Aksi fu Leisiman

Son sma abi a gwenti fu gi trawan kopi fu computer programa di sma musu bai. Fa tru Kresten musu si a sani disi?

Kande son sma sa suku fu taki dati a sani disi bun, èn den kan sori go na den wortu fu Yesus: „Unu kisi fu soso, so bun, gi fu soso.” Yesus seiker no ben wani taki dati wi kan gi trawan kopi fu publikâsi noso fu computer programa (software) fu soso, ala di wi no abi na auteursrecht (a reti fu meki, seri, noso tyari wan sani kon na doro di wan sma abi). Boiti dati, wet de di e sori fa wi musu handri na ini den kefal dati. Yesus ben wani taki dati wi musu gi fu soso na ini a preikiwroko. Yesus ben taigi den apostel di ben o go na difrenti foto nanga dorpu, taki den ben musu preiki a Kownukondre, dresi den sikiman, èn puru ogri yeye na sma tapu. Na presi taki den ben aksi den sma fu pai gi den sani disi, den apostel ben musu „gi fu soso”.—Mateus 10:7, 8.

Fu di a nomru fu computer di sma nanga bisnis abi e gro moro nanga moro, meki furu sma abi computer programa di trawan kan gebroiki bun. Moro furu, sma musu bai den programa disi. A tru taki son sma e meki computer programa di trawan no abi fu pai fu dati, èn den e taki  so srefi taki sma kan meki kopi fu a programa fu den gi trawan. Ma moro furu sma musu bai computer programa. Efu wan sma o gebroiki en na oso noso fu du bisnis, den sma di e gebroiki den computer programa musu bai den, san wani taki dati den musu pai gi den programa. Efu wan sma ben o teki wan computer programa noso efu a ben o meki kopi fu en, sondro taki a pai gi en, dan a sma dati no ben o handri akruderi wet. A no ben o handri akruderi wet tu te a ben o meki kopi fu buku, fu seri den bogobogo gi wan moro lagi prijs. Srefi te a ben o gi sma den buku disi fu soso, a no ben o handri akruderi wet.

Na tapu moro furu fu den computer programa disi (so srefi computer games) wan sani skrifi di e sori taki den abi a primisi fu meki sowan programa. A sma di e gebroiki noso di abi a programa musu hori ensrefi na den krinkrin markitiki di poti na ini a primisi disi di gi. Furu fu den primisi disi taki dati wán sma nomo kan poti a computer programa tapu en computer èn a sma dati wawan mag gebroiki en. Moro furu a sani disi wani taki dati a sma musu poti a programa tapu wán computer nomo, a kan de a computer di a sma e gebroiki na oso, na ini wan bisnis, noso na skoro. Son primisi di gi e taki dati a sma di e gebroiki a programa kan meki wan backup copy gi ensrefi (wan kopi fu a programa di a kan gebroiki te kande a programa e gi problema). Ma a sma no mag meki kopi fu a programa disi gi trawan. Te a sma di abi a computer programa wani gi trawan a heri programa (makandra nanga a primisi nanga a buweisi di e sori taki a programa ben de fu en), dan a kan du dati. Ma te a du dati, dan ensrefi no mag gebroiki a programa moro. Difrenti sortu primisi de, fu dati ede a sma di e bai noso e kisi wan computer programa musu kon sabi san a primisi di a abi e sori trutru.

Na ini furu kondre wet de di e tapu sma fu no meki kopi fu „koni sani di trawan meki”, soleki computer programa. Den kondre disi e du muiti fu strafu den sma di no e hori den srefi na den wet disi. Fu eksempre, a tijdschrift The New York Times fu 14 yanuari 2000, skrifi taki „skowtu fu Doisrikondre nanga Deinsikondre grabu memre fu wan grupu hori. Den skowtu taki dati den sma disi ben de wan bigi grupu fu fufuruman di e meki moni nanga computer programa di tra sma meki”. A grupu disi ben meki kopi fu computer programa nanga computer games, èn ben tyari den go seri na sma. Den ben seri wan tu fu den srefi tapu Internet.

Fa a Kresten gemeente e si a sani disi? We, Yesus ben taki: „Pai caesar den sani baka di de fu caesar, ma Gado den sani di de fu Gado” (Markus 12:17). Den wortu disi e sori taki Kresten musu hori densrefi na den wet fu a kondre di no de kontrari a Wet fu Gado. Ini a tori fu tirimakti Paulus ben skrifi: „Meki ibri sili saka ensrefi na ondro den hei tirimakti . . . A sma di e gens a makti, opo ensrefi kontrari a seti fu Gado; den wan di opo densrefi kontrari disi, sa tyari krutu kon na tapu densrefi.”—Romesma 13:1, 2.

Owruman na ini a Kresten gemeente no abi a frantwortu fu luku san de tapu a computer fu trawan. Den no abi a makti fu strafu sma di no e hori densrefi na den wet di abi fu du nanga a meki fu kopi fu computer programa di trawan abi auteursrecht na tapu. Ma den e leri sma san den e bribi, taki Kresten no musu teki tra sma sani èn den musu pruberi fu hori den srefi na wet. A sani disi e kibri Kresten fu no kisi strafu fu di den no hori densrefi na den wet. A e yepi den tu fu abi wan krin konsensi na fesi Gado. Paulus ben skrifi: „Dati meki wan tranga reide de gi unu fu saka unsrefi na ondro makti, no soso fu na atibron dati ede, ma so srefi fu un konsensi ede” (Romesma 13:5). Na wan srefi sortu fasi Paulus ben taki fu a sani di Kresten e angri fu abi: „Wi abi a frutrow taki wi abi wan eerlijk konsensi, fu di wi wani tyari wisrefi na wan eerlijk fasi na ini ala sani.”—Hebrewsma 13:18.

[Faki na tapu bladzijde 29]

Wan tu bisnis nanga skoro e bai computer programa di e gi primisi na moro leki wán sma fu gebroiki a programa. Na ini 1995, den gemeente fu Yehovah Kotoigi taki fu wan artikel di ben gi a rai disi:

„Moro furu fu den bedrijf di e meki èn e seri computer programa abi auteursrecht tapu den programa disi, èn den programa abi so srefi wan primisi pe skrifi finifini fa sma kan gebroiki a programa akruderi wet. Furutron a primisi e taki dati a sma di abi a programa no musu gi tra sma kopi fu en, fu taki en leti, na internationaal wet di abi fu du nanga auteursrecht, e tapu sma fu du dati . . . Wan tu bigi bisnis e seri computer di abi programa na den tapu kaba, en den programa disi e gi primisi. Ma den programa di son computer wenkri e poti na tapu den computer no e gi sma primisi, fu di den programa na kopi di no ben meki akruderi wet. Dati wani taki dati a sma di e bai a computer no e hori ensrefi na wet te a e gebroiki den programa disi. Fu dati ede, te wet e tapu sma fu meki kopi fu sani (soleki fa a de nanga den publikâsi fu a Genootschap), dan Kresten no musu poti den sani dati tapu computer so taki iniwan sma kan meki kopi fu den sondro taki den sma di meki den programa disi ben gi den primisi fu du dati. Kresten no musu (download) teki den sortu sani disi puru tu fu a computer.