A Bun Nyunsu fu a Kownukondre—San Na Dati?

A yari di pasa, 6.035.564 sma na ini 235 kondre na heri grontapu, yongu sma nanga owru sma, ben gebroiki 1.171.270.425 yuru fu taki nanga sma fu a sani. Boiti taki den fruteri sma nanga mofo fu a sani, dan den prati moro leki 700 milyun buku gi a publiki fu meki a sani bekènti èn fu fruklari a sani. Den ben prati so srefi dusundusun cassette nanga videocassette fu meki furu sma kon sabi a sani. Ma san na „a sani”?

„A SANI” na a bun nyunsu fu Gado en Kownukondre. Fu tru, noiti ete na ini a historia fu libisma „a bun nyunsu disi fu a kownukondre” preiki na so furu presi leki fa wi e si dati e pasa now.—Mateus 24:14.

Den wan di e du a preikiwroko nanga a leriwroko disi na heri grontapu, e du en fu di densrefi wani dati. Gi grontapu, a kan gersi taki den no bun nofo fu du a wroko disi. San e meki taki den abi so wan deki-ati èn so furu bun bakapisi? A moro prenspari sani na a krakti fu a bun nyunsu fu a Kownukondre, fu di dati na nyunsu di e taki fu blesi di sa kon gi a libisma famiri. Den blesi disi na sani di ala sma wani trutru, èn dati na koloku, fri fu problema na ekonomia sei, wan bun tirimakti, vrede, nanga seikerfasi. Èn wan tra blesi di sa kon ma di furu sma no man bribi, na têgo libi! Disi na bun nyunsu fu tru gi sma di e suku wan marki na ini a libi. Iya, ala den blesi disi èn moro sani srefi, kan de gi yu efu yu e arki te a bun nyunsu fu a Kownukondre e meki bekènti.

San Na a Kownukondre?

Ma san na a Kownukondre di sma e taki fu en leki bun nyunsu? A de a Kownukondre di milyunmilyun sma kisi leri fu begi gi dati, nanga den wortu disi di wi alamala sabi: „Wi Tata na hemel, meki yu nen kon santa. Meki yu kownukondre kon. Meki yu wani pasa, soleki na hemel, so tu na grontapu.”—Mateus 6:9, 10.

A de a Kownukondre di a Hebrew profeiti Danièl ben taki fu en 25 yarihondro pasa kaba, di a ben skrifi: „A Gado fu hemel sa opo wan kownukondre di noiti no sa kisi pori. Èn a kownukondre srefi no sa gi na no wan tra pipel. A sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu.”—Danièl 2:44.

So bun, a bun nyunsu e taki fu a Kownukondre, noso a tiri fu Gado. A sa puru ala ogridu èn baka dati a sa tiri heri grontapu na ini vrede. A sa de a kontru fu san a Mekiman ben abi na prakseri biginbigin gi libisma èn gi grontapu.—Genesis 1:28.

 „A Kownukondre fu Hemel Kon Krosibei”

So wan 2000 yari pasa, dan wan man di ben de fayafaya ben meki a bun nyunsu fu a Kownukondre bekènti a fosi tron. A krosi fu en nanga na aparti fasi fa a ben de, ben hari a prakseri fu furu sma. A man dati ben de Yohanes a Dopuman, a manpikin fu wan Dyu priester Sakaria nanga en wefi, Elisabet. Yohanes ben weri wan krosi fu kameili wiwiri, nanga wan leri buba lontu en mindribere, neleki a profeiti Elia, di ben de wan prenki fu en. Ma a boskopu fu en ben de a sani di ben hari a prakseri fu furu sma. „Abi berow,” a ben meki bekènti, „bika a kownukondre fu hemel kon krosibei.”—Mateus 3:1-6.

Den sma di ben arki Yohanes ben de Dyu, di ben taki dati den na anbegiman fu a tru Gado, Yehovah. Leki wan nâsi, den ben kisi a Wetfrubontu nanga yepi fu Moses, so wan 1500 yari na fesi. A kefalek moi tempel ben de ete na ini Yerusalem, pe den ben tyari srakti-ofrandi soleki fa a Wet ben taki. Den Dyu ben de seiker taki Gado ben feni na anbegi fu den bun.

