Frulusu gi Den Wan Di Wani a Leti
Frulusu gi Den Wan Di Wani a Leti
„Yehovah na mi leti, nanga mi frulusu. Suma mi sa frede?”—PSALM 27:1.
1. Sortu sani Yehovah seti fu sma kisi libi?
YEHOVAH na a Sma di e gi leti komopo na son, so taki libi kan de na grontapu (Genesis 1:2, 14). Yehovah na a Mekiman tu fu leti na yeye fasi. A leti dati e puru a dungru fu Satan en grontapu di e tyari dede kon (Yesaya 60:2; 2 Korentesma 4:6; Efeisesma 5:8-11; 6:12). Den wan di wani a leti, kan taki neleki a psalm skrifiman ben taki: „Yehovah na mi leti, nanga mi frulusu. Suma mi sa frede?” (Psalm 27:1a). Ma soleki fa ben pasa na ini a ten fu Yesus, dan den sma di wani a dungru moro leki a leti, kan fruwakti wan krutu nomo nanga takru bakapisi.—Yohanes 1:9-11; 3:19-21, 36.
2. San ben pasa nanga den sma na ini owruten di no ben wani waka na ini a leti fu Yehovah, èn san ben pasa nanga den wan di ben arki en wortu?
2 Na ini a ten fu Yesaya, moro furu fu a pipel di Yehovah ben meki wan frubontu nanga den, no ben wani waka na ini a leti. Fu dati ede, Yesaya ben si fa a noordsei kownukondre Israèl leki wán nâsi, ben kisi pori. Èn na ini 607 b.G.T., Yerusalem nanga a tempel fu en ben kisi pori èn den sma fu Yuda ben tyari gowe na ini katibo. Ma den wan di ben arki a wortu fu Yehovah, ben kisi krakti fu kakafutu gi den sma na ini a ten dati di ben fadon komoto na bribi. Yehovah ben pramisi taki na ini a yari 607 b.G.T, a ben o frulusu den wan di ben arki en (Yeremia 21:8, 9). Na ini a ten disi, ibriwan fu wi di lobi a leti kan leri furu fu san ben pasa na ini na ten dati.—Efeisesma 5:5.
Den Sma Di De na ini a Leti De Koloku
3. Sortu frutrow wi abi na ini a ten disi? Sortu „regtfardiki nâsi” wi lobi, èn sortu „tranga foto” a „nâsi” dati abi?
3 „Wi abi wan tranga foto. Frulusu srefi [Gado] e poti leki skotu èn leki fortresi. Un opo den portu, so taki a regtfardiki nâsi, di e tan tyari ensrefi na wan getrow fasi, kan kon na inisei” (Yesaya 26:1, 2). Disi na den prisiri wortu fu sma di ben frutrow tapu Yehovah. Getrow Dyu na ini den dei fu Yesaya, ben si Yehovah leki a wan-enkri Sma di ben man kibri den trutru. Den no ben suku yepi na den falsi gado fu den kondreman fu den. Na ini a ten disi, wi abi a srefi frutrow. Boiti dati, wi lobi Yehovah en „regtfardiki nâsi” — „na Israèl fu Gado” (Galasiasma 6:16; Mateus 21:43). Yehovah lobi a nâsi disi tu bika a nâsi de getrow na en. Fu di Yehovah e blesi den, meki na Israèl fu Gado abi „wan tranga foto”. Dati na wan organisâsi di gersi wan foto. A e horibaka èn e kibri a nâsi disi.
4. Sortu fasi fu denki wi musu kon abi?
4 Den sma na ini a „foto” disi sabi heri bun taki „a fasi fu denki di no e degedege, [Yehovah] sa gi kibri na ini têgo vrede, bika dati meki sma e frutrow tapu [Yehovah]”. Yehovah e horibaka gi den wan di wani frutrow na en tapu èn di wani libi akruderi den regtfardiki gronprakseri fu en. Fu dati ede den getrow sma na ini Yuda ben poti prakseri na a frumane fu Yesaya: „Un frutrow tapu Yehovah fu ala ten, bika na ini Yah Yehovah a Klepston de fu ten di no skotu” (Yesaya 26:3, 4; Psalm 9:10; 37:3; Odo 3:5). Den sma di abi a denki dati, e suku yepi na „Yah Yehovah” di de a wan-enkri Klepston di kan kibri den. Den e nyan bun fu „têgo vrede” nanga en.—Filipisma 1:2; 4:6, 7.
