„A Wortu fu Yehovah Ben Panya Go na Ala Sei”

„A e seni en komando go na grontapu; a wortu fu en e panya esi-esi go na ala sei.”—PSALM 147:15.

1, 2. Sortu wroko Yesus ben gi den disipel fu en? San den ben abi fu du na ini a wroko dati?

WAN fu den moro moi profeititori na ini Bijbel de fu feni na Tori fu den Apostel 1:8. Syatu bifo Yesus ben opo go na hemel, a ben taigi den getrow bakaman fu en: „Unu sa kisi krakti te a santa yeye e kon na un tapu, èn unu sa de kotoigi fu mi . . . te na a moro farawe presi fu grontapu.” Disi ben o de wan bun bigi wroko!

² A ben musu sori fu de wan bigi tyalensi gi a pikin grupu disipel dati, di ben kisi a wroko fu meki a wortu fu Gado bekènti na heri grontapu. Luku san den ben musu du. Den ben sa abi fu yepi sma fu frustan a bun nyunsu fu Gado en Kownukondre (Mateus 24:14). A gi di den ben o gi kotoigi fu Yesus, wani taki so srefi dati den ben musu prati den krakti leri fu en nanga tra sma èn dati den ben musu fruklari o prenspari Yesus de ini den sani di Yehovah abi na prakseri. Boiti dati, a wroko di den ben kisi, wani taki tu dati den ben musu meki disipel fu sma èn ben musu dopu den baka dati. Èn ala den sani disi den ben musu du na heri grontapu!—Mateus 28:19, 20.

3. San na a dyaranti di Yesus ben gi den bakaman fu en, èn fa den ben piki tapu a wroko di den ben kisi?

³ Ma toku, Yesus ben gi den bakaman fu en a dyaranti taki santa yeye ben o yepi den fu du a wroko di a ben gi den. Fu dati ede, ala di a wroko ben de so bigi, ala di gensman nomonomo ben du muiti na wan ogri-ati fasi fu tapu den, toku den fosi disipel fu Yesus ben du soleki fa a ben gi a komando èn a wroko fu den ben abi bun bakapisi. Den sani disi skrifi na ini historia buku èn no wan sma kan taki dati a no tru.

4. Fa a wroko di sma ben kisi, fu preiki èn fu gi tra sma leri, e sori taki Gado lobi libisma?

⁴ Nanga yepi fu a preikiwroko èn a leriwroko di Gado ben meki sma du na heri grontapu, Gado sori taki a lobi den wan di no ben sabi en. Na so fasi den sma dati ben abi na okasi fu kon krosibei na Yehovah èn kisi pardon fu den sondu fu den (Tori fu den Apostel 26:18). A gi di Gado ben gi sma a wroko fu preiki èn fu gi trawan leri, so srefi ben sori krin taki Gado lobi den wan di ben tyari a boskopu. A wroko dati ben gi den na okasi fu sori taki den gi densrefi na ini a dini fu Yehovah èn fu sori a lobi di den abi gi tra sma (Mateus 22:37-39). Na apostel Paulus ben abi so furu warderi gi a Kresten diniwroko taki a ben kari en wan „gudu”.—2 Korentesma 4:7.

5. (a) Na ini sortu buku wi e feni a moro bun tori di skrifi fu den fosi Kresten? Sortu sani ben panya go na ala sei, soleki fa a buku dati e taki? (b) Fu san ede a buku Tori fu den Apostel prenspari srefisrefi gi den futuboi fu Gado na ini a ten disi?

⁵ A moro bun tori di skrifi fu a preikiwroko fu den fosi Kresten, de fu feni na ini a buku Tori fu den Apostel di Gado ben meki a disipel Lukas skrifi nanga yepi fu santa yeye. A de wan tori di e sori fa a Wortu ben panya esi-esi go na ala sei na wan kefalek bun fasi. A fasi disi fa a sabi fu Gado Wortu ben panya go na ala sei, e meki wi prakseri Psalm 147:15 di e taki: „[Yehovah] e seni en komando go na grontapu; a wortu fu en e panya esi-esi go na ala sei.” A tori fu den fosi Kresten, di ben kisi krakti fu santa yeye, na wan span tori èn a prenspari gi wi srefisrefi na ini a ten disi. Yehovah Kotoigi e du a srefi wroko fu preiki èn fu meki disipel, nomo den e du en na wan moro bigi fasi. Wi e miti den srefi sortu problema leki den Kresten na ini a fosi yarihondro. Te wi e luku fa Yehovah ben blesi den fosi Kresten èn fa a ben gi den krakti, dan dati e meki wi bribi moro tranga taki a sa horibaka gi wi tu.