Ma di son sma arki Yohanes, dan den kon frustan taki a bribi fu den no ben de san den ben denki taki a ben de. A Griki kulturu nanga filosofia ben kon na ini den Dyu kerki leri. A wet di den ben kisi fu Gado nanga yepi fu Moses, no ben soifri moro now èn den ben poti en na wan sei srefi. Disi ben pasa fu di den ben moksi en nanga bribi èn nanga gwenti fu libisma (Mateus 15:6). Den kerki tiriman di no ben abi firi gi den sma èn di no ben abi sari-ati gi den, ben puru den na a bun pasi. Fu dati ede, furu sma no ben anbegi Gado moro na a fasi di a ben feni bun (Yakobus 1:27). Den ben musu abi berow fu den sondu fu den teige Gado èn teige a Wetfrubontu.

Na a ten dati, furu Dyu ben fruwakti taki a pramisi Mesias, noso Krestes ben o kon, èn son wan ben e taki fu Yohanes: „Na en na a Krestes kande?” Ma Yohanes ben taki dati en no ben de a Krestes, èn na presi fu dati a ben poti den prakseri na wan tra sma, di a ben taki fu a sma dati: „Mi no warti fu puru [en] susu na en futu” (Lukas 3:15, 16). Di Yohanes ben meki den disipel fu en kon sabi Yesus, dan a ben meki bekènti: „Luku, a Pikin Skapu fu Gado di e teki a sondu fu grontapu tyari gowe!”—Yohanes 1:29.

Dati ben de bun nyunsu fu tru, bika te yu e luku en bun, dan Yohanes ben sori ala sma a pasi fu kisi libi nanga koloku. A pasi dati ben de Yesus, a wan di „e teki a sondu fu grontapu tyari gowe”. Leki bakapikin fu Adam nanga Efa, ala libisma gebore ondro a kwinsi fu sondu nanga dede. Romesma 5:19 e fruklari: „Neleki fa a trangayesi fu a wán man [Adam] ben meki furu sma kon tron sondari, na so a gi di a wán sma [Yesus] gi yesi, sa meki furu sma kon regtfardiki.” Yesus, di ben de leki wan pikin skapu di sma tyari leki srakti-ofrandi, ben musu ’teki sondu tyari gowe’, èn a ben musu kenki a sari situwâsi di libisma ben de na ini. „Sondu e pai nanga dede,” na so Bijbel e fruklari, „ma a presenti di Gado e gi, na têgo libi nanga yepi fu Krestes Yesus, wi Masra.”—Romesma 6:23.

Leki wan volmaakti man, Yesus teki a wroko  fu preiki a bun nyunsu. Te yu e luku en bun, dan a ben de a moro bigi man di oiti libi. A Bijbel tori na Markus 1:14, 15 e fruteri wi: „Baka di den ben sroto Yohanes, dan Yesus go na ini Galilea, ala di a ben preiki a bun nyunsu fu Gado èn a ben taki: ’A reti ten kon tru, èn a kownukondre fu Gado kon krosibei. Abi berow, un pipel, èn abi bribi na ini a bun nyunsu.’”

Den sma di ben du wan sani na tapu a boskopu fu Yesus èn di ben bribi a bun nyunsu, ben kisi wan tumusi bigi blesi. Yohanes 1:12 e taki: „Ala den wan di ben teki [Yesus], a ben gi makti fu tron Gado pikin, fu di den ben sori bribi na ini en nen.” Fu di den ben de pikin, noso manpikin fu Gado, meki den ben kan kisi a paiman fu têgo libi.—1 Yohanes 2:25.

Ma a grani fu kisi Kownukondre blesi no ben de wawan gi den sma na ini a fosi yarihondro. Soleki fa wi taki kaba, dan na ini a ten disi a Kownukondre fu Gado e meki bekènti na heri grontapu pe sma e libi, èn sma e kisi leri fu en tu. So bun, sma kan kisi Kownukondre blesi ete. San yu musu du fu kisi den blesi dati? Na artikel di e kon now sa fruteri yu dati.