San Na a Tru Tori fu den Dede Se Lolo?

Moro leki 50 yari pasa, wan skapuman fu wan Arabiri lo fringi wan ston go na ini wan ston-olo èn a meki taki sma feni san sonwan e kari a moro prenspari owruten sani di libisma feni na ini a di fu 20 yarihondro. A skapuman disi yere fa a ston broko wan kroiki opo. Di a go luku fu si san ben de a sani, dan a feni den fosiwan fu den seibi lolo di sma kon sabi baka ten leki den Dede Se Lolo.

HEI leriman èn so srefi radio, telefisi, nanga koranti poti furu prakseri na den lolo disi, èn a tori kon tron wan heri yu-o-hari-yu-o-trusu. Sma no ben sabi moro san den ben musu bribi èn den ben kisi wan lo sani fu yere di no ben de tru. A nyunsu ben panya taki sma e du tranga muiti fu meki trawan no kon sabi san skrifi na tapu den lolo, fu di den ben frede taki dati ben o meki Kresten nanga Dyu lasi bribi. Ma san den lolo disi wani taki trutru? Wi kan kon sabi dati baka moro leki 50 yari?

San Na den Dede Se Lolo?

Den Dede Se Lolo na owruten dokumenti fu den Dyu. Furu fu den dokumenti disi skrifi na ini Hebrewtongo, wan tu fu den skrifi na ini Arameisi, èn wan tu fu den na ini Grikitongo. Furu fu den lolo nanga den pisi lolo disi owru moro leki 2000 yari, fu sensi a ten bifo Yesus gebore. Na mindri den fosi lolo di sma kisi fu na Arabiri lo, seibi langa dokumenti ben de. Wan tu fu den no ben makriki fu leisi èn trawan fu den sma no ben man leisi srefisrefi. Di sma go luku na ini moro fu den ston-olo, dan den feni tra lolo èn so srefi dusundusun pisi fu lolo. Na mindri den yari 1947 nanga 1956, sma feni, ala nanga ala, 11 ston-olo di ben abi lolo na ini den. Den ston-olo disi ben de krosibei fu a presi Qumran di de na a Dede Se.

Te sma orga ala den lolo nanga den pisi lolo, dan den ala makandra e doro so wan 800 dokumenti.  Pikinmoro a di fu fo pisi, noso pikinmoro leki 200 fu den dokumenti disi nomo, na pisi fu den Hebrew Bijbel wortu. Tra dokumenti na sani di Dyu ben skrifi na ini owruten èn di no de fu feni na ini Bijbel. Den sani disi ben teki puru fu den Apocrief Buku nanga Dyu Apocalyptisch Buku. *

Wan tu fu den lolo di gi sabiman moro bigi prisiri, na den lolo di e fruteri sani di den sabiman no ben sabi fosi. Na so den kon sabi den difrenti fasi fa sma ben fruklari a Dyu wet èn so srefi spesrutu markitiki gi a libimakandra fu a sekte di ben libi na Qumran. Den lolo ben abi puwema nanga begi so srefi di den ben gebroiki na ini na anbegi fu den. Moro fara den ben fruteri fu sani di den sma ben skrifi fu den lasti dei, di e tyari kon na krin fa den sma dati ben si a kontru fu Bijbel profeititori nanga den lasti dei. Aparti Bijbel komentaar skrifi tu na ini den lolo èn disi na den moro owru Bijbel komentaar di sma skrifi oiti di e taki fu den wortu fu bijbeltekst.

Suma Skrifi den Dede Se Lolo?

Difrenti fasi di sma e gebroiki fu luku o owru owruten dokumenti de, e sori taki den lolo ben skrifi na wan ten di de na mindri a di fu dri yarihondro b.G.T. nanga a fosi yarihondro G.T. Wan tu sabiman taki dati Dyu fu Yerusalem ben kibri den lolo na ini den ston-olo bifo a tempel ben kisi pori na ini 70 G.T. Ma moro furu fu den sabiman di e ondrosuku den lolo, feni taki a denki dati no de akruderi den sani di skrifi na ini den lolo srefi. Furu fu den lolo e tyari denki nanga gwenti kon na krin di de tra fasi leki san den kerki edeman na Yerusalem ben e leri sma. Den lolo disi e tyari kon na krin taki wan grupu sma ben de di ben bribi taki Gado no ben feni den priester nanga a tempel anbegi na Yerusalem bun moro. A grupu disi ben bribi so srefi taki Gado ben si na anbegi fu den na ini a gran sabana leki wan sortu tempel diniwroko di ben teki a presi fu a tempel diniwroko na Yerusalem. Den tiriman fu a tempel na Yerusalem no ben o kibri den sortu lolo disi.

