Fa fu Bow wan Osofamiri Di Tranga na Yeye Fasi
Fa fu Bow wan Osofamiri Di Tranga na Yeye Fasi
„Tan kweki den na ini a trangaleri èn a seryusu frumane fu Yehovah.”—EFEISESMA 6:4.
1. San Gado ben abi na prakseri gi na osofamiri, ma san pasa na presi fu dati?
„UN MEKI pikin èn un kon furu èn un furu grontapu” (Genesis 1:28). Yehovah Gado ben taigi Adam nanga Efa den wortu dati di a ben seti na osofamiri (Efeisesma 3:14, 15). A fosi trowpaar dati ben kan fruwakti fu si wan grontapu di ben o lai nanga den bakapikin fu den — wan bun bigi famiri fu volmaakti libisma di ben e prisiri fu libi na ini wan paradijs grontapu èn di ben e anbegi a Gran Mekiman fu den na ini wánfasi. Ma Adam nanga Efa tron sondari, èn grontapu no kon furu nanga regtfardiki sma di ben e frede Gado (Romesma 5:12). Na presi fu dati, na osofamiri-libi heri esi go na baka, èn bita-ati, ogri di sma e du nanga tranga, èn a mankeri di sma e mankeri „natuurlijk firi fu lobi” lai na grontapu, spesrutu na ini „den lasti dei” disi.—2 Timoteus 3:1-5; Genesis 4:8, 23; 6:5, 11, 12.
2. Sortu sani den bakapikin fu Adam ben man du, ma fa den ben o man bow wan osofamiri di tranga na yeye fasi?
2 Gado ben meki Adam nanga Efa akruderi a prenki fu en. Ala di Adam ben tron wan sondari now, Yehovah gi en primisi fu kisi pikin (Genesis 1:27; 5:1-4). Neleki a papa fu den, na so den pikin fu Adam ben sabi fa fu tyari densrefi na a yoisti fasi èn den ben kan leri fu si a difrenti na mindri san bun èn san ogri. Den ben kan kisi leri fu kon sabi fa fu anbegi a Mekiman fu den èn fu san ede den ben musu lobi en nanga den heri ati, sili, frustan, nanga krakti (Markus 12:30; Yohanes 4:24; Yakobus 1:27). Boiti dati, den ben kan kisi leri „fu du retidu èn fu lobi switifasi èn fu waka bescheiden nanga . . . Gado” (Mika 6:8). Ma leki sondari, den ben o musu arki Gado bun, fu man bow wan osofamiri di tranga na yeye fasi.
Bai Ten
3. Fa papa nanga mama kan ’bai ten’ fu kweki Kresten pikin?
3 Na ini a bruya ten disi di tranga fu pasa, sma musu du furu muiti fu sorgu taki pikin-nengre e tron „sma di lobi Yehovah” èn di trutru „no wani si ogri na ai” (Psalm 97:10). Papa nanga mama di koni, sa ’bai ten’ fu du a muilek wroko disi (Efeisesma 5:15-17). Efu yu na wan papa noso wan mama, fa yu kan du a sani disi? Na a fosi presi, bosroiti san na den sani di de moro tranga fanowdu, ala di yu e poti prakseri na „den moro prenspari sani”, èn so srefi na a leri di yu musu leri den pikin fu yu (Filipisma 1:10, 11). Wan tra sani di yu musu du, na taki yu musu go libi wan moro sempel libi. Kande yu sa musu tapu nanga sani di yu e du èn di no de trutru fanowdu. Noso kande yu sa musu gi sma den sani di yu no abi fanowdu èn di e teki tumusi furu fu yu ten, noso kande yu musu seri den sani disi. Leki wan Kresten papa noso mama, noiti yu sa sari taki yu du muiti fu kweki pikin di e frede Gado.—Odo 29:15, 17.
