Prèise Yehovah gi Den Bigi Sani Di A Du!
Prèise Yehovah gi Den Bigi Sani Di A Du!
„Mi sili e prèise Yehovah . . . bika a Maktiwan du bigi sani gi mi.”—LUKAS 1:46-49.
1. Gi sortu bigi sani di Yehovah du, wi e prèise en trutru?
YEHOVAH warti fu kisi prèise gi den bigi sani di a du. Di a profeiti Moses ben fruteri fa Israèl ben kisi frulusu fu Egipti, dan a ben taki: „Nanga un eigi ai unu si ala den bigi sani di Yehovah du” (Deuteronomium 11:1-7). Na so a ben de tu di na engel Gabrièl ben fruteri a nyunwenke Maria taki Yesus ben o gebore. Maria ben taki: „Mi sili e prèise Yehovah . . . bika a Maktiwan du bigi sani gi mi” (Lukas 1:46-49). Leki Kotoigi fu Yehovah, wi e prèise en gi den bigi sani di a du, soleki a fri di a fri Israèl komoto fu katibo na Egipti, èn a wondru di a ben du fu meki Maria de nanga bere fu en lobi Manpikin.
2. (a) San a „têgo prakseri” fu Gado wani taki gi libisma di e gi yesi na en? (b) Sortu sani Yohanes ben ondrofeni na tapu na èilanti Patmos?
2 Furu fu den bigi sani di Yehovah du, abi fu du nanga en „têgo prakseri”. A prakseri disi fu en de, taki a sa blesi libisma di e gi yesi na en, nanga yepi fu a Mesias nanga en Kownukondre tiri (Efeisesma 3:8-13). A prakseri dati safrisafri ben tyari kon na krin gi na owru apostel Yohanes. Na ini wan fisyun a ben kisi primisi fu luku go na ini wan opo doro na hemel. A ben yere wan sten neleki a babari fu wan trompeti e taki: „Kon dyaso na tapu, èn mi sa sori yu den sani di musu feni presi” (Openbaring 4:1). A Rome tirimakti ben seni en go leki katiboman na a èilanti Patmos, ’fu di a ben e taki fu Gado èn ben e gi kotoigi fu Yesus’. Ma ala di a ben de drape, Yohanes ben kisi „wan openbaring fu Yesus Krestes”. Den sani di na apostel ben si èn yere ben tyari furu sani kon na krin di abi fu du nanga a têgo prakseri fu Gado. Na so fasi ala tru Kresten ben man frustan sani na yeye fasi moro bun, èn den sani disi ben kan gi den deki-ati na a yoisti ten.—Openbaring 1:1, 9, 10.
3. Suma den 24 owruman e prenki di Yohanes ben si na ini wan fisyun?
3 Na ini na opo doro dati na hemel, Yohanes ben si 24 owruman di ben sidon na tapu kownusturu èn di ben weri kownu-ati, neleki kownu. Den ben boigi na fesi Gado èn den ben taki: „Yu, Yehovah, iya wi Gado, warti fu kisi a glori nanga a grani nanga a krakti, bika yu ben meki ala sani, èn fu yu wani ede den ben de èn yu ben meki den” (Openbaring 4:11). Den owruman dati e prenki ala den salfu Kresten di ben kisi wan opobaka èn di ben kisi a hei posisi di Gado pramisi den. Den wani prèise Yehovah fu di a ben meki ala sani na wan tumusi moi fasi. Wisrefi e fruwondru te wi e si ala den buweisi fu Yehovah en „têgo krakti nanga en makti leki Gado” (Romesma 1:20). Èn o moro wi e leri fu Yehovah, o moro wi sa wani prèise en gi den bigi sani di a du.
Taki fu den Sani Di Yehovah Du èn Di A Musu Kisi Prèise gi Dati!
4, 5. Fruteri fa David ben prèise Yehovah.
4 A psalm skrifiman David ben prèise Gado gi den bigi sani di A du. David ben singi fu eksempre: „Singi prèisesingi gi Yehovah, di e tan na ini Sion; fruteri sma san a du. Sori sari-ati gi mi, o Yehovah; luku fa den wan di no lobi mi, e meki mi pina, o yu di e opo mi fu den portu fu dede, so taki mi kan taki fu ala den sani di yu du èn di yu musu kisi prèise gi dati, na ini den portu fu na umapikin fu Sion (Psalm 9:11, 13, 14). Baka di David ben sori en manpikin Salomo fa fu bow a tempel, dan David ben blesi èn prèise Gado èn a ben taki: „Fu yu, o Yehovah, a bigi nanga a makti, nanga a moifasi nanga a tumusi bunfasi nanga a wartifasi de . . . Fu yu a kownukondre de, o Yehovah, yu di e opo yusrefi tu leki edeman na tapu ala sani. . . . Èn now, o wi Gado, wi e taki yu tangi èn wi e prèise yu glori nen.”—1 Kroniki 29:10-13.
