A Pipel Di Yehovah Tyari Kon Baka na ini En Tru Anbegi, E Prèise En na Heri Gro
A Pipel Di Yehovah Tyari Kon Baka na ini En Tru Anbegi, E Prèise En na Heri Grontapu
„Mi sa meki den pipel taki wan soifri tongo, so taki den alamala kan kari a nen fu Yehovah.”—SEFANIA 3:9.
1. Fu san ede takru krutu boskopu ben kon tru gi Yuda èn gi tra nâsi?
FU TRU, Yehovah ben meki Sefania tyari krakti krutu boskopu! Den takru krutu boskopu dati ben kon tru gi a nâsi Yuda èn gi en mamafoto, Yerusalem, fu di den fesiman nanga a pipel leki wán grupu no ben du a wani fu Yehovah. Den nâsi di ben de na ini a birti fu den, soleki Filistia, Moab nanga Amon, ben o tesi Gado en atibron tu. Fu san ede? Bika hondrohondro yari langa den ben gens Yehovah en pipel na wan ogri-ati fasi. Fu a srefi sani ede, a grontapumakti Asiria ben o kisi pori, èn noiti a ben o seti baka.
2. Gi suma den wortu na Sefania 3:8 ben skrifi soleki fa a sori?
2 Ma toku, wan tu sma ben de na Yuda fu owruten di ben abi a yoisti yeye. Den ben wakti fayafaya tapu a krutu di Gado ben o tyari kon na tapu den godelowsuwan. Èn soleki fa a sori, dan den wortu disi ben skrifi gi den sma disi: „ ’Tan fruwakti mi,’ na so Yehovah taki, ’te leki a dei doro taki mi e opo tanapu fu wini sani, bika a krutu bosroiti fu mi, na fu tyari den nâsi kon na makandra, fu tyari den kownukondre kon na makandra, so taki mi kan kanti a krutu fu mi kon na den tapu, ala mi faya atibron; bika a faya di mi abi fu du sani fayafaya, sa nyan heri grontapu.’”—Sefania 3:8.
Suma E Kisi „wan Soifri Tongo”?
3. Sortu boskopu fu howpu Gado ben meki Sefania tyari?
3 Iya, Sefania ben tyari takru krutu boskopu fu Yehovah. Ma Gado ben meki en tyari wan kefalek moi boskopu fu howpu tu — wan boskopu di ben o trowstu den wan di ben tan getrow na Yehovah. Soleki fa a skrifi na Sefania 3:9, Yehovah Gado ben fruklari: „Dan mi sa meki den pipel taki wan soifri tongo, so taki den alamala kan kari a nen fu Yehovah, so taki den kan dini en skowru na skowru.”
4, 5. (a) San ben o pasa nanga den onregtfardikisma? (b) Suma ben o kisi wini, èn fu san ede?
4 Ma wan tu sma ben sa de di no ben o kisi a soifri tongo. A profeititori e taki fu den sma disi te a e taki: „Mi sa puru den sma na yu mindri di e prisiri srefisrefi na wan heimemre fasi” (Sefania 3:11). So bun, Gado ben o puru den heimemrewan di ben wisiwasi den wet fu En èn di ben du onregtfardiki sani. Suma ben o kisi wini te Gado ben o puru den sma disi? Sefania 3:12, 13 e fruklari: „Fu tru mi [Yehovah] sa meki wan pipel di abi sakafasi èn di mofina, tan abra na yu mindri, èn den trutru sa kon suku kibri na a nen fu Yehovah. Ini a tori fu den wan di tan abra fu Israèl, den no sa du onregtfardikifasi, èn den no sa taki wan lei, èn sma no sa feni wan bedrigi tongo na ini a mofo fu den; bika densrefi sa nyan èn trutru sa langa densrefi didon, èn no wan sma sa de di sa meki den beifi.”
5 Wan getrow fikapisi na Yuda fu owruten ben o kisi wini. Fu san ede? Fu di den ben handri akruderi den wortu disi: „Suku Yehovah, ala un safri-atisma fu grontapu, di du den krutu bosroiti fu En. Suku regtfardikifasi, suku safri-atifasi. Kande unu sa kisi kibri tapu a dei fu Yehovah en atibron.”—Sefania 2:3.
