Poti Prakseri na den Wondruwroko fu Gado
Poti Prakseri na den Wondruwroko fu Gado
„Furu sani yusrefi du, o Yehovah, mi Gado, srefi den wondruwroko fu yu èn den prakseri fu yu gi wi; no wan sma de di de leki yu.”—PSALM 40:5.
1, 2. Sortu buweisi wi abi fu den wondruwroko fu Gado, èn san den musu buweigi wi fu du?
TE YU e leisi Bijbel, dan a no muilek fu si taki Gado ben du wondrusani gi Israèl, a pipel fu en fu owruten (Yosua 3:5; Psalm 106:7, 21, 22). Awansi a de so taki Yehovah no e du den sani dati gi libisma na ini a ten disi, toku wi e feni nofo buweisi fu den wondruwroko fu en na wi lontu. Fu dati ede wi abi reide fu taki a srefi sani di a psalm skrifiman ben taki: „Den wroko fu yu furu srefisrefi, o Yehovah! Yu meki den alamala nanga koni. Grontapu furu nanga den sani di yu meki.”—Psalm 104:24; 148:1-5.
2 Furu sma na ini a ten disi no wani si den krinkrin buweisi disi fu den sani di a Mekiman du (Romesma 1:20). Ma a bun te wi e poti prakseri na den sani disi èn e kon sabi fa wi Mekiman e si wi èn sortu plekti wi abi na en. Den kapitel 38 te nanga 41 fu a buku Yob e gi wi bun yepi fu du dati, bika na ini den kapitel disi Yehovah e meki Yob poti prakseri na spesrutu sani di abi fu du nanga den wondruwroko fu en. Luku wan tu fu den prenspari sani di Gado tyari kon na fesi.
Wondruwroko Di Krakti èn Di Moi Srefisrefi
3. Sortu sani Gado aksi soleki fa a skrifi na Yob 38:22, 23, 25-29?
3 Gado ben aksi Yob srefi: „Yu go na ini den maksin fu a snew, noso yu e si srefi den maksin fu den pisipisi ijs di e fadon komopo na loktu, di mi hori kibri gi a ten fu banawtu, gi a dei fu feti nanga orloku?” Na furu presi fu grontapu, libisma sabi snew nanga pisipisi ijs di e fadon komopo na loktu. Gado go doro fu taki: „Suma diki wan gotro gi a frudu fu watra èn wan pasi gi a blaka dondruwolku, fu meki alen fadon na a kontren pe no wan sma e libi, na ini a woestijn pe no wan sma e tan, fu satisferi den opo presi pe bigi winti e wai èn fu meki a grasi sproiti? Na alen abi wan tata, noso suma ben meki den dowdropu gebore? Fu suma en bere na ijs e komoto kon na dorosei, èn ini a tori fu a dow fu hemel di e tron finifini pisi ijs, suma e meki a gebore trutru?”—Yob 38:22, 23, 25-29.
4-6. Sortu sani fu snew sma no sabi finifini?
4 Te sma e libi na ini wan libimakandra pe ala sani e waka esi-esi, èn te den musu go na tra presi furutron, dan den kan si snew leki wan problema nomo. Ma furu tra sma e si snew leki wan prisiri sani, fu di a heri presi e kon weti nanga en èn a sani disi a e gi sma okasi fu du tra sortu prisiri sani. Nanga na aksi fu Gado na prakseri, yu sabi finifini san na snew, yu si en kaba wan leisi? We, wi si ipi-ipi snew kaba, kande na tapu fowtow di ben sori snew bergi noso kande wi si bun furu snew nanga wi eigi ai. Ma fa a de nanga den pikinpikin pisi snew? Yu sabi san den gersi, noso yu ondrosuku fa den du kon?
5 Someni tenti yari kaba, wan tu sma studeri èn meki fowtow fu pikinpikin pisi snew. Pikinpikin pisi snew kan abi 100 pikin pisi ijs di seti na wan kefalek moi fasi. A buku Atmosphere e taki: „Sma sabi heri bun taki den pikinpikin pisi snew seti na furu difrenti fasi, èn ala di den sabidensiman e hori nomonomo taki naturu no abi wan wet di e tapu den pikinpikin pisi snew disi fu gersi makandra, toku noiti sma feni tu srefi sortu pikinpikin pisi snew. A sma di ondrosuku a tori disi moro langa leki iniwan tra sma, na Wilson A. Bentley. Moro leki 40 yari, a man disi ondrosuku pikinpikin pisi snew nanga yepi fu wan microscoop èn a meki fowtow fu den, ma noiti a feni tu pikinpikin pisi snew di ben de a srefi.” Ma srefi efu tu pisi snew oiti ben o de a srefi, dan dati trutru ben o kenki a wondru fu den someni difrenti pikinpikin pisi snew?
