„Masra Ben Kisi wan Opobaka Trutru!”

Prakseri fa den disipel fu Yesus ben sari di sma ben kiri a Masra fu den. Neleki fa a ben de nanga a dedeskin di Yosef fu Arimatea ben poti na ini a grebi-olo, a ben gersi so srefi taki a howpu fu den no ben abi krakti moro. Iniwan fruwakti di den ben abi taki Yesus ben o fri den Dyu fu a katibo fu Rome, ben lasi gowe so srefi.

EFU dati ben de a kaba fu a tori, dan kande den disipel fu Yesus no ben o de moro, neleki fa a pasa nanga den bakaman fu den someni sokari Mesias. Ma Yesus ben de na libi! Soleki fa den Buku fu Bijbel e sori, wan syatu pisi ten baka di a dede, dan den bakaman fu en ben si en na difrenti okasi. Fu dati ede, wan tu fu den ben abi reide fu bari: „Masra ben kisi wan opobaka trutru!”—Lukas 24:34.

Sma ben aksi den disipel fu buweisi taki Yesus trutru ben de a Mesias, soleki fa den ben bribi. Fu du dati, den disipel meki sma si taki na opobaka di Yesus ben kisi fu dede ben de a moro krin buweisi taki a ben de a Mesias. Iya, „nanga bigi krakti den apostel ben tan gi kotoigi fu na opobaka fu Masra Yesus”.—Tori fu den Apostel 4:33.

Efu iniwan sma oiti ben buweisi taki na opobaka fu Yesus ben de wan lei, fu di kande a sma dati ben meki wan fu den disipel erken dati, noso fu di a ben sori trawan taki a dedeskin fu Yesus ben tan na ini a grebi-olo, dan na a bigin srefi Krestendom ben o kon na wan kaba. Ma dati no pasa. Fu di den bakaman fu Yesus ben sabi taki a ben de na libi, dati meki den go na ala presi fu meki na opobaka  fu en bekènti, èn ipi-ipi sma tron bribiman fu Krestes di ben opo baka.

Fu san ede yu tu kan bribi taki Krestes ben kisi wan opobaka? Sortu buweisi de taki a sani disi pasa trutru?

Fu San Ede Wi Musu Poti Prakseri na den Buweisi?

Ala fo Evangelie tori e taki fu na opobaka fu Yesus (Mateus 28:1-10; Markus 16:1-8; Lukas 24:1-12; Yohanes 20:1-29). * Tra pisi fu den Kresten Griki Buku fu Bijbel e taki tu fu na opobaka di Yesus ben kisi fu dede, èn den e du dati na wan fasi di e sori taki a sani disi pasa trutru.

A no de fu fruwondru taki den bakaman fu Yesus meki na opobaka fu en bekènti! Efu a de so taki Gado trutru ben gi en libi baka, dan dati na a moro moi nyunsu di grontapu yere oiti. A sani disi e sori taki Gado de. A e sori so srefi taki Yesus de na libi nownowde.

San dati wani taki gi wi? We, Yesus ben begi: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). Iya, wi kan kisi sabi fu Yesus èn fu en Tata, èn a sabi disi sa gi wi libi. Awansi wi dede, wisrefi kan kisi wan opobaka te wi e handri akruderi a sabi disi, fu di Yesus ben kisi wan opobaka (Yohanes 5:28, 29). Wi kan abi a howpu fu kisi têgo libi na wan paradijs grontapu di sa kisi tiri fu Gado en hemel Kownukondre di de na ini na anu fu en Manpikin, Yesus Krestes, a Kownu fu den kownu.—Yesaya 9:6, 7; Lukas 23:43; Openbaring 17:14.

Fu dati ede, a prenspari srefisrefi taki wi kon sabi efu Yesus trutru kisi wan opobaka fu dede. A abi fu du nanga a libi fu wi now èn so srefi nanga den sani di wi e fruwakti na ini a ten di e kon. Dati meki wi e gi yu deki-ati fu luku finifini san tru fu den fo sani di e buweisi taki Yesus dede èn taki a kisi wan opobaka.

Yesus Dede Trutru na wan Postu

Wan tu tweifriman e taki dati, ala di den ben spikri Yesus na wan postu, a no tru taki a dede drape. Den e taki dati a ben de fu dede nomo èn taki a kowru fu a grebi-olo meki a kisi ensrefi baka. Toku, ibri sani di skrifi fu a tori disi e sori taki na a dedeskin fu Yesus sma ben poti na ini a grebi-olo.