5 Ibritron baka den Buku fu Bijbel e gi wi wan kari fu prèise Gado, neleki fa David ben du dati. Te yu e luku en bun, dan den e gi wi tranga srefi fu du dati. A buku Psalm abi furu singi na ini di e prèise Gado, èn pikinmoro afu fu den singi disi e kon fu David. A ben prèise Yehovah èn ben taki en tangi doronomo (Psalm 69:30). Boiti dati, sensi owruten, sma ben gebroiki singi di David nanga trawan ben skrifi nanga yepi fu santa yeye, fu prèise Yehovah.
6. Fa wi kan gebroiki den Psalm di Gado meki sma skrifi nanga yepi fu santa yeye, na wan bun fasi?
6 Den anbegiman fu Yehovah kan gebroiki den Psalm heri bun! Te wi wani fu taki Gado tangi gi ala den bigi sani di a du gi wi, dan wi kan prakseri den moi wortu di de fu feni na ini den Psalm. Fu eksempre, te wi e wiki na a mamanten fu wan nyun dei, dan kande wi wani taki wortu soleki disi: „A bun fu gi Yehovah tangi èn fu meki poku gi yu nen, o Moro Heiwan; fu fruteri fu yu lobi bun-ati na mamanten èn fu yu getrowfasi na neti, . . . bika yu meki mi prisiri, o Yehovah, fu den wroko fu yu ede; mi e bari wan prisiri babari fu den wroko fu yu anu ede” (Psalm 92:1-4). Te wi e lusu wan problema di meki taki wi no e go na fesi na yeye fasi, dan kande wi wani sori na ini begi taki wi e prisiri èn taki wi de nanga tangi na ati. A psalm skrifiman ben du a srefi di a ben singi: „O un kon, meki wi bari gi Yehovah nanga prisiri! Meki wi bari wan wini babari gi wi Klepston fu frulusu. Meki wi kon na fesi en fu taki tangi; meki wi singi prèisesingi gi en nanga prisiri.”—Psalm 95:1, 2.
7. (a) San de moi fu si na den furu singi di Kresten e singi? (b) San na wan reide fu san ede wi musu kon biten na den konmakandra èn musu tan te na a kaba?
7 Furutron wi e opo wi sten fu singi prèisesingi gi Yehovah na den gemeente konmakandra, den kring-konmakandra, èn den kongres. A de moi fu si taki furu fu den singi disi, teki fu a buku Psalm di abi prakseri na ini di Gado meki sma skrifi nanga yepi fu santa yeye. We breiti trutru taki wi abi singi na ini a ten disi di e meki wi prisiri èn di wi kan gebroiki fu prèise Yehovah! A singi di wi e singi prèisesingi gi Gado, na wan bun reide fu kon biten na den konmakandra fu wi, èn fu tan te na a kaba. Na so fasi wi, makandra nanga tra anbegiman, kan prèise Yehovah nanga singi èn nanga begi.
„Unu Musu Prèise Yah!”
8. San a wortu „Halleluja” wani taki?
8 A wortu „Halleluja” wani taki prèise Yehovah. Halleluja na a fasi fa sma e skrifi a Hebrew wortu disi na ini Sranantongo. Fu eksempre, na ini Psalm 135:1-3 wi e feni a kari disi di e taki na wan lobi-ati fasi èn nanga furu krakti: „Unu musu prèise Yah! Prèise a nen fu Yehovah, o un futuboi fu Yehovah, prèise en, yu di e tanapu na ini na oso fu Yehovah, na ini a fesi dyari fu na oso fu wi Gado. Prèise Yah, bika Yehovah bun. Singi prèisesingi gi en nen, bika a de switi.”
9. San e meki taki wi wani prèise Yehovah?
9 Te wi e prakseri den wondrusani di Gado meki nanga ala den sani di a du gi wi, dan wi wani prèise en fu di wi e warderi nanga wi heri ati san a du gi wi. Te wi e prakseri den wondrusani di Yehovah du gi en pipel na ini a ten di pasa, dan wi wani prèise en nanga wi heri ati. Èn te wi e denki dipi fu den pramisi fu Yehovah taki a sa du bigi sani ete, dan wi e suku fasi fu prèise en èn fu sori en taki wi de nanga tangi na ati.
10, 11. Fa a meki di Gado meki wi, e gi wi reide fu prèise en?
