Afkodrei Trutru Kan Satisferi den Nowtu fu Wi na Yeye Fasi?

WI ALAMALA abi nowtu na yeye fasi, soleki fa wi abi nowtu na materia sei. Fu dati ede furu sma e aksi sani soleki: Fu san ede wi de na libi? Fu san ede sma e pina? San e pasa nanga wi te wi dede? Furu opregti sma e suku den piki tapu den aksi disi, èn tapu tra srefi sortu aksi na den konmakandra di sma di e du afkodrei e hori. Na den konmakandra dati, den e aksi rai na den sma di de leki asi fu den yeye. Den e howpu taki den man abi kontakti nanga den yeye fu den dedewan. A sani disi di sma e du den e kari afkodrei.

Na ini furu kondre, sma e du afkodrei, èn den e kon makandra na ini gemeente nanga kerki. Fu eksempre na Brasyonkondre, sma e denki taki so wan 4.000.000 sma e du afkodrei, èn den sma disi e hori densrefi na den leri di a man Hyppolyte Léon Denizard Rivail ben tyari kon na wán na ini buku. A man disi ben de wan Fransi leriman nanga filosofiaman di ben gebroiki a nen Allan Kardec leki en nen te a ben skrifi buku. A fosi leisi di Kardec ben wani sabi ala sani di abi fu du nanga afkodrei, ben de na ini 1854. Baka ten a ben poti aksi gi sma na furu presi, di ben de leki asi fu den yeye. Baka dati, a ben skrifi den piki di a ben kisi fu den, na ini a buku The Book of Spirits (A Buku fu den Yeye) di ben tyari kon na doro na ini 1857. Tu buku di a ben skrifi tu, ben de The Mediums’ Book (A Buku fu den Lukuman) nanga The Gospel According to Spiritism (Na Evangelie Akruderi Afkodrei Tori).

Afkodrei abi fu du nanga sani soleki obiawroko, bonuwroko, towfruwroko, noso nanga na anbegi di sma e anbegi Satan. Ma den sma di e hori densrefi na den leri fu Allan Kardec, e taki dati a bribi fu den de tra fasi. Nofotron den buku fu den abi bijbeltekst na ini, èn den e taki fu Yesus leki „a sma di e sori a libisma famiri a yoisti pasi èn di de wan eksempre gi den”. Den e taki dati Yesus „ben leri sma a wet fu Gado na a moro soifri fasi”. Allan Kardec ben feni taki a di fu dri fasi fa Gado meki a wet fu en bekènti na a libisma famiri, de nanga yepi fu den buku di e taki fu afkodrei tori. A ben feni taki den fosi tu fasi fa Gado ben meki a wet fu en bekènti, ben de nanga den leri fu Moses èn nanga den leri fu Yesus.

Afkodrei e hari furu sma, bika a bribi dati e poti krakti na tapu taki sma musu lobi trawan èn musu du bun wroko gi tra sma. Wan sani di den sma di e du afkodrei e bribi, na: „Te yu no e du bun wroko gi trawan, dan yu no kan kisi frulusu.” Furu fu den sma di e bribi na ini afkodrei, e wroko fayafaya fu yepi tra sma na ini a libimakandra, den e yepi fu seti ati-oso, skoro, nanga tra presi. Den muiti disi di den e du, de fu prèise. Ma den sani di den sma disi e bribi, na a srefi leki den leri fu Yesus soleki fa den skrifi na ini Bijbel? Meki wi teki tu eksempre: a howpu gi den dedewan, èn fu san ede sma e pina.

San Na a Howpu gi den Dedewan?