Fu di sma ben kiri Yesus na publiki, dan kotoigi ben de di ben si taki a dede trutru na a postu. A legre ofsiri di ben abi a frantwortu fu kiri Yesus, ben kotoigi taki Yesus dede trutru. Na ofsiri dati ben sabi en wroko bun, èn a wroko fu en ben abi na ini en tu taki a ben musu luku efu wan sma dede trutru. Wan tra sani de taki a Tiriman fu Rome, Pontius Pilatus, gi Yosef fu Arimatea a dedeskin fu Yesus fu beri en, baka di a ben sabi seiker taki Yesus dede trutru.—Markus 15:39-46.

A Grebi-olo Ben Leigi

A leigi grebi-olo ben de a fosi buweisi gi den disipel taki Yesus ben kisi wan opobaka èn a buweisi dati tru srefisrefi. Den ben beri Yesus na ini wan nyun grebi-olo di sma noiti bifo ben gebroiki fu beri sma. A grebi-olo ben de krosibei fu a presi pe den ben spikri Yesus na wan postu èn na a ten dati a no ben muilek srefisrefi fu feni a grebi-olo (Yohanes 19:41, 42). Ala den Evangelie tori e taki dati di den mati fu Yesus ben doro na a grebi-olo tapu a di fu tu mamanten baka di a dede, dan en dedeskin no ben de drape moro.—Mateus 28:1-7; Markus 16:1-7; Lukas 24:1-3; Yohanes 20:1-10.

Den feanti fu Yesus èn den mati fu en, no ben man bribi taki a grebi-olo ben leigi. Den feanti fu en langa ten kaba ben suku fu kiri en. Now di den ben doro a marki dati, den sorgu taki wan waktiman ben hori wakti na fesi a grebi èn taki a grebi-olo ben tapu na so fasi taki a ben o muilek fu opo  en. Toku, a mamanten fu a fosi dei fu a wiki, a grebi-olo ben leigi.

A ben de so taki den mati fu Yesus ben teki en dedeskin puru fu a grebi-olo? A no gersi fu de so, fu di den Evangelie e sori taki den ben sari srefisrefi baka di sma ben kiri en. Moro fara, den disipel fu en seiker no ben o wani meki taki sma ben frufolgu den èn kiri den gi wan sani di den ben sabi taki na wan lei tori.

Suma ben teki a dedeskin fu Yesus puru fu a grebi-olo? Den feanti fu Yesus seiker no ben teki a dedeskin. Efu den ben du dati, dan a de seiker taki den ben o teki en baka ten fu buweisi taki den disipel ben lei fu di den ben taki dati Yesus ben kisi wan opobaka èn ben de na libi. Ma no wan fu den sani dati pasa, fu di Gado ben kon na ini a tori.

Wan tu wiki baka dati, den feanti fu Yesus no ben du noti fu sori taki Petrus ben e lei di a taki: „Man fu Israèl, yere den wortu disi: Yesus fu Nasarèt, wan man di Gado sori unu na publiki nanga yepi fu krakti wroko nanga wondruwroko nanga marki, di Gado ben meki a du na un mindri, soleki fa unu srefi sabi, bika David e taki fu en: ’Ala ten Yehovah ben de na mi fesi . . . Moro fara, mi skin srefi sa rostu na ini howpu, bika yu no sa libi mi sili na ini Hades, èn yu no sa gi pasi taki a sma di de loyaal na yu, e si pori.’”—Tori fu den Apostel 2:22-27.

Furu Sma Si Yesus Baka Di A Ben Kisi wan Opobaka

Na ini a buku Tori fu den Apostel, na Evangelie skrifiman Lukas ben taki: „Nanga furu bun buweisi so srefi [Yesus] ben sori ensrefi libilibi na [den apostel] baka di a ben pina, èn den si en fotenti dei langa èn a ben fruteri den sani fu a kownukondre fu Gado” (Tori fu den Apostel 1:2, 3). Wan tu fu den disipel ben si Yesus na difrenti okasi baka di a ben kisi wan opobaka. Den ben si en na ini wan dyari, na tapu pasi, di den ben nyan, èn na a Se fu Tiberias.—Mateus 28:8-10; Lukas 24:13-43; Yohanes 21:1-23.

Sma di e krutu sani e tweifri efu sma ben si Yesus trutru na den okasi disi. Den e taki dati den skrifiman srefi ben meki den tori disi, èn den e taki so srefi dati den tori disi fu den skrifiman e difrenti fu makandra. Fu taki en leti, fu di den Evangelie skrifiman e fruteri den tori pikinso difrenti fu makandra, dan dati e buweisi taki den no ben meki mofo fu meki den tori disi. Wi e kon sabi moro fu Yesus te wan skrifiman e skrifi moro fini fu den tra tori di abi fu du nanga spestrutu sani di pasa na ini a libi fu Krestes di a ben de na grontapu.

