Yu Meki a Waarheid Tron wan Pisi fu Yu Libi Kaba?

„Kenki un fasi fu denki, so taki unu kan drai un libi fu kan kon sabi gi unsrefi san na a bun, yoisti èn volmaakti wani fu Gado.”​—ROMESMA 12:2.

1, 2. Fu san ede a no makriki fu de wan tru Kresten na ini a ten disi?

A NO makriki fu de wan tru Kresten na ini den lasti dei disi — den „muilek ten” disi di „tranga fu pasa” (2 Timoteus 3:1). Iya, te wan sma wani waka baka na eksempre fu Krestes, dan a musu wini grontapu (1 Yohanes 5:4). Prakseri baka san Yesus ben taki fu a pasi di Kresten musu waka: „Pasa go na ini a smara doro; bika bradi èn bigi a pasi de di e tyari sma go na pori, èn furu sma de di e pasa go na ini; ma smara a doro de èn smara a pasi de di e tyari sma go na libi, èn pikinso sma de di e feni en.” A ben taki tu: „Efu iniwan sma wani waka na mi baka, dan meki a drai en baka gi ensrefi èn meki a teki en pina-udu ibri dei baka èn waka na mi baka doronomo.”​—Mateus 7:13, 14; Lukas 9:23.

² Te wan Kresten e feni a smara pasi di e tyari sma go na libi, dan wan tra tyalensi na fu tan na tapu a pasi dati. Fu san ede dati na wan tyalensi? Fu di sensi wi gi wisrefi abra na Gado èn teki dopu, Satan e suku fu kisi wi nanga den triki fu en (Efeisesma 6:11). A e poti prakseri na den swakifasi fu wi èn a e suku fasi fu mesbroiki den so taki a kan meki wi kon swaki na yeye fasi. A ben pruberi kaba fu broko Yesus en soifri retifasi. So bun, wi no kan fruwakti taki a no sa pruberi fu du dati nanga wi tu.​—Mateus 4:1-11.

Den Triki fu Satan

3. Fa Satan ben meki Efa tweifri?

³ Wan triki di Satan e gebroiki na fu meki sma tweifri. A e luku fu si efu wan sani e mankeri na den fetisani fu wi na yeye fasi. Na a bigin, a ben gebroiki a triki dati na Efa. A ben aksi en: „A de trutru so, taki Gado ben taki dati unu no musu nyan fu ibri bon fu a dyari?” (Genesis 3:1). Nanga tra wortu, Satan ben taki, ’Gado ben tapu unu trutru fu du so wan sani? A ben kibri so wan bun sani fu unu? Iya, Gado sabi taki na a srefi dei te unu e nyan fu a bon, un ai sa kon opo seiker èn seiker unu sa de leki Gado, unu sa sabi bun nanga ogri!’ Na so fasi, Satan ben meki Efa tweifri neleki a ben prani wan siri, èn a ben wakti fu meki a gro.​—Genesis 3:5.

4. Sortu sani ben sa kan meki son sma tweifri?

⁴ Fa Satan e gebroiki a triki disi now? Efu wi no e leisi Bijbel, no e studeri nanga wisrefi, no e begi, no e du wi Kresten diniwroko noso no e go na den konmakandra, dan sani di tra sma e taki kan meki wi tweifri makriki. Fu eksempre: „Fa wi sabi taki disi na a srefi waarheid di Yesus ben leri sma?” „Wi e libi na ini den lasti dei trutru? Te yu e luku en bun, wi de na ini a di fu 21 yarihondro kaba.” „Wi de na a mofodoro fu Armagedon, noso a fara ete?” Efu wi e bigin tweifri na den sani disi, dan san wi kan du fu puru den tweifri?

5, 6. San wi musu du te wi e bigin tweifri na sani?

⁵ Yakobus ben gi bun rai di a ben skrifi: „Efu wan fu unu no abi nofo koni, meki a tan aksi Gado, bika a e gi ala sma pasa marki èn sondro fu sori en tapu en fowtu; èn a sa kisi en. Ma meki a tan aksi nanga bribi, èn a no musu tweifri kwetikweti, bika a sma di e tweifri, de neleki wan skwala fu se di winti e wai go-kon. Fu taki en leti, no meki a sma dati prakseri taki a sa kisi wan sani fu Yehovah; a de wan sma di no man teki bosroiti, di no e tanapu kánkan na ini ala en pasi.”​—Yakobus 1:5-8.

