Yu Kan Kisi Kownukondre Blesi

A KRESTEN apostel Paulus ben man taki wan tu prenspari tongo fu en ten, heri bun. A ben kisi leri na wan skoro di wi kan agersi nanga wan universiteit na ini a ten disi. A ben abi ala den winimarki nanga reti di wan borgu fu Rome ben abi (Tori fu den Apostel 21:37-40; 22:3, 28). Fu di a ben abi den sani disi, meki a ben kan tron wan gudu man èn a ben kan kisi barinen. Toku a ben taki: „Ala sani di ben warti gi mi, mi si leki sani di mi lasi fu Krestes ede . . . èn mi e si den leki wan ipi doti, so taki mi man wini Krestes” (Filipisma 3:7, 8). Fu san ede Paulus ben taki so wan sani?

Sma ben sabi Paulus fosi leki Saulus fu Tarsus èn leki wan sma di ben frufolgu den wan „di ben de fu A Pasi”. Ma Paulus ben tron wan bribiman baka di a kisi wan fisyun pe a ben si Yesus di ben opo baka èn di ben kisi glori (Tori fu den Apostel 9:1-19). Gi Paulus, dan a sani disi di a ondrofeni di a ben de na pasi fu go na Damaskus, sondro tweifri ben buweisi taki Yesus ben de a pramisi Mesias, noso Krestes, èn taki a sa de a tiriman fu a pramisi Kownukondre, na ini a ten di e kon. Na ondrofeni disi ben tyari wan bigi kenki kon tu na ini a fasi fa Paulus ben libi, soleki fa ensrefi taki na wan krakti fasi. A sani dati skrifi na tapusei. Nanga tra wortu, fu di Paulus ben de opregti èn ben abi wan bun ati, meki a ben abi berow.—Galasiasma 1:13-16.

Na ini Bijbel, a werkwortu „abi berow” e vertaal furutron fu wan  Griki wortu di wani taki trutru „sabi baka ten”. Disi de kontrari „a sabi di wan sma sabi sani na fesi”. So bun, fu abi berow wani taki dati wan sma musu kenki en prakseri, a fasi fa a e tyari ensrefi, noso a marki di a abi. A wani taki tu dati wan sma musu poti a fasi fa a ben libi fosi na wan sei, fu di a fasi dati fu libi no bun moro (Tori fu den Apostel 3:19; Openbaring 2:5). Na ini a kefal fu Paulus, dan a prenspari sani dati di pasa di a ben de na pasi e go na Damaskus, no ben de wan ondrofeni nomo di ben meki a firi bun noso wan sani di ben tranga en bribi srefi. Paulus ben kon frustan taki a fasi fa a ben libi bifo ben de fu soso, fu di a no ben sabi Krestes. A ben frustan tu taki, efu a ben wani kisi wini fu a sabi fu Krestes di a ben kisi no so langa pasa, dan a ben musu du wan sani fu kenki a fasi fa a ben libi.—Romesma 2:4; Efeisesma 4:24.

Wan Kenki Di Tyari Blesi Kon

Fosi, a sabi di Paulus ben abi fu Gado ben kon moro furu fu a sekte fu den Fariseiman, wan grupu di a ben de wan memre fu dati. Den sani di a sekte ben e bribi ben abi furu libisma filosofia nanga gwenti na ini. Fu di Paulus ben krutu sma fu tra bribi, meki a faya di a ben abi nanga a muiti di a ben meki, no ben yoisti. Ala di a ben denki taki a ben e dini Gado, dan te yu luku en bun, a ben e feti teige Gado.—Filipisma 3:5, 6.

Paulus ben kisi soifri sabi fu Krestes èn a ben kon sabi o prenspari Krestes de na ini a prakseri fu Gado. Baka dati Paulus ben man si taki a ben musu teki wan bosroiti: A ben musu tan de wan Fariseiman èn tan abi wan hei posisi? A ben musu tan teki a grani di sma ben gi en noso a ben musu kenki a fasi fa a ben libi èn bigin du san ben de fanowdu fu meki Gado feni en bun? Koloku taki Paulus ben teki a yoisti bosroiti, bika a ben taki: „Mi no e syen gi a bun nyunsu; fu taki en leti, a de a krakti fu Gado fu frulusu ibriwan sma di abi bribi, fosi den Dyu èn so srefi den Grikisma” (Romesma 1:16). Paulus tron wan fayafaya preikiman fu a bun nyunsu di abi fu du nanga Krestes èn nanga a Kownukondre.

Furu yari baka dati, Paulus ben taigi tra Kresten: „Mi no e si misrefi leki wan sma di hori en kaba, ma wán sani de seiker: Ala di mi frigiti den sani di de na mi baka èn langa misrefi go na den sani di de na mi fesi, mi e suku fu doro a marki fu kisi a paiman fu a kari di Gado e kari sma go na tapusei, nanga yepi fu Krestes Yesus” (Filipisma 3:13, 14). Paulus ben kisi winimarki fu a bun nyunsu fu di a ben wani fu libi ala den sani na baka di ben hari en gowe fu Gado. Nanga en heri ati a ben du sani di ben de akruderi a prakseri fu Gado.