6. San ben pasa na ini a fosi kontru fu a profeititori fu Sefania?
6 Na ini a fosi kontru fu a profeititori fu Sefania, Gado ben strafu Yuda di no ben de getrow. A ben meki a Grontapumakti Babilon teki Yuda abra èn teki en pipel go na ini katibo na ini 607 b.G.T. Son sma, soleki Yeremia, ben kisi kibri èn trawan ben tan getrow na Yehovah di den ben de na ini katibo. Na ini 539 b.G.T., den Mediasma nanga den Persiasma na ondro a tirimakti fu Kownu Sirus, ben meki Babilon fadon. So wan tu yari baka dati, Sirus ben poti wan wet di ben gi wan fikapisi fu den Dyu pasi fu drai go baka na a kondre fu den. Baka ten, a tempel fu Yerusalem ben bow baka, èn den priester ben kisi a frantwortu baka fu leri a pipel a Wet (Maleaki 2:7). Na so Yehovah ben meki sani waka bun nanga a fikapisi di ben drai kon baka — so langa den ben tan getrow.
7, 8. Fu suma den profeiti wortu fu Sefania 3:14-17 ben taki, èn fu san ede yu e piki so?
7 Sefania ben taki na fesi fu den wan di ben o nyan bun fu den sani dati di ben seti baka, di a ben taki: „Bari fu prisiri ede, o umapikin fu Sion! Bari prisiri babari, o Israèl! Prisiri èn breiti pasa marki nanga yu heri ati, o umapikin fu Yerusalem! Yehovah puru den krutu di ben de na yu tapu. A puru a feanti fu yu. A kownu fu Israèl, Yehovah, de na yu mindri. Yu no sa frede rampu moro. A dei dati den sa taigi Yerusalem: ’No frede, o Sion. No meki den anu fu yu kon swaki. Yehovah, yu Gado, de na yu mindri. Leki wan Maktiwan, a sa gi frulusu. Nanga prisiri a sa breiti pasa marki fu yu ede. A sa tan pî na ini a lobi fu en. A sa prisiri fu yu ede nanga babari fu koloku ede.’”—Sefania 3:14-17.
8 Den profeiti wortu dati ben sori go na a fikapisi di ben komoto fu katibo na Babilon, èn di ben tyari kon baka na a kondre fu den afo fu den. Disi e tyari kon na krin na Sefania 3:18-20, pe wi e leisi: „’Mi sa tyari den wan kon makandra di sari, fu di den no ben de na a pisi ten di yu ben hori a fesa fu yu; den no ben de nanga yu, fu di den ben kisi porinen fu en ede. Luku, mi sa strafu ala den wan di e kwinsi unu, na a ten dati; èn mi wani frulusu a wan di malengri, èn mi sa tyari a wan di ben seni gowe, kon na wan. Èn mi wani poti den leki wan sani fu prèise èn leki wan nen na ini a heri kondre fu den pe den kisi syen. Na a ten dati mi sa tyari unu kon dya, iya, na ini a ten di mi e tyari unu kon na wan. Bika mi sa meki unu kon tron wan nen èn wan sani fu prèise na mindri ala den pipel fu grontapu, te mi sa meki den wan fu unu di de na ini katibo, drai kon baka na fesi un ai’, na so Yehovah taki.”
9. Fa Yehovah ben meki en nen bigi ini a tori fu Yuda?
9 Prakseri fa sma fu den nâsi lontu den, di ben de feanti fu Gado en pipel, ben musu fu skreki! A tranga Babilon ben tyari den sma fu Yuda go na ini katibo. A ben gersi leki den no ben sa kon fri noiti moro. Boiti dati, a kondre fu den ben de wan broko pranasi. Ma nanga yepi fu a krakti fu Gado, meki taki baka 70 yari den ben man drai go baka na a kondre fu den, ala di den nâsi di ben de feanti fu den ben o kisi pori. Yehovah trutru ben meki en nen bigi fu di a ben tyari a getrow fikapisi dati kon baka! A ben meki den „tron wan nen èn wan sani fu prèise na mindri ala den pipel fu grontapu”. A tyari di Yehovah ben tyari en pipel kon baka, trutru ben de wan sani di ben meki Yehovah èn den sma di ben tyari en nen, kisi grani!
Na Anbegi fu Yehovah Kon Moro Hei
10, 11. O ten a bigi kontru fu a profeititori fu Sefania ben o kon, di e taki fu a seti di a tru anbegi seti baka? Fa wi sabi disi?
