ben kisi fu du diniwroko. Ala di a no ben man dini makandra nanga Paulus èn nanga Silas, toku a ben man go na Siprus nanga Barnabas, a presi pe Barnabas ben libi. Markus ben dini na Babilon tu nanga Petrus. Te fu kaba, a ben kisi na okasi fu wroko nanga Paulus — èn nanga Timoteus — na Rome (Kolosesma 1:1; 4:10; 1 Petrus 5:13). Baka ten, nanga yepi fu santa yeye, Markus ben skrifi wan fu den fo Evangelie tori srefi!

A heri tori disi e leri wi wan sani di wi kan gebroiki heri bun. Markus no ben broko en ede someni nanga a grani di a lasi, taki a no ben warderi den grani di a ben kan abi ete fu du diniwroko. Markus ben tan wroko fayafaya na ini a diniwroko fu Yehovah, èn Yehovah ben blesi en.

So bun, efu yu lasi wan grani, dan yu no musu lasi-ati. Efu yu e tan prakseri taki bun sani kan miti yu, èn efu yu e tan du a diniwroko, dan  a kan de so taki yu sa kisi tra grani. So furu sani de fu du na ini a wroko fu Masra.​—1 Korentesma 15:58.

Wan Getrow Futuboi E Lasi-ati

A no makriki fu feti wan tranga feti gi a bribi. Son leisi, wan sani kan meki yu lasi-ati. A kan de so srefi taki yu no e feni en bun taki yu e lasi-ati, fu di yu e denki taki wan getrow futuboi fu Gado no musu firi so kwetikweti. Prakseri fu Elia, wan fu den moro bun profeiti fu Israèl.

Koningin Iseibèl ben de fayafaya fu panya Bâ-al anbegi na ala presi. Di a ben kon sabi taki Elia ben kiri den profeiti fu Bâ-al, dan a ben sweri taki a ben o kiri Elia. Elia ben kisi fu du nanga feanti di ben bigi moro Iseibèl, ma wantronso a lasi-ati sote taki a ben wani dede (1 Kownu 19:1-4). Fa dati ben kan pasa? A ben frigiti wan sani.

Elia ben frigiti fu suku yepi na Yehovah, a Sma di ben gi en krakti. Suma ben gi Elia a krakti fu opo dedesma baka, èn fu kakafutu gi den profeiti fu Bâ-al? Na Yehovah. A no de fu taki dati Yehovah ben kan gi en a krakti fu kakafutu gi a Koningin Iseibèl di ben atibron srefisrefi.​—1 Kownu 17:17-24; 18:21-40; 2 Korentesma 4:7.

Iniwan sma kan frigiti fu wan momenti fu frutrow tapu Yehovah. Neleki Elia, a kan de so taki son leisi wi e pruberi fu lusu wan spesrutu problema soleki fa wi e denki, na presi fu gebroiki „a koni fu tapusei” fu feni wan lusu gi a problema (Yakobus 3:17). Ma Yehovah no ben drai en baka gi Elia di a ben lasi en frutrow fu wan syatu momenti.

Elia ben lowe go na Berseba, baka dati a go na a gran sabana. A ben denki taki no wan sma ben o feni en drape. Ma Yehovah ben feni en. A ben seni wan engel go fu trowstu en. Na engel ben sorgu taki a ben abi baka brede fu nyan, nanga watra fu dringi èn dati ben gi en krakti baka. Baka di Elia rostu, dan na engel ben komanderi en fu waka pikinmoro 300 kilometer go na a Horeb-bergi pe Yehovah ben o tranga en moro fara.​—1 Kownu 19:5-8.

Na a Horeb-bergi, Elia ben si a krakti fu Yehovah nanga en eigi ai èn dati ben tranga en bribi. Dan nanga wan safri sten, Yehovah ben gi Elia a dyaranti taki a no ben de en wawan. Yehovah ben de nanga en, èn 7000 brada fu en ben de nanga en tu ala di a no ben sabi dati. Te fu kaba, Yehovah ben gi en wroko fu du. Yehovah no ben puru Elia na en wroko leki profeiti!​—1 Kownu 19:11-18.

Yu Kan Kisi Yepi

Efu son leisi a de so taki yu e lasi-ati, dan kande yu sa firi moro bun te yu e sribi pikinso moro langa, noso te yu e nyan wan gosontu nyanyan. Nathan H. Knorr di ben dini leki wan memre fu a Tiri Skin fu Yehovah Kotoigi teleki en dede na ini 1977, ben si taki bigi problema nofotron no gersi so bigi moro baka te yu ben kisi wan bun neti-sribi. Ma te a problema e kon bigi moro nanga moro, dan kande dati no de nofo — yu musu kisi yepi fu man kakafutu gi a lasi-ati di yu lasi-ati.

Yehovah ben seni wan engel fu tranga Elia. Na ini a ten disi, Gado e gebroiki owruman nanga tra lepi Kresten fu gi wi deki-ati. Den owruman kan „de leki wan kibripresi gi a winti” fu tru (Yesaya 32:1, 2). Ma efu yu wani kisi deki-ati fu den, dan a kan de so taki yu sa abi fu go na den fosi. Elia ben lasi-ati srefisrefi, ma toku a go na a Horeb-bergi fu kisi rai fu Yehovah. Wi e kisi rai nanga leri di e gi wi deki-ati na ini a Kresten gemeente.

Te wi e meki gebroiki fu a yepi di wi e kisi èn e kakafutu nanga deki-ati gi tesi, soleki te sma hati wi nanga san den e taki noso e du, noso te wi lasi wan grani, dan wi e teki Yehovah sei na ini wan prenspari strei. Sortu strei? Satan ben taki nomo dati libisma e dini Yehovah soso fu kisi wini gi densrefi. Satan no e taki dati wi no sa dini Gado efu ala sani e waka bun na ini wi libi. Ma a e taki nomo dati wi o tapu fu dini Gado te wi e kisi fu du nanga problema. (Yob kapitel 1 nanga 2.) Te wi e tan na ini a diniwroko fu Yehovah sondro fu degedege, awansi sani de di e meki wi lasi-ati, dan wi kan yepi fu gi wan piki tapu na afrontu di Didibri afrontu Gado nanga ogri-ati lei fu pori en nen.​—Odo 27:11.

Hana, Markus, nanga Elia ben abi problema  di ben meki den de nanga sari na ati wan syatu pisi ten. Ma den ben kakafutu gi den problema fu den, èn den ben man du bun sani ete na ini den libi. Nanga a yepi fu Yehovah, yu tu kan kakafutu te wan sani e meki yu lasi-ati!