San Yu Ben O Du?

Kande yu yere a bun nyunsu fu a Kownukondre no so langa pasa. A howpu fu libi fu têgo na ini wan volmaakti paradijs e hari yu? A musu hari yu, fu di wi alamala gebore nanga a winsi fu libi èn fu nyan bun fu wan libi na ini vrede nanga seikerfasi. Bijbel e taki dati Gado poti „ten di no skotu” na ini wi ati (Preikiman 3:11). So bun, a de wan bun sani gi wi fu howpu tapu a ten pe sma kan libi fu têgo ini vrede nanga koloku. Èn dati na san wi e feni na ini a bun nyunsu fu a Kownukondre.

Ma fu meki a howpu dati kon tru, dan yu musu ondrosuku fu kon sabi san na a bun nyunsu. Na apostel Paulus ben gi a seryusu rai disi: „Kon sabi gi [yusrefi] san na a bun, yoisti èn volmaakti wani fu Gado” (Romesma 12:2). So bun, neleki fa Paulus ben du, dan baka di yu kisi sabi èn yu kon frustan sani, yu musu teki wan bosroiti.

Na a tra sei, kande yu e bribi wan tu sani kaba di abi fu du nanga a tamara fu yu. Memre taki Saulus ben abi en eigi denki kaba fu a wani fu Gado, bifo a tron na apostel Paulus. Ma na presi taki yu e fruwakti taki Gado sa opo yu ai na wan wondru fasi, dan fu san ede yu no e luku a tori leki fa a de trutru? Aksi yusrefi: ’Mi sabi trutru san na a wani fu Gado ini a tori fu a libisma famiri nanga grontapu? Sortu buweisi mi kan gi fu sori taki a bribi fu mi, de wan trutru sani? A buweisi di mi abi sa tranga ete te mi e ondrosuku sani nanga yepi fu Gado en Wortu, Bijbel?’ Yu no e lasi no wan sani te yu e ondrosuku den kerki bribi fu yu na a fasi disi. Fu taki en leti, yu musu wani fu du disi, bika Bijbel e gi wi tranga nanga den wortu disi: „Overtoigi yusrefi fu ala sani, hori fasti na a sani di bun srefisrefi” (1 Tesalonikasma  5:21). Te yu e luku en bun, a no de so dan taki a moro prenspari sani de, taki Gado musu feni wi bun?—Yohanes 17:3; 1 Timoteus 2:3, 4.

Kande kerki fesiman e pramisi wi wan tamara di sa de fu têgo. Ma efu a pramisi dati no de akruderi den leri fu Bijbel, dan a no sa yepi wi fu kisi den blesi fu a Kownukondre fu Gado. Na ini en barinen Bergitaki, Yesus ben warskow wi na wan krakti fasi: „A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata, di de na hemel.”—Mateus 7:21.

Luku taki Yesus e poti krakti tapu a du di wi musu du a wani fu en Tata. Disi na a markitiki fu kisi den blesi fu a Kownukondre fu Gado. Nanga tra wortu, wan sani kan gersi leki a santa, ma a no abi fu de so taki Gado e feni a sani dati bun. Te yu luku en bun, dan Yesus ben taki moro fara: „Furu sma sa taigi mi na a dei dati: ’Masra, Masra, a no na ini yu nen wi ben taki profeititori, èn a no na ini yu nen wi ben puru ogri yeye na sma tapu, èn a no na ini yu nen wi ben du furu krakti wroko?’ Èn toku mi sa taigi den na publiki: Mi no ben sabi unu noiti! Un komoto na mi fesi, un wrokoman fu kruktudu” (Mateus 7:22, 23). A de krin taki a moro prenspari sani de taki wi musu de seiker taki wi e frustan heri bun san na a bun nyunsu fu a Kownukondre trutru; te wi sabi dati kaba, dan wi musu handri akruderi a sabi dati.—Mateus 7:24, 25.

Wi Kan Kisi Yepi

Yehovah Kotoigi preiki a bun nyunsu fu a Kownukondre fu Gado moro leki 100 yari kaba. Fu di den e prati buku èn e taki nanga sma, dan den e yepi sma na heri grontapu fu kisi soifri sabi fu a Kownukondre disi, sortu blesi a sa tyari kon, èn san wan sma musu du fu kisi den blesi disi.

Wi e gi yu deki-ati fu du wan sani te yu e yere a boskopu di den Kotoigi fu Yehovah e preiki. Efu yu e teki a bun nyunsu èn e du wan sani na tapu dati, dan yu kan kisi bun bigi blesi no wawan na ini a ten disi, ma so srefi na ini a ten di e kon te a Kownukondre fu Gado sa tiri a heri grontapu.—1 Timoteus 4:8.

Du wan sani nownow, fu di den blesi di a Kownukondre fu Gado sa tyari kon, de krosibei!

[Prenki na tapu bladzijde 7]

Kotoigi fu Yehovah e preiki a bun nyunsu fu a Kownukondre fu Gado nanga yepi fu buku èn fu di den e taki nanga sma