6 Memre na aksi fu Gado: „Yu go na ini den maksin fu snew?” Furu sma e denki taki den wolku na den maksin fu snew. Yu man denki taki yu e go na ini den maksin disi fu go luku omeni difrenti pikinpikin pisi snew de èn fu studeri fa den du kon? Wan sabidensi encyclopedia e taki: „Na inibere fu a moro pikin pisi ijs, wan sani di de fanowdu fu meki bun kowru dropu fu wolku fu sowan -40oC, na wan sani di te leki now no de so krin ete fu frustan.”—Psalm 147:16, 17; Yesaya 55:9, 10.
7. San libisma sabi fu alen?
7 Noso, san wi kan taki fu alen? Gado aksi Yob: „Alen abi wan tata, noso suma meki den dowdropu?” A srefi sabidensi encyclopedia e taki: „Fu di a muilek fu frustan fa sani e waka na ini a loktu èn fu di bun furu difrenti dampu nanga pikinpikin pisi sani de na ini a loktu, dati meki wan sma no man skrifi soifri èn finifini fa den wolku nanga alen du kon.” Fu taki en moro makriki, sabidensiman kon nanga finifini leri, ma den no man fruklari soifri san na alen. Toku, yu sabi taki na alen di grontapu abi so tranga fanowdu, e fadon, a e nati a gron, a e meki sani gro, so taki wi kan tan na libi èn wi e nyan bun fu a libi.
8. Fu san ede den wortu fiti di Paulus skrifi na Tori fu den Apostel 14:17?
8 Yu no ben o agri nanga a bosroiti fu Paulus? A ben gi trawan tranga fu si na ini den wondruwroko disi buweisi fu a Sma di ben du den. Paulus ben taki fu Yehovah Gado: „A ben gi kotoigi fu ensrefi fu di a ben du bun, fu di a e gi unu alen fu hemel nanga bun yariten, èn fu di a e furu un ati bogobogo nanga nyanyan èn nanga bigi prisiri.”—Tori fu den Apostel 14:17; Psalm 147:8.
9. Fa den wondruwroko fu Gado e sori en bigi krakti?
9 A de seiker taki a Duman fu den sortu wondruwroko disi di e tyari winimarki kon gi sma, musu de kefalek koni èn a musu abi bun bigi makti. Ini a tori fu en makti, prakseri disi: Sma e taki dati sowan 45.000 bigi alen e fadon ala dei, èn moro leki 16 milyun na ini wán yari. Disi wani taki dati sowan 2000 bigi alen e fadon nownowde. Den dangra wolku fu wán bigi alen nomo, e wai pasa nanga a srefi krakti fu tin noso moro fu den atoombom di trowe na ini a di fu Tu Grontapufeti. Wan pisi fu a krakti dati de fu si leki dondrufaya. Boiti taki dondrufaya abi kefalek bigi krakti, a e yepi tu fu meki stikstof (wan spesrutu sortu gas) di e go na ini a gron, èn den bon e gebroiki en leki mest fu gro moro bun. So bun a dondrufaya e sori bun furu krakti, ma a e tyari trutru winimarki tu.—Psalm 104:14, 15.
Fa Yu E Denki fu den Sani Disi?
10. Fa yu ben o piki den aksi di skrifi na Yob 38:33-38?
10 Prakseri taki yu na Yob, èn taki na Almakti Gado ben e poti aksi gi yu. Kande yu sa agri taki furu sma no e poti nofo prakseri na den wondruwroko fu Gado. Yehovah e poti den aksi gi wi di skrifi na Yob 38:33-38. „Yu kon sabi den wet fu hemel, noso yu ben sa kan meki a makti fu en wroko na grontapu? Yu kan opo yu sten go na den wolku tu, so taki wan frudu fu watra kan tapu yu? Yu kan seni dondrufaya, meki den gowe èn den taigi yu: ’Dya wi de!’? Suma poti koni na ini den pisi fu den wolku, noso suma gi frustan na a sani di e sori ensrefi na loktu? Suma kan teri den wolku soifri nanga koni, noso den watrakan fu hemel — suma kan kanti den, te a fini doti e lon komopo na ini neleki wan bigi ipi, èn den pisi doti fu gron e tan na wan?”
11, 12. San na wan tu sani di e buweisi taki Gado na a Duman fu wondruwroko?