⁶ San wi musu du dan? Wi musu „tan aksi Gado” na ini begi fu meki wi abi bribi èn fu meki wi frustan sani. Wisrefi musu du furu muiti fu studeri nanga wisrefi te wi wani kon sabi  sani, noso te wi e tweifri na sani. Wi kan aksi den sma tu di abi wan tranga bribi, fu yepi wi èn noiti wi no musu tweifri taki Yehovah sa gi wi a yepi di wi abi fanowdu. Yakobus ben taki tu: „Fu dati ede, saka unsrefi na Gado ondro; ma kakafutu gi Didibri èn a sa lon gowe libi unu. Kon krosibei na Gado, èn en sa kon krosibei na unu.” Iya, wi no sa tweifri na sani moro te wi e kisi wan tranga banti nanga Gado, nanga yepi fu studie nanga begi.​—Yakobus 4:7, 8.

7, 8. San na wan tu prenspari sani di e yepi wi fu si efu wi e anbegi Gado na a fasi fa Yesus ben leri sma, èn suma e du den sani disi?

⁷ Luku na aksi disi fu eksempre: Fa wi sabi taki wi e anbegi Gado na a fasi fa Yesus ben leri sma? Te wi wani piki na aksi disi, dan sortu sani wi musu hori na prakseri? Bijbel e sori taki tru Kresten musu lobi makandra trutru (Yohanes 13:34, 35). Den musu santa Gado nen, Yehovah (Yesaya 12:4, 5; Mateus 6:9). Èn den musu meki a nen dati bekènti.​—Exodus 3:15; Yohanes 17:26.

⁸ Wan tra sani di e yepi wi kon sabi suma na den tru anbegiman, na taki den musu de sma di e lespeki Gado Wortu, Bijbel. Disi na a wan-enkri buku di e tyari a fasi fa Gado de, kon na krin èn so srefi den prakseri fu en (Yohanes 17:17; 2 Timoteus 3:16, 17). Boiti dati, tru Kresten e meki bekènti taki a Kownukondre fu Gado na a wan-enkri sani di kan meki sma libi fu têgo na tapu wan paradijs grontapu (Markus 13:10; Openbaring 21:1-4). Den no de wan pisi fu a kruka politiek sistema fu a grontapu disi. Den no e tyari densrefi leki den sma fu a grontapu disi di abi wan doti fasi fu libi (Yohanes 15:19; Yakobus 1:27; 4:4). Suma na ini a ten disi e du den sani disi trutru? A de krin fu si taki wan grupu sma nomo e du dati — Yehovah Kotoigi.

San Wi Musu Du te Wi E Tan Tweifri na Sani?

9, 10. San wi kan du fu no tan tweifri na sani?

⁹ Ma fa a de te wi e tweifri na sani tumusi? San wi musu du dan? A koni Kownu Salomo e gi wi a piki: „Mi manpikin, efu yu e teki mi wortu èn e kibri den gebod fu mi leki wan gudu na yu, fu yu poti prakseri nanga yu yesi na koni, so taki yu kan beni yu ati go na a koni fu man si sani krin; efu, boiti dati, yu e bari kari a frustan srefi èn e opo yu sten srefi go na a koni fu si sani krin, efu yu e tan suku en leki solfru, èn yu e tan suku en leki gudu di kibri, dan ini a tori disi yu sa frustan a frede fu Yehovah, èn yu sa feni a sabi fu Gado srefi.”​—Odo 2:1-5.

¹⁰ A no e naki wi ati srefisrefi te wi e leisi disi? Efu wi de klariklari fu poti prakseri trutru na a koni fu Gado, dan wi sa „feni a sabi fu Gado srefi”. Iya, wi kan kisi a sabi fu a Soeverein Masra fu na universum makriki efu wi de klariklari fu arki san a e taki èn te wi e si den sani dati leki  warti sani. Dati wani taki dati wi musu suku yepi na Yehovah na ini begi èn musu studeri nanga wisrefi. Den warti sani di kibri na ini en Wortu kan puru ala sortu tweifri di wi abi èn dati kan yepi wi fu si a leti fu waarheid.

