A Strei fu Puru Pôtifasi—Na Du No Du?

SMA di e go fu luku den Verenigde Nâsi na New York City, e si a zaal fu a Komte di e suku fu meki na ekonomia situwâsi nanga sani na ini a libimakandra na grontapu kon bun. Na loktusei fu a zaal di de gi a publiki, yu e si den peipi nanga den faya-titei. A sma di e tyari fisitiman fu luku a presi e fruteri: „Taki a plafon ’no kaba meki’, na wan sani fu memre sma taki den Verenigde Nâsi no kaba noiti nanga a wroko fu lusu den problema na ekonomia sei èn so srefi den problema na ini a libimakandra; ala ten wan sani o de di ben kan du ete fu meki a fasi fa sani e go na ini a libimakandra na grontapu, kon moro betre.”

Ala di a Komte e du ala san den man fu horibaka gi a marki fu gi libisma deki-ati fu kisi wan moro bun libi, toku a sori taki a wroko disi no o kaba noiti. A moi fu si taki di Yesus Krestes ben e du en diniwroko na grontapu na ini a fosi yarihondro G.T., a ben taki: „A yeye fu Yehovah de na tapu mi, bika a ben salfu mi fu meki bun nyunsu bekènti gi den mofinawan” (Lukas 4:18). San ben de a „bun nyunsu” san a ben meki bekènti? A ben de a boskopu fu a Kownukondre taki Yehovah Gado, di kon tron „wan fortresi gi a pôtiwan di de na ini banawtu”, o poti Yesus Krestes leki Kownu. San a Kownukondre dati o du? Yesaya ben taki na fesi: „Yehovah fu den legre trutru sa meki gi ala pipel . . . wan fesa-nyanyan di lai nanga oli, wan fesa-nyanyan fu win di den kibri na tapu a sakasaka, fu nyanyan di lai nanga oli èn di furu nanga bonyo fatu, fu win di den kibri na tapu a sakasaka, di soifri. A sa swari dede trutru fu têgo, èn a Soeverein Masra Yehovah trutru sa figi den watra-ai puru fu ala den fesi.”—Yesaya 25:4-6, 8.

Yu wani sabi moro fu a fasi fa Gado Kownukondre o „meki a situwâsi fu a libimakandra kon moro betre”, so taki sma no sa mankeri no wan sani moro? Luku a faki na ondro sei, so taki yu kan kon sabi fa fu feni wan sma di sabi fa fu leri yu moro san Bijbel e taki fu den sortu sani disi.