11 Wi kari wan tu fu den sani nomo di Elihu ben tyari kon na fesi di a ben taki nanga Yob, èn wi kari wan tu aksi di Yehovah ben wani taki Yob ben piki den „leki wan dyadya man” (Yob 38:3). Wi e taki „wan tu” bika na ini kapitel 38 nanga 39, Gado ben poti prakseri na tra prenspari sani di abi fu du nanga den sani di a meki. Fu gi wan eksempre, a fasi fa hemel seti. Suma sabi ala den wet noso reglementi fu den? (Yob 38:31-33). Yehovah ben meki Yob poti prakseri na sonwan fu den meti — a lew nanga a blaka fowru, a stonbokoboko nanga a zebra, a werdri mankaw nanga a struisvogel, a tranga asi nanga na aka. Fu taki en leti, Gado ben aksi Yob efu na en ben gi den difrenti meti disi den eigifasi di den abi so taki den kan libi èn kan meki pikin. Yu sa kisi prisiri te yu e studeri den kapitel disi, spesrutu te yu na wan sma di lobi asi noso tra meti.—Psalm 50:10, 11.
12 Yu ben kan studeri so srefi Yob kapitel 40 nanga 41, pe Yehovah e aksi Yob ete wantron fu gi piki tapu den aksi di e handri fu tu spesrutu mekisani. Soleki fa wi sabi, dan den mekisani disi na a nijlpaard (Behemot), wan bun bigi sortu watrabofru di krakti srefisrefi, nanga a Nijl krokodil (Lefiatan), wan bun bigi sortu kaiman di e frede sma. Na den eigi fasi, ibriwan fu den meti disi na wan wondru mekisani èn a bun te wi e poti prakseri na den. Meki wi luku now fa wi musu si den sani disi.
13. Sortu krakti den aksi fu Gado ben abi tapu Yob, èn sortu krakti den sani disi musu abi na wi tapu?
13 Yob kapitel 42 e sori wi sortu krakti den aksi di Gado ben poti gi Yob ben abi na en tapu. Wan pisi ten na fesi Yob ben poti tumusi furu prakseri na ensrefi èn na trawan. Ma di Yob teki a piri-ai di Gado ben gi en nanga yepi fu aksi, dan a kenki a fasi fa a ben e denki. A ben tyari kon na krin: „Mi kon sabi taki yu [Yehovah] man du ala sani, èn no wan sani de di yu no man du. ’Suma de drape di e kibri rai sondro sabi?’ Fu dati ede mi ben taki, ma mi no ben e frustan sani di ben de tumusi fruwondru gi mi, sani di mi no sabi” (Yob 42:2, 3). Iya, baka di Yob poti prakseri na den wroko fu Gado, dan a taki dati den sani disi ben de tumusi wondru sani gi en. Baka di wi luku den kefalek moi wondru sani disi ete wan leisi, dan a koni èn a makti fu Gado musu naki wi ati tu. Nanga sortu marki den sani disi musu naki wi ati? A de so taki a bun bigi makti nanga koni fu Gado musu naki wi ati nomo? Noso den musu abi wan moro bigi krakti na wi tapu?
14. San David ben taki fu den wondruwroko fu Gado?
14 We, na ini Psalm 86, wi e feni wortu fu David di e handri fu a tori disi. Na ini wan psalm na fesi, David ben taki: „Den hemel e meki a glori fu Gado bekènti; èn a loktu e fruteri fu a wroko fu en anu. A wán dei baka a trawan e meki sma taki, èn a wán neti baka a trawan e tyari sabi kon na krin” (Psalm 19:1, 2). Ma David go doro fu taki. Na Psalm 86:10, 11 wi e leisi: „Yu bigi èn yu e du wondrusani; yu na Gado, yu wawan. Leri mi, o Yehovah, fu den pasi fu yu. Mi sa waka na ini yu waarheid. Meki mi ati kon de wán fu man frede yu nen.” Boiti taki David ben abi lespeki gi a Mekiman fu di a du furu wondruwroko, David ben abi a yoisti frede gi en. Yu kan frustan fu san ede. David no ben wani fu gi a Sma di man du den wondruwroko disi syen. Wi no musu du dati tu.
15. Fu san ede a frede di David ben abi gi Gado ben de wan yoisti frede?
15 David ben musu kon frustan taki fu di Gado abi bigi krakti èn so srefi e gebroiki dati, dan a kan gebroiki en teige iniwan sma di no e du a wani fu en. A krakti fu Gado e frede den sortu sma dati. Gado ben aksi Yob: „Yu go na ini den maksin fu a snew, noso yu si srefi den maksin fu den pikinpikin pisi ijs, di mi kibri gi a ten fu banawtu, gi a dei fu feti nanga orloku?” Snew, pikinpikin pisi ijs, bigi alen, winti, nanga kotifaya, den alamala na sani di Gado kan gebroiki fu feti. Èn den sani disi na trutru bigi krakti fu a naturu!—Yob 38:22, 23.
