Ondrofenitori

Wi Ben Du Ala Sani Makandra

SOLEKI FA MELBA BARRY FRUTERI

Tapu 2 yuli 1999, mi nanga mi masra ben de na wan bigi konmakandra fu Kotoigi fu Yehovah, soleki fa wi ben du dati dusundusun tron kaba na ini den 57 yari di wi ben trow. A freida dati, Lloyd ben e hori a lasti lezing na a distrikt kongres na ini Hawai. Wantronso, a fadon na gron. Ala di sma meki ala sortu muiti nanga en so taki a ben kan kisi ensrefi baka, toku a dede. *

MI WARDERI den Kresten brada nanga sisa dati na Hawai srefisrefi, fu di den ben meki muiti fu yepi mi fu kakafutu gi a rampu disi! Lloyd ben abi krakti tapu a libi fu furu fu den brada nanga sisa disi èn so srefi tapu a di fu furu trawan na heri grontapu.

Ini den pikinmoro leki tu yari di a dede kaba, mi prakseri den warti yari di wi ben de makandra. Furu fu den yari disi wi ben de leki zendeling na ini wan tra kondre noso na a edekantoro fu Yehovah Kotoigi na ini Brooklyn, New York. Mi prakseri den yari fu mi so srefi leki yongu meisje na ini a foto Sydney na Australia, èn den tyalensi di ben miti mi nanga Lloyd di wi ben wani trow na a bigin fu a di fu Tu Grontapufeti. Ma meki mi fruteri yu fosi fa mi du tron wan Kotoigi èn fa mi miti Lloyd na ini 1939.

Fa Mi Du Tron wan Kotoigi

Mi papa nanga mi mama ben de James nanga Henrietta Jones. Den ben lobi mi èn den ben sorgu mi bun. Mi ben abi 14 yari nomo di mi klari skoro na ini 1932. Na a ten dati grontapu ben de leti mindri fu a Bigi Depressie (wan muilek pisi ten na ekonomia sei). Mi bigin wroko fu yepi mi papa nanga mi mama èn so srefi den tu pikin sisa fu mi. Baka wan tu yari nomo, mi ben abi wan wroko di ben e pai bun èn wan tu yongu uma ben e wroko ondro mi.

Na a srefi ten, na ini 1935, mi mama teki Bijbel  publikâsi fu wan Yehovah Kotoigi èn heri esi a ben de seiker taki a ben feni waarheid. Mi nanga den tra memre fu wi osofamiri ben denki taki a ben e law. Ma wan leisi, mi si a pikin buku di nen Waar zijn de Dooden? (Pe den Dedewan De?) èn a nen fu a pikin buku disi ben hari mi prakseri. So bun, mi leisi a pikin buku sondro fu meki trawan kon sabi dati. A sani dati kenki ala sani! Wantewante mi bigin go nanga mi mama na wan mindriwiki konmakandra di den ben kari modelstudie (Wan studie di de leki wan eksempre). A pikin buku disi di nen Model Study ben abi aksi nanga piki èn so srefi bijbeltekst di ben horibaka gi den piki. Te fu kaba dri fu den buku disi ben de.

Pikinmoro na a srefi ten dati, na ini april fu a yari 1938, Joseph F. Rutherford, di ben de fu na edekantoro fu Yehovah Kotoigi, kon na Sydney. Mi go arki a publikitaki di a hori èn dati ben de a fosi leisi di mi yere wan publikitaki. A ben o hori a publikitaki disi na Sydney Townhall (wan konmakandrapresi fu Sydney), ma gensman ben sorgu taki wi no ben kisi primisi fu gebroiki a presi dati. Na presi fu dati, Brada Rutherford hori a publikitaki na ini wan stadion di nen Sydney Sports Ground èn a stadion disi ben bigi moro leki a fosi presi. Fu di sma ben gens a publikitaki, meki a sani disi ben de bekènti na ala sei èn so wan 10.000 sma kon arki a taki. Dati na wan tumusi moi nomru, te yu e prakseri taki 1300 Kotoigi nomo ben de na ini Australia na a ten dati.