 Den Disipel Ben Kon Moro Furu

6. Sortu wortu di abi fu du nanga wan sani di ben panya go na ala sei, de fu feni dri leisi na ini a buku Tori fu den Apostel? Na san den wortu e sori go?

⁶ Wán fasi fa wi kan ondrosuku a kontru fu Tori fu den Apostel 1:8 na fu luku den wortu, „a wortu fu Yehovah ben panya go na ala sei”. Den wortu disi de fu feni na ini Bijbel dri leisi; soso wan tu wortu nomo e difrenti èn ala dri leisi den de fu feni na ini a buku Tori fu den Apostel (Tori fu den Apostel 6:7; 12:24; 19:20). Te den tekst disi e taki fu „a wortu fu Yehovah”, noso „a wortu fu Gado”, dan dati e sori go na a bun nyunsu. Dati na a boskopu fu Gado en waarheid di e naki sma ati, èn a de wan libilibi boskopu di abi so wan bigi krakti, taki a ben meki den sma di teki en, drai den libi.—Hebrewsma 4:12.

7. San ben pasa fu di a wortu fu Gado ben panya go na ala sei, soleki fa Tori fu den Apostel 6:7 e taki? San ben pasa tapu a dei fu a Pinksterfesa fu 33 G.T.?

⁷ A fosi tekst di e taki dati a wortu fu Gado ben panya go na ala sei, na Tori fu den Apostel 6:7. Drape wi e leisi: „Fu dati ede a wortu fu Gado ben panya go na ala sei, èn den sma di ben tron disipel, ben tan kon moro furu srefisrefi na ini Yerusalem, èn wan bigi ipi priester ben bigin gi yesi na a bribi.” Soleki fa a tekst disi e taki, dan a panya di a wortu fu Gado panya go na ala sei, ben meki taki moro furu sma ben tron disipel. Tapu wan momenti na fesi, tapu a dei fu a Pinksterfesa fu 33 G.T., Gado ben kanti en santa yeye na tapu so wan 120 disipel di ben kon makandra na ini wan tapusei kamra. Baka dati, na apostel Petrus ben gi wan taki di ben naki sma ati, èn so wan 3000 sma di ben arki, ben tron bribiman tapu a srefi dei dati. A presi drape ben musu fu seki fu tru di dusundusun sma ben go na a watra-olo noso den watra-olo na ini a birti fu Yerusalem èn na ini Yerusalem srefi! Den ben go fu teki dopu na ini a nen fu Yesus, a man di sma ben spikri na wan postu leki wan ogriman so wan 50 dei na fesi.—Tori fu den Apostel 2:41.

8. Fa den disipel ben kon moro furu na ini den yari baka a Pinksterfesa fu 33 G.T.?

 ⁸ A no de fu taki, den sani disi di pasa ben de a bigin nomo. Den Dyu kerki fesiman ben tan du muiti fu tapu a preikiwroko, ma ala san den ben du ben de fu soso. „Ala dei Yehovah ben tan tyari den wan di kisi frulusu, kon na [den disipel]” èn dati ben meki den kerki fesiman dati mandi nomo (Tori fu den Apostel 2:47). No langa na baka, „den man di ben tron disipel ben doro wan sani fu feifi dusun”. Baka dati, „moro nanga moro sma ben kon bribi na ini Masra, ipi-ipi man nanga uma” (Tori fu den Apostel 4:4; 5:14). Wan tra tekst e fruteri san ben pasa na ini wan pisi ten na baka: „Na ini a heri kontren fu Yuda, Galilea nanga Samaria, a gemeente trutru ben kon abi wan pisi ten fu vrede, di meki taki a ben kisi deki-ati; èn ala di a ben waka na ini a frede fu Yehovah èn na ini a trowstu fu a santa yeye, a gemeente ben tan kon moro bigi” (Tori fu den Apostel 9:31). Wan tu yari baka dati, kande wan sani fu 58 G.T., dan sma ben taki dati „dusundusun bribiman” ben de (Tori fu den Apostel 21:20). Na a ten dati, furu Heiden bribiman ben de tu.