16, 17. Sortu sani e sori a bigi krakti di Gado abi, èn fa Gado gebroiki a krakti disi na ini a ten di pasa?
16 Kande yu e memre wan tu bigi rampu na ini yu kontren di ben de bakapisi fu — wan bigi ogri winti, pikinpikin pisi ijs di e fadon bogobogo komopo na loktu, noso wan bigi frudu. Fu gi wan eksempre fu dati, na a kaba fu a yari 1999, wan bigi ogri winti wai na a zuid-westsei fu Europa. Sabiman srefi di e luku a weer no ben fruwakti a sani disi. Bigi ogri winti di ben wai so esi leki 200 kilometer wán yuru, ben wai dusundusun daki puru, kanti elektrisch paal trowe, èn drai truck tapu. Pruberi fu si a sani disi na yu fesi: A pisi ten di a bigi ogri winti dati wai, a rutu puru noso kanti sowan 270 milyun bon, 10.000 fu den bon disi ben de na ini a park fu Versailles, di de dorosei fu Parijs. Milyunmilyun oso ben de sondro faya. Pikinmoro 100 sma dede. Èn ala den sani disi pasa na ini wan syatu pisi ten nomo. Dati na wan bigi krakti!
17 Wan sma kan taki dati bigi ogri winti e wai wantronso èn den kan hari go na ala sei sondro taki wan sani kan tapu den. Ma san ben kan pasa te na Almaktiwan e du wondruwroko nanga yepi fu den krakti disi, fu di a e gebroiki den na a fasi fa a wani? A ben du wan srefi sortu sani na ini a ten fu Abraham. Abraham ben kon sabi taki a Krutuman fu a heri grontapu ben krutu na ogridu fu den tu foto Sodom nanga Gomora. Den tu foto disi ben kruka sote, taki a krei di sma ben krei gi den foto disi ben opo go na Gado. Na so meki Gado yepi ala den regtfardikiwan fu lon komopo fu den foto disi di ben o kisi krutu. Bijbel e skrifi: „Dan Yehovah meki swarfu nanga faya komoto fu Yehovah, fu hemel”, na tapu den foto dati. Dati ben de wan wondruwroko, fu di a ben kibri regtfardikiwan èn a ben pori den wan di ben takru srefisrefi.—Genesis 19:24.
18. Fu sortu wondrusani Yesaya kapitel 25 e taki?
18 Wan pisi ten baka dati, Gado krutu na owruten foto Babilon, di kande na a foto di Yesaya kapitel 25 e taki fu en. Gado ben taki na fesi taki wan foto ben o kisi pori: „Bika yu meki wan foto tron wan ipi fu ston èn yu meki wan tranga foto tron wan brokopresi di e broko na pisipisi, èn yu meki wan toren pe freimdesma e tan, no de wan foto moro, di sma no sa bow baka srefi te ten di no skotu” (Yesaya 25:2). Sma na ini a ten disi di e go luku a presi pe Babilon ben de, kan erken taki a sani disi trutru pasa. A de so taki a pori di Babilon kisi no abi wan sani fu du nanga Gado? Nôno. Na presi fu dati, wi kan teki den wortu fu Yesaya: „O Yehovah, yu na mi Gado. Mi e hei yu, mi e prèise yu nen, bika yu du kefalek wondrusani, bosroiti di yu teki fu sensi owruten, de getrow èn den de fu frutrow.”—Yesaya 25:1.
Wondruwroko na ini a Ten Di E Kon
19, 20. Sortu kontru wi kan fruwakti fu Yesaya 25:6-8?
19 Gado ben gi a profeititori na tapusei wan kontru na ini a ten di pasa, èn a sa du wondrusani na ini a ten di e kon. Na ini den vers disi pe Yesaya e taki fu „wondrusani” fu Gado, wi e feni wan profeititori di wi kan frutrow èn di musu kisi wan kontru ete, neleki fa a krutu di Babilon ben musu kisi, ben kisi wan kontru. Sortu ’wondrusani’ Gado e pramisi? Yesaya 25:6 e taki: „Èn Yehovah fu den legre trutru sa meki gi ala pipel na tapu a bergi disi, wan fesa-nyanyan fu preti di lai nanga oli, wan fesa-nyanyan fu win di den kibri na tapu a sakasaka, fu preti di lai nanga oli èn di furu nanga bonyo fatu, fu win di den kibri na tapu a sakasaka, di soifri.”
