Paulus E Seti Sani fu Yepi den Santawan

GI TRU Kresten, yeye afersi prenspari moro leki ala tra sani. Toku den wani si tu taki sani e waka bun na skin sei nanga trawan. Kresten furutron sorgu gi sma di abi problema. A lobi di Kresten abi gi den brada nanga sisa fu den, e buweigi den fu yepi tra brada nanga sisa di de na nowtu.—Yohanes 13:34, 35.

A lobi di Paulus ben abi gi den yeye brada nanga sisa fu en, ben buweigi en fu seti sani taki den gemeente na ini Akaya, Galasia, Masedonia, nanga a distrikt Asia ben poti moni makandra. Fu san ede dati ben de fanowdu? Fa den ben orga sani fu yepi trawan? Fa den gemeente ben si a sani disi? Èn fu san ede wi musu poti prakseri na den sani di pasa?

A Situwâsi fu a Gemeente na Yerusalem

Tapu a Pinksterfesa fu 33 G.T., Dyu nanga proselietsma di ben de fu wan tra presi, tron disipel. Baka a Pinksterfesa den tan wan pisi ten na ini Yerusalem fu kon sabi a tru bribi moro bun. Pe a ben de fanowdu, tra anbegiman ben breiti fu yepi pai den kostu fu den sma disi di ben tan moro langa drape (Tori fu den Apostel 2:7-11, 41-44; 4:32-37). Den Dyu di ben wani wan fri nâsi, ben gi grupu sma deki-ati fu meki opruru èn fu du ogri. A kan de so taki a dyugudyugu disi di ben de na mindri den borgu na ini Yerusalem, ben meki taki den Kresten disi ben abi moro yepi fanowdu. So bun, fu sorgu taki no wan bakaman fu Krestes ben o de nanga angri, meki pôti weduwe ben kisi nyanyan ala dei (Tori fu den Apostel 6:1-6). Herodes ben frufolgu a gemeente doronomo, èn na wan sani fu 46 G.T., wan angriten pina den sma na ini Yudea. Gi den bakaman fu Yesus, ala den sani disi kande ben abi leki bakapisi san Paulus ben kari „pina”, „frufolgu”, nanga „a fufuru di sma fufuru den gudu fu [den]”.—Hebrewsma 10:32-34; Tori fu den Apostel 11:27–12:1.

Krosibei fu a yari 49 G.T, a situwâsi ben takru ete. Fu dati ede, baka di den brada ben bosroiti taki Paulus ben o preiki spesrutu gi den Heiden, dan Petrus, Yakobus, nanga Yohanes gi en deki-ati fu „memre den pôtiwan”. Na dati Paulus ben meki muiti fu du.—Galasiasma 2:7-10.

Paulus E Seti Sani fu Tyari Moni Kon Makandra

Paulus ben abi a frantwortu fu a moni di ben tyari kon makandra gi den pôti Kresten na ini Yudea. Krosibei fu a yari 55 G.T., a ben taigi den Korentesma: „Ini a tori fu a moni di o tyari kon makandra gi den santawan, unu du so tu neleki fa mi ben gi komando na den gemeente fu Galasia. Ibri fosi dei fu a wiki, meki ibriwan fu unu poti wan sani na wan sei na ini en eigi oso èn kibri en, akruderi a fasi fa sani go bun gi en . . . [Dan] iniwan man di unu sa skrifi fu en na ini brifi taki a bun fu kisi a frantwortu disi, mi sa seni den fu tyari a bun presenti fu unu go na Yerusalem” (1 Korentesma 16:1-3). Wán yari baka dati, Paulus ben taki dati Masedonia nanga Akaya ben tyari moni kon makandra tu. Èn di den seni a moni di den ben tyari  kon makandra go na Yerusalem, sma fu a Distrikt Asia ben de drape, san ben sori taki den gemeente fu a kontren dati ben gi wan sani tu.—Tori fu den Apostel 20:4; 2 Korentesma 8:1-4; 9:1, 2.

No wan sma no ben dwengi wan trawan fu gi moro leki san a ben man gi. Na presi fu dati, den ben tyari sani kon na ini balansi so taki na ini Yerusalem nanga Yudea, den santawan drape di no ben abi nofo ben man kisi san ben tan abra (2 Korentesma 8:13-15). „Meki ibriwan sma du soleki fa a bosroiti na ini en ati”, Paulus ben taki, „no nanga a firi fu no wani du en noso na ondro dwengi, bika Gado lobi wan sma di e gi nanga prisiri.”—2 Korentesma 9:7.