Furu fu den sma di e bribi na ini afkodrei, e bribi taki sma e nasi. Wán buku di abi fu du nanga afkodrei, e taki: „A bribi taki sma e nasi, na a wan-enkri kerkileri di e kruderi nanga a fasi fa wi e denki fu a regtfardikifasi fu Gado; a de a wan-enkri kerkileri di kan fruklari san wi kan fruwakti na ini a tamara, èn kan meki wi howpu kon tranga.” Sma di e bribi na ini afkodrei, e fruklari taki te wan sma dede, dan a sili, noso „a yeye di a abi”, e komoto gowe fu en skin — neleki fa wan woron e kon kenki èn e komoto leki wan kaperka. Den e bribi taki baka ten, den yeye disi e nasi leki libisma so taki den man kon krin fu ala den sondu di den ben du na ini wan tra libi. Ma den sma dati no man memre sortu sondu den ben du. „Gado ben feni taki a moro bun fu meki wan sma frigiti den sondu di a ben du na ini a tra libi”, na so a buku The Gospel According to Spiritism e taki.

„Te wan sma no e bribi taki sma e nasi, dan a no e bribi tu na ini den wortu fu Yesus”, na so Allan Kardec ben skrifi. Ma Yesus noiti no ben taki dati „sma e nasi”, èn noiti a ben taki fu wan sani di abi fu du nanga dati. (Luku a faki di nen „Bijbel E Leri Taki Sma E Nasi?” tapu bladzijde 22) Na presi  fu dati, Yesus ben leri sma fu na opobaka fu den dedewan. Di a ben du en diniwroko na grontapu, dan a ben gi dri sma wan opobaka — a manpikin fu wan weduwe na ini Nain, na umapikin fu a fesiman dinari fu wan snoga, nanga en bun mati Lasarus (Markus 5:22-24, 35-43; Lukas 7:11-15; Yohanes 11:1-44). Meki wi luku wan fu den tumusi aparti tori dati, èn meki wi si san Yesus ben wani taki nanga na „opobaka”.

Na Opobaka fu Lasarus

Yesus ben yere taki en mati Lasarus ben siki. Tu dei baka dati, a ben taigi den disipel fu en: „Lasarus, wi mati, go rostu, ma mi e go drape fu wiki en na a sribi.” Den disipel no ben frustan san Yesus ben taki, so a taigi den krinkrin: „Lasarus dede.” Di Yesus doro na a grebi fu Lasarus te fu kaba, a man dede fo dei kaba. Toku Yesus ben gi a komando fu puru a ston san ben tapu a doro fu a grebi krinkrin. Dan a bari taki: „Lasarus kon na doro!” Ne wan tumusi fruwondru sani ben pasa. „A man di ben dede, ben kon na doro, ala di den futu nanga den anu fu en ben domru nanga krosi èn en fesi ben tai nanga wan duku. Yesus ben taigi den: ’Lusu en èn meki a go.’”—Yohanes 11:5, 6, 11-14, 43, 44.

A de krin taki a man Lasarus no ben nasi. Yesus ben taki dati Lasarus di dede, ben e sribi, taki a no ben sabi noti. ’Den prakseri fu en ben lasi gowe’, na so Bijbel e taki en. A no ben „sabi notinoti” (Psalm 146:4; Preikiman 9:5). Lasarus di ben kisi wan opobaka, no ben de wan tra sma. A no de so taki en yeye ben nasi na ini wan tra libisma skin. Lasarus ben de a srefi sma di a ben de bifo a dede, a ben owru a srefi, èn a ben abi a srefi frustan fu memre ala sani tu. A ben bigin du den aladei sani baka di a ben gwenti fu du bifo a dede wantronso, èn a ben drai go na den lobiwan fu en di ben sari a dede fu en.—Yohanes 12:1, 2.

Baka ten, Lasarus dede baka. So bun, fu san ede a ben kisi wan opobaka? Na opobaka disi makandra nanga den tra opobaka di Yesus ben gi sma, e tranga wi frutrow na ini a pramisi fu Gado, taki den getrow futuboi fu En sa kisi wan opobaka tapu En reti ten. Den wondru dati di Yesus ben du, na wan tranga buweisi fu san a ben taki: „Mi na a opobaka nanga a libi. A sma di e poti bribi na mi, sa kon na libi, awinsi a dede.”—Yohanes 11:25.