4. Fa wan osofamiri kan tan na ini wánfasi?
4 Te papa nanga mama e teki ten fu de nanga den pikin fu den, spesrutu te den e du sani makandra di abi fu du nanga yeye afersi, dan dati a no lasi ten gi den èn disi na wán fu den moro bun fasi fu hori na osofamiri na wán. Ma no du a sani disi wanwan leisi nomo. Poti ten na wan sei spesrutu fu de nanga den pikin fu yu. Disi no wani taki nomo dati yu musu de na ini a srefi oso makandra nanga den, ala di ibri sma e du san ensrefi wani. Pikin-nengre e gro kon tron moro bun sma te papa nanga mama e teki ten ibri dei fu de nanga den. Mama nanga papa doronomo musu sori taki den lobi den pikin fu den, èn taki den e broko den ede nanga den doronomo tu. Srefi bifo trowpaar e bosroiti fu meki pikin, den musu poti seryusu prakseri na a prenspari frantwortu disi (Lukas 14:28). Te den e du dati, dan den no sa si a kweki di den musu kweki den pikin fu den leki wan tranga wroko di no switi fu du. Na presi fu dati, den sa si en leki wan grani di e tyari blesi kon.—Genesis 33:5; Psalm 127:3.
Gi Leri Nanga Yepi fu Yu Wortu èn Yu Eksempre
5. (a) San yusrefi musu du fosi efu yu wani leri yu pikin fu lobi Yehovah?(b) Sortu rai papa nanga mama e kisi na ini Deuteronomium 6:5-7?
5 Te yu wani leri yu pikin fu lobi Yehovah, dan yusrefi musu sori taki yu lobi en. Te yu abi wan tranga lobi gi Gado, dan dati sa meki taki yu sa teki ala den rai fu Gado na wan getrow fasi. Dati wani taki so srefi taki yu e kweki den pikin fu yu „na ini a trangaleri èn a seryusu frumane fu Yehovah” (Efeisesma 6:4). Gado e gi papa nanga mama a rai fu gi den pikin fu den wan bun eksempre, fu abi takimakandra nanga den, èn fu leri den. Deuteronomium 6:5-7 e taki: „Èn yu musu lobi Yehovah, yu Gado, nanga heri yu ati èn nanga heri yu sili èn nanga heri yu krakti. Èn den wortu disi di mi e komanderi yu tide, musu de na tapu yu ati; èn yu musu poti den go dipi na ini a manpikin fu yu èn taki fu den te yu e sidon na ini yu oso èn te yu e waka na pasi èn te yu e go didon èn te yu e opo.” Te yu abi a gwenti fu frumane den pikin fu yu doronomo èn te yu e taki ibri tron baka nanga den, dan yu kan poti den komando fu Gado go dipi na ini den. Na so fasi den pikin fu yu sa si a lobi di yu abi gi Yehovah, èn dati sa meki taki densrefi sa kon kisi wan krosibei matifasi nanga en tu.—Odo 20:7.
6. Fa papa nanga mama kan kisi wini fu a leri di pikin e leri fu di den e waka baka na eksempre fu trawan?
6 Pikin-nengre angri fu leri sani. Den gaw fu yere èn fu si sani èn den de esi fu waka baka na eksempre di yu e gi den. Te den e si taki yu no e feti na baka materia sani nomo, dan disi e yepi den fu kon sabi fa fu handri akruderi a rai fu Yesus. Yu e leri den fu no broko den ede tumusi nanga materia sani ma fu ’suku fosi a kownukondre fu Gado’ (Mateus 6:25-33). Te yu abi bun takimakandra nanga yu pikin fu Bijbel waarheid, fu a gemeente fu Gado, èn fu den owruman di poti na wroko, dan yu e leri den fu lespeki Yehovah èn fu warderi den sani na yeye fasi di Yehovah sreka gi wi. Fu di pikin-nengre heri-esi e si taki wi no e du san wi e taki, dati meki a fasi fa wi e tyari wisrefi èn so srefi a fasi fa wi e denki, musu sori den taki wisrefi abi furu warderi gi yeye afersi. A de trutru wan blesi te papa nanga mama e si taki a bun eksempre fu den meki taki den pikin fu den lobi Yehovah nanga den heri ati!—Odo 23:24, 25.
7, 8. Sortu eksempre e sori taki a de prenspari fu bigin leri pikin-nengre frukufruku, èn suma musu kisi a grani te sani e waka bun?
7 Wan eksempre fu Venezuela e sori wi o prenspari a de taki papa nanga mama e leri den pikin fu den te den de yonguyongu ete (2 Timoteus 3:15). Disi na a tori fu Félix nanga Mayerlín, wan yongu trowpaar. Den na pionier. Di Felito, a manpikin fu den, gebore, den ben abi a fasti bosroiti fu du ala san den ben man du fu kweki en leki wan tru anbegiman fu Yehovah. Mayerlín bigin leisi Mi boekoe nanga bijbel tori gi Felito meki a yere. Yehovah Kotoigi tyari a buku disi kon na doro. Di Felito ben de yonguyongu ete, a ben gersi leki a ben man sabi suma na Moses nanga tra sma di prenki na ini a buku disi.