A de so taki den sma di ben si Yesus baka di a ben kisi wan opobaka, ben si fisyun? Sma no kan taki dati srefisrefi, fu di so furu sma ben si en. Den sma di ben si en ben de fisiman, umasma, wan srudati, nanga na apostel Tomas srefi di ben tweifri, èn di ben bribi soso di a ben si nanga en eigi ai taki Yesus ben opo baka na dede (Yohanes 20:24-29). Na wan tu okasi, den disipel fu Yesus no ben erken en wantewante leki a Masra fu den di ben kisi wan opobaka. Wan leisi, moro leki 500 sma ben si en, èn moro furu fu den ben de na libi ete di na apostel Paulus ben taki fu a srefi okasi dati fu buweisi taki na opobaka na wan tru tori.—1 Korentesma 15:6.

Yesus Di De na Libi Abi Krakti Tapu Sma

Sma no musu si na opobaka fu Yesus leki wan sani nomo di wi musu kon sabi moro fu en noso  di musu tron wan yu-o-hari-yu-o-trusu. Furu sma na ala sei feni bun winimarki fu di Yesus de na libi. Sensi a fosi yarihondro, ipi-ipi sma di no ben broko den ede nanga Krestendom noso di ben gens a bribi disi, now de seiker srefisrefi taki a de a tru bribi. San meki taki den sma disi kenki? Di den luku san Bijbel e taki, dan den kon si taki Gado gi Yesus wan opobaka fu libi leki wan hei yeye meki sani na ini hemel (Filipisma 2:8-11). Den abi bribi na ini Yesus èn na ini a seti fu Yehovah Gado di e tyari frulusu kon nanga yepi fu a frulusu-ofrandi fu Krestes (Romesma 5:8). Den sortu sma disi feni trutru koloku, fu di den e du a wani fu Gado èn fu di den e libi akruderi den leri fu Yesus.

Poti prakseri na san a ben wani taki fu de wan Kresten na ini a fosi yarihondro. Kresten no ben de sma nanga biginen, makti, noso gudu. Kontrari fu dati srefisrefi, furu fositen Kresten ’nanga prisiri ben teki a fufuru di sma fufuru den gudu fu den’ fu a bribi fu den ede (Hebrewsma 10:34). Wan sma di ben de wan Kresten ben musu de klariklari fu nyan pina nanga frufolgu èn na ini furu kefal a libi disi ben abi dede leki bakapisi.

Bifo den sma disi ben tron bakaman fu Krestes, dan wan tu fu den ben abi bun okasi fu kisi biginen èn fu kon gudu. Saulus fu Tarsus ben kisi leri fu Gamalièl, wan barinen leriman fu Wet, èn den Dyu ben bigin si en leki wan prenspari sma (Tori fu den Apostel 9:1, 2; 22:3; Galasiasma 1:14). Toku, Saulus ben tron na apostel Paulus. Makandra nanga furu trawan a drai baka gi a biginen nanga a makti di a grontapu dati ben kan gi en. Fu san ede? A ben du dati so taki a ben kan tyari wan tru boskopu fu howpu di abi leki fondamenti den pramisi fu Gado èn so srefi a tru tori taki Yesus Krestes ben kisi wan opobaka fu dede (Kolosesma 1:28). Den ben de klariklari fu pina gi wan sani di den ben sabi taki a tru.

Na ini a ten disi hondrohondro milyun sma e du a srefi sani disi. Den sma disi de fu feni na ini den gemeente fu Yehovah Kotoigi na heri grontapu. Den Kotoigi e gi yu wan switi kari fu kon na a alayari Memrefesa fu a dede fu Krestes. A Memrefesa disi sa de tapu 8 april 2001, baka sondongo. Den Kotoigi fu Yehovah sa breiti te yu de na a Memrefesa disi èn so srefi na ala den konmakandra fu den di de fu studeri Bijbel. Den konmakandra disi e hori na ini den Kownukondre zaal fu den.

Fu san ede yu no e kon sabi moro fu a dede nanga na opobaka fu Yesus èn so srefi fu a libi nanga den leri fu en? A e gi wi wan kari fu kon na en (Mateus 11:28-30). Handri now fu kisi soifri sabi fu Yehovah Gado èn fu Yesus Krestes. Te yu e du dati dan dati kan tyari têgo libi gi yu na ondro a Kownukondre fu Gado di de na ini na anu fu en lobi Manpikin.

[Futuwortu]

[Prenki na tapu bladzijde 7]

Hondrohondro milyun sma e feni trutru koloku leki bakaman fu Yesus Krestes

[Sma di abi a reti fu a prenki na tapu bladzijde 6]

A teki puru fu a Self-Pronouncing Edition of the Holy Bible, di abi a King James Version nanga a Revised Version na ini