Ini a tori fu na opobaka na ini a ten di e kon, Yesus ben taki: „A yuru e kon pe ala sma di de na ini den memregrebi, sa yere en sten èn sa kon na doro, den wan di ben du bun sani, fu go ini wan opobaka fu kisi libi, den wan di ben du tegu sani, fu go ini wan opobaka fu kisi krutu” (Yohanes 5:28, 29). Neleki na ini a kefal fu Lasarus, dati sa de wan opobaka tu fu dede sma. A no de so taki pori dedeskin di kande ben tron wan pisi fu tra libisani na ini a gron kaba, sa kisi wan opobaka èn taki yeye di abi frustan e go tan na ini den skin dati. Na opobaka fu dedesma na wan sani di a Mekiman fu hemel nanga grontapu kan du sondro trobi, bika a abi koni nanga krakti pasa marki.

Yesus Krestes ben leri sma fu na opobaka. A leri disi no e sori taki Gado lobi ibri libisma trutru? Ma fa a de nanga a di fu tu aksi di poti na a bigin fu na artikel disi?

Fu San Ede Sma E Pina?

Furu takru sani e pasa di e meki sma pina, fu di trawan no e gebroiki a frustan fu den, noso den e du sani sondro taki den abi ondrofeni. Furu sma e pina tu te godelowsu sma e du den ogri. Ma san wi musu taki fu den kefalek takru sani di e feni presi èn di no wan sma no abi a fowtu fu dati? Fu eksempre, fu san ede ongoloku, nanga naturu rampu e pasa? Fu san ede pikin-nengre e gebore nanga siki noso mankeri? Allan Kardec ben si den sani disi leki strafu. A ben skrifi: „Efu wi e kisi strafu, dan a krin taki wi ben du wan ogri. Efu wi no  ben du na ogri dati na ini a libi disi, dan a musu de wan ogri di wi ben du na ini wan tra libi di pasa.” Sma di e du afkodrei, e leri fu begi na a fasi disi: „Masra, Yu de regtfardiki dorodoro. A siki di Yu feni bun fu poti en na mi tapu, musu fu de wan sani di mi frudini . . . Mi e si en leki wan sani di mi musu kisi, fu pai gi den sondu di mi ben du fosi. Mi e si en tu leki wan okasi fu sori taki mi abi bribi èn fu saka misrefi na Yu bun wani.”—The Gospel According to Spiritism.

Yesus ben leri so wan sani? Nôno. Yesus ben sabi heri bun san Bijbel e taki: „Ten nanga sani di e pasa èn di sma no sabi na fesi, e miti den alamala” (Preikiman 9:11). A ben sabi taki takru sani e pasa son leisi. Den no abi fu de wan strafu gi sondu.

Luku a tori disi di ben pasa na ini Yesus en libi: „Di [Yesus] ben e waka pasa, a ben si wan man di ben breni sensi a gebore. Den disipel ben aksi en: ’Rabi, suma ben sondu, so taki a gebore breni? A man disi, noso a papa nanga mama fu en? A piki di Yesus ben gi den, ben meki den frustan a tori heri bun: „A man no ben sondu. A papa nanga mama fu en no ben sondu tu. Ma a sani disi pasa, so taki den wroko fu Gado ben sa de fu si na ini a kefal fu en. Baka di a ben taki den sani disi, a spiti na gron, èn a ben meki tokotoko nanga a spiti, dan a ben poti a tokotoko na tapu den ai fu a man. Dan a taigi a man: ’Go wasi yusrefi na ini na watra-olo fu Siloam’ . . . So bun, a gowe go wasi ensrefi, èn a ben man si di a drai kon baka.”—Yohanes 9:1-3, 6, 7.