8 Ala di Felito ben de yonguyongu ete, a bigin gi kotoigi en wawan. A tron wan Kownukondre preikiman soleki fa a ben wani, èn baka ten a teki dopu. Baka wan pisi ten, Felito tron wan gewoon pionier. En papa nanga mama e taki: „Te wi e luku fa a manpikin fu wi e go na fesi, dan wi e taki Yehovah tangi fu di a gi wi rai nanga leri.
Yepi Pikin-nengre fu Gro na Yeye Fasi
9. Fu san ede wi musu de nanga tangi na ati fu a rai di wi e kisi na yeye fasi nanga yepi fu a getrow èn koni srafu grupu?
9 Bun furu tijdschrift èn hondrohondro buku de, so srefi dusundusun sani de tapu Internet di e gi sma rai fa fu kweki pikin. Furutron „den rai di sma e gi no e kruderi nanga makandra”, na so a tijdschrift Newsweek di ben taki spesrutu fu pikin-nengre, e tyari kon na fesi. „A sani di e bruya yu moro srefi, na te yu e kisi rai di yu denki taki a bun, baka ten e sori fu de rai di no bun kwetikweti.” Wi trutru de nanga tangi na ati, fu di Yehovah gi wi bun furu rai fa fu tiri èn fa fu meki wan osofamiri gro na yeye fasi! Yu e kisi trutru wini fu ala den sani di Yehovah seti gi wi nanga yepi fu a getrow èn koni srafu grupu?—Mateus 24:45-47.
10. Fa wan bun osofamiri bijbelstudie e tyari wini kon gi papa nanga mama èn so srefi gi pikin-nengre?
10 Wan tumusi prenspari sani di wan osofamiri abi fanowdu, na wan bijbelstudie di papa nanga mama e hori doronomo. Den musu du dati na wan fasi di e meki taki ala den memre fu na osofamiri e firi switi. Fu kan sorgu taki na osofamiri bijbelstudie e leri den wan sani, èn e gi den prisiri, nanga tranga, dan papa nanga mama musu sreka densrefi bun na fesi. Te papa nanga mama e gi den pikin fu den okasi fu taki, dan den kan kon sabi san de na ini na ati fu den èn fa den e denki. Wán fasi fu kon sabi efu den pikin e kisi wini fu na osofamiri bijbelstudie, na fu luku efu a de so taki ala den memre fu na osofamiri e angri gi a studie.
11. (a) Sortu marki papa nanga mama kan yepi den pikin fu den fu abi? (b) San ben de a bakapisi di wan meisje fu Yapan suku fu doro a marki fu en?
11 Te na osofamiri e poti marki na yeye fasi di den wani doro, dan dati e yepi tu fu bow wan osofamiri di tranga na yeye fasi, èn papa nanga mama musu yepi den pikin fu den fu abi den marki disi. Den kan abi marki fu leisi Bijbel ala dei, fu tron wan preikiman di e preiki a bun nyunsu doronomo, èn fu go na fesi so taki den e gi densrefi abra na Gado èn e teki dopu. Kande den kan abi tra marki so srefi fu du furuten diniwroko leki pionier, fu go na Bethel, noso fu dini leki wan zendeling. Ala di wan meisje na Yapan di nen Ayumi ben de na lagiskoro ete, a ben abi a marki fu gi ibriwan sma na ini en klas kotoigi. Fu meki taki en skoromisi nanga den pikin fu en klas ben sa wani sabi moro, Ayumi aksi primisi fu poti wan tu Bijbel publikâsi na ini a bibliotheek. A bakapisi ben de taki na ini den siksi yari di a ben de na a lagiskoro, a hori 13 bijbelstudie. Wan fu den bijbelstudenti dati èn so srefi tra sma ini na osofamiri fu en, tron dopu Kresten.