9. San yu ben sa taki fu den fosi Kresten?

⁹ A fasi disi fa a gemeente ben kon moro bigi, na fu di furu sma ben tron disipel fu di den ben drai den libi. A bribi di den ben abi now ben de nyunyun, ma den sma na ini a bribi disi, ben wroko fayafaya. Den disipel no ben de leki kerkisma di e sidon arki nomo. Den disipel ben gi densrefi dorodoro na ini a dini fu Yehovah èn ben hori densrefi krinkrin na a Wortu fu en. Son leisi, den ben leri a waarheid fu den wan di ben kisi frufolgu na wan ogri-ati fasi (Tori fu den Apostel 16:23, 26-33). Den wan di ben teki a Krestendom, ben prakseri bun fosi den du dati, èn den ben ondrosuku sani finifini tu (Romesma 12:1). Den ben kisi bun leri fu den pasi fu Gado; a waarheid ben de na ini a prakseri èn na ini na ati fu den (Hebrewsma 8:10, 11). Den ben de klariklari fu dede gi den sani di den ben bribi na ini.—Tori fu den Apostel 7:51-60.

10. San den fosi Kresten ben teki leki wan frantwortu na den tapu èn sortu srefi sani wi e si na ini a ten disi?

¹⁰ Den wan di ben teki den Kresten leri nanga den heri ati, ben frustan taki den abi a frantwortu fu prati a waarheid nanga tra sma. Disi ben yepi langalanga taki furu sma moro ben tron disipel. Wan Bijbel sabiman ben taki: „A no de so taki soso den sma di fayafaya na ini a bribi, noso den wan di ben poti na wroko leki evangelie preikiman, ben abi a reti fu fruteri sma fu a bribi fu den. Te sma ben du a preikiwroko, dan dati ben de wan grani èn a de fu ibri Kerki memre . . . A fasi fa a heri grupu fu Kresten ben wani abi wan prati na a preikiwroko, sensi a bigin kaba ben meki a wroko go na fesi esi-esi.” A ben skrifi moro fara: „A preikiwroko di den fosi Kresten ben du, ben de a moro prenspari sani di ben meki taki den ben abi bun bakapisi ini a bribi fu den.” Na so a de tu nanga den tru Kresten na ini a ten disi.

A Wortu fu Gado Panya Go na Moro Kondre

11. Na sortu fasi a wortu fu Gado ben panya go na ala sei, soleki fa Tori fu den Apostel 12:24 e taki? Fa disi ben feni presi?

¹¹ Wan di fu tu tekst di e taki fu a panya di a wortu fu Gado ben panya go na ala sei, na Tori fu den Apostel 12:24: „A wortu fu Yehovah ben panya go na ala sei.” Dyaso den wortu abi fu du nanga a preiki di sma ben preiki a wortu na ini moro kondre. Ala di den tirimakti ben gens a wroko, toku a wroko ben tan abi bun bakapisi. Gado ben kanti santa yeye na tapu sma na Yerusalem, èn fu drape a wortu ben panya esi-esi go na ala sei. Fu di den disipel ben kisi frufolgu, meki den ben panya go na ini a heri kontren fu Yudea nanga Samaria. San ben de a bakapisi fu disi? „Den wan di ben panya, ben go na ala presi fu meki a bun nyunsu fu a wortu bekènti” (Tori fu den Apostel 8:1, 4). Filipus ben kisi a komando fu gi kotoigi na wan man. A man ben teki dopu èn baka dati a ben tyari a boskopu go na Etiopia (Tori fu den Apostel 8:26-28, 38, 39). A waarheid ben kisi rutu esi-esi na ini Lida, na Opo presi fu Saron, èn na ini Yope (Tori fu den Apostel 9:35, 42). Baka ten, na apostel Paulus ben reis furu dusundusun kilometer tapu se èn tapu drei gron, ala di a ben seti gemeente na ini furu kondre krosibei fu a Mindrikondre Se. Na apostel Petrus ben go na Babilon (1 Petrus 5:13). Na ini moro mendri leki 30 yari baka di santa yeye ben kanti na tapu den disipel tapu a Pinksterfesa, Paulus ben skrifi taki a bun nyunsu ben „preiki na ala mekisani fu Gado na ondro hemel”; kande a ben taki fu den presi na grontapu di sma ben sabi na a ten dati.—Kolosesma 1:23.