Den wortu fu Yesus ben sori taki a man no ben abi fowtu taki a ben gebore breni. A papa nanga mama fu en no ben abi fowtu tu. So bun, Yesus no ben horibaka gi a prakseri taki a man ben kisi strafu fu sondu di a ben du na ini wan tra libi. A tru, Yesus ben sabi taki ala libisma kisi sondu. Ma den kisi a sondu fu Adam. Dyaso no e taki fu sondu di den ben du bifo den ben gebore. Fu di Adam ben sondu, dati meki ala libisma e gebore nanga wan skin di no de volmaakti, san e meki taki den e kon siki èn e dede (Yob 14:4; Psalm 51:5; Romesma 5:12; 9:11). Te yu luku en bun, dan yoisti fu a situwâsi dati ede Yesus ben kon fu tyari wan lusu. Yohanes a Dopuman ben taki dati Yesus ben de „a Pikin Skapu fu Gado di e teki a sondu  fu grontapu tyari gowe.”—Yohanes 1:29. *

Prakseri tu, taki Yesus no ben taki dati Gado ben meki a man gebore leki wan breniman fu espresi, so taki wán dei Yesus ben o kon èn ben o meki a man kon betre. Dati ben o de wan ogri-ati sani srefisrefi! Efu Gado ben du so wan sani, dan dati ben o meki sma gi en grani? Kwetikweti. Na presi fu dati, a wondru di Yesus ben du fu dresi a breni man, ben musu ’meki sma si den wroko fu Gado’. Neleki den someni tra sma di Yesus ben dresi, a wondru disi ben sori taki Gado trutru lobi a libisma famiri di e pina. A sori tu taki wi trutru kan abi a frutrow taki tapu En reti ten, Gado sa du soleki fa a ben pramisi, namku fu tyari wan kaba kon na ala siki di libisma e kisi èn na ala pina di den e ondrofeni.—Yesaya 33:24.

Na presi taki wi hemel Tata e meki sma pina, a e gi „bun sani na den wan di e aksi en fu dati”. Dati e gi wi trowstu, a no so? (Mateus 7:11). Te den brenisma sa man si baka, den dofusma sa man yere baka, èn den malengriwan sa man waka, dyompo, lon baka, dan dati trutru sa gi a Moro Heiwan grani!—Yesaya 35:5, 6.

Satisferi den Nowtu fu Wi na Yeye Fasi

Yesus ben fruklari: „Libisma no musu libi fu brede wawan, ma fu ibri wortu di e kon fu Yehovah en mofo” (Mateus 4:4). Iya, wi e satisferi den nowtu fu wi na yeye fasi, te wi e leisi Gado Wortu, Bijbel, èn e libi akruderi san skrifi na ini. Te wi e suku rai na sma di de leki asi fu den yeye, dan dati no sa satisferi wi nowtu na yeye fasi trutru. Iya, a sani disi di sma e du, na wan sani di Gado e krutu krinkrin na ini san Allan Kardec ben kari a fosi fasi fa Gado ben meki a wet fu en bekènti na sma.—Deuteronomium 18:10-13.

Furu sma, so srefi den sma di e du afkodrei, e erken taki Gado na a Moro Hei Sma, taki a e libi fu têgo, taki a de volmaakti pasa marki, taki a abi switifasi nanga bun-atifasi èn a de regtfardiki. Ma Bijbel e tyari moro sani kon na krin. A e fruteri taki Gado abi wan nen, Yehovah, èn taki wi musu hori a nen dati hei soleki fa Yesus ben du dati (Mateus 6:9; Yohanes 17:6). A e sori taki Gado na wan trutru sma, èn taki libisma kan abi wan tranga banti nanga en (Romesma 8:38, 39). Te wi e leisi a Bijbel, dan wi e kon sabi taki Gado abi sari-ati èn taki a „no handri nanga wi akruderi den sondu fu wi srefi; èn a no gi wi san wi e frudini akruderi den sondu fu wi” (Psalm 103:10). Nanga yepi fu en Wortu, a Soeverein Masra Yehovah e sori taki a lobi sma, taki a abi ala makti, èn taki a de reidelek. En na a Sma di e tiri libisma, èn na en e kibri den wan di e gi yesi na en. Te wi e kon sabi Yehovah èn a Manpikin fu en, Yesus Krestes, dan dati „wani taki têgo libi”.—Yohanes 17:3.