10 Wan tra leisi di sani ben seti baka ben de na ini a fosi yarihondro fu wi Gewoon Teri, di Yesus Krestes ben tyari wan fikapisi fu Israèl kon na wan na ini a tru anbegi. Dati ben sori na fesi san ben musu kon ete, bika a bigi kontru fu a seti di a tru anbegi seti baka, ben de na ini a tamara ete. A profeititori fu Mika ben taki na fesi: „A musu pasa na ini a lasti pisi fu den dei, taki a bergi fu na oso fu Yehovah sa poti steifi na tapu na ede fu den bergi, èn trutru a sa opo hei na tapu den pikin bergi; èn na drape sma musu go na ipi-ipi.”—Mika 4:1.
11 O ten disi ben o pasa? Soleki fa a profeititori ben taki, dan disi ben o pasa „na ini a lasti pisi fu den dei” — iya, na ini „den lasti dei” disi (2 Timoteus 3:1). Disi ben sa feni presi bifo a kaba fu a godelowsu seti fu sani disi èn te den nâsi ben sa anbegi kruktu gado ete. Mika 4:5 e taki: „Ala pipel, fu den sei, sa waka ibriwan fu den na ini a nen fu en gado.” Èn fa a de nanga den tru anbegiman? A profeititori fu Mika e piki: „Ma wi, fu wi sei, sa waka na ini a nen fu Yehovah, wi Gado, te ten di no skotu, iya fu têgo.”
12. Fa a tru anbegi kon moro hei na ini den lasti dei disi?
12 Fu dati ede, na ini den lasti dei disi, ’a bergi fu na oso fu Yehovah poti steifi na tapu na ede fu den bergi’. A tru anbegi fu Yehovah di hei, meki kon bun baka, a seti steifi, èn a kon hei moro leki ala den tra fasi fu bribi nanga anbegi di de. Soleki fa a profeititori fu Mika ben taki na fesi tu, dan „na drape sma musu go”. Èn den wan di e hori densrefi na a tru anbegi, sa ’waka na ini a nen fu Yehovah, a Gado fu den, te ten di no skotu, iya fu têgo’.
13, 14. O ten a grontapu disi doro „a lasti pisi fu den dei”, èn san e pasa sensi a ten dati nanga a tru anbegi?
13 Den sani di e pasa leki wan kontru fu Bijbel profeititori e sori taki a grontapu disi doro „a lasti pisi fu den dei” — den lasti dei fu en — na ini a yari 1914 (Markus 13:4-10). Historia e sori taki Yehovah ben bigin tyari kon na wan na ini a tru anbegi, wan getrow fikapisi fu salfuwan di abi a howpu fu libi na hemel. Baka dati, „wan bigi ipi” tyari kon na wan „di komoto na ala nâsi nanga lo nanga pipel nanga tongo” — den sma di abi a howpu fu libi fu têgo na grontapu.—Openbaring 7:9.
14 Sensi a ten fu a Fosi Grontapufeti te leki a dei fu tide, den wan di e anbegi Yehovah èn di e tyari a nen fu en, go na fesi heri bun na ondro a tiri fu en. Baka a Fosi Grontapufeti, wan tu dusun anbegiman fu Yehovah ben de. Nownow so wan siksi milyun sma de èn den tyari kon makandra na ini so wan 91.000 gemeente na ini 235 kondre. Ibri yari, den Kownukondre preikiman disi e teki moro leki wan milyard yuru fu prèise Gado na publiki. A de krin taki den Kotoigi disi fu Yehovah na den sma di e meki den profeiti wortu fu Yesus kon tru: „A bun nyunsu disi fu a kownukondre sa preiki na heri grontapu pe sma e libi, leki wan kotoigi gi ala nâsi, èn dan a kaba sa kon.”—Mateus 24:14.
15. Fa Sefania 2:3 e kon tru nownow?
15 Sefania 3:17 e taki: „Yehovah, yu Gado, de na yu mindri. Leki wan Maktiwan, a sa gi frulusu.” Sani e go bun na yeye fasi nanga den futuboi fu Yehovah na ini den lasti dei disi, fu di den abi Yehovah ’na den mindri’ leki na almakti Gado fu den. Soleki fa a ben de na Yuda fu owruten di sani meki kon bun baka na ini 537 b.G.T., na so a de na ini a ten disi. So bun, wi kan si now fa Sefania 2:3 abi wan moro bigi kontru na ini a ten disi te a e taki: „Suku Yehovah, ala un safri-atisma fu grontapu.” Na ini 537 b.G.T., a wortu „ala” ben abi fu du nanga a fikapisi fu den Dyu di ben drai kon baka fu katibo na ini Babilon. Now a wortu „ala” e prenki den safri-atisma fu ala den nâsi na heri grontapu, den wan di e piki bun tapu a preikiwroko di e du na heri grontapu, èn di e go na „a bergi fu na oso fu Yehovah”.
