Yu „E Bai a Yoisti Ten”?

NA APOSTEL Paulus ben gi den Kresten na ini a fosi yarihondro foto Efeise a rai: „Luku bun fa unu e waka, no leki sma di no koni, ma leki koni sma, fu di unu e bai a yoisti ten gi unsrefi, bika den dei godelowsu (Efeisesma 5:15, 16). Fu san ede a rai disi ben de fanowdu? Fu man piki na aksi disi, dan wi musu sabi sortu situwâsi ben de wan tesi gi den Kresten ini na owruten foto dati.

Sma ben sabi Efeise leki wan kefalek gudu foto pe hurudu ben du na wan takru fasi. Ini a foto disi ogridu ben furu na ala sei èn sma ben anbegi ogri yeye na ala sortu fasi. Boiti den sani disi, dan den Kresten drape ben musu kakafutu gi a filosofia fasi fa sma ben e si ten. Den Grikisma na Efeise di no ben de Kresten no ben bribi taki te ten pasa dan a no e kon moro. A Griki filosofia leri den taki a libi furu nanga pisi ten pe sani e kon ibritron baka. Efu wan sma ben gebroiki en libiten na wan don fasi, dan a ben kan kisi a libiten disi baka ini wan tra pisi ten fu a libi. A fasi disi fu denki ben kan abi krakti tapu den Kresten fu Efeise. Den ben kan kon si a ten di Yehovah seti fu du sani èn so srefi a ten di a seti fu krutu sani leki wan sani di no de so prenspari. Fu dati ede, a rai di Paulus ben gi fu ’bai a yoisti ten’, ben fiti.

Paulus no ben taki nomo fu ten leki fa moro furu sma e si ten. A Griki wortu di a ben gebroiki wani taki wan fasti ten, wan reti ten fu du wan spesrutu sani. Paulus ben gi den fosi yarihondro Kresten rai fu gebroiki a reti ten noso a pisi ten fu bun-ati di den abi nownow, na wan koni fasi, bifo a ten disi ben o kon na wan kaba. Na a kaba fu a pisi ten disi, dan a sari-ati fu Gado nanga na okasi fu kisi frulusu no ben sa de moro.—Romesma 13:11-13; 1 Tesalonikasma 5:6-11.

Wi e libi na ini wan srefi sortu pisi ten. Kresten no wani gebroiki a pisi ten disi fu bun-ati di no sa kon baka noiti moro, na wan don fasi fu suku den prisiri sani fu a grontapu disi, fu di den sani disi de fu wan syatu pisi ten nomo. Na presi fu dati, den na koni sma te den e gebroiki a ten di den abi ’fu du sani di e sori taki den e gi densrefi na ini a dini fu Gado’ èn na so fasi e tranga a matifasi di den abi nanga a Mekiman, Yehovah Gado.—2 Petrus 3:11; Psalm 73:28; Filipisma 1:10.