11. Fa a tweifri di a dinari fu Elisa ben tweifri, ben abi krakti na en tapu?

¹¹ Na 2 Kownu 6:11-18, wan eksempre de di e sori krin fa begi ben yepi wan futuboi fu Gado di ben frede èn ben tweifri. A dinari fu Elisa no ben abi a koni fu man si sani krin na yeye fasi. A legre fu Siria ben lontu Elisa, ma a dinari fu Elisa no ben man si taki den hemel legre ben de drape fu horibaka gi a profeiti fu Gado. A dinari ben frede, a bari taki: „Ke, mi masra! San wi sa du?” Fa Elisa piki en? „No frede, bika moro de di de nanga wi leki den wan di de nanga den.” Ma fa a ben kan meki a dinari bribi taki a ben de so trutru? A dinari no ben man si den hemel legre.

12. (a) San meki taki a dinari no ben tweifri moro? (b) San wi kan du te wi e tweifri na wan sani kande?

¹² „Elisa bigin begi èn taki: ’O Yehovah, grantangi opo den ai fu en, so taki a kan si.’ Wantewante Yehovah ben opo den ai fu a dinari, so taki a ben si; èn luku! a bergi kontren ben furu nanga asi èn nanga fetiwagi fu faya di ben de lontu Elisa.” Na ini a kefal dati, Yehovah ben meki a dinari si den legre fu hemel di ben sorgu taki no wan ogri no miti Elisa. Ma wi no musu fruwakti taki Gado sa yepi wi na wan srefi sortu fasi na ini a ten disi. Hori na prakseri, taki a dinari dati fu a profeiti no ben abi a heri Bijbel di a ben man studeri fu tranga en bribi. Ma wi abi a Bijbel. Efu wi e gebroiki en bun dorodoro, dan wi bribi kan kon tranga tu. Fu eksempre, wi ben kan prakseri dipi fu den tori di e taki fu Yehovah na ini en hemel krutubangi. Den tori disi e meki taki wi no abi fu tweifri srefisrefi taki Yehovah abi wan hemel organisâsi trutru, di e horibaka gi den futuboi fu en na ini a leriwroko di den e du na heri grontapu now.​—Yesaya 6:1-4; Esekièl 1:4-28; Danièl 7:9, 10; Openbaring 4:1-11; 14:6, 7.

De na Ai gi den Triki fu Satan!

13. Sortu sani Satan e gebroiki fu pruberi fu meki wi no hori wisrefi tranga na a waarheid?

¹³ San na wan tu tra fasi di Satan e gebroiki fu meki wi kon swaki na yeye fasi èn fu meki wi no hori wisrefi tranga na waarheid moro? Wan fu den fasi na hurudu, èn sma e du dati na ala sortu fasi. Na ini a grontapu fu tide sma abi seks na  prakseri nomo. A sani di den sma disi e kari wan lobi (wan tra wortu di den e gebroiki fu no meki wakalibi gersi so seryusu), tron wan aladei sani gi den. Na so den e si a seks tu di den abi nanga trawan fu wán neti nomo. Den de wan geslakti fu sma di e suku fu satisferi den eigi lostu nomo. Den e du ala san den man fu abi prisiri, awinsi san na den bakapisi. Kino, telefisi, nanga video e gi sma deki-ati fu tyari densrefi na so wan fasi. Porno de fu si now na ala fasi tu, spesrutu tapu na Internet. Den sani disi de wan tesi gi den wan di wani luku den sani disi nomonomo.​—1 Tesalonikasma 4:3-5; Yakobus 1:13-15.

