Yongu Sma Di E ’Frutrow Tapu Yehovah’

A NO yongusma wawan moi èn a no de so tu taki soso owrusma abi koni. (Teki gersi Odo 11:22; Preikiman 10:1.) Na presi fu dati, den sma di moi ala ten èn di abi trutru koni, na den wan di e frutrow tapu Yehovah èn di e taki fu en nanga den heri ati: „Yu na mi Gado.”—Psalm 31:14; Odo 9:10; 16:31.

Na heri grontapu a grupu fu moi sma, dati na yongusma nanga owrusma, e gro srefisrefi. Den sma disi e sori a koni fu den, fu di den e dini Gado èn fu di den e preiki  a bun nyunsu fu Gado Kownukondre. Luku fu eksempre Sabrina, di abi aiti yari.

Sabrina e tan na Doisrikondre, èn a de na ini a di fu tu klas. En na a fosi Kotoigi fu Yehovah tapu a skoro fu en. Na wan sari fu si taki den tra skoro pikin ben afrontu en. Disi ben go doro teleki a dei di a skoromisi aksi den studenti fu tyari wan buku go na skoro, di den ben lobi trutru. Sabrina bosroiti fu tyari a buku di nen: Mi boekoe nanga bijbel tori. A neti na fesi, a ben senwe pikinso, ma toku a sreka ensrefi bun gi a les. Fu di 26 studenti ben de na ini a klas fu en, meki a ben sabi taki a no ben o abi furu ten. Ma a ben abi a fasti bosroiti fu no meki no wan sma koti en mofo te a ben o hori en takimakandra, èn a ben de seiker taki Yehovah ben o yepi en. Di a dei doro, dan a skoromisi aksi suma ben tyari wan buku èn suma ben sa wani de a fosiwan fu sori en na trawan. We, Sabrina wawan ben tyari wan buku. A ben tanapu na fesi a klas, a bigin taki, leisi, èn sori prenki fu a buku. A fruteri taki ala sani na ini a buku ben teki fu Bijbel. Na a kaba, a aksi: „Suma ben sa wani abi a buku disi?” A gi a skoromisi wán èn den dei baka dati, a gi tin buku na wan tu fu den tra studenti di ben de na ini a klas fu en. A wan-enkri sani di a skoromisi ben taki fu a takimakandra fu Sabrina ben de disi: „Noiti ete mi ben si so wan sani.” Sabrina ben kisi a moro hei cijfer gi a takimakandra fu en.

Fu taki en leti, furu yongu Kotoigi e prisiri fu taki fu a bun nyunsu na skoro. Wan tra eksempre na di fu Erika, di abi 11 yari èn di de wan preikiman na Meksikow. Fu sensi en yongu yari a ben leri fu lobi Yehovah. A e du en skorowroko heri bun. Wan fu den sani di a ben musu du na skoro, ben de fu sreka wan tori di ben taki fu AIDS èn a de di wan sma de wan srafu fu tabaka nanga sopi. A sreka ensrefi heri bun, a gebroiki a tijdschrift Ontwaakt! èn a ben kisi den moro hei cijfer. A skoromisi fu Erika aksi en pe a feni den bodoi, èn Erika gi en den tijdschrift di ben abi den artikel nanga den tori dati na ini. Baka ten, a skoromisi gebroiki den tijdschrift disi fu hori wan takimakandra nanga a heri klas fu den tori dati. Erika ben tyari ensrefi na wan tumusi bun fasi, a ben lespeki den skoromisi fu en, èn a ben kisi hei cijfer. Fu dati ede a ben kisi presenti, furu diploma, èn a skoro ben pai wan pisi fu a moni di a ben abi fanowdu fu kisi moro skoroleri. Ma toku Erika feni taki den moro bun sani di a du, na taki a sori sma dati en na wan Kotoigi fu Yehovah. So srefi a ben man prati Bijbel publikâsi èn a ben hei a nen fu Gado.

Dan yu abi Shannon, di abi tin yari èn di e libi na Nyun Zeeland. A abi wán ai nomo di a man si bun nanga dati; a lasi a tra ai fu di a ben kisi kanker di a ben de wan beibi. Di Shannon ben abi seibi yari, dan a mama fu en ben bigin studeri Bijbel nanga den Kotoigi fu Yehovah. Ma no langa baka di a bigin nanga a bijbelstudie fu en, a bigin libi nanga wan man sondro taki a trow nanga en. A mama fu Shannon ben bosroiti fu no go doro nanga a studie. Shannon aksi tangitangi efu a bijbelstudie fu ensrefi ben kan go doro. A sani di a ben wani, pasa trutru. Den Kotoigi ben tan kon na den oso, èn baka ten ala den dri sma fu na osofamiri studeri Bijbel èn den ben go na fesi na yeye fasi. Baka di a mama fu Shannon nanga a stiefpapa fu en ben trow na lanti, den ben teki dopu.

Wan dei, Shannon nanga na uma fu a kringopziener ben de makandra na ini a preikiwroko. Wan ososma ben aksi Shannon: „San pasa nanga yu ai?” „Mi ben kisi kanker na ini na ai fu mi, èn datra ben musu puru en”, na so a ben piki. „Heri esi Yehovah o gi mi wan nyun ai na ini Paradijs, èn fu dati ede wi de dyaso fu fruteri yu fu disi.”