„Yehovah Bun gi Mi Srefisrefi!”

TAPU wan heri moi neti na ini maart 1985, den man nanga uma fu a Skrifiman Afdeling na a edekantoro fu Yehovah Kotoigi na New York, Amerkankondre, ben memre wan tumusi moi sani di pasa. Karl F. Klein ben du a furuten diniwroko 60 yari kaba. Nanga bun furu prisiri Brada Klein ben taki: „Yehovah bun gi mi srefisrefi!” A ben taki dati Psalm 37:4 ben de wan bijbeltekst di a lobi srefisrefi. Baka dati a ben prisiri den trawan fu di a ben prei poku nanga en cello (wan sani fu prei poku).

Na ini den 15 yari di kon baka a dei dati, Brada Klein ben go doro fu wroko leki wan memre fu a Skrifiman Afdeling èn so srefi fu dini leki memre fu a Tiri Skin fu Yehovah Kotoigi. Ne, a libi di Karl Klein ben libi na wan getrow fasi na grontapu ben kon na wan kaba tapu 3 yanuari 2001, di a ben abi 95 yari.

Karl ben gebore na ini Doisrikondre. En famiri ben froisi go na Amerkankondre, èn Karl ben gro kon bigi na ini a birti fu Chicago, Illinois. Di Karl nanga en yongu Brada Ted ben yongu ete, dan den ben tron sma di ben wani sabi trutru moro fu Bijbel. Karl ben dopu na ini 1918. Den tumusi moi sani di a ben yere na a kongres fu den Bijbel Ondrosukuman na ini 1922 ben wiki na ini en ati wan lobi gi a preikiwroko di tan en heri libi langa. A no ben wani taki wan wiki ben pasa sondro fu a ben teki prati na a preikiwroko. A ben du dati srefi na ini den lasti wiki fu en libi.

Karl ben kon tron wan memre fu grupu wrokoman na a edekantoro na ini 1925. A ben wroko fosi pe den e druk buku. A ben lobi poku trutru, èn wan tu yari a ben prei cello ini a grupu pokuman fu a Kresten radiostation WBBR. Baka dati, a ben wroko na a Dienst Afdeling. Wan sani di ben gi en prisiri spesrutu na taki a ben wroko makandra nanga T. J. Sullivan, na opziener fu na afdeling dati. Na ini a pisi ten dati Ted ben trow, èn makandra nanga en wefi Doris, a ben go du a zendelingwroko ini Porto Riko.

So wan 50 yari Karl Klein ben wroko na a Skrifiman Afdeling, pe a ben yepi na wan tumusi moi fasi fu di a ben lobi fu ondrosuku sani finifini, èn a ben abi furu sabi fu Bijbel. Na ini 1963 Karl ben trow nanga Margareta, wan zendeling fu Doisrikondre di ben e dini na ini Bolifia. En wefi ben yepi en na wan lobi-ati fasi, spesrutu di Karl ben kisi problema nanga en gosontu. Dati meki a ben man wroko bun langa ete, srefi baka a yari te furu sma e kisi pensyun. Fu di Karl ben e taki sani soifri soleki fa dati ben de èn fu di a ben lobi poku srefisrefi, meki furu sma no man frigiti den lezing di a ben hori na den gemeente noso na den kongres. Syatu bifo a dede, a ben teki fesi di den ben taki mamanten fu a deitekst nanga a bigi Bethelfamiri fu New York. Dati ben de wan sani di ben prisiri èn ben gi ala sma deki-ati.

Furu sma di gwenti leisi A Waktitoren o memre na ondrofenitori fu Brada Klein. Wan moi tori di ben e fruteri fu den sani di a ben ondrofeni, ben tyari kon na doro na ini De Wachttoren fu 15 yuli 1989. Yu o feni en wan prisiri sani fu leisi dati efu yu no ben du dati ete, noso fu leisi en baka, ala di yu e hori na prakseri taki a sma di skrifi en, wroko so wan 15 yari ete leki wan getrow Kresten di gi ensrefi abra.

Nanga en heri ati, Brada Klein, leki wan fu den brada di Masra salfu, ben wani tiri makandra nanga Krestes na ini hemel. Wi abi ala reide fu bribi taki Yehovah meki a winsi disi kon tru now.—Lukas 22:28-30.

[Prenki na tapu bladzijde 31]

Karl na ini 1943, nanga T. J. Sullivan makandra nanga Ted nanga Doris

[Prenki na tapu bladzijde 31]

Karl nanga Margareta, oktober 2000