Yepi Den Weduwe fu Man Tyari den Problema fu Den

WAN fu den tori di abi fu du nanga weduwe èn di moro furu sma sabi, na a Bijbel tori fu Rut nanga a mama fu en masra, di nen Naomi. Ala tu uma ben de weduwe. Ma Naomi no ben lasi en masra wawan na ini dede, ma so srefi den tu manpikin fu en, èn wan fu den manpikin disi ben de a masra fu Rut. Fu di den ben libi na ini wan libimakandra pe den mansma moro furu ben du gronwroko, dati meki a situwâsi fu den ben de wan sari sani trutru.—Rut 1:1-5, 20, 21.

Ma Naomi ben abi Rut, a wefi fu en manpikin, di ben de wan tumusi bun mati èn wan trowstu gi en. A no ben wani gowe libi Naomi kwetikweti. Baka wan pisi ten, Rut ben sori taki a ben „bun moro leki seibi manpikin gi [Naomi]” — no wawan fu di a ben lobi Naomi trutru, ma so srefi fu di a ben lobi Gado (Rut 4:15). Di Naomi ben taigi Rut fu drai go baka na en famiri èn na den mati fu en di ben de Moabsma, dan Rut piki en na wan fasi di ben sori trutru loyaalfasi. Disi na wan tu fu den moro moi wortu na ini Bijbel di e naki sma ati: „Pe yu e go, na drape mi sa go, èn pe yu e tan te neti, na drape mi sa tan te neti. Yu pipel sa de mi pipel, èn yu Gado mi Gado. Pe yu  sa dede, na drape mi sa dede, èn na drape den sa beri mi. Meki Yehovah du so nanga mi èn moro tu efu iniwan sani boiti dede, ben sa prati yu nanga mi.”—Rut 1:16, 17.

Yehovah Gado ben si a fasi fa Rut ben handri. A ben blesi a pikin osofamiri fu Naomi nanga Rut, èn te fu kaba Rut trow nanga na Israèlsma Boas. A pikin fu den ben tron wan afo fu Yesus Krestes, èn Naomi ben sorgu en neleki a ben de en eigi pikin. A historia disi e sori taki Yehovah lobi den weduwe di e kon krosibei na en èn e frutrow na en tapu. Moro fara, Bijbel e fruteri wi taki Yehovah e warderi den wan di e yepi den weduwe na wan lobi-ati fasi fu man tyari den problema fu den. So bun, fa wi kan yepi den weduwe na wi mindri na ini a ten disi?—Rut 4:13, 16-22; Psalm 68:5.

Taigi Den Krinkrin Fa Yu Wani Yepi Den, ma Sondro fu Basi Den

Te yu wani yepi wan weduwe, dan a moro bun fu taigi en krinkrin fa yu wani yepi en, ma sondro taki yu e basi en. Luku bun fu no taigi en sani soleki „Yu musu taigi mi te yu abi wan sani fanowdu”. Dati ben sa kan de a srefi leki te yu e taigi wan sma di kowru e naki en èn angri e kiri en, taki a musu „tan waran èn nyan bun” ala di yu no e du noti fu yepi en (Yakobus 2:16). Furu sma no sa aksi yepi te den abi wan sani fanowdu; na presi fu dati, den e tan tiri, den no e fruteri no wan sma fu den nowtu fu den. Te wi wani yepi den sma disi, dan wi musu abi koni fu man si sani krin, wi musu luku san den abi fanowdu. Na a tra sei, te wi e prei basi gi en — te ala ten wi e fruteri a weduwe san a musu du — dan dati kan meki taki wi sa hati den firi fu en, noso wi kan kisi trobi nanga en. Fu dati ede, Bijbel e sori krin taki a de fanowdu fu luku san wi musu du èn san wi no musu du te wi e handri nanga trawan. Ala di a e gi wi deki-ati fu poti prakseri na tra sma sondro fu prakseri wi eigi afersi nomo, a e memre wi tu taki wi no musu de sma di e bumui nanga tra sma tori.—Filipisma 2:4; 1 Petrus 4:15.

Rut ben sori a bun fasi fu handri disi, di a ben de nanga Naomi. Ala di Rut ben tan dorodoro nanga a mama fu en masra, toku Rut no ben dwengi en, noso basi en. A ben teki koni bosroiti fu du sani sondro taki Naomi ben aksi en, soleki fu suku nyanyan gi ensrefi èn gi Naomi, ma a ben gi yesi na den rai fu Naomi tu.—Rut 2:2, 22, 23; 3:1-6.

