Prisiri Nanga a Koloku Gado
Prisiri Nanga a Koloku Gado
„Te fu kaba, brada, tan prisiri, . . . èn a Gado fu lobi èn fu vrede sa de nanga unu.”—2 KORENTESMA 13:11.
1, 2. (a) Fu san ede a libi fu so furu sma de sondro prisiri? (b) San na prisiri, èn fa wi kan kisi en?
NA INI a ten disi di lai nanga someni sari, furu sma no abi nofo reide fu prisiri. Te rampu miti den, noso wan sma di den lobi, dan kande den e firi leki Yob fu owruten di ben taki: „Libisma, di wan uma meki, e libi syatu èn abi furu problema” (Yob 14:1). Kresten e firi a hebi druk tu fu a ’muilek ten disi di tranga fu pasa’, èn a no musu fruwondru wi taki getrow futuboi fu Yehovah son ten e lasi-ati.—2 Timoteus 3:1.
2 Toku, Kresten kan de nanga prisiri, srefi te tesi e miti den (Tori fu den Apostel 5:40, 41). Fu man frustan fa a sani disi kan, dan luku fosi san na prisiri. Prisiri na „a firi di wan sma abi te a e kisi noso e fruwakti wan bun sani”. * Fu dati ede, efu wi e teki ten fu teri den blesi di wi abi now, èn so srefi te wi e denki dipi fu den prisiri di e wakti wi na ini a nyun grontapu fu Gado, dan wi kan de nanga prisiri.
3. Fu san ede wi kan taki dati ala sma ala ten abi reide fu de nanga prisiri?
3 Ibriwan sma abi blesi di a kan warderi. Wan osofamiri edeman kan lasi en wroko. Soleki fa wi kan frustan, a sani disi e gi en broko-ede. A wani sorgu gi den lobiwan fu en. Toku, efu a tranga na skin sei èn efu a abi wan bun gosontu, dan a kan de nanga tangi na ati gi dati. Efu a e feni wan wroko, dan a sa man wroko tranga. Na a tra sei, wan Kresten uma kande abi wan siki di e swaki en skin. Toku, a kan taki Gado tangi fu di den lobi-ati mati nanga famiriman fu en e yepi en fu kakafutu gi a siki fu en na wan warti fasi èn nanga deki-ati. Èn ala tru Kresten, awansi sortu situwâsi den de na ini, kan prisiri nanga a grani di den abi fu sabi Yehovah, „a koloku Gado”, èn Yesus Krestes, „a wan-enkri koloku Tiriman” (1 Timoteus 1:11; 6:15). Iya, Yehovah Gado nanga Yesus Krestes koloku srefisrefi. Den tan nanga prisiri ala di a situwâsi na grontapu de heri tra fasi leki san Yehovah ben abi na prakseri na ini a bigin. Na eksempre fu den kan leri wi furu fa wi kan tan nanga prisiri.
Noiti Den Lasi a Prisiri fu Den
4, 5. (a) San Yehovah du di den fosi libisma opo densrefi teige en? (b) Fa Yehovah tan denki bun fu libisma?
4 Na ini a dyari fu Eden, Adam nanga Efa ben abi wan volmaakti gosontu nanga wan volmaakti frustan. Den ben abi bun wroko fu du èn den ben man du dati na ini a moro bun presi di ben de na grontapu. A moro moi sani ben de taki den ben abi a grani fu taki doronomo nanga Yehovah. A ben de a marki fu Gado taki den ben abi wan koloku tamara. Ma a fosi papa nanga mama fu wi no ben de tevrede nanga ala den bun presenti disi, den fufuru a froktu di den no ben mag nyan fu a „bon fu sabi bun nanga ogri”. A sani disi di ben sori taki den no ben gi yesi na Yehovah, ben abi leki bakapisi ala a sari di wi, den bakapikin fu den, e ondrofeni na ini a ten disi.—Genesis 2:15-17; 3:6; Romesma 5:12.
