Yu E Memre Disi Ete?

Yu warderi en fu leisi den uitgave fu A Waktitoren di ben kon no so langa pasa? We, luku efu yu kan gi wan piki na tapu den aksi di e kon now:

• Fu san ede na apostel Paulus ben kari howpu leki lasti sani na ini Romesma 5:3-5?

Paulus ben kari wan tu sani di kan pasa nanga Kresten — banawtu, horidoro, a feni di Gado feni wi bun, nanga howpu. A „howpu” disi no de a srefi leki a fosi howpu di wan sma ben kisi fu Bijbel, ma a tranga moro leki a howpu dati. Na wan sani di e go moro dipi, a e kon de wan pisi fu wi, èn a de wan sani di wan Kresten kan kisi baka wan pisi ten.—15/12, bladzijde 22, 23.

• Fu san ede wan Kresten na ini a ten disi kande sa wani sabi moro fu den wega di ben e hori na ini owruten Grikikondre pe atleet ben e strei nanga makandra?

Te wi e frustan a fasi fa den wega disi ben hori èn san ben de den gwenti na den wega disi, dan a kan meki taki wi e frustan furu bijbeltekst moro bun. Son wan fu den tekst disi e taki fu ’strei akruderi den markitiki’, ’puru ibri hebi èn luku na eksempre fu Yesus’, ’lon a streilon te na a kaba’, èn taki wi e kisi wan kownu-ati noso wan prijs (2 Timoteus 2:5; 4:7, 8; Hebrewsma 12:1, 2; 1 Korentesma 9:24, 25; 1 Petrus 5:4).— 1/1, bladzijde 28-30.

• Nanga sortu nyun fasi fu meki a bun nyunsu bekènti den ben bigin na ini yanuari 1914?

Na a ten dati den ben tyari a „Photo-Drama der Schepping” kon na doro. A ben abi fo pisi èn a ben abi atosigi tu, di ben meki fu grasi èn di ben abi hondrohondro kloru. Te den ben drai a felem disi, dan na furu fu den pisi yu ben kan yere na a srefi ten lezing di den ben poti na tapu grammofoonplaat fu fruklari sani. Twenti fu a Drama disi ben sreka èn den ben gebroiki den na ala sei fu leri sma a Bijbel boskopu.—15/1, bladzijde 8, 9.

• Na sortu fasi a Tiri Skin e difrenti fu wan korporâsi?

Ala di sma e stem poti den memre fu a bestuur fu a Genootschap, no wan enkri sma boiti Yesus Krestes poti a Tiri Skin na wroko. Dati meki a no de fanowdu taki den memre fu a bestuur fu difrenti korporâsi di Yehovah Kotoigi e gebroiki musu de memre fu a Tiri Skin? Na a lasti alayari konmakandra di a Watch Tower Bible and Tract Society of Pennsylvania ben hori, memre fu a Tiri Skin di ben dini leki memre fu a bestuur ben saka a wroko fu den. Lepi brada fu den „tra skapu” ben teki a wroko dati abra (Yohanes 10:16). So bun, a Tiri Skin abi moro ten fu sreka nyanyan na yeye fasi èn fu sorgu gi den sani na yeye fasi di a bradafasi na heri grontapu abi fanowdu.—15/1, bladzijde 29, 31.

• Sortu tu Bijbel eksempre wi kan ondrosuku fu leri fa fu kakafutu te wan sani e meki wi lasi-ati?

Wan fu den na Hana, a mama fu Samuèl. A ben kan lasi-ati di Eli, a granpriester fu Israèl, no ben krutu en bun. Na presi fu dati, na wan switi èn lespeki fasi a fruteri en fa sani ben de trutru. Moro fara, Hana no ben hori Eli na ati. A di fu tu eksempre na Markus. A ben musu lasi-ati di na apostel Paulus no ben wani teki en go na wan preikiwaka. Na presi taki Markus ben lasi-ati di a lasi a grani dati, a ben go moro fara nanga en diniwroko di a ben du fayafaya, ala di a ben reis nanga Barnabas.—1/2, bladzijde 20-22.

• Fu san ede Kresten musu luku bun te den e gi trawan computer programa noso te den e kisi dati fu trawan?

Na tapu moro furu fu den computer programa disi (so srefi computer games) wan sani skrifi di e sori taki den abi a primisi fu meki so wan programa. A sma di e gebroiki noso di abi a programa abi a primisi fu poti a programa tapu wán computer nomo. Moro furu a de so taki wi e pasa na auteursrecht te wi e meki kopi gi trawan, awinsi wi e gi den a kopi fu soso. Kresten wani hori densrefi na a wet, fu di den e ’pai Caesar den sani baka di de fu Caesar’ (Markus 12:17).—15/2, bladzijde 28, 29.

• Suma ben de Cyrillus nanga Metodius, èn fa den yepi sma fu studeri Bijbel?

Den ben de tu brada di ben gebore na ini a di fu neigi yarihondro na ini Tesalonika, na Grikikondre. Den ben meki wan alfabet gi den tongo di den Slafiasma e taki èn den ben poti wan bigi pisi fu Bijbel na ini Slafiatongo.—1/3, bladzijde 28, 29.

• San den wortu „prakseri den sani fu a yeye” wani taki?—Romesma 8:6.

Dati wani taki dati a wroko krakti fu Yehovah e tiri en, e wroko na en tapu, èn e gi en deki-ati fu du sani. Wi kan meki a yeye fu Gado wroko na wi tapu te wi e leisi èn e studeri Bijbel, te wi e hori wisrefi na a wet fu Gado nanga wi heri ati, èn te wi e begi fu Gado en yeye.—15/3, bladzijde 15.

• San wi kan du efu wi feni taki trawan abi wan fowtu denki fu wi?

A de prenspari fu lusu a tori na wan lobi-ati fasi. Ma efu dati no e yepi, no lasi ati. Aksi Yehovah di „e ondrosuku den ati” fu A frustan fa yu e firi èn fu A yepi yu (Odo 21:2; 1 Samuèl 16:7).—1/4, bladzijde 21-23.