A no de fu taki dati den sani di a wan sma abi fanowdu, kan difrenti srefisrefi fu san wan tra sma abi fanowdu. Sandra, di wi ben taki fu en kaba, e taki: „Mi ben abi san mi ben abi fanowdu di mi ben brokosaka krinkrin — mati di lobi mi srefisrefi ben de nanga mi.” Na a tra sei, Elaine di wi taki fu en kaba, ben wani de en wawan. So bun, efu wi wani yepi den, dan dati wani taki dati wi musu abi a koni fu man si sani krin. Na a wán sei, wi musu erken taki a tra sma abi a reti fu du san ensrefi wani èn fu de en wawan efu a wani, ma na a tra sei wi musu de klariklari tu fu yepi en te a abi dati fanowdu.

Yepi fu Famiriman

Te a weduwe abi wan waran, lobi-ati famiri, dan den kan du furu fu gi en deki-ati, fu di den e sori en taki a sa man tyari den problema fu en leki weduwe. Ala di son memre fu a famiri kan yepi moro furu leki trawan, toku alamala kan du wan sani fu yepi a weduwe. „Efu wan weduwe abi pikin noso granpikin, meki den disi leri fosi fu sori taki den gi densrefi na ini a dini fu Gado ini den eigi osofamiri èn fu den tan pai wan paiman di fiti na den papa nanga mama èn na den granpapa nanga granmama, bika disi bun na Gado ai.”—1 Timoteus 5:4.

Nofotron, a no ben sa de fanowdu fu gi a weduwe moni, noso „wan paiman di fiti”. Son weduwe abi nofo moni fu sorgu densrefi, èn na ini  son kondre weduwe kan kisi moni fu lanti. Ma na ini den kondre pe weduwe no abi den sani disi, dan famiriman musu yepi den. Efu wan weduwe no abi krosibei famiri di kan yepi en, noso efu a de so taki den famiri disi no man yepi, dan den Buku fu Bijbel e gi tra bribiman a tranga fu yepi en: „A fasi fu anbegi di krin èn di no pori, leki fa wi Gado nanga Tata e si en, na disi: fu luku den pikin di no abi papa nanga mama èn den weduwe na ini a banawtu fu den.”—Yakobus 1:27.

Den sma di e handri akruderi den Bijbel gronprakseri disi, trutru e „gi weduwe grani” (1 Timoteus 5:3). Te yu e gi wan sma grani, dan fu taki en leti, dati wani taki dati yu e sori lespeki gi a sma dati. Sma di e kisi grani e firi taki den warti, taki sma lobi den èn e lespeki den. Den no e firi taki trawan e yepi den soso fu di den abi a plekti fu yepi den. Ala di Rut srefi ben de wan weduwe fu wan pisi ten, toku a ben gi Naomi grani trutru fu di a ben de klariklari fu yepi en. Na wan lobi-ati fasi Rut ben sorgu taki Naomi ben kisi ala san a ben abi fanowdu na skin sei, èn a ben hori den firi fu Naomi na prakseri tu. Fu taki en leti, a fasi fa Rut ben handri, esi-esi ben meki taki a kon abi wan bun nen, so taki a man di ben o trow nanga en, ben taigi en: „Ala sma na ini a foto fu mi pipel sabi taki yu na wan tumusi bun uma” (Rut 3:11, futuwortu). Na a srefi ten, Naomi ben lobi Gado, a no ben aksi tumusi furu fu tra sma, a trutru ben warderi den sani so srefi di Rut ben du gi en, èn dati meki a ben musu de wan prisiri gi Rut fu yepi Naomi. Naomi na trutru wan tumusi moi eksempre gi weduwe na ini a ten disi!

Kon Krosibei na Gado

A no de fu taki dati famiriman nanga mati no man du noti na a misi di a weduwe e misi en trowpatna di a lasi na ini dede. Fu dati ede a prenspari taki a sma di lasi en trowpatna, e kon krosibei spesrutu na „a Tata fu safu sari-atifasi èn a Gado fu ala trowstu, di e trowstu wi na ini ala wi banawtu” (2 Korentesma 1:3, 4). Luku na eksempre fu Ana, wan opregti weduwe di ben abi 84 yari na a ten di Yesus ben gebore.

Di Ana en masra dede baka di den ben trow seibi yari nomo, a ben suku yepi na Yehovah fu a trowstu en. „Den no ben misi [en] noiti na ini a tempel, ala di a ben e du santa diniwroko dei nanga neti, nanga faste èn nanga tranga begi” (Lukas 2:36, 37). Yehovah ben warderi a gi di Ana ben gi ensrefi na ini a dini fu en? Iya! Yehovah ben sori na wan tumusi aparti fasi taki a lobi en, fu di a ben meki en si a beibi di ben o gro kon tron a Frulusuman fu grontapu. Disi ben naki Ana ati srefisrefi èn ben gi en trowstu! A de krin taki a ben ondrofeni trutru san skrifi na Psalm 37:4: „Abi switi prisiri na ini Yehovah tu, èn a sa gi yu san na ati fu yu e aksi.”