5 Ma ala di Adam nanga Efa no ben de nanga tangi na ati, dati no pori a prisiri fu Yehovah. A ben abi a frutrow taki awansi wan tu nomo fu den bakapikin fu den ben o wani dini en. Fu taki en leti, Yehovah ben abi so furu frutrow taki srefi bifo Adam nanga Efa ben kisi a fosi pikin fu den, a meki bekènti a marki di a abi fu frulusu den bakapikin fu Adam nanga Efa di ben o gi yesi na en! (Genesis 1:31; 3:15) Na ini den hondrohondro yari baka dati, a moro bigi pisi fu a libisma famiri waka baka na eksempre fu Adam nanga Efa, ma Yehovah no drai en baka gi libisma fu a sani dati ede. Na presi fu dati, a poti spesrutu prakseri na den man nanga uma di ’prisiri en ati’, den sma di du trutru muiti fu du a wani fu en, fu di den ben lobi en.—Odo 27:11; Hebrewsma 6:10.
6, 7. Sortu sani yepi Yesus fu man tan nanga prisiri?
6 Fa a de nanga Yesus — fa a ben man tan nanga prisiri? Leki wan makti yeye mekisani na ini hemel, Yesus ben abi ala okasi fu luku den sani di mansma nanga umasma ben e du na grontapu. Ala di na onvolmaaktifasi fu den ben de krinkrin fu si, toku Yesus ben lobi den (Odo 8:31). Baka ten, di a kon na grontapu èn trutru ’ben tan na mindri’ libisma, dan a no kisi wan tra denki fu a libisma famiri (Yohanes 1:14). San ben meki taki a volmaakti Manpikin fu Gado ben man tan abi so wan bun denki fu a libisma famiri di de na ini sondu?
7 Na a fosi presi, Yesus no ben fruwakti tumusi furu fu ensrefi noso fu trawan. A ben sabi taki a no ben o man kenki grontapu (Mateus 10:32-39). Fu dati ede a ben prisiri srefi te wan-enkri getrow sma ben teki a Kownukondre boskopu. Ala di Yesus no ben de tevrede ala ten nanga a fasi fa den disipel fu en ben handri èn ben tyari densrefi, toku a ben sabi taki na ini den ati den trutru ben wani dini Gado. Èn a ben lobi den fu a sani dati ede. (Lukas 9:46; 22:24, 28-32, 60-62). A prenspari fu si taki di Yesus ben begi en hemel Tata, dan a taki fu den bun sei fu den disipel fu en: „Den du a wortu fu yu.”—Yohanes 17:6.
8. Taki san na wan tu fasi fa wi kan waka baka na eksempre fu Yehovah nanga Yesus te wi wani tan nanga prisiri.
8 A de seiker taki wi alamala sa kisi winimarki te wi e luku den eksempre di Yehovah Gado nanga Krestes Yesus gi na ini a tori disi. Wi kan waka moro bun baka na eksempre fu Yehovah fu di wi no e broko wi ede tumusi te sani no e waka na fasi fa wi ben wani? Wi kan waka moro soifri baka na eksempre fu Yesus te wi e tan denki bun fu a situwâsi di wi de na ini now, èn te wi no e fruwakti tumusi furu fu wisrefi noso fu trawan? Meki wi luku fa wi kan gebroiki wan tu fu den gronprakseri disi na ini wan kontren di furu fayafaya Kresten na heri grontapu lobi — a preikiwroko.
Tan Denki Bun fu a Diniwroko
9. Fa Yeremia ben kisi prisiri baka, èn fa na eksempre fu en kan yepi wi?
9 Yehovah wani taki wi abi prisiri na ini a diniwroko fu en. A prisiri fu wi no musu anga fu den bun bakapisi di wi e kisi (Lukas 10:17, 20). A profeiti Yeremia ben preiki furu yari langa na ini wan kontren, sondro fu abi bun bakapisi. Di a ben poti prakseri na den sma nomo di no ben wani arki, dan dati ben meki a lasi en prisiri (Yeremia 20:8). Ma di a denki dipi o moi a boskopu srefi de, dan a kisi prisiri baka. Yeremia taigi Yehovah: „Den ben feni den wortu fu yu, èn baka dati mi ben nyan den; èn yu wortu tron gi mi a prisiri sani èn a sani di e breiti mi ati; bika den kari yu nen na mi tapu, o Yehovah” (Yeremia 15:16). Iya, Yeremia ben prisiri nanga a grani di a ben abi fu preiki a wortu fu Gado. Wi kan du dati tu.