Wan syatu pisi ten baka dati, mi teki prati fu a fosi tron na a preikiwroko — èn mi ben du dati sondro taki sma ben leri mi san fu taki. Di a grupu fu wi doro na ini a kontren pe wi ben o preiki, dan a brada di ben teki fesi taigi mi: „Yu kan go na a oso drape.” Mi ben senwe sote taki di wan umasma opo a doro, mi aksi en: „Yu kan taigi mi grantangi o lati a de?” A go na ini a oso, a luku o lati a de, èn a drai kon baka fu taigi mi. Dati ben de ala. Mi go baka na a oto.

Ma mi no lasi ati, èn heri esi mi ben e prati a Kownukondre boskopu doronomo nanga tra sma (Mateus 24:14). Na ini maart fu a yari 1939, mi gi misrefi abra na Yehovah èn mi teki dopu na ini a badkuip fu a birfrow di ben libi na wi sei èn di nen Dorothy Hutchings. Fu di brada no ben de, dan wan syatu pisi ten baka di mi dopu, mi kisi frantwortu na ini a gemeente, ala di Kresten brada ben gwenti fu kisi den frantwortu disi.

Wi ben gwenti fu hori den konmakandra fu wi na ini sma oso, ma son leisi wi ben yuru wan zaal fu hori publikitaki. Wan moi yongu brada fu Bethel, a bijkantoro fu wi, ben kon na a pikin gemeente fu wi fu hori wan lezing. Mi no ben sabi taki a ben abi wan tra reide so srefi fu kon drape — a ben wani leri sabi mi moro bun. Iya, na so mi miti Lloyd.

Mi E Miti a Famiri fu Lloyd

Heri esi mi ben wani du furuten diniwroko gi Yehovah. Ma di mi skrifi mi nen na tapu wan formulier fu tron wan pionier, dan den brada aksi mi efu mi ben wani dini na Bethel. So bun, na ini september 1939, na ini a mun di a di fu Tu Grontapufeti bigin, mi tron wan memre fu a Bethelfamiri na ini Strathfield, wan fu den birti di de na a lanki fu Sydney.

Na ini december 1939, mi reis go na Nyun Zeeland fu de na wan kongres. Fu di Lloyd ben de fu Nyun Zeeland, a ben e reis go drape tu. Wi ben teki a srefi sipi, èn wi kon leri sabi makandra moro bun. Lloyd ben sorgu taki mi ben miti en mama, en papa, nanga den sisa fu en na a kongres na ini a foto Wellington èn baka ten mi go na a oso fu den na ini a foto Christchurch.

Den E Tapu a Wroko fu Wi

Tapu satra 18 yanuari 1941, den lanti tiriman fu a Gemenebest (wan grupu fu kondre di ben de na ondro a makti fu Ingrisikondre) rei kon na a bijkantoro na ini sowan siksi langa blaka oto, fu teki a presi abra. Fu di mi ben e wroko na ini a pikin kamra pe wi e ontfanga fisitiman èn di ben de fesisei fu a Bethel-oso, dan mi ben de a fosi sma di si den. So wan 18 yuru bifo a sani disi  ben pasa wi ben kisi fu yere taki den ben o tapu a wroko. Fu dati ede den brada ben teki pikinmoro ala den publikâsi nanga tra prenspari papira di ben de na a bijkantoro, èn den tyari den go na wan tra presi. A wiki baka dati, feifi memre fu a Bethelfamiri nanga Lloyd so srefi, ben poti na strafu-oso.

Mi ben sabi taki a moro prenspari sani di den brada disi ben abi fanowdu ben de yeye nyanyan. Mi teki a bosroiti fu skrifi Lloyd „lobi brifi” fu gi en deki-ati. Na a bigin fu a brifi mi ben e skrifi sani di ben o meki sma prakseri taki a brifi ben de wan lobi brifi, ma mi ben skrifi heri Waktitoren artikel poti tu na ini a brifi disi. Na a kaba fu a brifi mi ben skrifi wan tu sani di ben meki a gersi taki mi ben de Lloyd en lobiwan. Baka fo nanga afu mun, den lusu Lloyd.