Den Feanti fu Gado E Kisi Syen
5, 6. (a) Fa Babilon fu owruten ben kisi syen? (b) Na sortu fasi „Babilon a Bigiwan” ben kisi syen?
5 San efu den wan di e frutrow tapu Yehovah e pina fu di den e kisi tesi? Den no musu frede. Yehovah e gi pasi meki den sani disi pasa fu wan pisi ten. Ma te fu kaba, a e tyari frulekti kon èn den sma di e tesi den, sa kisi krutu fu en (2 Tesalonikasma 1:4-7; 2 Timoteus 1:8-10). Luku a tori fu wan spesrutu „hei foto”. Yesaya e taki: „[Yehovah] trowe den wan na gron di e libi na tapu a hei presi, a hei foto. A e lagi en, a e lagi en te na grontapu; a e meki en tuka nanga a doti. A futu sa trapu en masi, den futu fu a sma di e pina, den futustap fu den mofinawan” (Yesaya 26:5, 6). A kan de so taki a hei foto di kari dyaso, na Babilon. A foto dati ben meki Gado en pipel pina fu tru. Ma san ben pasa nanga Babilon? Na ini 539 b.G.T., den Mediasma nanga den Persiasma ben teki en abra. Dati ben gi en syen srefisrefi!
6 Na ini a ten fu wi, den profeiti wortu fu Yesaya e fruteri krin san pasa nanga „Babilon a Bigiwan” sensi a yari 1919. A hei foto dati ben fadon na ini 1919, di a ben abi fu fri a pipel fu Yehovah fu katibo na yeye fasi. A fadon disi di a foto ben fadon ben de wan bigi syen gi en (Openbaring 14:8). A sani di ben pasa baka dati ben gi en moro syen srefi. A pikin grupu disi fu Kresten ben ’trapu masi’ a foto di ben hori den na ini katibo fosi. Na ini 1922 den ben bigin meki bekènti taki Krestenhèit ben o kon na en kaba heri esi. Den ben meki den boskopu bekènti fu den fo engel fu Openbaring 8:7-12 di ben bro tapu trompeti. So srefi den ben bariwroko gi Krestenhèit, den dri helu di ben taki na fesi na Openbaring 9:1–11:15.
„A Pasi fu a Regtfardikiwan Na Opregtifasi”
7. Sortu tiri den sma e kisi di e go waka na ini a leti fu Yehovah? Suma den e howpu na tapu èn san den lobi?
7 Yehovah e frulusu den wan di e go waka na ini a leti fu en, èn a e sori den pe den musu waka, soleki fa Yesaya e fruteri now: „A pasi fu a regtfardikiwan na opregtifasi. Fu di yu opregti, dan yu sa meki srefi a futumarki fu wan regtfardikiwan kon grati. Iya, gi a pasi fu den krutu fu yu, o Yehovah, wi howpu tapu yu. A sili e angri fu a nen fu yu èn e angri fu memre yu” (Yesaya 26:7, 8). Yehovah na wan regtfardiki Gado, èn den wan di e anbegi en musu hori densrefi na den regtfardiki markitiki fu en. Te den e du dati, dan Yehovah e tiri den; a e grati a futupasi fu den. Te den safri-atiwan disi e teki a tiri fu Yehovah, dan den e sori taki den e howpu na en tapu. Te den e gi yesi na en, dan den e sori tu taki nanga den heri ati den lobi a nen fu en — a sani di sma „e angri fu memre”.—Exodus 3:15.