10. Fa wi kan tan nanga prisiri na ini a preikiwroko srefi te wi no e kisi bun bakapisi na ini a gebied fu wi now?
10 Srefi te furu sma e weigri fu arki a bun nyunsu, wi abi ala reide fu de nanga prisiri te wi e teki prati na a preikiwroko. Memre taki Yehovah ben abi a faste frutrow taki wan tu libisma ben o wani dini en. Neleki Yehovah, noiti wi musu lasi howpu taki awansi wan tu sma nomo sa kon frustan taki den musu anbegi Yehovah, èn taki den sa teki a Kownukondre boskopu. Wi no musu frigiti taki a situwâsi fu sma e kenki. Te wan sma di abi ala sani e lasi wan sma na ini dede wantronso noso te wan rampu miti en onfruwakti, dan a sma dati srefi kan bigin aksi ensrefi seryusu fu san ede libisma de na libi. Yu sa de drape fu yepi so wan sma te a e ’kon sabi a nowtu na yeye fasi fu en’? (Mateus 5:3) A kan de so srefi taki wan sma na ini wi gebied de klariklari fu arki a bun nyunsu a tra leisi te yu de na en oso!
11, 12. San ben pasa na ini wan spesrutu foto, èn san wi kan leri fu a sani dati?
11 Tra sma kan kon tan na ini a gebied fu wi tu. Luku na eksempre disi. Wan grupu fu yongu trowpaar nanga pikin ben e tan na ini wan foto. Den trowpaar disi ben abi wan krosibei matifasi nanga makandra. Di Yehovah Kotoigi go preiki na den oso, dan na ala presi den ben kisi fu yere, „Wi no wani yere san unu abi fu taki!” Te wan sma ben wani sabi moro fu a Kownukondre boskopu, dan den birtisma fu den heri esi ben sorgu taki a no ben abi kontakti moro nanga den Kotoigi. Yu kan frustan taki a ben de wan bigi tyalensi fu preiki drape. Toku, den Kotoigi no lasi ati; den tan preiki na den sma disi. San ben de a bakapisi?
12 Baka wan pisi ten, furu fu den pikin na ini a foto dati gro kon bigi, den trow, èn den seti libi drape. Di den kon si taki a libi fu den no ben tyari trutru koloku kon gi den, dan wan tu fu den yongu sma disi bigin suku waarheid. Den feni en di den arki a bun nyunsu di den Kotoigi ben meki bekènti. Na so a kon taki baka furu yari, a pikin gemeente bigin gro. Prakseri fa den Kownukondre preikiman di no ben lasi ati ben de nanga prisiri! Meki wi kisi prisiri tu fu di wi e tan prati a tumusi moi Kownukondre boskopu nanga trawan!
Brada Nanga Sisa Sa Horibaka gi Yu
13. Pe wi kan suku yepi te wi e firi brokosaka?
13 Te a libi kon moro hebi noso te wan rampu miti yu, dan pe yu kan go suku trowstu? Milyunmilyun futuboi fu Yehovah e begi Yehovah fosi, èn baka dati den e suku yepi na den Kresten brada nanga sisa fu den. Di Yesus ben de na grontapu, dan a ben warderi a yepi di a ben kisi fu den disipel fu en. A neti fosi a dede, a taki fu den leki „den wan di tan nanga mi di mi kisi tesi” (Lukas 22:28). A tru taki den disipel no ben de volmaakti, ma fu di den ben de getrow, dan dati ben de wan trowstu gi a Manpikin fu Gado. Wi kan kisi tranga tu fu den brada nanga sisa fu wi.
14, 15. San yepi wan trowpaar fu kakafutu di a manpikin fu den dede, èn san yu e leri fu na ondrofenitori fu den?