Wi E Trow èn Wi E Tan Du Furuten Diniwroko

Na ini 1940, a mama fu Lloyd kon na Australia, èn Lloyd taigi en taki wi ben wani trow. En mama ben gi en a rai fu no du dati fu di a ben gersi taki a kaba fu a seti fu sani ben de heri krosibei (Mateus 24:3-14). Lloyd ben taigi den mati fu en tu taki wi ben wani trow, ma ibri leisi, den ben e pruberi fu overtoigi en fu no trow. Te fu kaba, wan dei na ini februari fu a yari 1942, Lloyd no taigi no wan sma èn a tyari mi go na a Burgerlijke Stand. Fo tra Kotoigi di ben pramisi taki den no ben o taigi no wan sma, ben kon tu nanga wi. Drape mi nanga Lloyd trow. Na a ten dati Australia no ben gi Yehovah Kotoigi a reti ete fu trow brada nanga sisa.

Ala di wi no ben kisi primisi fu tan dini na Bethel leki wan trowpaar, den brada aksi wi efu wi ben wani du spesrutu pionierwroko. Wi ben breiti taki den seni wi go wroko na ini wan boiti foto di nen Wagga Wagga. A preikiwroko fu wi ben tapu ete, èn no wan sma ben e yepi wi nanga moni. Fu dati ede wi ben musu trowe wi hebi trutru na Yehovah tapu.—Psalm 55:22.

Wi ben e rei wan tandem baisigri (wan baisigri di tu sma kan rei makandra) fu go na den boitipresi. Wi miti wan tu bun sma drape èn wi ben abi langa takimakandra nanga den. Furu sma no ben teki wan bijbelstudie. Ma wan wenkriman  di ben abi bigi warderi gi a wroko di wi ben e du, ben gi wi froktu nanga gruntu ibri wiki. Di wi ben tan siksi mun na ini Wagga Wagga, dan den brada aksi wi fu kon baka na Bethel.

A Bethelfamiri ben froisi gowe libi a Strathfield bijkantoro na ini mei 1942 èn den go tan na ini aparti oso. Ibri leisi, baka wan tu wiki, den ben e froisi go tan na wan tra oso, so taki sma no ben o kon sabi wan sani. Di mi nanga Lloyd drai go baka na Bethel na ini augustus, wi go tan nanga a Bethelfamiri na ini wan fu den oso disi. Na deiten mi nanga Lloyd ben e wroko na ini wan fu den drukkerij di ben seti sondro taki tra sma ben sabi fu dati. Te fu kaba, na ini yuni 1943 Yehovah Kotoigi ben mag wroko fri baka.

Wi E Sreka Sani fu Go Dini na ini wan Tra Kondre

Na ini april 1947 mi nanga Lloyd kisi formulier fu go na a Waktitoren Bijbelskoro Gilead, di ben de na ini South Lansing na New York, Amerkankondre. Na a srefi ten, wi ben musu go na den gemeente na ini Australia fu tranga den na yeye fasi. Baka wan tu mun, wi kisi kari fu go na a di fu 11 klas fu Gilead. Na ini wan pisi ten fu dri wiki, wi ben musu seti ala den tori fu wi èn wi ben musu poti den sani di wi ben o tyari gowe kon na wan. Wi gowe libi famiri nanga mati na ini december 1947 èn wi go na New York makandra nanga 15 tra sma fu Australia di ben kisi kari fu go na a srefi klas.

Den mun di wi ben de na Gilead ben frei pasa esi-esi èn wi ben musu go du zendelingwroko na Yapan. Fu di a ben teki wan heri pisi ten fu kisi wi papira fu go na Yapan, dati meki Lloyd ben musu dini baka leki wan kringopziener fu Yehovah Kotoigi. Wi ben musu dini gemeente na ini a foto Los Angeles te go miti a grens fu Meksikow. Fu di wi no ben abi wan wagi, den Kotoigi ben prisiri fu tyari wi go fu a wán gemeente go na a trawan. A kring dati ben abi wan bigi gebied, èn na ini a ten disi a prati na ini dri Ingrisitongo èn so srefi dri Spanyoro distrikt. Iniwan fu den distrikt disi abi pikinmoro tin kring!

Wantronso a ben de oktober 1949, èn wi ben de na ini wan sipi di sma ben e gebroiki fosi fu tyari srudati. A sipi disi ben e tyari wi go na Yapan. Na wan sei fu a sipi mansma ben sidon, èn a tra sei ben de gi umasma nanga pikin. Wán dei nomo bifo wi ben doro na ini a foto Yokohama, wi miti nanga wan bigi ogri winti. Soleki fa a ben sori dan a winti disi ben wai den dungru wolku gowe, bika di son opo a dei baka dati, wi ben man si ala a moi fu a Fujibergi. A sani disi fu tru ben gi wi wan switi firi srefisrefi di wi doro na ini a nyun toewijzing fu wi.