Tru Anbegi E Panya na Ala Sei
16. Fa den feanti fu wi e firi kande, fu di den e si taki sani e waka bun nanga den futuboi fu Yehovah na ini a ten disi?
16 Baka 537 b.G.T., furu sma fu den nâsi lontu den ben fruwondru taki den futuboi fu Gado ben seti a tru anbegi baka na ini a kondre fu den. Ma toku, a meki di sani meki kon bun baka na a ten dati, no ben feni presi na so wan bigi fasi leki na ini a ten disi. Nownow den futuboi fu Yehovah e kon moro furu, sani e waka bun nanga den, èn den e go na fesi. Yu man prakseri san wan tu sma — srefi den feanti fu Gado en pipel — e taki te den e si dati? Kande wan tu fu den feanti disi e firi soleki fa den Fariseiman ben firi di den ben si fa den sma ben go ipi-ipi na Yesus. Den ben bari taki: „Luku! Heri grontapu go waka na en baka.”—Yohanes 12:19.
17. San wan skrifiman ben taki fu Yehovah Kotoigi, èn fa den gro sensi a ten dati?
17 Professor Charles S. Braden ben taki na ini en buku These Also Believe: „Yehovah Kotoigi trutru go na ala presi na heri grontapu fu gi kotoigi. Nanga reti wi kan taki dati no wan tra kerki na grontapu ben abi moro faya èn ben horidoro leki Yehovah Kotoigi, fu prati a bun nyunsu fu a Kownukondre. Soleki fa a sori, dan na organisâsi disi sa kon bigi moro nanga moro.” Fu tru, a ben abi leti! Di a ben skrifi den wortu disi 50 yari pasa, dan so wan 300.000 Kotoigi nomo ben e preiki na heri grontapu. San a ben sa taki nownow efu a ben si taki so wan 20 tron moro furu sma — so wan siksi milyun — e preiki a bun nyunsu?
18. San na a soifri tongo, èn na suma Gado gi a soifri tongo disi?
18 Gado ben pramisi nanga yepi fu en profeiti: „Mi sa meki den pipel taki wan soifri tongo, so taki den alamala kan kari a nen fu Yehovah, so taki den kan dini en skowru na skowru” (Sefania 3:9). Na ini den lasti dei disi, na den Kotoigi fu Yehovah e kari a nen fu Yehovah, na den e dini en leki wán man na ini wan banti fu lobi di no man broko — iya, „skowru na skowru”. Na den kisi a soifri tongo fu Yehovah. Te wan sma kisi a soifri tongo disi, dan a man frustan a waarheid fu Gado èn den sani di A abi na prakseri, na wan yoisti fasi. Na Yehovah wawan kan meki sma kisi a sabi disi nanga yepi fu en santa yeye (1 Korentesma 2:10). Na suma Yehovah gi en yeye? A gi dati soso „na den wan di e gi yesi na en leki tiriman” (Tori fu den Apostel 5:32). Yehovah Kotoigi wawan wani gi yesi na Gado leki Tiriman na ini ala sani. Dati meki den e kisi Gado en yeye èn e taki a soifri tongo, a waarheid fu Yehovah nanga den moi sani di a abi na prakseri. Den e gebroiki a soifri tongo disi fu prèise Yehovah na moro nanga moro presi na heri grontapu.
19. San a wani taki fu taki a soifri tongo?
19 Fu taki a soifri tongo no wawan wani taki dati wan sma e bribi a waarheid èn taki a e leri tra sma a waarheid dati, ma a fasi fa a e tyari ensrefi musu kruderi tu nanga den wet nanga gronprakseri fu Gado. Salfu Kresten na den fosiwan di suku Yehovah èn di taki a soifri tongo. Prakseri fu a fasi fa sani go na fesi! Ala di den salfuwan no de so furu moro, den no doro 8700 sma srefi, toku so wan siksi milyun tra sma e sori a srefi bribi leki den salfuwan disi fu di den e suku Yehovah èn e taki a soifri tongo tu. Den wan disi na a bigi ipi di komoto na ala nâsi èn di e gro nomonomo. Den e bribi na ini a frulusu-ofrandi fu Yesus, den e du santa diniwroko na ini a fesi dyari na grontapu fu a yeye tempel fu Gado, èn den sa pasa „a bigi banawtu” libilibi, san o kon heri esi na tapu na onregtfardiki grontapu disi.—Openbaring 7:9, 14, 15.