8. Sortu bun fasi fu denki Yesaya ben sori?
8 Yesaya ben lobi a nen fu Yehovah trutru. Disi de krin fu si na den wortu di a e taki now: „Nanga mi sili mi angri fu yu te neti; iya, nanga mi yeye na ini mi, mi e tan suku yu; bika, te den krutu de di yu abi gi grontapu, dan regtfardikifasi na san den sma di e libi na tapu a fatu gron sa leri trutru” (Yesaya 26:9). Yesaya ben angri fu Yehovah ’nanga en sili’ — nanga a heri sma di a de. Prakseri fa a profeiti e gebroiki a netiten te ala sani tiri, fu begi Yehovah èn fu taki nanga Gado fu den moro dipi prakseri fu en, èn fu suku a tiri fu Yehovah fayafaya. A ben gi wan tumusi moi eksempre fu tru! Boiti dati, Yesaya ben leri regtfardikifasi fu den krutu di Yehovah ben tyari kon tapu sma. Dati meki a e memre wi na a de di a de prenspari srefisrefi fu de na ai doronomo; wi musu tan na ai fu man si krin san na a wani fu Yehovah.
Son Sma Wani a Dungru
9, 10. Sortu bun sani Yehovah ben du gi a nâsi fu en di no ben de getrow? Ma san a nâsi ben du fu en sei?
9 Yehovah ben sori Yuda lobi bun-ati srefisrefi, ma na wan sari sani taki a no ala sma ben warderi dati. Nofotron, moro furu fu den no ben wani taki Yehovah tiri den èn den ben fadon komoto na bribi na presi fu waka na ini a leti fu a waarheid fu Yehovah. Yesaya ben taki: „Awansi sma ben sa sori a godelowsuwan bun-ati, toku a no sa leri regtfardikifasi kwetikweti. A sa handri na wan onregtfardiki fasi na ini a kondre fu opregtifasi, èn a no sa si a heifasi fu Yehovah.”—Yesaya 26:10.
10 Na ini a ten fu Yesaya, moro furu sma fu Yuda no ben wani erken taki Yehovah ben kibri den fu den feanti fu den. Di a ben blesi den nanga a vrede fu en, dan a nâsi no ben taki en tangi. Fu dati ede, Yehovah ben drai en baka gi den, meki den go dini „tra masra”. Te fu kaba, a ben gi pasi meki sma tyari den Dyu gowe na ini katibo na Babilon na ini 607 b.G.T. (Yesaya 26:11-13). Toku wan fikapisi fu a nâsi ben drai kon baka na a kondre fu den te fu kaba, baka di den ben kisi strafu.
11, 12. (a) San ben pasa nanga den sma di ben hori Yuda na ini katibo? (b) Na ini 1919, san ben de a tamara fu den sma di ben hori Yehovah en salfu futuboi na ini katibo fosi?
11 Fa a de nanga den sma di ben hori Yuda na ini katibo? Yesaya e piki na wan profeiti fasi: „Den dede; den no sa libi. Fu di den no man du noti na ini dede, meki den no sa opo. Fu dati ede yu poti yu prakseri na den, so taki yu ben sa kan wai den puru èn no ben sa meki sma kari a nen fu den moro” (Yesaya 26:14). Iya, baka di Babilon ben fadon na ini 539 b.G.T., a no ben man opo baka. Te fu kaba, a foto no ben sa de moro. A ’no ben o man du noti moro na ini dede’, èn sma ben o man leisi fu a gran kownukondre disi na ini buku nomo. Fu tru, disi na wan seryusu warskow gi den wan di e howpu tapu den maktiwan fu a grontapu disi!
12 Wan tu pisi fu a profeititori disi ben kon tru di Gado ben gi pasi meki den salfu futuboi fu en go na ini katibo na yeye fasi na ini 1918 èn kon fri baka dati, na ini 1919. Bigin nanga a momenti dati, den sma di ben hori den na ini katibo, spesrutu Krestenhèit, no ben o abi wan bun tamara kwetikweti. Ma Yehovah en pipel ben o kisi furu blesi srefisrefi.
