Prakseri den Sani fu a Yeye èn Tan na Libi!
Prakseri den Sani fu a Yeye èn Tan na Libi!
„Te wan sma e prakseri den sani fu a yeye, dan a sa libi.”—ROMESMA 8:6.
1, 2. Sortu difrenti na mindri „skin” nanga „yeye”, Bijbel e tyari kon na krin?
A NO makriki srefisrefi fu tan abi wan bun nen na fesi Gado leki wan sma di e tyari ensrefi na wan krin fasi. Wi e libi na ini wan libimakandra di pori, fu di den sma na ini nomonomo wani satisferi den lostu fu a skin. Ma den Buku fu Bijbel e tyari a difrenti na mindri „skin” nanga „yeye” kon na krin fu di den e sori taki, te wi e meki a sondu skin basi wi, dan dati sa tyari takru bakapisi kon, ma te wi e meki a santa yeye fu Gado tiri wi, dan dati sa meki wi kisi blesi.
2 Fu eksempre, Yesus Krestes ben taki: „Na a yeye e gi libi; a skin no warti noti. Den wortu di mi taigi unu, dati na yeye nanga libi” (Yohanes 6:63). Na apostel Paulus ben skrifi go na den Kresten na Galasia taki: „Den lostu fu a skin de kontrari a yeye, èn a yeye de kontrari a skin; bika den tu sani disi e gens makandra” (Galasiasma 5:17). Paulus ben taki tu: „A sma di e sai nanga en skin na prakseri, sa koti porifasi fu en skin, ma a sma di e sai nanga a yeye na prakseri, sa koti têgo libi fu a yeye.”—Galasiasma 6:8.
3. San wi abi fanowdu fu kon fri fu takru lostu nanga denki?
3 Yehovah en santa yeye — en wroko krakti — kan puru takru „lostu fu a skin” krinkrin. A kan sorgu tu taki wi sondu skin no e meki wi du sani di e tyari pori kon (1 Petrus 2:11). Efu wi wani kon fri fu a basi di takru denki e basi wi, dan wi abi Gado en yeye tranga fanowdu fu yepi wi, fu di Paulus ben skrifi: „Te wan sma e prakseri den lostu fu a skin nomo, dan a sa dede, ma te wan sma e prakseri den sani fu a yeye, dan a sa libi èn abi vrede” (Romesma 8:6). San a wani taki fu prakseri den sani fu a yeye?
„Prakseri den Sani fu a Yeye”
4. San a wani taki fu „prakseri den sani fu a yeye”?
4 Di Paulus ben skrifi taki wi musu „prakseri den sani fu a yeye”, dan a ben gebroiki wan Griki wortu di e sori go na a fasi fa wan sma e ’si sani, noso e denki, noso a marki di a e suku fu doro’. Wan werkwortu di abi fu du nanga a Griki wortu disi, wani taki „fu abi wan spesrutu fasi fu denki”. So bun, te wan sma e prakseri den sani fu a yeye, dan dati wani taki dati a wroko krakti fu Yehovah e tiri en, e wroko na en tapu, èn e gi en deki-ati fu du sani. A wani taki dati wi de klariklari fu meki Gado en yeye tiri wi denki, den firi fu wi, èn den muiti fu wi te wi e suku fu doro wan marki.
5. Omeni krakti a santa yeye musu abi na wi tapu?
5 Paulus ben sori krin omeni krakti a santa yeye musu abi na wi tapu, di a ben taki dati wi musu de ’srafu fu a yeye’ (Romesma 7:6). Fu di Kresten e bribi na ini a frulusu-ofrandi fu Yesus, meki sondu no e basi den moro. Na so fasi den „dede” leki sma di fosi ben de srafu fu sondu (Romesma 6:2, 11). Den sma disi di dede na agersi fasi ini a tori disi, de na libi ete na skin sei. Den kon fri now fu waka baka Krestes leki „srafu fu regtfardikifasi”.—Romesma 6:18-20.
Wan Trutru Bigi Kenki
6. Sortu kenki den sma e meki di e tron „srafu fu regtfardikifasi”?
6 Te sma di de „srafu fu sondu” e kenki den libi fu dini Gado leki „srafu fu regtfardikifasi”, dan dati na trutru wan bigi kenki. Paulus ben taki fu wan tu sma di ben meki a kenki disi, di a ben skrifi: ’Unu wasi kon krin, unu kon santa, den fruklari unu regtfardiki ini a nen fu wi Masra Yesus Krestes èn nanga a yeye fu wi Gado.’—Romesma 6:17, 18; 1 Korentesma 6:11.