12. Fa pikin-nengre kan kisi a moro bigi wini fu den Kresten konmakandra?
12 Wan sani di de fanowdu tu fu kisi wan bun gosontu na yeye fasi, na fu go na den konmakandra doronomo. Na apostel Paulus ben gi brada nanga sisa a rai fu ’no libi a kon di wi e kon makandra, soleki fa sonwan ben abi a gwenti fu du’. Meki wi no kisi a gwenti dati, bika yonguwan èn so srefi owruwan e kisi furu wini fu di den de na den Kresten konmakandra doronomo (Hebrewsma 10:24, 25; Deuteronomium 31:12). Pikin-nengre musu leri fu poti yesi arki. A de tumusi prenspari tu taki wi e sreka wisrefi gi den konmakandra, bika a moro bigi wini e kon te wi e teki prati fu di wi e gi komentaar. Ala di wan yongu pikin kande e bigin taki wan tu wortu noso a e leisi wan pikin pisi fu wan paragraaf, toku a sa abi moro furu wini te papa nanga mama e leri den fa fu feni den piki èn fa fu gi den piki disi nanga den eigi wortu. Papa nanga mama, yu e gi den pikin fu unu wan bun eksempre fu di unsrefi abi a gwenti fu gi bun komentaar? A bun tu taki ibri memre fu na osofamiri abi wan Bijbel, wan singibuku, nanga wan fu den publikâsi di wi e gebroiki te wi abi wan Bijbel takimakandra.
13, 14. (a) Fu san ede papa nanga mama musu wroko makandra nanga den pikin fu den na ini a preikiwroko? (b) San sa yepi den pikin fu kisi wini èn so srefi prisiri fu a preikiwroko?
13 Papa nanga mama di koni, sa yepi den pikin fu den fu gebroiki a krakti fu den fu dini Yehovah, ala di den e yepi den fu gi a preikiwroko wan prenspari presi na ini den libi (Hebrewsma 13:15). Soso te papa nanga mama e wroko makandra nanga den pikin fu den na ini a preikiwroko, den kan sorgu taki den yonguwan fu den sa kisi a leri di de fanowdu fu tron dinari „di no abi fu syen fu noti, di e gebroiki a wortu fu waarheid na wan reti fasi” (2 Timoteus 2:15). Fu dati ede dan, fa a de nanga yu? Efu yu na wan papa noso mama, yu e yepi den pikin fu yu fu sreka densrefi gi a preikiwroko? Te yu e du dati, dan dati sa yepi den fu kisi moro prisiri na ini a preikiwroko, fu di a sa gi den winimarki, èn a sa tyari bun bakapisi kon gi den.
14 Fu san ede a bun te papa, mama, nanga den pikin fu den e wroko makandra na ini a preikiwroko? Na so fasi den pikin kan si èn so srefi kan waka baka a bun eksempre fu den papa nanga mama fu den. Na a srefi ten, papa nanga mama kan luku sortu denki den pikin fu den abi èn fa den e tyari densrefi, èn den kan luku so srefi efu den pikin fu den e du a preikiwroko bun. Sorgu taki yu e tyari yu pikin go nanga yu te yu e go du difrenti fasi fu diniwroko. Efu a kan, meki ibri pikin abi en eigi preikiwroko tas, èn leri a pikin fu handri na so wan fasi nanga a tas taki a e tan krin ala ten. Te pikin-nengre e kisi leri doronomo èn e kisi tranga tu, dan den sa kisi trutru warderi gi a preikiwroko, èn den sa si a preikiwroko leki wan fasi fu sori taki den lobi Gado èn so srefi a sma na den sei.—Mateus 22:37-39; 28:19, 20.
Hori Yeyefasi
15. Fu di a de so prenspari taki na osofamiri e hori en yeyefasi, dan san na wan tu fasi fa yu kan du disi?
15 A de prenspari fu sorgu taki na osofamiri e hori en yeyefasi (Psalm 119:93). Wán fasi fa yu kan du dati, na fu teki ibri okasi fu taki fu yeye afersi nanga yu osofamiri. Yu e taki fu a deitekst nanga den? Yu abi a gwenti fu taki nanga den fu den sani di yu ondrofeni na ini a preikiwroko, noso fu sani di yu ben leisi na ini den nyun Waktitoren nanga Ontwaakt! „te yu e waka na pasi”? A de so taki „te yu e go didon èn te yu e opo” yu no e frigiti fu taki Yehovah tangi na ini begi gi ibri dei di yu de na libi èn gi den sani di a seti pasa marki? (Deuteronomium 6:6-9) Te den pikin fu yu e si na ini ala sani di yu e du taki yu lobi Gado, dan disi sa yepi den fu meki a waarheid tron wan pisi fu a libi fu den.