„Yu Meki a Nâsi Kon Moro Bigi”
13, 14. San na den someni blesi di Yehovah en salfu futuboi kisi sensi 1919?
13 Gado ben blesi den futuboi fu en na ini 1919, fu di den ben sori taki den ben abi berow, èn a ben meki den kon moro furu. Na a fosi presi, den ben poti prakseri na a tyari di den lastiwan fu na Israèl fu Gado ben musu tyari kon na wan. Baka dati, den ben bigin tyari „wan bigi ipi” fu „tra skapu” kon na wan (Openbaring 7:9; Yohanes 10:16). A profeititori fu Yesaya ben taki na fesi fu den blesi disi: „Yu meki a nâsi kon moro bigi; o Yehovah, yu meki a nâsi kon moro bigi; yu gi yusrefi glori. Yu bradi ala den grens fu a kondre te na farawe. O Yehovah, na ini a ten fu banawtu den prakseri yu; den puru na ati fu den kon na doro ini wan safri begi, di den ben kisi trangaleri fu yu.”—Yesaya 26:15, 16.
14 Na ini a ten disi, den hari a grens fu na Israèl fu Gado go na heri grontapu. A bigi ipi di kon moro bigi, abi so wan siksi milyun sma now di e teki prati fayafaya na a wroko fu preiki a bun nyunsu (Mateus 24:14). Yehovah blesi den fu tru! Ala den sani disi e gi en nen grani srefisrefi! A nen dati de fu yere now na ini 235 kondre — trutru wan tumusi moi kontru fu san a ben pramisi.
15. Sortu agersi opobaka ben feni presi na ini 1919?
15 Yuda ben abi yepi fu Yehovah fanowdu fu lon komoto na katibo na ini Babilon. Den no ben man du dati den wawan (Yesaya 26:17, 18). Na a srefi fasi, a fri di na Israèl fu Gado ben kon fri na ini 1919, ben sori taki Yehovah ben horibaka gi den. Dati no ben man pasa efu a no ben yepi den. A situwâsi fu den ben kenki na wan fasi di ben fruwondru sma srefisrefi. Fu dati ede Yesaya ben teki dati gersi nanga wan opobaka: „Den dedewan fu yu sa libi. Wan dedeskin fu mi — den sa opo baka. Wiki èn meki wan prisiri babari, un sma di e tan na ini a doti! Bika a dow fu yu de leki a dow fu den maluw èn a gron srefi sa trowe den wan di no man du noti na ini dede, soleki fa dati e pasa te wan sma gebore” (Yesaya 26:19; Openbaring 11:7-11). Iya, den wan di no man du noti na ini dede, ben o gebore baka, fu taki en so, fu bigin wroko baka!
Kibripresi na ini Ogri Ten
16, 17. (a) San den Dyu ben musu du na ini 539 b.G.T. fu man tan na libi te Babilon ben o fadon? (b) San na den „inisei kamra” na ini a ten disi kande, èn fa wi e kisi wini fu den?
16 Den futuboi fu Yehovah abi en yepi fanowdu ala ten fu kibri den. Ma heri esi, a sa langa en anu go teige a grontapu fu Satan fu a lasti leisi, èn den anbegiman fu Yehovah sa abi en yepi fanowdu moro leki oiti bifo (1 Yohanes 5:19). Ini a tori fu na ogri pisi ten dati, Yehovah e warskow wi: „Go, mi pipel, go na ini den inisei kamra fu yu, èn tapu den doro na yu baka. Kibri yusrefi gi wán momenti nomo, te leki a krutu di mi e krutu sma pasa gowe. Bika luku! Yehovah e komoto na ini a presi fu en fu aksi a sma di e libi na ini a kondre fu gi frantwortu fu a fowtu di a du, èn fu tru, a kondre sa tyari kon na krin taki a kiri sma èn a no sa kibri den sma moro di a kiri” (Yesaya 26:20, 21; Sefania 1:14). A warskow disi ben sori den Dyu fa den ben man tan na libi te Babilon ben o fadon na ini 539 b.G.T. Den wan di ben gi yesi na a warskow ben o tan na ini na oso fu den. Drape den srudati di ben kon na ini den strati fu teki a foto abra, no ben o man du den ogri.