20. Sortu howpu den getrow salfuwan abi èn sortu howpu den wan fu a bigi ipi abi?
20 A bigi ipi sa tyari go na ini a regtfardiki nyun grontapu fu Gado (2 Petrus 3:13). Yesus Krestes èn den 144.000 salfuwan di e kisi wan opobaka fu go libi na hemel fu dini leki kownu nanga priester makandra nanga en, sa tron a nyun tirimakti fu grontapu (Romesma 8:16, 17; Openbaring 7:4; 20:6). Den sma di pasa a bigi banawtu libilibi, sa wroko fu meki grontapu tron wan paradijs èn den sa go doro fu taki a soifri tongo di Gado gi den. Fu taki en leti, den wortu disi abi fu du so srefi nanga den sma di o libi na grontapu: „Ala den manpikin fu yu [a no de fu taki, so srefi den umapikin fu yu] sa de sma di Yehovah gi leri, èn a vrede fu den manpikin fu yu sa de pasa marki. Yu sa de sma di seti steifi na ini regtfardikifasi srefi.”—Yesaya 54:13, 14.
A Moro Bigi Leriwroko na ini Historia
21, 22. (a) Suma sa musu kisi leri fu a soifri tongo, soleki fa Tori fu den Apostel 24:15 e sori? (b) Sortu leriwroko di noiti ete ben du, sa feni presi na grontapu na ondro a Kownukondre tiri?
21 Wan tra kefalek bigi grupu sma di sa kisi na okasi fu leri a soifri tongo na ini a nyun grontapu, na den sma disi di Tori fu den Apostel 24:15 e taki fu den: „Wan opobaka o de fu den regtfardikiwan nanga den onregtfardikiwan.” Na ini a ten di pasa, milyardmilyard sma ben libi sondro fu abi wan soifri sabi fu Yehovah èn den dede tu sondro taki den ben kisi a sabi dati. Na wan fasi di orga bun, Yehovah sa tyari den kon na libi baka. Èn den sma disi di sa kisi wan opobaka sa musu kisi leri fu a soifri tongo.
22 A sa de wan moi grani srefisrefi fu teki prati na a bigi wroko dati fu gi sma leri! A sa de a moro bigi leriwroko na ini a historia fu libisma. Ala den sani disi sa feni presi na ondro a bun tiri fu Krestes Yesus di abi Kownukondre makti. Dati meki taki te fu kaba, a libisma famiri sa si a kontru fu Yesaya 11:9 di e taki: „Grontapu sa kon furu trutru nanga a sabi fu Yehovah, soleki fa watra e tapu se.”
23. Fu san ede yu ben kan taki dati wi leki a pipel fu Yehovah abi wan bigi grani?
23 Fu tru wi abi wan bigi grani na ini den lasti dei disi fu sreka wisrefi gi a moi ten dati te a sabi fu Yehovah trutru sa furu grontapu! Èn wi trutru abi wan bigi grani nownow kaba fu de a pipel fu Gado, di e si a kontru fu den profeiti wortu di skrifi na Sefania 3:20! Drape wi e feni a dyaranti di Yehovah e gi: „Mi sa meki unu kon tron wan nen èn wan sani fu prèise na mindri ala den pipel fu grontapu.”
San Yu Ben Sa Piki?
• Na sortu fasi a profeititori fu Sefania, di e taki fu a seti di a tru anbegi seti baka, kon tru?
• Fa sani ben e waka bun nanga a tru anbegi na ini den lasti dei disi?
• Sortu bigi leriwroko sa feni presi na ini a nyun grontapu?
[Aksi fu a tori disi]
[Prenki na tapu bladzijde 25]
Yehovah en pipel ben drai go baka na a kondre fu den fu seti a soifri anbegi baka. Yu sabi san disi wani taki na ini a ten disi?
[Prenki na tapu bladzijde 26]
Fu di Yehovah Kotoigi e taki a „soifri tongo”, meki den e pristeri sma a Bijbel boskopu di e gi trowstu