16. O prenspari a de taki wi e gi pikin-nengre deki-ati fu ondrosuku sani densrefi?
16 Son leisi, pikin-nengre sa abi yepi fanowdu fu kakafutu gi problema noso gi spesrutu sani di e miti den. Fu san ede yu no e sori den fa fu kon sabi fa Gado e denki fu sani, fu di yu e gi den deki-ati fu ondrosuku sani densrefi? Yu kan du dati na presi fu taigi den ala ten san den musu du. Te wi e leri den pikin a yoisti fasi fa fu gebroiki ala den wrokosani nanga den publikâsi di wi e kisi nanga yepi fu a ’getrow srafu’, dan dati sa yepi den fu kweki wan krosibei matifasi nanga Yehovah (1 Samuèl 2:21b). Èn te den e taki nanga den tra memre fu na osofamiri fu den sani di den ben ondrosuku di abi fu du nanga Bijbel tori, dan na osofamiri e kon moro tranga na yeye fasi.
Frutrow Dorodoro Tapu Yehovah
17. Fu san ede papa nanga mama di no abi trowpatna, no musu lasi-ati te den musu kweki den pikin na a fasi fa Kresten musu du dati?
17 Fa a de nanga papa noso mama di no abi trowpatna? Den sma disi e kisi moro tyalensi te a abi fu du nanga a kweki fu pikin. Ma papa noso mama di no abi trowpatna, no lasi-ati! Yu kan abi bun bakapisi, soleki fa a de nanga furu papa noso mama di no abi trowpatna èn di frutrow tapu Gado. Den gi yesi na a rai fu en, èn den kweki bun pikin di tranga na yeye fasi (Odo 22:6). A no de fu taki dati Kresten papa noso mama di no abi trowpatna musu frutrow dorodoro tapu Yehovah. Den musu bribi taki a sa yepi den.—Psalm 121:1-3.
18. San pikin-nengre abi fanowdu na frustan sei èn na skin sei, ma na san paa nanga mama musu poti moro prakseri?
18 Papa nanga mama di koni e frustan taki ’wan ten de fu lafu, èn wan ten de fu dyompodyompo’ (Preikiman 3:1, 4). Fu man meki wan pikin kisi bun frustan nanga wan krakti skin, a de prenspari taki a e prei èn taki a e meki prisiri na wan bun fasi. Te wan pikin e arki poku di bun èn spesrutu te a e singi prèisesingi gi Gado, dan dati sa yepi a pikin fu kon abi wan bun fasi fu denki di kan de prenspari gi en fu tranga a matifasi di a abi nanga Yehovah (Kolosesma 3:16). A de so tu taki wan sma musu sreka ensrefi na ini en yongu yari fu tron wan bigisma di e frede Gado. Na so fasi a sa go doro fu têgo fu nyan bun fu a libi na ini wan paradijs na grontapu.—Galasiasma 6:8.
19. Fu san ede papa nanga mama kan frutrow na tapu taki Yehovah sa blesi a muiti di den du fu kweki den pikin fu den?
19 Yehovah wani taki ala Kresten osofamiri e tan tranga na yeye fasi èn a wani tu taki den e tan na ini wánfasi. Te wi lobi Gado trutru èn te wi e du ala san wi man fu gi yesi na a Wortu fu en, dan a sa blesi a muiti di wi e meki. So srefi a sa gi wi a krakti di wi abi fanowdu fu waka a pasi di a e sori wi na ini en Wortu (Yesaya 48:17; Filipisma 4:13). Memre taki na okasi di yu abi nownowde fu leri den pikin fu yu, na fu wan syatu pisi ten nomo, èn yu no sa kisi na okasi disi ete wan leisi. Du ala san yu man du fu handri akruderi a rai fu Gado Wortu, èn Yehovah sa blesi a muiti di yu e du fu bow wan osofamiri di tranga na yeye fasi.
San Wi Ben Leri?
• Fu san ede a de so prenspari taki wi e bai ten te wi e kweki pikin?
• Fu san ede a de fanowdu taki papa nanga mama e gi wan bun eksempre?
• San na wan tu fu den prenspari fasi fa wi kan yepi pikin-nengre fu gro na yeye fasi?
• Fa wan osofamiri kan sorgu taki a e hori en yeyefasi?
[Aksi fu a tori disi]
[Prenki na tapu bladzijde 24]
Osofamiri di tranga na yeye fasi e studeri Gado Wortu doronomo, den e go na den Kresten konmakandra, èn den e wroko nanga makandra na ini a preikiwroko