17 Na ini a ten disi, a kan taki „den inisei kamra” fu a profeititori e prenki den tin dusundusun gemeente fu Yehovah en pipel na heri grontapu. Den gemeente disi na wan kibripresi nownow srefi. Den de presi pe Kresten kan kisi kibri na mindri den brada nanga sisa fu den, èn drape den owruman e sorgu gi den na wan lobi-ati fasi (Yesaya 32:1, 2; Hebrewsma 10:24, 25). Disi de so, spesrutu te wi e luku o krosibei a kaba fu a seti fu sani disi de. Efu wi wani tan na libi na a ten dati, dan wi musu gi yesi.—Sefania 2:3.
18. Fa Yehovah sa „kiri a se bubu di de na ini se” dyonsro?
18 Ini a tori fu a ten dati, Yesaya e taki na fesi: „Na a dei dati, Yehovah sa gebroiki a feti-owru fu en di tranga, di bigi èn di krakti, fu poti en prakseri na Lefiatan, a sneki di e gratigrati, iya, na Lefiatan, a kronkron sneki, èn a sa kiri a se bubu trutru di de na ini se” (Yesaya 27:1). San na a disiten „Lefiatan”? Soleki fa a sori, dan dati na „a fosi sneki”, Satan srefi, makandra nanga a godelowsu seti fu sani fu en di a e gebroiki fu feti nanga na Israèl fu Gado (Openbaring 12:9, 10, 17; 13:14, 16, 17). Na ini 1919, Lefiatan no ben man abi krakti tapu Gado en pipel moro. Te fu kaba, Lefiatan no sa de moro kwetikweti (Openbaring 19:19-21; 20:1-3, 10). So bun, Yehovah sa „kiri a se bubu di de na ini se”. Na ini a pisi ten te Lefiatan de na libi ete, no wan-enkri sani di a ben sa pruberi fu du a pipel fu Yehovah ogri, sa abi bun bakapisi di e go nanga langa (Yesaya 54:17). A dyaranti dati e gi wi trowstu fu tru!
„Wan Droifidyari fu Win Di E Skuma”
19. San na situwâsi fu a fikapisi na ini a ten disi?
19 Ala a leti disi di wi e kisi fu Yehovah no e meki wi prisiri? Iya, a e meki wi prisiri srefisrefi! Yesaya e fruteri so moi fa Yehovah en pipel e prisiri. A e skrifi: „Un singi gi en na a dei dati: ’Wan droifidyari fu win di e skuma! Mi, Yehovah, e kibri en. Ibri momenti mi sa gi en watra. So taki no wan sma no e du wan ogri nanga en, meki mi sa kibri en srefi dei nanga neti’” (Yesaya 27:2, 3). Yehovah sorgu gi a „droifidyari” fu en, namku a fikapisi fu na Israèl fu Gado. A sorgu tu gi den kompe fu den di e wroko tranga (Yohanes 15:1-8). Fu di a du dati, meki bun sani e pasa di e gi en nen glori èn di e meki den futuboi fu en na grontapu prisiri srefisrefi.
20. Fa Yehovah e kibri a Kresten gemeente?
20 Wi kan breiti srefisrefi taki Yehovah no atibron moro nanga den salfu futuboi fu en. Na atibron dati ben meki a gi pasi meki den go na ini katibo na yeye fasi na ini 1918. Yehovah srefi e taki: „Mi ati no e bron. Suma sa gi mi maka-busibusi nanga takru wiwiri na ini a feti? Mi sa trapu na den tapu. Na a srefi ten mi sa sutu faya gi den. Noso, meki a hori a fortresi fu mi steifi; meki a suku vrede nanga mi; meki a suku vrede nanga mi” (Yesaya 27:4, 5). Fu de seiker taki den droifibon fu en e tan gi bogobogo „win di e skuma”, dan Yehovah e masi puru iniwan sani di gersi takru wiwiri èn di ben kan kiri den bon. So bun, no meki no wan sma du takru sani di kan pori a Kresten gemeente! Meki ala sma ’hori a fortresi fu Yehovah steifi’, fu di den e suku en bun-ati èn e suku kibri na en. Te wi e du dati, dan wi e suku vrede nanga Gado — wan sani di de so prenspari, taki Yesaya ben taki tu leisi fu en.—Psalm 85:1, 2, 8; Romesma 5:1.
