Aksi fu Leisiman
Aksi fu Leisiman
O ten „a Moro Santapresi” ben kisi salfu, soleki fa a ben taki na fesi na Danièl 9:24?
Danièl 9:24 na wan profeititori di abi fu du nanga a ten di „Mesias a Fesiman”, a Krestes, ben musu kon. So bun, te a tekst e taki dati „a Moro Santapresi” ben o kisi salfu, dan dati no wani taki dati a Moro Santapresi fu a tempel na ini Yerusalem ben o kisi salfu. Na presi fu dati, den wortu „a Moro Santapresi” e sori go na a santapresi fu Gado na hemel na ini a gran yeye tempel fu Yehovah. *—Hebrewsma 8:1-5; 9:2-10, 23.
O ten a yeye tempel fu Gado bigin wroko? We, luku san ben pasa di Yesus ben gi ensrefi fu dopu na ini 29 G.T. Bigin nanga a momenti dati na ini en libi, Yesus ben meki den wortu fu Psalm 40:6-8 kon tru. Baka ten, na apostel Paulus ben sori taki Yesus ben taigi Gado na ini begi: „Srakti-ofrandi nanga a tyari fu ofrandi yu no ben wani, ma yu ben sreka wan skin gi mi” (Hebrewsma 10:5). Yesus ben sabi taki Gado „no ben wani” dati sma ben tan òfer meti-ofrandi na a tempel fu Yerusalem. Na presi fu dati, Yehovah ben sreka wan volmaakti libisma skin gi Yesus fu tyari dati leki wan srakti-ofrandi. Yesus ben sori san a ben wani trutru di a ben taki moro fara: „Luku! Mi kon (na ini a lolo fu a buku den skrifi fu mi) fu du yu wani, o Gado” (Hebrewsma 10:7). Fa Yehovah piki tapu dati? Na Evangelie fu Mateus e taki: „Baka di Yesus kisi dopu, a ben opo komoto na a watra wantewante; èn luku! hemel ben kon opo èn a ben si a yeye fu Gado e saka kon leki wan doifi e kon na en tapu. Luku! Wan sten ben komoto na hemel tu, di ben taki: ’Disi na mi Manpikin, a lobiwan, di mi feni bun.’”—Mateus 3:16, 17.
A feni di Yehovah Gado ben feni en wan bun sani taki Yesus ben gi en skin leki ofrandi, ben sori taki Gado ben seti wan altari di bun moro leki a trutru altari na ini a tempel fu Yerusalem. Disi ben de wan altari akruderi Gado en „wani”, noso a seti fu teki Yesus en libi leki libisma leki wan srakti-ofrandi (Hebrewsma 10:10). A salfu di Yesus ben salfu nanga santa yeye ben wani taki dati now, Gado ben seti a heri yeye tempel fu en. * Fu dati ede, a ten di Gado ben salfu en hemel tanpresi, noso ben poti en aparti leki „a Moro Santapresi” na ini a gran seti fu a yeye tempel, ben de na a ten di Yesus dopu.
[Futuwortu]
^ paragraaf 3 Fu kon sabi moro fu den difrenti pisi fu a yeye tempel fu Gado, dan luku bladzijde 12-17 fu A Waktitoren fu 1 yuli 1996.
^ paragraaf 5 Bladzijde 194-195 fu a buku ¡Poti Prakseri na a Profeititori fu Danièl! ben poti prakseri na a penti disi.
[Prenki na tapu bladzijde 27]
„A Moro Santapresi” ben kisi salfu di Yesus ben teki dopu