Unu Musu De Lepi Sma Di Abi Wan Tranga Bribi

’Luku! A Bigi Ipi!’

A BEN de wan aksi di ben dangra den futuboi fu Yehovah someni tenti yari langa kaba. Den ben du muiti someni langa kaba fu lusu a tori akruderi Bijbel. A tori disi meki taki someni takimakandra ben hori. Ma te fu kaba, den feni a piki na ini Bijbel, èn dati trutru ben naki na ati fu den sma na a kongres na Washington, D.C., na ini a yari 1935.

Sma ben hori den someni takimakandra disi, bika den ben aksi densrefi: Suma ben de a „bigi grupu” (King James Version), noso „bigi ipi” (New World Translation), di kari na Openbaring 7:9? A grupu bribiman disi ben o libi na ini hemel?

Wan Sani Di Sma Ben Aksi Densrefi Someni Langa Kaba

Bigin fu a ten fu na apostel Yohanes te na ini a ten fu wi, Kresten no ben sabi suma na a „bigi grupu”. Den Bijbel Ondrosukuman ben prakseri taki a bigi ipi ben de wan tra grupu na ini hemel di no ben de so prenspari. Den ben denki taki a ben de wan grupu sma di ben sabi waarheid fu Bijbel ma di no ben meki furu muiti fu panya dati go na ala sei.

Ma wan tu kompe fu den salfu Kresten ben kon de sma di e wroko fayafaya na ini a preikiwroko. Den no ben abi a tranga winsi fu go na hemel. Iya, a howpu fu den ben kruderi nanga a publikitaki di Yehovah en pipel ben hori fu 1918 te go miti 1922. A publikitaki ben nen „Milyunmilyun Sma Di E Libi Now Noiti Sa Dede”. Den sma disi ben o kisi têgo libi na grontapu.

The Watch Tower fu 15 oktober 1923 ben taki fu na agersitori di Yesus ben fruteri fu den skapu nanga den bokoboko, èn a tijdschrift ben taki: „Den skapu e prenki ala den sma fu den nâsi. A no den sma di gebore nanga yeye, ma den sma di lobi regtfardikifasi. Na den sma di e erken taki Yesus Krestes na a Masra. Na den wan di wani wan moro betre ten na ondro a tiri fu en èn e howpu tu taki a ten dati sa kon.”—Mateus 25:31-46.

A Leti E Skèin Moro Krin

Na ini a yari 1931, dan Pisi Wán fu Vindication ben taki fu Esekièl kapitel 9. A buku ben sori taki den sma di abi wan marki na tapu na fesi-ede fu kisi kibri te grontapu sa kisi pori, na den skapu fu na agersitori fu Yesus. Pisi Dri fu Vindication (di ben tyari kon na doro na ini 1932), ben taki fu na opregti fasi fu denki fu a man Yonadab di no ben de wan Israèlsma. A buku ben fruteri fa Yonadab ben go na ini a fetiwagi fu a salfu Kownu Yehu fu Israèl, èn fa a ben go makandra nanga Yehu fu si a faya di Yehu ben abi fu kiri falsi anbegiman (2 Kownu 10:15-28). A buku ben taki: „Yonadab e prenki a grupu sma di de now na grontapu, [di] no e wroko makandra nanga Satan en organisâsi moro. A de a grupu sma di e teki a fasti bosroiti fu du san regtfardiki. Den wan disi na den sma di a Masra sa kibri na ini a ten fu Armagedon, di a sa hari den komoto fu a banawtu dati èn sa gi têgo libi na grontapu. Den wan disi na a ’skapu’ grupu.”

Na ini 1934, The Watchtower ben sori krin taki Kresten di abi a howpu fu libi na grontapu, musu gi densrefi abra na Yehovah èn musu dopu. Fu tru, a leti ben skèin moro krin ini a tori fu a grupu disi na grontapu!—Odo 4:18.

Sani E Tyari Kon na Fesi Moro Krin

Sma ben sa kon frustan Openbaring 7:9-17 moro krin (Psalm 97:11). Wan kongres ben o hori fu 30 mei te go miti 3 yuni 1935, na ini Washington, D.C., na Amerkankondre. The Watchtower ben sori taki den brada trutru ben wani taki den sma di e prenki Yonadab, ben o „kisi trowstu” èn ben o  „leri furu srefisrefi” na a kongres dati. Dati ben de trutru so!

J. F. Rutherford ben hori wan tumusi moi lezing di abi fu du nanga „A Bigi Grupu”. A ben hori a lezing dati gi so wan 20.000 sma di ben kon na a kongres. Na ini a lezing dati a ben puru buweisi fu Bijbel fu sori taki den disiten „tra skapu”, de a srefi grupu leki a „bigi ipi” fu Openbaring 7:9 (Yohanes 10:16). Na a kaba fu a lezing fu en, a takiman ben aksi: „Un alamala di abi a howpu fu libi fu têgo na grontapu, grantangi opo tanapu.” Di moro furu fu den sma drape opo tanapu, dan Rutherford ben taki nanga wan krakti sten: „Luku! A bigi grupu!” Ala sma ben pî. Baka dati, den ben bari fu prisiri ede. A dei na baka, dan 840 nyun Kotoigi fu Yehovah dopu. Moro furu fu den ben taki dati den ben de fu a bigi ipi.

Wan Kefalek Moi Grupu

Bifo 1935, moro nanga moro fu den sma di ben teki a Bijbel boskopu èn di ben e preiki a bun nyunsu fayafaya, ben sori taki den ben wani libi fu têgo na tapu a Paradijs grontapu. Den no ben abi a winsi fu go na hemel, bika Gado no ben gi den a howpu fu libi na ini hemel. Den ben sori fu de fu a bigi ipi fu tra skapu. Dati ben wani taki dati na ini 1935 a kari fu den 144.000 salfu Kresten pikinmoro ben kon na wan kaba.—Openbaring 7:4.

Di a di fu Tu Grontapufeti broko, dan Satan Didibri ben meki tranga muiti srefisrefi fu tapu a wroko fu tyari sma kon makandra na ini a bigi ipi. Lanti ben tapu a Kownukondre preikiwroko na ini furu kondre. Na ini den muilek ten dati, èn syatu bifo J.F. Rutherford dede na ini yanuari 1942, a ben taki: „A gersi leki, toku a ’bigi grupu’ no sa de so bigi.”

Ma fu di Gado ben blesi a wroko, meki sani waka tra fasi. Den salfuwan nanga den kompe fu den, den tra skapu, „de lepi sma di abi wan tranga bribi”, èn den hori densrefi na a komando fu meki disipel (Kolosesma 4:12; Mateus 24:14; 28:19, 20). Na ini 1946, dan 176.456 Yehovah Kotoigi ben preiki na heri grontapu. Moro furu fu den ben de fu a bigi ipi. Na ini a yari 2000, moro leki 6.000.000 Kotoigi ben e dini Yehovah getrow na ini 235 kondre. Dati na wan bigi ipi fu tru! Èn a nomru fu den e tan gro moro nanga moro.