14. Fu san ede den triki fu Satan kisi wan tu Kresten?

¹⁴ Wan tu Kresten ben wani sabi den sani disi nomonomo, dati meki den go du den tu. Den pori a denki nanga na ati fu den fu di den ben luku seks-prenki noso srefi seks-felem di e sori ala sani finifini. Den gi pasi meki Satan kori den èn dati meki den fadon na ini a trapu fu en. Fu di den du dati, meki furutron den kon lasi a bribi fu den. Den sma disi misi fu tan „nyofi pikin ini a tori fu takrudu”. Den no tron ’bigisma ini a man di den man frustan sani’ (1 Korentesma 14:20). Ibri yari, dusundusun sma e ondrofeni den takru bakapisi fu di den no e hori densrefi na den gronprakseri nanga den markitiki fu Gado Wortu. Den no poti prakseri na a weri di den musu weri èn tan abi „ala den pisi fu a fetisani fu Gado” nanga den.​—Efeisesma 6:10-13; Kolosesma 3:5-10; 1 Timoteus 1:18, 19.

Wi Musu Warderi San Wi Abi

15. Fu san ede son sma ben sa kan feni en muilek fu warderi a yeye gudu fu den?

¹⁵ „Unu sa sabi a waarheid, èn a waarheid sa meki unu kon fri”, na so Yesus ben taki (Yohanes 8:32). Moro furu Kotoigi ben musu tapu nanga a fasi fu libi nanga a bribi di den ben abi fosi. Fu dati ede a kan de so taki den e warderi a fri di a waarheid e gi den, moro makriki. Na a tra sei, wan tu yongu sma di kisi leri fu den papa nanga mama di de na waarheid, e feni en muilek kande fu warderi a yeye gudu di den kisi. Den noiti no ben de na ini wan falsi kerki. Den noiti no ben de wan pisi fu a grontapu disi tu di e poti prakseri moro furu na a meki fu prisiri, na a gebroiki fu drugs pasa marki, nanga hurudu. Dati meki den no man si taki a paradijs fu wi na yeye fasi de krinkrin heri tra fasi leki a pori grontapu fu Satan. Sonwan fu den kan brokokindi srefi gi a tesi fu go du den takru sani fu grontapu, fu si san na den sani di den misi.​—1 Yohanes 2:15-17; Openbaring 18:1-5.

16. (a) Sortu sani wi ben kan aksi wisrefi? (b) Wi e leri èn e kisi deki-ati fu du san?

¹⁶ A de fanowdu srefisrefi fu bron wi finga fosi fu sabi san na pen nanga pina? Wi no kan leri fu den takru sani di tra sma ondrofeni? Wi abi fu go baka na „a tokotoko” fu a grontapu disi fu si efu wi misi wan bun sani? (2 Petrus 2:20-22). Petrus ben memre Kresten fu a fosi yarihondro di ben de wan pisi fu a grontapu fu Satan fosi, na a sani disi: „A nofo taki na ini a ten di pasa unu du a wani fu den nâsi fu di unu ben gi unsrefi abra na du fu lusu fasi fu libi, gridi lostu, a dringi fu win pasa marki, dringi èn nyan pasa marki, fesa fu dringi sopi nanga na anbegi fu kruktu gado na wan fasi di wet no e gi pasi fu dati.” Fu  tru, wi no abi fu fadon na ini a „lagi peti fu yayolibi” fu si o takru a libi kan de (1 Petrus 4:3, 4). Kontrari fu dati, wi e leri den hei markitiki fu Yehovah na den Kownukondre zaal fu wi, di de presi pe wi e kisi leri fu Bijbel. So srefi wi e kisi deki-ati fu gebroiki wi frustan fu man si gi wisrefi efu wi abi a waarheid. Na so fasi wi e meki a waarheid tron wan pisi fu wi libi.​—Yosua 1:8; Romesma 12:1, 2; 2 Timoteus 3:14-17.

Wi No Musu Tyari a Nen Nomo

17. Fa wi kan de bun Kotoigi fu Yehovah?

¹⁷ Efu wi e meki a waarheid tron wan pisi fu wi libi, dan wi sa suku fu prati en nanga tra sma na ibri okasi pe wi kan du dati. Disi no wani taki dati wi o pruberi fu dwengi den sma di no wani arki, fu teki a boskopu (Mateus 7:6). Na presi fu dati, wi musu abi a deki-ati, fu taigi sma dati wi na Yehovah Kotoigi. Efu wan sma e sori pikinso taki a wani sabi moro fu di a e aksi wan sani, noso fu di a e teki wan Bijbel publikâsi, dan wi sa de klariklari fu prati wi howpu nanga en. Ma dati wani taki dati wi musu abi wan tu buku noso tra sani nanga wi ala ten, awansi na sortu presi wi de — efu wi de na oso, na wrokope, na skoro, na wenkri, noso na presi pe sma e go fu koiri.​—1 Petrus 3:15.