Gado E Gebroiki Tra Bribiman fu Gi Yepi

Elaine e taki: „Wan langa pisi ten baka a dede fu David, mi skin ben hati mi, mi ben firi neleki wan nefi ben e drai na ini mi bere. Mi prakseri taki mi ben kisi beri-ati fu sani di mi ben nyan èn di mi skin no ben teki. Wán dei, a pen ben kon so hebi, dati mi prakseri taki mi ben o abi fu go na datra. Wan sisa na yeye fasi di de wan mati fu mi tu, ben si san ben pasa. A ben taigi mi taki kande a de di mi ben de nanga sari meki taki mi abi so furu pen. A sisa ben gi mi deki-ati fu aksi Yehovah fu yepi èn trowstu mi. Na a srefi momenti dati mi du san a ben taigi mi fu du; mi begi nanga wan safri sten ma nanga mi heri ati. Dan mi aksi Yehovah fu yepi mi fu horidoro ala di mi ben de nanga sari. Èn a ben du dati fu tru! Elaine ben bigin firi moro bun, èn no langa baka dati en skin no ben hati en moro srefi.

Gemeente owruman spesrutu kan du muiti na wan lobi-ati fasi fu tron wan mati fu weduwe di de nanga sari. Te owruman di e gi den weduwe yepi na yeye fasi èn e trowstu den, e du dati nanga takt èn e sori taki den abi a koni fu man si sani krin, dan den kan yepi weduwe fu tan krosibei na Yehovah awinsi sortu problema e miti den. Pe a de fanowdu, owruman kan yepi tu fu seti sani so, taki tra sma e yepi den na materia sei. Den owruman disi di abi sari-ati nanga a koni fu man si sani krin, trutru e kon de leki „wan kibripresi gi a winti”.—Yesaya 32:2; Tori fu den Apostel 6:1-3.

A Nyun Kownu fu Grontapu Sa Gi Trowstu fu Ala Ten

A sma di owru Ana ben prisiri fu si, so wan tu dusun yari pasa, kon tron a Mesias Kownu now  fu a hemel Kownukondre fu Gado. Dyonsro, a tirimakti disi sa puru ala sani di e meki sma sari, so srefi dede. Ini a tori disi, Openbaring 21:3, 4 e taki: „Luku! A tenti fu Gado de nanga libisma . . . A sa figi puru ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.” Yu si taki a tekst disi e taki fu „libisma”? Iya, libisma no sa dede moro èn den no sa de nanga a sari èn nanga a babari moro di dati e tyari kon.

Ma moro bun nyunsu de srefi! Bijbel e pramisi taki den dedewan sa kisi wan opobaka. „A yuru e kon pe ala sma di de na ini den memregrebi, sa yere [Yesus] sten èn sa kon na doro” (Yohanes 5:28, 29). Neleki Lasarus di Yesus ben opo baka na dede, na so den dedewan sa kon na doro leki libisma tu, no leki yeye mekisani (Yohanes 11:43, 44). Den wan di ’e du bun sani’ baka dati, sa tron volmaakti sma. Yehovah sa sorgu ibriwan fu den leki fa wan papa e sorgu den pikin fu en, fu di a e ’opo en anu èn e meki den lostu fu ala libisani kon tru”.—Psalm 145:16.

Den wan di lasi wan lobiwan na ini dede, e si taki te den e poti bribi na ini a howpu disi di no abi misi, dan dati e gi den trowstu srefisrefi (1 Tesalonikasma 4:13). So bun, efu yu na wan weduwe, no frigiti fu ’begi Gado doronomo’ fu gi yu a trowstu nanga a yepi di yu abi fanowdu ala dei fu man tyari den difrenti hebi di e kon na yu tapu (1 Tesalonikasma 5:17; 1 Petrus 5:7). Poti ten na wan sei tu fu leisi Gado Wortu ibri dei, so taki den prakseri fu Gado kan trowstu yu. Efu yu e du ala den sani disi, dan yusrefi sa si fa Yehovah kan yepi yu trutru fu abi wan korostu ati, awinsi sortu problema nanga tyalensi e miti yu leki weduwe.

[Prenspari pisi na tapu bladzijde 5]

Te wi wani yepi, dan wi musu erken na a wán sei taki a sma abi a reti fu de en wawan efu a wani, ma na a tra sei wi musu de klariklari tu fu yepi en te a abi dati fanowdu

[Prenki na tapu bladzijde 7]

Gado ben blesi na owru weduwe Ana