Oparâsi Sondro Brudu—„A Sortu Datrayepi Di Moro Nanga Moro Sma Wani”

ONDRO na edeprakseri „Oparâsi ’Sondro Brudu’”, a tijdschrift Maclean’s ben skrifi taki datra na ini heri Kanada du muiti fu „feni nyun fasi di meki taki ini den feifi yari di pasa, oparâsi sondro brudu soleki fa sma e kari dati, kon tron a sortu datrayepi di moro nanga moro sma wani”. Brian Muirhead, wan anesthesist (wan datra di e gi sma dresi fu meki den sribi te den e du oparâsi) di e wroko na a Health Sciences Centre (wan bigi ati-oso) na ini a foto Winnipeg, na wan fu den datra disi. San meki taki a bigin suku tra fasi fu dresi sma sondro fu gebroiki brudutransfusie?

Na ini 1986, Datra Muirhead teki a tyalensi fu du oparâsi tapu wan man di ben abi 70 yari. A man disi ben abi wan sweri di ben brudu na ini en bere. A ben wani wan oparâsi sondro brudu, fu di a ben hori ensrefi na den gronprakseri fu Bijbel leki wan Kotoigi fu Yehovah (Tori fu den Apostel 15:28, 29). Datra Muirhead „pompu wan zoutoplossing (wan sortu dresi) go na ini a skin fu a sikiman disi fu sorgu taki en brudu no saka, wan fasi fu datrayepi di no ben e gebroiki furu fu yepi sma”, na so a tijdschrift Maclean’s e skrifi. „A sani di a du ben abi bun bakapisi, èn a meki taki Muirhead kisi wan moro tranga overtoigi taki ’wi ben e gebroiki tumusi furu brudutransfusie fu dresi sma. Mi ben feni taki a ten ben doro fu luku fa wi kan dresi sma tra fasi.’”

Moro nanga moro sma wani oparâsi sondro brudu, fu di „sma e broko den ede efu nofo brudu sa de fu gebroiki na ini a ten di e kon — èn fu di furu sikisma e frede taki den o kon siki te den kisi wan brudutransfusie”. Tangi fu na ondrosukuwroko di datra du fu feni nyun fasi fu dresi sma, meki a no soso Yehovah Kotoigi wawan kisi winimarki, ma so srefi furu tra sma. „Boiti taki oparâsi sondro brudu e meki taki brudutransfusie no de fanowdu moro ini furu situwâsi, a e sorgu tu taki a kans e kon moro pikin — awansi fa o pikin — taki sma e kon siki fu di den ben kisi brudu di no bun”, na so a tijdschrift Maclean’s e taki. Ma srefi „bun” brudu kan meki taki sma e kisi siki, fu di a brudu disi e swaki a skin fu a sikiman wan pisi ten, so taki a skin no man feti siki.

Fu san ede Yehovah Kotoigi abi a tranga overtoigi taki datra kan dresi sma sondro fu gebroiki brudutransfusie? Kande yu sa wani leisi a brochure Hoe kan bloed uw leven redden? Yehovah Kotoigi sa breiti fu taki fu a brochure nanga yu.