Ala di a gersi taki wan grupu fu sma di ben skrifi den Buku fu Bijbel abra ben de na Qumran, toku a kan de so taki den bribiman ben tyari den lolo kon na wan na wan tra presi, èn ben tyari den go na a presi Qumran baka ten. Na wan fasi, den Dede Se Lolo na wan bigi bibliotheek fu difrenti sortu sani. Neleki iniwan tra bibliotheek, den lolo kan abi difrenti sortu prakseri. A no abi fu de so taki den alamala e fruteri fu a bribi di den leisiman fu den lolo disi ben abi. Ma den lolo disi di abi moro leki wán kopi, e sori san e meki a grupu disi so aparti èn den e fruteri so srefi fu a bribi di a grupu ben abi.

Den Sma Di Ben Tan na Qumran Ben De Eseinasma?

Efu den lolo disi ben de a bibliotheek fu Qumran, dan suma na den sma di ben tan drape? Na ini 1947, Professor Eleazar Sukenik ben kisi dri lolo gi na Hebrew Universiteit na ini Yerusalem. A professor disi na a fosi sma di ben taki dati den lolo disi ben de fu wan grupu Eseinasma.

Den Eseinasma ben de wan Dyu sekte di skrifiman fu a fosi yarihondro soleki Josephus, Filo fu Aleksandria, nanga Plinius na Owruman ben taki fu den. Ala di sma no sabi soifri pe den Eseinasma komopo trutru, toku a gersi taki den opo kon na ini a bruya pisi ten di ben de, baka di den Makabeisma ben opo den srefi teige den Griki tiriman na ini a di fu tu yarihondro b.G.T. * Josephus ben fruteri taki den Eseinasma ben de na ini a pisi ten dati, ala di a ben skrifi finifini fa a fasi fa den ben si sani na kerki sei ben difrenti fu a di fu den Fariseiman nanga den Saduseisma. Plinius ben taki dati a libimakandra fu den Eseinasma ben de na a Dede Se di de na mindri Yerikow nanga En-gedi.

Professor James VanderKam, wan sabiman fu den Dede Se Lolo, e taki dati „a grupu fu den Eseinasma di ben libi na Qumran ben de wan pikin pisi nomo fu a moro bigi grupu fu Eseinasma”. Josefus ben taki dati so wan 4000 sma ben de na ini a bigi grupu disi. Ala di wan tu fu den sani di a taki no e fiti a grupu disi, toku a gersi taki den sani di den lolo e skrifi, e fiti den Eseinasma moro bun leki iniwan tra Dyu grupu fu a ten dati.

Wan tu sma e taki dati Krestendom ben bigin na Qumran. Toku wi kan si furu krinkrin difrenti na  mindri a bribi fu a Qumran sekte nanga a di fu den fositen Kresten. Den lolo fu Qumran e sori taki den sma ben hori densrefi finifini na den wet fu a Sabadei èn pikinmoro a krin di wan sma ben musu krin na seremonia sei ben frei na den ede (Mateus 15:1-20; Lukas 6:1-11). Wi kan taki a srefi sani fu a hori di den Eseinasma ben hori densrefi aparti fu tra sma, fu a bribi fu den taki Gado poti na fesi kaba san o pasa nanga wan sma libi, èn fu a sili di no man dede. Den ben si en leki wan prenspari sani so srefi taki wan man no ben musu trow èn den abi na afkodrei denki taki den engel ben teki prati na ini na anbegi fu den. Den sani disi e sori taki den no ben libi akruderi den leri fu Yesus noso di fu den fositen Kresten.​—Mateus 5:14-16; Yohanes 11:23, 24; Kolosesma 2:18; 1 Timoteus 4:1-3.

A Tori No Kibri, No wan Lolo No Kibri

Na ini den yari baka di sma feni den Dede Se Lolo, difrenti publikâsi ben meki di gi sabiman na heri grontapu okasi fu studeri den fosi lolo di sma ben feni. Ma furu fu den dusundusun pisi lolo di ben de na ini wan fu den ston-olo di sma sabi leki Ston-olo 4, ben gi moro bigi broko-ede. Wan pikin grupu fu sabiman di ben komoto fu difrenti kondre, ben de na ini Owstu Yerusalem (na a ten dati a ben de wan pisi fu Yordan) na a Archeologisch Museum fu Palestina èn den ben abi den lolo disi. No wan enkri sabiman di ben de wan Dyu noso di ben de fu Israèl, ben de na ini a grupu disi.