14 Michel nanga Diana na wan Kresten trowpaar di kon si o warti a yepi de di brada nanga sisa e gi. Yonatan, a koloku manpikin fu den di ben abi 20 yari, ben de wan Kresten di ben abi wan moi libi ete na en fesi. Ma datra ben kon si taki a ben abi wan takru sweri na ini en edetonton. Den datra du ala sortu muiti fu hori en na libi, ma Yonatan ben kon siki sote taki wan mofoneti, a dede. Michel nanga Diana ben brokosaka srefisrefi. Den ben sabi taki a Diniwroko Konmakandra di ben e hori a neti dati, pikinmoro ben kon na wan kaba. Ma fu di den ben abi trowstu fanowdu trutru, dan den aksi na owruman di ben de nanga den, fu go nanga den na a Kownukondre zaal. Den doro drape leti na a momenti di a takiman ben taigi a gemeente taki Yonatan dede. Baka a konmakandra, brada nanga sisa lontu a papa nanga mama di ben e krei èn den brasa den èn trowstu den so srefi. Diana e memre: „Wi ben brokosaka di wi doro na a zaal, ma a trowstu di wi kisi fu den brada ben gi wi deki-ati trutru! Ala di den no ben man puru a sari fu wi, toku den yepi wi fu kisi deki-ati fu kakafutu gi a situwâsi!”—Romesma 1:11, 12; 1 Korentesma 12:21-26.
15 A hebi tesi di Michel nanga Diana ben kisi meki taki den kisi wan moro krosibei matifasi nanga den brada nanga sisa fu den. Den kisi wan moro krosibei matifasi nanga makandra so srefi. Michel e taki: „Mi leri fu warderi mi lobi wefi moro. Te wi e firi brokosaka, dan wi e taki nanga makandra fu Bijbel waarheid èn fu a fasi fa Yehovah e horibaka gi wi.” Diana e taki moro fara: „Now a Kownukondre howpu wani taki moro srefi gi wi.”
16. Fu san ede a prenspari taki wi e taigi den brada sortu nowtu wi abi?
16 Iya, wi Kresten brada nanga sisa kan de leki ’wan yepi di e gi wi tranga’ te problema e miti wi, èn na so fasi den kan yepi wi fu tan nanga prisiri (Kolosesma 4:11). A no de fu taki dati den no sabi san e moro yu. Fu dati ede, te wi abi yepi fanowdu, a bun fu taigi den dati. Dan wi kan sori trutru warderi gi iniwan sortu trowstu di wi brada man gi wi, ala di wi e si en leki trowstu di e komoto fu Yehovah.—Odo 12:25; 17:17.
Luku den Sma na ini a Gemeente fu Yu
17. Sortu tyalensi wan mama sondro patna abi, èn fa wi kan yepi sma di de leki en?
17 O moro yu e luku den brada nanga sisa fu yu, o moro yu sa leri fu warderi den èn fu kisi prisiri fu a demakandra di yu abi nanga den. Luku den sma na ini a gemeente fu yu. San yu e si? Wan mama sondro patna de na den mindri di e du muiti fu kweki den pikin fu en akruderi waarheid? Yu poti nofo prakseri na a bun eksempre di a e gi? Pruberi fu frustan wan tu fu den problema di a kan abi. Wan mama sondro patna di nen Jeanine, e kari wan tu fu den problema disi: a firi di yu e kisi taki yu de yu wawan, mansma na wroko di e fruferi yu, moni di no sari fu bai ala sani di de fanowdu. Ma a moro bigi tyalensi, a e taki, na a sorgu di a musu sorgu gi den pikin fu en, fu di ala pikin e difrenti fu makandra. Jeanine e kari wan tra problema: „A kan de wan trutru tyalensi fu no gi a manpikin fu yu a frantwortu fu osofamiri edeman, so taki a kan teki a presi fu a masra di no de. Mi abi wan umapikin, èn mi musu du tranga muiti fu no poti hebi na en tapu, fu di mi e fruteri en ala mi tori nanga problema.” Jeanine abi wan furuten wroko èn a e sorgu en osofamiri, neleki fa a de nanga dusundusun tra papa noso mama di de sondro patna èn di e frede Gado. A e studeri Bijbel tu nanga den pikin fu en, a e leri den fa fu preiki na ini a diniwroko èn a e tyari den go na den gemeente konmakandra (Efeisesma 6:4). Yehovah sa breiti srefisrefi te a e luku ala dei omeni muiti a famiri disi e du fu tan getrow! A no e gi yu ati prisiri fu di wi abi den sortu sma disi na wi mindri? Iya, srefisrefi.