7. Fu san ede a prenspari fu si sani neleki fa Yehovah e si den?
7 Efu wi wani kenki wi libi na so wan bun fasi tu, dan wi musu leri fosi fa Yehovah e denki fu sani. Hondrohondro yari na fesi, a psalm skrifiman David ben begi Gado fayafaya: „Meki mi kon sabi den pasi fu yu, o Yehovah . . . Meki mi waka na ini yu waarheid èn leri mi” (Psalm 25:4, 5). Yehovah ben arki David. A kan piki den disiten futuboi fu en tu efu den e begi na so wan fasi. Den pasi nanga a waarheid fu Gado krin èn den santa. Fu dati ede, te wi e denki dipi fu den, dan dati sa de wan yepi gi wi te wi e kisi a firi fu satisferi takru lostu fu a skin.
Gado Wortu Prenspari
8. Fu san ede a prenspari srefisrefi fu studeri Bijbel?
8 Gado ben gebroiki en yeye fu meki sma skrifi en Wortu, a Bijbel. Fu dati ede, wan prenspari fasi fa wi kan meki a yeye dati wroko na wi tapu na fu leisi èn studeri a Bijbel — ibri dei efu a kan (1 Korentesma 2:10, 11; Efeisesma 5:18). Te wi e furu wi denki èn wi ati nanga Bijbel waarheid èn nanga Bijbel gronprakseri, dan dati sa yepi wi fu kakafutu gi sani di kan pori wi yeyefasi. Iya, te wi e kisi tesi fu du hurudu, dan Gado en yeye kan meki wi memre Bijbel frumane nanga gronprakseri di kan tiri wi. Den kan tranga wi bosroiti fu handri soleki fa Gado wani (Psalm 119:1, 2, 99; Yohanes 14:26). Fu dati ede, no wan sani kan kori wi fu du fowtu sani.—2 Korentesma 11:3.
9. Fa bijbelstudie e tranga wi bosroiti fu tan hori a banti di wi abi nanga Yehovah?
9 Te wi e go doro fayafaya fu studeri den Buku fu Bijbel seryusu ala di wi e gebroiki den Bijbel publikâsi, dan a yeye fu Gado e bigin abi krakti na tapu a denki nanga na ati fu wi. Na so fasi, wi e kisi moro lespeki gi den markitiki fu Yehovah. A banti di wi abi nanga Gado e kon de a moro prenspari sani na ini wi libi. Te wi e kisi tesi, dan wi no e tan prakseri a prisiri di kande wi sa abi te wi e du sondu. Na presi fu dati, wi e broko wi ede moro furu nanga fa wi kan tan hori wi soifri retifasi na Yehovah. Te wi e warderi a matifasi di wi abi nanga en, dan dati e gi wi deki-ati fu feti nanga ibri prakseri noso firi di ben sa kan pori noso broko a matifasi dati.
„O Fa Mi Lobi Yu Wet!”
10. Fu san ede wi musu hori wisrefi na a wet fu Yehovah te wi wani de sma di e prakseri den sani fu a yeye?
10 Efu wi wani de sma di e prakseri den sani fu a yeye, dan a sabi wawan fu Gado Wortu no de nofo. Kownu Salomo ben frustan den markitiki fu Yehovah heri bun, ma na a kabapisi fu en libi a no ben hori ensrefi na den moro (1 Kownu 4:29, 30; 11:1-6). Efu wi de klariklari fu poti prakseri na yeye afersi, dan wi sa frustan taki a no de nofo fu sabi wawan san skrifi na ini Bijbel, ma taki wi musu hori wisrefi na a wet fu Gado nanga wi heri ati. Dati wani taki dati wi musu ondrosuku den markitiki fu Yehovah finifini èn wi musu du muiti fayafaya fu hori wisrefi na den. A psalm skrifiman ben abi so wan denki. A ben singi: „O, fa mi lobi yu wet! Heri dei mi wani poti prakseri na en” (Psalm 119:97). Te wi wani hori wisrefi na a wet fu Gado trutru, dan dati e buweigi wi fu sori den eigifasi fu Gado na ini wi libi (Efeisesma 5:1, 2). Na presi taki wi no man yepi wisrefi te a firi fu du ogri e tesi wi, dan wi e sori a froktu fu a yeye. Te wi abi na angri fu plisi Yehovah, dan dati e meki wi drai baka gi den takru „wroko fu a skin”.—Galasiasma 5:16, 19-23; Psalm 15:1, 2.