18. Fa wi e kisi wini te wi e meki sma kon sabi sondro draidrai taki wi na Kresten?

¹⁸ Te wi e meki sma kon sabi sondro draidrai taki wi na Kresten, dan wi e tranga wisrefi fu man kakafutu gi den triki fu Satan fu du wi ogri. Te wan sma e friyari, noso te sma e hori wan Kresneti fesa, noso te den abi wan lotrèi na wrokope, dan nofotron den sma di e wroko nanga yu sa taki, „Yu no abi fu aksi na uma dati. En na wan Kotoigi fu Yehovah.” Fu a srefi sani disi ede, sma no sa wani taki dotitaki te den e tanapu na yu birti. So bun, te wi e meki sma kon sabi taki wi na Kresten, dan dati sa meki wi kisi wini na ini wi libi. A de so, neleki na apostel Petrus ben sori: „Fu tru, suma na a libisma di sa du unu ogri, efu unu kon de sma di fayafaya fu du san bun? Ma srefi efu unu musu pina fu regtfardikifasi ede, toku unu de koloku.”​—1 Petrus 3:13, 14.

19. Fa wi sabi taki wi de bun fara na ini den lasti dei?

¹⁹ Wan tra wini di wi e kisi te wi e meki a waarheid tron wan pisi fu wi libi, na taki wi sa bribi trutru taki wi e libi na ini den lasti dei fu a seti fu sani disi. Wi sa si taki furu fu den Bijbel profeititori e kon tru na ini a ten fu wi. * Paulus ben gi a warskow taki „na ini den lasti dei muilek ten sa kon, di tranga fu pasa”. Den takru sani di ben feni presi na ini a yarihondro di pasa, e sori krinkrin taki den wortu disi tru (2 Timoteus 3:1-5; Markus 13:3-37). Wan artikel di ben kon na ini wan koranti no so langa pasa, ben taki fu a di fu 20 yarihondro. A nen fu na artikel ben de „It Will Be Remembered as the Age of Barbarism” (Sma Sa Memre a Ten Dati Leki a Moro Ogri-ati Pisi Ten). Na artikel ben taki: „A yari 1999 sori fu de a moro ogri-ati yari na ini a lasti pisi fu a moro ogri-ati yarihondro.”

20. Now na a ten fu du san?

²⁰ Now a no a ten fu draidrai. A de krin fu si taki Yehovah e blesi a moro bigi Bijbel leriwroko di oiti ben du na heri grontapu leki wan kotoigi gi den nâsi (Mateus 24:14). Meki a waarheid tron wan pisi fu yu libi, èn prati en nanga trawan. Den sani di yu e du now sa sori efu yu sa kisi libi fu têgo na ini a ten di e kon. Te wi e go du wi wroko safrisafri, dan wi no kan fruwakti taki Yehovah sa blesi wi (Lukas 9:62). Now na a ten fu ’kon de kánkan, fu no beifi, fu abi ala ten furu fu du na ini a wroko fu Masra, fu di unu sabi taki a wroko fu unu no de fu soso ini a tori fu Masra’.​—1 Korentesma 15:58.

[Futuwortu]

Yu E Memre Disi Ete?

• Fa wi kan puru tweifri?

• San wi kan leri fu na eksempre fu Elisa en dinari?

• Gi sortu tesi wi musu de na ai doronomo?

• Fu san ede wi musu meki sma kon sabi sondro draidrai taki wi na Yehovah Kotoigi?

[Aksi fu a tori disi]

[Prenki na tapu bladzijde 10]

Te wi e studeri Bijbel doronomo èn e begi, dan dati kan yepi wi fu puru tweifri

[Prenki na tapu bladzijde 11]

A dinari fu Elisa no ben tweifri moro di a si wan fisyun

[Prenki na tapu bladzijde 12]

Wi e kisi leri fu Yehovah en hei markitiki na den Kownukondre zaal leki a wan disi na Benin