21. Na sortu fasi a fatu gron kon furu nanga „nyanyan”?
21 Moro blesi de: „Na ini den dei di e kon, Yakob sa kisi rutu, Israèl sa meki bromki èn sa sproiti trutru; èn den sa furu a fatu gron nomo nanga a nyanyan di e gro na tapu” (Yesaya 27:6). A vers disi ben kon tru sensi 1919. Dati na wan kefalek moi buweisi fu a makti fu Yehovah. Salfu Kresten furu grontapu nanga „nyanyan”, gosontu nyanyan na yeye fasi. Nanga prisiri den e hori densrefi na den hei markitiki fu Gado, ala di den e libi na ini wan pori grontapu. Èn Yehovah e tan blesi a wroko fu den, so taki moro sma e kon fu dini Gado makandra nanga den. A bakapisi fu disi na taki milyunmilyun kompe fu den, namku den tra skapu, „e du santa diniwroko gi [Gado] . . . dei nanga neti” (Openbaring 7:15). Meki noiti wi no frigiti taki a de wan bigi grani fu tru fu teki a „nyanyan” gi wisrefi èn fu prati dati nanga trawan!
22. Sortu blesi den sma e kisi di e go waka na ini a leti?
22 Na ini den muilek ten disi, dungru e tapu grontapu èn deki dungru e tapu den nationaal grupu. Wi no musu de nanga tangi na ati taki Yehovah e skèin leti na yeye fasi na tapu en pipel? (Yesaya 60:2; Romesma 2:19; 13:12). Gi ala sma di e go waka na ini a leti disi, a de wan sani di e meki na ati fu den firi korostu nownow. A de wan sani di e gi den prisiri tu èn kan meki den kisi têgo libi srefi na ini a ten di e kon. Fu dati ede, ibriwan fu wi di lobi a leti abi bun reide fu opo wi sten fu prèise Yehovah nanga wi heri ati èn fu taki makandra nanga a psalm skrifiman: „Yehovah na a fortresi fu mi libi. Suma sa meki mi skreki? Howpu tapu Yehovah; hori deki-ati èn meki yu ati de tranga. Iya, howpu tapu Yehovah.”—Psalm 27:1b, 14.
Yu E Memre Disi Ete?
• San o pasa nanga den sma di e kwinsi Yehovah en pipel?
• San ben o kon moro furu soleki fa Yesaya ben taki na fesi?
• Na ini sortu „inisei kamra” wi musu tan, èn fu san ede?
• Fu san ede a situwâsi pe Yehovah en pipel de na ini, na wan sani di e meki sma prèise en?
[Aksi fu a tori disi]
[Faki na tapu bladzijde 22]
WAN NYUN BUKU
Moro furu fu den sani di wi ben taki fu den na ini den tu studie-artikel disi, ben pristeri na ini wan lezing na a distrikt kongres gi a yari 2000. Na a kaba fu a lezing, wan nyun buku ben tyari kon na doro. A buku abi leki nen A Profeititori fu Yesaya — Leti gi a Heri Libisma Famiri I. A buku disi abi 416 bladzijde. A e taki finifini fu ibri vers fu den fosi 40 kapitel fu a buku Yesaya.
[Prenki na tapu bladzijde 18]
Soso den regtfardikisma e kisi primisi fu kon na ini Yehovah en „tranga foto”, dati wani taki na ini en organisâsi
[Prenki na tapu bladzijde 19]
Yesaya ben suku Yehovah „na neti”
[Prenki na tapu bladzijde 21]
Yehovah e kibri a „droifidyari” fu en èn a e meki en tyari froktu