Wi E Wroko Nanga den Brada Nanga Sisa fu Yapan

Di wi ben kon krosibei fu a lanpresi, dan wi si hondrohondro sma nanga blaka wiwiri. ’Dati na wan babari di den sma dati e meki!’ wi ben prakseri di wi ben yere wan bigi babari. Ala den sma ben weri udu klompu di ben e nakinaki na tapu den udu planga fu a lanpresi. Baka di wi ben de wán neti na ini Yokohama, wi teki loko fu go na Kobe pe wi ben musu du zendelingwroko. Drape, Don Haslett, wan tra brada fu Gilead di ben doro na ini Yapan wan tu mun bifo wi ben doro drape, ben yuru a zendeling-oso. A ben de wan moi, bigi oso di ben gersi wan Amerkan oso di ben abi tu sodro èn a heri oso ben leigi!

Fu man abi wan sani fu sribi na tapu, wi koti hei grasi na tapu a prasi èn wi poti en na tapu a gron na ini na oso. Na so wi bigin a zendeling libi fu wi nanga noti moro leki a bagasi di wi ben abi. Wi ben kisi pikin kropatu di den sma na ini Yapan e kari hibachi, èn den kropatu disi ben de fu waran wi èn so srefi fu bori na tapu. Wan neti, Lloyd ben kon miti tu tra zendeling, Percy nanga Ilma Iszlaub, di ben flaw. Lloyd opo den fensre fu meki krin, kowru winti kon na ini na oso, èn a sani dati meki taki den kisi densrefi baka. Misrefi flaw wan leisi tu di mi ben bori na tapu den kropatu. Wi ben musu gwenti ete nanga wan tu sani!

A ben de prenspari taki wi ben leri a tongo, èn wi ben studeri Yapantongo wán mun langa, 11 yuru wán dei. Baka dati wi ben go na ini a preikiwroko nanga wán noso tu sani di wi ben skrifi na tapu papira èn di ben musu yepi wi fu bigin nanga a preikiwroko. A fosi dei di mi ben de na ini a preikiwroko, mi miti wan moi uma, Miyo Takagi, èn a kari mi kon na ini en oso na  wan switi fasi. Te wi ben e tyari gobaka, dan wi ben e meki muiti nanga wan Yapantongo-Ingrisitongo wortubuku, teleki wi ben hori wan moi bijbelstudie nanga den sma. Na ini 1999, di wi ben de na a inwijding fu a bijkantoro fu Yapan di ben bow kon moro bigi, mi si Miyo baka, èn so srefi wan tu tra lobiwan di mi ben studeri Bijbel nanga den. Feifitenti yari pasa, ma te nanga now den na fayafaya Kownukondre preikiman ete, di e du ala san den man fu dini Yehovah.

Tapu 1 april 1950 na ini Kobe, sowan 180 sma kon na a Memrefesa fu Krestes en dede. A ben fruwondru wi taki a mamanten baka dati, 35 sma ben kon makandra fu teki prati na a preikiwroko. Ibri zendeling ben teki dri noso fo fu den nyun sma disi fu go wroko nanga den na ini a preikiwroko. Den ososma no ben taki nanga mi fu di mi ben de wan sma fu wan tra kondre èn mi no ben e frustan furu fu Yapantongo. Na presi fu dati, den ben taki nanga den Yapansma di ben de nanga mi èn di ben de den nyun sma di ben kon na a Memrefesa. Den takimakandra ben go nanga langa, ma mi no ben sabi srefisrefi san den ben e taki. Mi breiti fu man taki dati wan tu fu den nyun sma disi kisi moro sabi èn den tan du a preikiwroko te nanga a dei fu tide.