11. Fa yu ben sa fruklari taki Yehovah wani kibri wi nanga en wet di e taki dati wi no musu du hurudu?
11 Fa wi kan kisi bigi lespeki nanga lobi gi a wet fu Yehovah? Wan fasi fa wi kan du dati na fu ondrosuku finifini sortu wini wi kan kisi fu a wet. Prakseri fu a wet fu Gado di e taki dati tu sma musu trow nanga makandra fosi, bifo den kan abi seks demakandra. A e taki tu dati sma no mag du hurudu nanga sutadu (Hebrewsma 13:4). Wi e misi wan bun sani te wi e hori wisrefi na a wet disi? Wan lobi-ati hemel Tata ben sa meki wan wet di e meki wi lasi wan sani di bun gi wi? Kwetikweti! Luku san e pasa na ini a libi fu someni sma di no e libi akruderi den markitiki fu Yehovah. Te den de nanga bere sondro taki den wani dati, dan den e puru bere, noso den e trow tumusi yongu sondro fu de koloku na ini a trowlibi fu den. Furu sma musu kweki wan pikin sondro taki den abi wan masra noso wefi. Moro fara, den wan di e du hurudu kan kisi siki di sma e gi trawan nanga yepi fu seks (1 Korentesma 6:18). Èn efu wan futuboi fu Yehovah e du hurudu, dan dati kan meki en brokosaka krinkrin. Te a e pruberi fu no firi a fonfon fu en konsensi, dan dati kan meki taki a no man sribi na neti, èn a kan bruya srefisrefi (Psalm 32:3, 4; 51:3). A no de krin fu si taki Yehovah wani kibri wi nanga en wet di e taki dati wi no musu du hurudu? Iya, wi kan kisi furu wini trutru te wi e tan tyari wisrefi na wan krin fasi!
Begi Yehovah fu Yepi Yu
12, 13. Fu san ede a fiti fu begi te a firi fu du sondu e trobi wi?
12 Efu wi wani prakseri den sani fu a yeye, dan wi musu begi na wan opregti fasi. A fiti te wi e aksi fu Gado en yeye yepi wi, bika Yesus ben taki: „Efu unu . . . sabi fa fu gi bun presenti na den pikin fu unu, omeni moro dan a Tata di de na hemel, sa gi santa yeye na den wan di e aksi en fu dati!” (Lukas 11:13). Wi kan taki na ini begi taki wi abi a yeye tranga fanowdu fu yepi wi nanga wi swakifasi (Romesma 8:26, 27). Te wi e si taki lostu noso denki fu du sondu e basi wi, noso te wan tra bribiman e si dati èn e taki nanga wi fu dati, dan a ben sa bun fu taki finifini fu a problema na ini begi. Wi musu aksi Gado tu fu yepi wi kakafutu gi den lostu noso prakseri disi.
13 Yehovah kan yepi wi fu poti prakseri na sani di regtfardiki, di krin, di bun, èn di de fu prèise. A bun fu begi en na wan opregti fasi, so taki „a vrede fu Gado” sa kibri wi ati nanga wi frustan! (Filipisma 4:6-8). Fu dati ede, meki wi begi Yehovah fu yepi wi fu ’feti baka regtfardikifasi, a gi di wi e gi wisrefi na ini a dini fu Gado, fu feti baka bribi, lobi, horidoro, safri-atifasi’ (1 Timoteus 6:11-14). Te wi e kisi a yepi fu wi hemel Tata, dan tranga lostu nanga tesi no sa kon so hebi taki wi no man du noti fu basi den. Na presi fu dati, wi sa abi a vrede na ini wi libi di Gado e gi.
No Meki a Yeye Firi Sari
14. Fu san ede Gado en yeye de wan sani di e gi wi deki-ati fu de krin?
14 Lepi futuboi fu Yehovah e du san Paulus ben gi leki rai: „No kiri a faya fu a yeye” (1 Tesalonikasma 5:19). Fu di a yeye fu Gado na „a yeye fu santafasi”, meki a de krin, soifri, santa (Romesma 1:4). So bun, te a yeye dati e wroko na wi tapu, dan dati e gi wi deki-ati fu de santa noso krin. A e yepi wi fu tan libi wan krin libi fu di wi e gi yesi na Gado (1 Petrus 1:2). Efu wi ben sa du iniwan takru sani, dan dati e sori taki wi no e warderi a yeye fu Gado, èn dati kan abi takru bakapisi. Fa so?