Bijbel e gi ala san wi wani sabi fu den prakseri fu Gado, èn a e fruteri wi san wi musu du efu wi wani plisi en. Te wi e ondrosuku a Bijbel finifini, dan wi sa si taki a e gi den yoisti piki tapu den aksi fu wi. Bijbel e sori wi tu san bun èn san ogri, èn a e gi wi wan howpu di no sa misi kwetikweti. A e gi wi a dyaranti taki dyonsro, Gado „sa figi puru ala watra na den ai [fu libisma], èn dede no sa de moro, no wan sari, no wan babari, no wan pen no sa de moro. Den fositen sani pasa kaba” (Openbaring 21:3, 4). Nanga yepi fu Yesus Krestes, Yehovah sa puru a sondu èn na onvolmaaktifasi di a libisma famiri kisi. Den libisma di e gi yesi na en, sa kisi têgo libi na tapu wan paradijs grontapu. Na a ten dati, den sa kisi ala san den abi fanowdu na skin sei èn na yeye fasi.—Psalm 37:10, 11, 29; Odo 2:21, 22; Mateus 5:5.

[Futuwortu]

[Faki na tapu bladzijde 22]

BIJBEL E LERI TAKI SMA E NASI?

Bijbeltekst e horibaka gi a kerkileri taki sma e nasi? Luku wan tu bijbeltekst di den sma di e bribi taki sma e nasi, e gebroiki fu horibaka gi a kerkileri disi:

„Bika den alamala, den Profeiti nanga a Wet, ben taki profeititori te leki Yohanes kon . . . Ensrefi na ’Elia, di musu kon’. ”—Mateus 11:13, 14.

A de so taki Yohanes a Dopuman ben de Elia di ben musu kon? Di sma ben aksi Yohanes: „Joe de Elia?”, dan a ben piki den krinkrin: „Nono” (Yohanes 1:21, Da Bijbel na ini Sranantongo). Ma Bijbel ben taki na fesi dati Yohanes ben o kon bifo a Mesias „na ini da jeje nanga da krakti fu Elia” (Lukas 1:17, Da Bijbel na ini Sranantongo; Maleaki 4:5, 6). Nanga tra wortu, Yohanes a Dopuman ben de Elia, fu di a ben du wan wroko di gersi a wroko di Elia ben du.

„Efu wan sma no gebore ete wan tron, dan a no kan si a kownukondre fu Gado. No fruwondru fu di mi ben taigi Yu: unu musu gebore ete wan tron.”—Yohanes 3:3, 7.

Baka ten, wan fu den apostel ben skrifi: „Grantangi vo Gado, da Tata vo wi Masra Jezus Kristus, disi ben meki wi kom njoegebore nanga da toemoesi bigi gnade vo hem, meki wi kisi wan reti liebi hopoe nanga da hopo baka vo Jezus Kristus na dede” (1 Petrus 1:3, 4, Njoe Testament Nanga Dem Psalm; Yohanes 1:12, 13). A de krin, di Yesus ben taki dati den bakaman fu en ben o kon nyungebore, dan dati wani taki dati den ben o kon nyungebore na yeye fasi ala di den ben o de na libi ete. A no wani taki dati den ben o nasi na ini a ten di e kon.

„Te wan man dede, dan a e libi fu têgo: te mi libi na Grontapu kon na wan kaba, dan mi sa wakti, fu di mi sabi taki mi sa drai kon baka agen.”—Wan „Griki vertaling” fu Yob 14:14, soleki fa a skrifi na ini The Gospel According to Spiritism.

Da Bijbel e vertaal a tekst disi na so fasi: „Efoe wan man dede, a sa libi baka? Mi sa wakti ala dem dei fu mi disi ben seti kaba, te leki mi kenki sa kom.” Leisi den vers na fesi. Yu sa si taki den dedesma e wakti na ini a grebi, te leki a „kenki” fu den sa kon (vers 13). Ala di den e wakti, den no de na no wan pe. „Wan libisoema dede, en a go pori; ja, wan mansoema gi hem blo abra, en pe a de?”—Yob 14:10, Da Bijbel na ini Sranantongo.

[Prenki na tapu bladzijde 21]

A howpu fu na opobaka e sori taki Gado trutru wani yepi ibriwan fu wi

[Prenki na tapu bladzijde 23]

Gado sa tyari wan kaba kon na ala sani di e meki libisma pina