20 A profeititori dati seiker sa kisi wan kontru na ini a nyun grontapu di Gado pramisi, èn di de leti na wi fesi. Na a ten dati a libisma famiri sa kon fri fu ala den problema di de leki wan hebi gi so furu sma. Fu taki en leti, a profeititori di skrifi na Yesaya 25:7, 8 e gi wi a dyaranti taki Gado sa gebroiki a bigi krakti fu en fu du den moro bigi wondruwroko fu ala ten: „A sa swari dede trutru fu têgo, èn a Soeverein Masra Yehovah trutru sa figi den watra-ai puru fu ala den fesi. Èn a syen di en pipel e kisi, a sa puru en na heri grontapu, bika Yehovah srefi taki en.” Baka ten na apostel Paulus teki den wortu fu a tekst dati èn a gebroiki den fu sori taki Gado sa tyari dedewan kon na libi baka, a sa gi dedewan wan opobaka. Dati sa de wan wondruwroko fu tru!—1 Korentesma 15:51-54.
21. Sortu wondruwroko Gado sa du gi den dedewan?
21 Wan tra reide fu san ede watra-ai fu sari no sa de moro, na taki libisma sa kon fri fu ala den siki di den abi. Di Yesus ben de na grontapu, a dresi furu sma — a meki den breniwan si baka, den dofuwan ben man yere baka, a gi den malengri wan krakti. Yohanes 5:5-9 e fruteri taki Yesus ben dresi wan man di ben malengri 38 yari langa. Den sma di ben si a sani disi ben denki taki a ben de wan wondru, noso wan wondruwroko. En dati ben de so tu! Ma Yesus ben taigi den taki na opobaka di a sa gi den dedewan sa de wan moro bigi wondruwroko: „No fruwondru fu disi, bika a yuru e kon pe ala sma di de na ini den memregrebi, sa yere en sten èn sa kon na doro, den wan di ben du bun sani, fu kisi wan opobaka fu libi.”—Yohanes 5:28, 29.
22. Fu san ede den pôtiwan nanga den wan di e kisi kwinsi kan abi howpu gi a ten di e kon?
22 A sani disi seiker sa feni presi, bika Yehovah na a sma di e pramisi en. Wi kan de seiker taki te a e gebroiki en bigi krakti fu meki sani kon bun baka, dan a bakapisi sa de wan wondrusani. Psalm 72 e taki fu den sani di a sa du nanga yepi fu en Kownu-Manpikin. Na a ten dati a regtfardikiwan sa sproiti. Vrede sa de pasa marki. Gado sa frulusu a pôtiwan èn so srefi a sma di e kisi kwinsi. A e pramisi: „Siri-nyanyan sa de bogobogo na grontapu; na tapu na ede fu den bergi, sani sa de pasa marki. A froktu fu en sa de neleki na tapu Libanon [fu owru ten], èn den sma di komoto na foto sa gi bromki neleki den prani fu grontapu.”—Psalm 72:16.
23. Sortu sani den wondruwroko fu Gado musu buweigi wi fu du?
23 A de krin fu si taki wi abi reide fu poti prakseri na den wondruwroko fu Yehovah — den sani di a ben du na ini a ten di pasa, den sani di a e du na ini a ten disi, èn den sani di a sa du na ini a ten di e kon heri esi. „Blesi Yehovah Gado, a Gado fu Israèl, di en wawan e du wondruwroko. Èn blesi a glori nen fu en gi ten di no abi marki, èn meki a glori fu en furu a heri grontapu. Amen nanga Amen” (Psalm 72:18, 19). Wi musu taki doronomo fu a sani dati te wi abi fayafaya takimakandra nanga den famiri fu wi èn nanga trawan. Iya, meki wi „meki a glori fu en bekènti na mindri den nâsi, na mindri ala pipel den wondruwroko fu en”.—Psalm 78:3, 4; 96:3, 4.
San Yu Ben Sa Piki?
• Fa den aksi di Gado ben poti gi Yob e poti krakti na tapu taki libisma no sabi nofo?
• Sortu eksempre fu den wondruwroko fu Gado di skrifi na Yob kapitel 37-41, ben naki yu ati?
• San wi musu du te wi e poti prakseri na wan tu fu den wondruwroko fu Gado?
[Aksi fu a tori disi]
[Prenki na tapu bladzijde 10]
San yu abi fu taki fu den someni difrenti pikinpikin pisi snew èn fu a kefalek bigi krakti fu dondrufaya?
[Sma di abi a reti fu a prenki]
snowcrystals.net
[Prenki na tapu bladzijde 13]
Taki doronomo fu den wondruwroko fu Gado nanga trawan