Furu Grani Nanga Toewijzing

Wi tan du a zendelingwroko na ini Kobe teleki 1952, èn na a ten dati wi ben musu go na Tokyo, pe Lloyd ben musu dini leki bijkantoro opziener. Baka wan pisi ten, den toewijzing di a ben kisi ben tyari en na ala sei fu Yapan èn so srefi te na tra kondre. Baka ten, di a ben de na Tokyo wan leisi, dan Nathan Knorr fu na edekantoro taigi mi: „Bifo mi frigiti, yu sabi pe yu masra e go disi leisi leki zoneopziener? Australia nanga Nyun Zeeland”. A ben taki go moro fara: „Yu kan go tu efu yu e pai yu eigi kostu.” Dati ben de wan bigi prisiri! Te fu kaba, neigi yari ben pasa sensi wi ben gowe libi a kondre pe wi ben gebore!

Wi bigin skrifi brifi go esi-esi gi den famiri fu wi. Mi mama yepi fu pai gi mi ticket. Mi nanga Lloyd ben wroko fayafaya na ini a toewijzing fu wi, èn wi no ben abi a moni fu go luku den famiri fu wi. So bun, den begi fu mi ben kisi piki. Yu kan frustan taki, mi mama ben breiti srefisrefi fu si mi. A ben taki, „We, mi o poti moni na wan sei so taki baka dri yari yu kan kon dyaso baka”. Mi gowe libi mi mama ala di wi ben fruwakti fu si makandra baka dri yari, ma a sari taki a dede na ini yuli fu a yari na baka. A sa de wan tumusi moi sani fu miti en baka na ini a nyun grontapu!

Teleki 1960, a zendelingwroko ben de a wan-enkri toewijzing fu mi, ma baka dati mi kisi wan brifi di ben taki: „Bigin nanga a dei fu tide yu abi a wroko fu wasi èn triki den krosi fu a heri Bethelfamiri.” Na a ten dati a Bethelfamiri fu wi ben abi sowan 12 sma nomo, fu dati ede mi ben man du a wroko disi makandra nanga a zendelingwroko fu mi.

Na ini 1962 a genootschap broko a Bethel-oso fu wi puru di ben bow neleki den oso fu Yapan, èn a yari baka dati wan nyun gebow fu siksi sodro ben klari na tapu a srefi presi dati. Mi ben kisi a wroko fu yepi den nyun, yongu Bethel brada fu krin den kamra fu den èn fu hori ala sani krin. Na ini Yapan a gwenti no ben de fu leri boi fa fu du osowroko. Skoroleri ben de a moro prenspari sani gi den, èn den mama fu den ben e du ala sani gi den. Den leri heri esi taki mi no ben de den mama. Baka wan pisi ten, furu fu den go na fesi èn den kisi nyun frantwortu na ini na organisâsi.

Wan bun faya zomer dei, wan bijbelstudenti ben kon luku a bijkantoro,  èn a si fa mi ben e bosro den wasi-oso. A taki: „Grantangi taigi mi suma abi a frantwortu dyaso so taki mi kan pai wan sma fu du a wroko disi gi yu.” Mi taigi en taki ala di mi ben warderi a bunfasi fu en, toku na a tra sei mi ben de klariklari srefisrefi fu du iniwan wroko di mi ben kisi fu du na ini na organisâsi fu Yehovah.

Pikinmoro na a srefi ten disi, mi nanga Lloyd kisi kari fu go na a di fu 39 klas fu Gilead! Dati ben de wan grani na ini 1964, fu go baka na skoro na a libimarki fu 46 yari! A skoro disi ben de spesrutu fu yepi den brada di ben e dini na ini den bijkantoro, so taki den ben man du den frantwortu fu den na wan yoisti fasi. Wi ben kisi leri tin mun langa, èn baka dati wi ben musu go wroko baka na ini Yapan. Na a ten dati, moro leki 3000 Kownukondre preikiman ben de na ini a kondre dati.

Someni sma ben kon na ini waarheid taki na ini 1972 moro leki 14.000 Kotoigi ben de, èn wan nyun bijkantoro di ben abi feifi sodro ben bow na ini Numazu na a zuidsei fu Tokyo. Te wi ben de na ini Bethel dan wi ben man si a Fujibergi, san ben de wan tumusi moi sani fu si. A bigi nyun drukpers bigin druk moro leki wán milyun tijdschrift na ini Yapantongo na ini wán mun. Ma heri esi wan kenki ben o kon gi mi nanga Lloyd.