15, 16. (a) Fa wi ben sa kan meki Gado en yeye firi sari? (b) Fa wi kan sorgu taki wi no e meki Yehovah en yeye firi sari?
15 We, Paulus ben skrifi: „Unu no musu meki a santa yeye fu Gado firi sari; Gado ben gebroiki en fu gi unu wan marki, so taki unu abi a dyaranti taki wan dei unu sa kisi frulusu nanga yepi fu a lusu-paiman” (Efeisesma 4:30). Den Buku fu Bijbel e taki fu Yehovah en yeye leki wan marki, noso wan ’panti fu a sani di ben musu kon’, èn di getrow salfu Kresten kisi. Èn dati na a libi na hemel pe den no kan dede (2 Korentesma 1:22; 1 Korentesma 15:50-57; Openbaring 2:10). Gado en yeye kan tiri den salfuwan èn den kompe fu den di abi a howpu fu libi na grontapu, fu tan getrow na ini den libi. So srefi, a kan yepi den fu wai pasi gi sondu wroko.
16 Na apostel ben warskow sma fu no lei, fu no fufuru, fu no tyari densrefi na wan fasi di e gi syen èn so moro fara. Efu wi ben sa gi wisrefi pasi fu du den sani dati, dan wi ben o du sani di de kontrari a rai fu Gado Wortu di skrifi ondro a krakti fu santa yeye (Efeisesma 4:17-29; 5:1-5). Efu wi ben sa du dati, dan wi ben o meki Gado en yeye firi sari, èn wi no wani du dati kwetikweti. Fu dati ede, efu iniwan fu wi no wani teki a rai fu Yehovah en Wortu, dan wi ben kan kisi denki noso firi di ben kan meki wi du sondu fu espresi èn dati kan meki taki Gado no feni wi bun moro (Hebrewsma 6:4-6). Kande wi no e du wan sondu fu espresi nownow, ma wi ben kan de na pasi kaba fu du dati. Efu wi no e du soleki fa a yeye e tiri wi, dan wi ben o meki en firi sari. Na so fasi wi ben o trangayesi Yehovah èn wi ben o meki Yehovah, a Sma di e gi santa yeye, firi sari. Leki sma di lobi Gado, wi no wani du dati noiti. Na presi fu dati, meki wi begi Yehovah fu yepi wi, so taki wi no sa meki en yeye firi sari, ma sa gi en santa nen grani fu di wi e tan prakseri den sani fu a yeye.
Tan Prakseri den Sani fu a Yeye
17. San na wan tu marki na yeye fasi di wi ben kan poti gi wisrefi? Fu san ede disi ben o de wan koni sani fu du?
17 Wan prenspari fasi fa wi kan tan prakseri den sani fu a yeye na fu poti marki na yeye fasi gi wisrefi, èn fu du muiti fu doro den. Te wi e luku a yeye nowtu fu wi, noso a situwâsi pe wi e libi na ini, dan kande den marki di wi kan poti gi wisrefi, na fu studeri na wan moro bun fasi èn fu du moro na ini a preikiwroko. So srefi wi kan wroko fu doro spesrutu grani na ini a diniwroko, soleki a furuten pionierwroko, Bethel diniwroko, noso zendelingwroko. Disi sa meki wi poti furu prakseri na yeye afersi. A sa yepi wi so srefi fu no brokokindi gi den swakifasi di wi leki libisma abi. A sa yepi wi tu fu no meki materia gudu nanga den lostu fu a seti fu sani disi di no e kruderi nanga Bijbel, kon de den moro prenspari sani na ini wi libi. Disi na trutru a moro bun fasi fu libi, bika Yesus ben gi deki-ati: „Unu no musu tyari gudu kon na wan gi yusrefi na grontapu moro, pe motu nanga frustu e pori sani, pe fufuruman e broko kon na inisei fu fufuru sani. Na presi fu dati, tyari gudu kon na wan gi unsrefi na hemel, pe motu nanga frustu no e pori sani, èn pe fufuruman no e broko kon na inisei fu fufuru sani. Bika pe yu gudu de, na drape yu ati sa de tu.”—Mateus 6:19-21.