12. Fa gensman fu Krestendom ben erken taki a wortu fu Gado ben panya go na moro kondre?

 ¹² Srefi den gensman fu Krestendom ben erken taki a wortu fu Gado ben kisi rutu na ini a heri Gran Kownukondre Rome. Fu eksempre, Tori fu den Apostel 17:6 e fruteri taki gensman na ini Tesalonika na a noordsei fu Grikikondre, ben bari taki: „Den man disi di meki a heri grontapu pe sma e libi sekiseki, de dyaso tu.” Moro fara, na a bigin fu a di fu tu yarihondro, Plinius a Yonguwan fu Bitinia, ben skrifi go na Kèiser Trayanus fu Rome. A ben skrifi sani di abi fu du nanga a Krestendom. A ben kragi: „[A] no de na ini den foto wawan, ma leki wan takru siki a panya go na den dorpu di de krosibei èn na ini den opo presi fu a kondre.”

13. Na sortu fasi a panya di a wortu fu Gado ben panya go na moro kondre, ben sori taki Gado lobi a libisma famiri?

¹³ A panya di a wortu fu Gado ben panya go na moro kondre, ben sori taki Yehovah trutru lobi a libisma famiri di man kisi frulusu. Di Petrus ben si fa a santa yeye ben wroko tapu Kornelius di ben de wan Heiden, a ben taki: „Now mi sabi seiker taki Gado no e teki sma partèi, ma na ini ibri nâsi a sma di e frede en èn di e wroko regtfardikifasi, de bun na en” (Tori fu den Apostel 10:34, 35). Iya, a bun nyunsu ben de wan boskopu gi ala sma, èn a de wan boskopu ete gi ala sma. Fu di a wortu fu Gado ben panya go na moro kondre, dati meki taki sma na ala presi kisi na okasi fu piki tapu a lobi fu Gado. Na ini a di fu 21 yarihondro disi, a wortu fu Gado panya go na ala presi fu grontapu trutru.

A Wortu Ben Abi Krakti na Sma Tapu

14. Na sortu fasi a wortu fu Gado ben panya go na ala sei akruderi Tori fu den Apostel 19:20? Fa a wortu fu Gado ben abi krakti na sma tapu?

¹⁴ A di fu dri tekst di e taki fu a panya di a wortu fu Gado ben panya go na ala sei, na Tori fu den Apostel 19:20: „Na wan tranga fasi a wortu fu Yehovah ben panya go na ala sei èn ben abi krakti na tapu moro nanga moro sma.” A Griki wortu di sma ben gebroiki fosi èn di den vertaal nanga den wortu „ben abi krakti na tapu moro nanga moro sma”, abi a prakseri taki a wortu fu Gado „abi krakti na sma tapu”. Den tekst moro na fesi e fruteri taki furu sma na Efeise ben tron bribiman, èn someni sma di ben du obiawroko, ben bron den buku fu den na fesi ala sma. So bun, a wortu fu Gado ben abi someni krakti na sma tapu taki den ben libi den falsi bribi. A bun nyunsu ben abi krakti so srefi na sma tapu fu di a ben meki den kakafutu gi tra problema, soleki frufolgu. Noti ben kan tapu en. Den srefi sani disi e feni presi tu na ini a tru Krestendom fu a ten fu wi.