Na apostel ben gi den Korentesma bun reide fu gi sani nanga prisiri. Yesus ’ben kon pôti fu den ede, so taki den ben sa kon gudu’ na yeye fasi (2 Korentesma 8:9). A no de fu taki dati den ben o wani gi sani nanga prisiri neleki en. Moro fara, fu di Gado ben e meki den kon gudu „fu ibri sortu bun-ati”, dan a ben fiti taki den ben yepi sorgu gi den sani di den santawan ben abi fanowdu.—2 Korentesma 9:10-12.

A Denki fu den Sma Di Ben E Teki Prati

Wi kan kon sabi moro bun san a wani taki fu gi sani nanga wi friwani, te wi e poti prakseri na a denki fu den sma di ben poti moni kon makandra gi den santawan na ini a fosi yarihondro. A moni di den ben poti makandra no ben sori wawan taki den ben broko den ede nanga pôti tra anbegiman fu Yehovah. A ben sori so srefi taki wan banti fu bradafasi ben de na mindri den Dyu Kresten nanga den Kresten di ben de Heiden fosi. Den Heiden nanga den Dyu disi di ben gi moni fu yepi makandra èn so srefi ben teki moni fu makandra, ben sori na so wan fasi taki wánfasi nanga matifasi ben de na mindri den. Boiti taki den ben prati materia sani nanga makandra, den ben prati sani na yeye fasi tu.—Romesma 15:26, 27.

A kan de so taki na ini a bigin, Paulus no ben gi den Kresten fu Masedonia wan kari fu teki prati — fu di densrefi ben pôti sote. Ma den ’tan begi en nanga tranga fu kan kisi a grani fu gi sani nanga prisiri’. A no de fu taki dati, ala di den ben e kisi „wan bigi tesi di ben kwinsi den”, toku den gi nanga prisiri „moro leki san den ben man”! (2 Korentesma 8:1-4) Soleki fa a sori, dan den ben kisi bigi tesi fu di sma ben feni taki a wet fu Rome no ben gi pasi na a bribi fu den. Fu dati ede wi kan frustan taki den ben o firi gi den brada fu den na Yudea, di ben kisi kwinsi fu den srefi sortu problema disi.—Tori fu den Apostel 16:20, 21; 17:5-9; 1 Tesalonikasma 2:14.

Na ini a bigin den Korentesma ben de fayafaya fu poti moni kon makandra. Ala di Paulus ben gebroiki a faya fu den fu gi den Masedoniasma deki-ati, toku den Kresten na ini Korente no ben de so fayafaya moro. Na apostel ben taki now fu den Masedoniasma fu sori fa den ben gi sani nanga prisiri. A ben du dati fu gi den Korentesma deki-ati. Na apostel Paulus ben feni en fanowdu fu memre den taki a ten ben doro fu klari a wroko di den ben bigin wan yari na fesi. San ben pasa?—2 Korentesma 8:10, 11; 9:1-5.

Titus ben bigin tyari moni kon makandra na ini Korente, ma kande problema meki taki a sani disi no go doro. Baka di a go teki rai na Paulus di ben de na ini Masedonia, dan Titus drai go baka na Korente nanga tu tra brada fu gi a gemeente drape krakti èn fu tyari den lasti moni di sma ben gi, kon makandra. A kan de so taki wan tu sma ben abi a takru denki taki Paulus ben pruberi fu mesbroiki den Korentesma. Kande na fu dati ede a seni dri man go fu klari a wroko disi di ben abi fu du nanga a moni di sma ben gi. A seni taigi den sma drape taki iniwan fu den brada disi ben bun fu teki a frantwortu fu a wroko disi. „Wi e luku bun taki no wan sma e feni fowtu na wi di abi fu du nanga a moni di sma gi nanga den friwani, èn di de na wi anu”, Paulus ben taki. „Bika wi ’e sorgu taki ala sani e waka na wan eerlijk fasi, a no ini  Yehovah en ai wawan, ma so srefi na ini na ai fu sma’. ”—2 Korentesma 8:6, 18-23; 12:18.