18. Fu san ede a de so prenspari fu tan prakseri den sani fu a yeye na ini den lasti dei disi?
18 Te wi e prakseri den sani fu a yeye, èn e dwengi wisrefi fu no kisi den lostu fu grontapu, dan dati na trutru wan koni sani fu du na ini den „lasti dei” disi (2 Timoteus 3:1-5). Fu taki en leti, „grontapu e pasa gowe èn so srefi a lostu fu en, ma a sma di e du a wani fu Gado, e tan fu têgo” (1 Yohanes 2:15-17). Fu eksempre, efu wan yongu Kresten e suku fu du furuten diniwroko, dan disi kan gi en deki-ati fu kakafutu gi den sani di o miti en na a ini a ten di a de wan tini noso te a tron bigisma. Te trawan e dwengi so wan sma fu go du sani di no de akruderi Bijbel gronprakseri, dan a sma abi krinkrin na prakseri san a wani doro na ini a diniwroko fu Yehovah. So wan sma di tranga na yeye fasi no sa feni en wan koni sani fu poti marki na yeye fasi na wan sei, soso fu a kan suku materia gudu noso a sokari prisiri di a kan abi te a e du sondu. Memre taki Moses di ben poti prakseri na yeye afersi, „ben frukisi fu nyan pina nanga a pipel fu Gado na presi fu prisiri nanga wan sondu libi di de fu wan syatu pisi ten nomo” (Hebrewsma 11:24, 25). Efu wi yongu noso owru, wi e teki wan srefi sortu bosroiti te wi e tan prakseri den sani fu a yeye na presi fu den sani fu a sondu skin.
19. Sortu wini wi sa kisi efu wi e tan prakseri den sani fu a yeye?
19 „A prakseri di wan sma e prakseri den lostu fu a skin nomo, dati na feantifasi nanga Gado”, ma te „wan sma e prakseri den sani fu a yeye, dan a sa libi èn abi vrede” (Romesma 8:6, 7). Efu wi e tan prakseri den sani fu a yeye, dan wi sa abi furu vrede. Wi sa man kibri wi ati nanga wi frustan moro bun fu a krakti di sondu abi na wi tapu. Wi sa man kakafutu moro bun gi tesi fu du ogri. Wi sa kisi yepi fu Gado tu fu kakafutu gi a feti di a skin e feti nanga a yeye doronomo.
20. Fu san ede wi kan de seiker taki wi man wini a feti di a skin e feti nanga a yeye?
20 Fu di wi e tan prakseri den sani fu a yeye, meki wi abi wan tumusi prenspari banti nanga Yehovah, a Sma di e gi libi èn di e gi santa yeye (Psalm 36:9; 51:11). Satan Didibri nanga den wrokoman fu en e du ala san den man fu pori a banti di wi abi nanga Yehovah Gado. Den e pruberi fu basi wi denki, fu di den sabi taki efu wi e gi abra, dan dati sa meki wi tron feanti fu Gado te fu kaba, èn wi sa dede tu. Ma wi kan wini a feti di a skin e feti nanga a yeye. Paulus ondrofeni dati kaba, bika di a ben e skrifi fu a feti di ensrefi ben feti, a ben aksi fosi: „Suma sa frulusu mi fu a skin di e ondrofeni a dede disi?” Baka dati, fu di a ben sabi taki a ben man kisi frulusu, meki a ben bari taki: „Tangi fu Gado nanga yepi fu Yesus Krestes, wi Masra!” (Romesma 7:21-25). Wi kan taigi Gado tangi tu nanga yepi fu Krestes, fu di a e gi wi den sani di wi abi fanowdu fu kakafutu gi libisma swakifasi. Wi kan taigi en tangi tu fu di a e yepi wi fu tan prakseri den sani fu a yeye, ala di wi abi a howpu fu libi fu têgo.—Romesma 6:23.
Yu E Memre Disi Ete?
• San a wani taki fu prakseri den sani fu a yeye?
• Fa wi kan meki Yehovah en yeye wroko na wi tapu?
• Fruklari fu san ede a prenspari srefisrefi taki wi musu studeri Bijbel, musu gi yesi na a wet fu Yehovah èn musu begi en na ini a feti di wi e feti nanga sondu.
• Fa a kan yepi wi fu tan na tapu a pasi fu libi te wi e poti marki na yeye fasi gi wisrefi?
[Aksi fu a tori disi]
[Prenki na tapu bladzijde 16]
Bijbelstudie e yepi wi fu kakafutu gi sani di kan pori wi yeyefasi
[Prenki na tapu bladzijde 17]
A bun fu wi begi Yehovah fu yepi wi fu kakafutu gi sondu firi
[Prenki na tapu bladzijde 18]
Te wi e poti marki na yeye fasi gi wisrefi, dan dati kan yepi wi fu tan prakseri den sani fu a yeye