18, 19. Fruklari pikinso fa wi kan kisi moro dipi warderi gi den memre fu a gemeente.
18 Luku den sma na ini yu gemeente ete wan leisi. Kande yu e si getrow umasma nanga mansma di a patna fu den dede, ma di „noiti e misi” den konmakandra (Lukas 2:37). Den e firi son leisi leki den de den wawan? Seiker dati de so. Den e firi a mankeri fu den patna trutru! Ma den e tan wroko fayafaya na ini a diniwroko fu Yehovah èn den e teki ten fu abi demakandra nanga trawan. Fu di den no e degedege èn fu di den e denki bun fu sani, meki a gemeente e kisi moro prisiri. Wan Kresten di du furuten diniwroko moro leki 30 yari ben taki: „Wán fu den sani di e gi mi bun furu prisiri, na fu si taki den owru brada nanga sisa e dini Yehovah ete, ala di so furu tesi miti den!” Iya, owru Kresten na wi mindri e gi den wan di de moro yongu furu deki-ati.
19 Fa a de nanga den nyun sma di bigin kon na den konmakandra no so langa ete? Wi no e kisi deki-ati te den e sori a bribi fu den na den konmakandra? Prakseri fa den go na fesi sensi den bigin studeri Bijbel. Yehovah musu fu breiti srefisrefi nanga den. Wi breiti nanga den? Wi e sori den taki wi lobi den, fu di wi e prèise den fu a muiti di den e du?
20. Fu san ede wi kan taki dati iniwan sma na ini a gemeente e yepi fu bow a gemeente?
20 Yu na wan sma di trow, yu de sondro patna, noso yu na wan mama noso papa sondro patna? Yu na wan boi noso wan meisje di no abi papa (noso mama), noso yu na wan mansma noso umasma di lasi en patna na ini dede? Yu na wan sma di abi demakandra nanga a gemeente yari langa kaba, noso yu bigin kon na a gemeente no so langa ete? Yu kan de seiker taki a getrow eksempre fu yu e gi wi alamala deki-ati. Èn te yu e singi wan Kownukondre singi makandra nanga den tra brada nanga sisa, te yu e gi wan komentaar noso te yu e hori wan toewijzing leki studenti tapu a Theokrasia Diniwroko-skoro, dan den sani disi e gi wi moro bigi prisiri. Fu taki en moro bun, a e prisiri na ati fu Yehovah.
21. San wi alamala seiker kan du, ma sortu aksi e opo kon?
21 Iya, srefi na ini den muilek ten disi, wi kan de nanga prisiri te wi e anbegi wi koloku Gado. Wi abi furu reide fu teki a rai fu Paulus: „Tan prisiri, . . . èn a Gado fu lobi èn fu vrede sa de nanga yu” (2 Korentesma 13:11). Ma san fu du efu wi e miti nanga wan rampu fu a naturu, frufolgu, noso bigi problema na ekonomia sei? A de so taki wi kan tan nanga prisiri srefi te den sortu situwâsi disi miti wi? Yusrefi sa si efu dati kan te yu e luku na artikel di e kon now.
[Futuwortu]
^ paragraaf 2 Luku Inzicht in de Schrift, Deel 2, bladzijde 1202, di Yehovah Kotoigi tyari kon na doro.
Yu Kan Gi Piki?
• Fa na artikel e taki fu prisiri?
• Fa a yoisti denki di wi abi fu sani e yepi wi fu man tan nanga prisiri?
• San kan yepi wi fu denki bun fu a gebied pe a gemeente fu wi e preiki?
• Na sortu fasi yu e warderi den brada nanga sisa na ini yu gemeente?
[Aksi fu a tori disi]
[Prenki na tapu bladzijde 10]
Sma na ini wi gebied kan kenki
[Prenki na tapu bladzijde 12]
Sortu tyalensi den sma na ini yu gemeente e kisi?