Den E Tyari a Moni Di Sma Ben Gi Go na Yerusalem

Na a ten fu a lente fu 56 G.T., a moni di sma ben gi ben de nofo kaba fu tyari dati go na Yerusalem. Den sma di ben gi a moni ben seti wan grupu fu sma fu tyari a moni gowe, en Paulus ben o go nanga a grupu disi. Tori fu den Apostel 20:4 e taki: „Den sma di ben go nanga en ben de Sopater a manpikin fu Pirus fu Berea, Aristarkus nanga Sekundus fu den Tesalonikasma, nanga Gayus fu Derbe, nanga Timoteus, èn fu a distrikt fu Asia Tikikus nanga Trofimus.” Buweisi de taki Lukas ben de na den mindri tu, èn a kan de so taki a ben teki presi gi den Kresten na ini Filipi. So bun, pikinmoro neigi man ben go na Yerusalem fu du a wroko disi.

A sabiman Dieter Georgi e taki: „A moni di den brada ben tyari kon makandra, ben musu de furu. Efu dati no ben de so, dan a no ben o de fanowdu taki Paulus nanga someni sma ben musu tyari a moni gowe, èn a no ben o de fanowdu so srefi fu pai someni kostu.” Boiti taki a grupu disi ben de fu gi sma a dyaranti taki noti no ben o pasa nanga a moni, den ben kibri Paulus so srefi fu no kisi porinen taki a ben handri na wan kruka fasi nanga a moni. Den sma di ben go nanga Paulus na den santawan na ini Yerusalem, ben de fu den Heiden gemeente.

A grupu ben o seiri fu Korente go na Siria, èn den ben o doro na Yerusalem na a ten fu a Paskafesa. Ma di den yere taki sma ben meki mofo fu kiri Paulus, dan den tyari wan kenki kon ini a tori (Tori fu den Apostel 20:3). Kande den feanti fu Paulus ben seti sani fu kiri en na se.

Tra sani ben de di ben gi Paulus broko-ede. Bifo a ben go na Yerusalem, a skrifi aksi den Kresten na ini Rome fu begi taki ’a sa kisi frulusu fu den sma na ini Yudea di no de na bribi èn taki den santawan ben o feni a wroko di a ben du gi Yerusalem bun’ (Romesma 15:30, 31). Ala di den santawan seiker ben o de nanga bigi tangi te den ben o kisi a moni, a kan de so taki Paulus ben broko en ede nanga den problema di ben o kon na mindri a Dyu pipel te a ben doro na Yerusalem.

A de seiker taki Paulus ben memre den pôtiwan. Ala di den Buku fu Bijbel no e fruteri o ten den santawan ben kisi a moni, toku wánfasi ben kon de di den brada tyari a moni go gi den. So srefi Kresten di ben de Heiden fosi ben man sori den yeye brada nanga sisa fu den na ini Yudea, taki den ben de nanga tangi gi den yeye gudu di den ben kisi fu den. A go di Paulus go na a tempel syatu baka di a ben doro na ini Yerusalem, meki taki wan bigi opruru kon èn den sroto en. Ma te fu kaba, a sani disi ben gi en na okasi fu gi kotoigi na tiriman nanga kownu.—Tori fu den Apostel 9:15; 21:17-36; 23:11; 24:1–26:32.

Den Sani Di Wi E Gi fu Yepi Trawan na ini a Ten Disi

Fu sensi a fosi yarihondro, furu sani kenki — boiti den prenspari gronprakseri. A bun taki Kresten e kisi fu yere te trawan abi moni fanowdu. Iniwan sani di den e gi fu yepi sma di de na nowtu, den musu gi nanga den friwani, èn lobi gi Gado nanga tra sma musu buweigi den fu du dati.—Markus 12:28-31.

Den sani di den brada ben du fu yepi den santawan na ini a fosi yarihondro, e sori taki den sma di e teki frantwortu fu a moni di sma gi musu orga sani bun, èn ala sani musu waka na wan eerlijk fasi srefisrefi. A tru taki Yehovah Gado sabi san wi abi fanowdu, èn a e sorgu gi den futuboi fu en so taki ala di problema e miti den, den kan tan prati a bun nyunsu fu a Kownukondre nanga trawan (Mateus 6:25-34). Ma wi alamala kan yepi du wan sani, awansi wi gudu efu no. Na so fasi, ’a sma di abi furu no sa abi tumusi furu, èn a sma di abi pikinso no sa mankeri noti’.—2 Korentesma 8:15.