15. (a) San wan Bijbel historia skrifiman ben skrifi fu den fosi Kresten? (b) Suma den disipel ben gi grani fu den bun bakapisi na ini a wroko fu den?

¹⁵ Den apostel nanga tra Kresten fu a fosi yarihondro, ben meki a wortu fu Gado bekènti nanga faya. Wan Bijbel historia skrifiman ben fruteri sani di abi fu du nanga den, di a ben taki: „Te libisma wani srefisrefi fu taki fu a Masra fu den, dan den man feni furu fasi fu du dati. Iya, a no den fasi di den e gebroiki fu du a preikiwroko fu den e fruwondru wi srefisrefi, ma a de a faya di den man nanga uma disi abi fu du a wroko.” Toku, den fosi Kresten dati ben frustan heri bun taki a no fu di den wawan du muiti, meki a preikiwroko fu den ben abi bun bakapisi. Den ben kisi a komando fu Gado fu du a wroko fu den, èn Gado ben horibaka gi den fu klari a wroko. Na Gado e meki sani gro na yeye fasi. Na apostel Paulus ben erken disi na ini  a brifi di a ben seni gi a gemeente na Korente. A ben skrifi: „Mi ben prani, Apolos ben gi watra, ma Gado ben tan meki sani gro. Bika wi e wroko makandra nanga Gado.”—1 Korentesma 3:6, 9.

Santa Yeye E Wroko na Den Tapu

16. Sortu buweisi de taki a santa yeye ben gi den disipel a krakti fu taki sondro frede?

¹⁶ Memre taki Yesus ben gi den disipel a dyaranti taki santa yeye ben o de wan prenspari sani fu meki a wortu fu Gado panya go na ala sei èn taki santa santa yeye ben o gi den disipel krakti fu du a preikiwroko fu den (Tori fu den Apostel 1:8). Fa disi ben feni presi? Wan syatu pisi ten baka di a yeye ben kanti na tapu den disipel tapu a Pinksterfesa, Petrus nanga Yohanes ben kisi a komando fu kon na fesi a Dyu Sanhedrin, a moro hei krutu na ini a kondre. Den krutuman fu a Sanhedrin ben tyari a frantwortu fu a kiri di sma ben kiri Yesus Krestes. Den apostel ben sa frede srefisrefi fu tanapu na fesi a bun bigi konmakandra fu sma di ben de feanti fu den? Kwetikweti! Santa yeye ben gi Petrus nanga Yohanes a krakti fu taki nanga so furu deki-ati, taki den gensman ben fruwondru srefisrefi, èn den „ben kon si taki den ben de sma di ben de nanga Yesus” (Tori fu den Apostel 4:8, 13). Santa yeye ben meki tu taki Stefanus ben gi kotoigi na a Sanhedrin sondro frede (Tori fu den Apostel 6:12; 7:55, 56). Wan leisi na fesi kaba, a santa yeye ben buweigi den disipel fu preiki sondro frede. Lukas e fruteri: „Di den ben taki den tranga begi, dan a presi pe den ben kon makandra ben seki, èn den alamala ben kon furu nanga a santa yeye èn den ben e taki a wortu fu Gado sondro frede.”—Tori fu den Apostel 4:31.

17. Na sortu tra fasi a santa yeye ben yepi den disipel na ini a diniwroko fu den?

¹⁷ Yehovah, makandra nanga Yesus di kisi wan opobaka, e tiri a preikiwroko nanga yepi fu a krakti santa yeye fu en (Yohanes 14:28; 15:26). Di Gado ben kanti a yeye na tapu Kornelius, so srefi na tapu den famiriman nanga den bun mati fu en, dan na apostel Petrus ben frustan taki Heiden sma di no ben kisi besnijdenis ben man teki dopu na ini a nen fu Yesus Krestes (Tori fu den Apostel 10:24, 44-48). Baka ten, a yeye ben de prenspari ini a poti di Barnabas nanga Saulus (na apostel Paulus) ben poti fu du zendelingwroko. A santa yeye ben tiri den tu fu sabi pe den ben musu go èn pe den no musu go (Tori fu den Apostel 13:2, 4; 16:6, 7). A ben tiri den apostel nanga den owruman na ini Yerusalem te den ben musu teki bosroiti (Tori fu den Apostel 15:23, 28, 29). Santa yeye ben tiri so srefi a poti di brada ben poti leki opziener na ini a Kresten gemeente.—Tori fu den Apostel 20:28.