A grupu ben teki a bosroiti taki den no ben o gi no wan sma okasi fu luku den lolo teleki den ben klari nanga na ondrosukuwroko fu den èn ben tyari san den ben feni kon na doro. A grupu ala ten ben abi wan fasti nomru fu sabiman. Te wan memre fu a grupu dede, dan wán nyun sabiman nomo ben e poti na ini a grupu fu teki a presi fu en. Wan moro bigi grupu ben de fanowdu fu du a wroko, èn na ini wan tu kefal, sma di ben sabi Hebrewtongo nanga Arameisi moro bun, ben de fanowdu. James VanderKam ben taki en so: „Aiti sabiman no man studeri tin dusundusun pisi lolo, awansi fa den koni.”

Leki bakapisi fu a Siksi-Dei Feti fu 1967, Owstu Yerusalem kon na ondro a makti fu Israèl, ma wan bosroiti no ben teki fu tyari kenki kon na ini a grupu fu ondrosukuman. Yari ben tron someni tenti yari, ma den lolo fu Ston-olo 4 no ben tyari kon na doro ete. Teleki wan tu sabiman bigin kragi fu a tori disi. Na ini 1977, Professor Geza Vermes fu na Oxford Universiteit kari a sani a moro bigi syen di sabidensi kisi na ini a di fu 20 yarihondro. Sma bigin yere ala sortu takitaki, dati fu espresi Lomsu Kerki ben e kibri a tori fu den lolo, fu di den no ben wani taki den sani di ben skrifi na ini den lolo ben o gi Krestenhèit porinen.

Te fu kaba, a grupu fu ondrosukuman gro kon de 20 sabiman na ini den yari syatu baka 1980. Baka dati, Emanuel Tov fu a Hebrew Universiteit na ini Yerusalem, tron a sma di ben abi a frantwortu fu tyari sani kon na doro. Na en ben teki fesi na ini a grupu now. Na ini 1990, na ondro a tiri fu en, a grupu gro kon moro bigi, teleki a kon de moro leki 50 sabiman. Den meki wan schema di ben sori soifri o ten den ben o tyari den sani kon na doro di den ben kon sabi fu den lolo di ben tan abra.

Na ini 1991, den doro wan marki di no wan sma ben fruwakti. Na fosi presi, A Preliminary Edition of the Unpublished Dead Sea Scrolls (Wan buku di ben taki fu den Dede Se Lolo) ben kon na doro. A buku disi skrifi nanga yepi fu computer di ben gebroiki a wortulijst fu a grupu fu sabiman. Wan tra sani di pasa ben de taki a Huntington Bibliotheek na ini San Marino, California, meki bekènti taki den ben o gi iniwan sabiman na okasi fu man luku ala den fowtow di den ben meki fu den lolo. A no ben teki langa baka dati di a buku A Facsimile Edition of the Dead Sea Scrolls (Wan tra buku di ben handri fu den Dede Se Lolo) ben gi sma okasi fu si fowtow fu den lolo di no ben tyari kon na doro ete.

A bakapisi ben de taki ini den tin yari di pasa, sma kisi okasi fu ondrosuku ala den Dede Se lolo. Na ondrosukuwroko e tyari kon na krin taki sma no ben kibri a tori; den lolo no ben kibri. Di den lasti sani di skrifi fu den lolo e tyari kon na doro, dan now fosi sma kan bigin studeri den lolo dorodoro. Now wan nyun grupu fu sabiman e studeri lolo. Ma san na ondrosukuwroko disi wani taki gi bijbelstudenti?

[Futuwortu]

[Prenki na tapu bladzijde 3]

Disi na wan tu fu den ston-olo krosibei fu a Dede Se pe sma ben feni den owruten lolo na ini

[Sma di abi a reti fu den prenki na tapu bladzijde 3]

Wan pisi fu wan lolo: Bladzijde 3, 4, nanga 6: Nanga primisi fu Israel Antiquities Authority

[Sma di abi a reti fu a prenki na tapu bladzijde 5]

Nanga primisi fu a Shrine of the Book, Israèl Museum, Yerusalem