Na a kaba fu a yari 1974, Lloyd kisi wan brifi fu na edekantoro fu Yehovah Kotoigi na ini Brooklyn èn a brifi ben skrifi taki a ben kisi kari fu kon dini leki memre fu a Tiri Skin. Na ini a bigin mi ben denki: ’We, mi nanga Lloyd no o de makandra moro. Fu di Lloyd ben abi a howpu fu go na hemel èn mi ben abi a howpu fu tan na grontapu, dan toku wán dei wi ben sa musu prati. Kande a ben o de moro bun efu Lloyd go na Brooklyn sondro mi.’ Ma heri esi mi kenki a fasi fa mi ben denki èn mi ben de klariklari fu go na Brooklyn nanga Lloyd na ini maart 1975.

Blesi na a Edekantoro

Srefi na ini Brooklyn, Lloyd ben poti furu prakseri na a preikiwroko na ini Yapan, èn ala ten a ben e taki fu den ondrofeni di wi ben abi drape. Ma now okasi ben de fu wroko na tra presi. Na ini den lasti 24 yari fu en libi, Lloyd ben wroko spesrutu leki zone opziener, èn fu dati ede a ben reis go na furu presi fu grontapu. Difrenti leisi mi go nanga en na difrenti presi na grontapu.

Fu di wi go luku wi Kresten brada na ini tra kondre, dan dati yepi mi fu kon si na ini sortu situwâsi furu fu den e libi èn e wroko. Noiti mi sa frigiti a fesi fu wan meisje di mi ben miti na ini noord Afrika. A ben abi tin yari èn a nen Entellia. A ben lobi a nen fu Yehovah èn a ben waka wán yuru nanga afu go-kon, fu go na den den Kresten konmakandra. Ala di a famiri fu en ben frufolgu en na wan ogri-ati fasi, toku Entellia gi ensrefi abra na Yehovah. Di wi go na a gemeente fu en, wán dòf lampu nomo ben de di ben anga leti na tapu a schema fu a takiman. Boiti a pikinso leti disi, a presi ben dungru srefisrefi. Na ini a dungru dati, a ben naki yu ati srefisrefi fu yere fa den den brada nanga sisa ben e singi so moi.

Wan prenspari sani pasa na ini wi libi na ini december 1998. Mi nanga Lloyd ben de memre fu wan grupu di ben e go na a „Gado Pasi fu Libi” Distrikt Kongres di ben hori na ini Cuba. A ben naki wi ati fu tru fu si fa den brada nanga sisa ben de nanga warderi fu di wan tu brada fu a Brooklyn edekantoro ben kon na den! Mi no sa frigiti den leisi di mi ben miti lobiwan di e gi Yehovah prèise fayafaya nanga wan tranga sten.

Mi E Firi Switi na Mindri a Pipel fu Gado

Ala di mi gebore na ini Australia, toku mi kisi lobi gi den sma na ala den presi pe na organisâsi fu Yehovah ben seni mi go. Mi lobi den sma na ini Yapan, èn now di mi de moro leki 25 yari na ini Amerkankondre, dan mi si taki mi lobi den sma dyaso tu. Di mi masra dede, mi no prakseri fu drai go baka na Australia, ma fu tan na Brooklyn Bethel pe Yehovah gi mi wroko fu du.

Now mi abi moro leki 80 yari. Baka di mi dini 61 yari na ini a furuten diniwroko, mi de klariklari ete fu dini Yehovah na ala presi pe a wani taki mi du dati. Yehovah sorgu mi bun trutru. Mi breiti taki mi ben abi a grani fu libi moro leki 57 yari nanga wan lobi patna di ben lobi Yehovah. Mi de seiker taki Yehovah sa tan blesi wi, èn mi sabi taki a no sa frigiti a wroko fu wi nanga a lobi di wi sori gi a nen fu en.—Hebrewsma 6:10.

[Futuwortu]

[Prenki na tapu bladzijde 25]

Mi nanga mi mama na ini 1956

[Prenki na tapu bladzijde 26]

Mi nanga Lloyd makandra nanga wan grupu fu preikiman fu Yapan na ini den yari syatu baka 1950

[Prenki na tapu bladzijde 26]

Mi nanga mi fosi bijbelstudie, Miyo Takagi, na ini Yapan, syatu baka 1950 èn so srefi na ini 1999

[Prenki na tapu bladzijde 28]

Dyaso mi nanga Lloyd e gi kotoigi na strati na ini Yapan