18. Fa den fosi Kresten ben sori lobi gi tra sma?

¹⁸ Boiti dati, santa yeye ben wroko tu tapu Kresten srefi. Dati ben de fu si na den eigifasi di den ben sori, soleki lobi (Galasiasma 5:22, 23). Lobi meki taki den disipel ben prati sani nanga makandra. Fu eksempre, baka a Pinksterfesa fu 33 G.T., den ben seti wan fonsu fu sorgu gi den sani di den disipel na Yerusalem ben abi fanowdu na skin sei. A Bijbel tori e taki: „No wan enkri sma na den mindri ben mankeri wan sani; bika ala sma di ben abi gron noso oso, ben seri den èn den ben tyari ala san den ben kisi gi den sani di den seri, èn den ben e poti den na den futu fu den apostel. Baka dati dan den sani ben e prati gi ibri sma akruderi san a ben abi fanowdu” (Tori fu den Apostel 4:34, 35). Den no ben lobi tra bribiman wawan, ma so srefi tra sma, fu di den ben prati a bun nyunsu nanga den èn fu di den ben sori bun-ati nanga den sani di den ben du gi den (Tori fu den Apostel 28:8, 9). Yesus ben taki dati a lobi di den bakaman fu en abi fu òfer densrefi, ben o de wan marki di e meki sma si suma  na den bakaman fu en (Yohanes 13:34, 35). Fu tru, neleki na ini a ten disi, na so a tumusi prenspari eigifasi lobi ben hari sma fu kon krosibei na Gado, èn ben meki taki moro nanga moro sma tron disipel na ini a fosi yarihondro.—Mateus 5:14, 16.

19. (a) San na den dri fasi fa a wortu fu Yehovah ben panya go na ala sei na ini a fosi yarihondro? (b) San wi sa ondrosuku na ini na artikel di e kon?

¹⁹ Ala nanga ala, den wortu „santa yeye” de fu feni 41 leisi na ini a buku Tori fu den Apostel. A de krin taki a tron di moro furu sma ben tron disipel na ini a fosi yarihondro, na fu di a santa yeye ben gi den a krakti nanga a tiri di den ben abi fanowdu. Den disipel ben kon moro furu, a wortu fu Gado ben panya go na ala sei, èn a ben abi so furu krakti na sma tapu taki den libi falsi bribi èn den filosofia fu a ten dati. A fasi disi fa a wortu ben panya go na ala sei nanga bun bakapisi na ini a fosi yarihondro, de fu si so srefi ini a diniwroko di Yehovah Kotoigi e du na ini a ten disi. Na ini na artikel di e kon, wi sa ondrosuku fa a wortu fu Gado panya go na ala sei tu na ini a ten disi.

Yu E Memre Disi Ete?

• Fa den disipel fu a fosi yarihondro ben kon moro furu?

• Na sortu fasi a wortu fu Gado ben panya go na moro kondre?

• Fa a wortu fu Gado ben abi krakti na sma tapu na ini a fosi yarihondro?

• Fa a santa yeye yepi fu meki a wortu fu Gado panya go na ala sei?

[Aksi fu a tori disi]

[Prenki na tapu bladzijde 12]

Filipus ben preiki gi wan Etiopiaman, èn na so fasi a ben panya a bun nyunsu go na moro kondre

[Prenki na tapu bladzijde 13]

Santa yeye ben tiri den apostel nanga den owruman na ini Yerusalem

[Prenki na tapu bladzijde 10]

Tapusei na a reti-anusei: Wan prenki di e sori fa a Foto Yerusalem ben de na a ten fu a Di fu Tu Tempel — di de na den gron fu a Holyland Hotel, na ini Yerusalem