10 Wan bun reide fu san ede wi musu prèise Yah na fu di a meki wi. David ben singi: „Mi sa prèise yu [Yehovah] fu di yu ben meki mi na wan tumusi fruwondru fasi di e gi lespeki frede. Den wroko fu yu na wondruwroko; dati mi sili sabi heri bun” (Psalm 139:14). Iya, wi ’meki na wan fruwondru fasi’, èn wi abi wan tu moi presenti di Gado gi wi, soleki a si di wi man si, a yere di wi man yere, nanga a prakseri di wi man prakseri fu sani. A no musu de so dan, taki wi musu libi na wan fasi di e gi wi Mekiman prèise? Paulus ben abi a srefi sani na prakseri, di a ben skrifi: „Awansi unu e nyan, noso unu e dringi, noso unu e du iniwan tra sani, du ala sani fu gi Gado glori.”—1 Korentesma 10:31.
11 Wi sa du ala sani gi a glori fu Yehovah efu wi trutru lobi en. Yesus ben taki dati a fosi komando na disi: „Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan èn nanga ala yu krakti” (Markus 12:30; Deuteronomium 6:5). Fu tru, wi musu lobi Yehovah èn wi musu prèise en leki wi Mekiman èn leki a Giman fu „ibri bun presenti nanga ibri volmaakti kado” (Yakobus 1:17; Yesaya 51:13; Tori fu den Apostel 17:28). Te yu e luku en bun, dan wi musu lobi èn prèise Yehovah, fu di a man di wi man rideneri fu sani, a man di wi man frustan yeye afersi, èn a krakti di wi abi na skin fasi — ala den eigifasi fu wi èn ala den sani di wi man du — e kon fu Yehovah. Leki wi Mekiman, a warti taki wi lobi en èn taki wi prèise en.
12. Fa yu e feni den bigi sani di Yehovah du, èn fa yu e feni den wortu fu Psalm 40:5?
12 Den bigi sani di Yehovah du e gi wi bun furu reide fu lobi en èn fu prèise en! „Furu sani yusrefi du, o Yehovah, mi Gado, srefi den wondruwroko fu yu èn den prakseri fu yu gi wi”, na so David ben singi. „No wan sma de leki yu. Te mi ben sa wani fu fruteri èn taki fu den wondruwroko fu yu, den kon de so furu, moro leki mi man fruteri” (Psalm 40:5). David no ben kan taki fu ala den wondruwroko fu Yehovah, èn wisrefi no kan du dati tu. Ma meki wi prèise Gado ala ten, ibri leisi te wan sma e taki nanga wi fu den bigi sani di Gado du.
Sani Di Gado Du èn Di Abi fu Du Nanga En Têgo Prakseri
13. San a howpu fu wi abi fu du nanga den bigi sani di Gado du?
13 A howpu di wi abi gi a tamara, abi fu du nanga den bigi sani di Gado du èn di wi musu prèise en gi dati. Den sani disi di Gado du, abi fu du so srefi nanga en têgo prakseri. Baka na opruru na ini Eden, dan Yehovah gi a fosi profeititori di ben gi sma howpu. Di Gado ben krutu a sneki, a ben taki: „Mi sa poti feantifasi na mindri yu nanga na uma èn na mindri yu siri nanga en siri. A sa masi yu na a ede èn yu sa masi en na a bakafutu” (Genesis 3:15). Yehovah ben du wan bigi sani di a ben frulusu Noa nanga en osofamiri di a ben tyari a Frudu kon, pe a ben figi a heri ogri grontapu puru. Srefi baka di a du dati, dan a howpu tapu a pramisi Siri fu na uma ben tan de na ini na ati fu den getrow libisma (2 Petrus 2:5). Yehovah ben sori moro fara san a ben o du nanga yepi fu a Siri dati, fu di a ben gi den man di ben sori bribi soleki Abraham nanga David, profeititori di abi fu du nanga a pramisi Siri.—Genesis 22:15-18; 2 Samuèl 7:12.
14. San na a moro bun eksempre fu den bigi sani di Yehovah du gi a libisma famiri?
14 A moro bun fasi fa Yehovah sori taki en na a sma di e du bigi sani gi a libisma famiri, ben de di a ben gi en wan-enkri gebore Manpikin — a pramisi Siri, Yesus Krestes — leki wan frulusu-ofrandi (Yohanes 3:16; Tori fu den Apostel 2:29-36). A lusu-paiman ben de a sani di ben meki taki sma ben kan kon bun baka nanga Gado (Mateus 20:28; Romesma 5:11). Yehovah ben tyari den fosi sma di ben kon bun baka nanga en, makandra na ini a Kresten gemeente di ben seti na a Pinksterfesa na ini 33 G.T. Nanga yepi fu a santa yeye, den sma disi ben preiki a bun nyunsu na ala presi. Den ben sori sma fa a dede nanga na opobaka fu Yesus e meki taki a libisma famiri di e gi yesi, kan kisi têgo blesi na ondro a tiri fu Gado en hemel Kownukondre.
15. Fa Yehovah handri na wan fruwondru fasi na ini a ten fu wi?
15 Na ini a ten fu wi, Yehovah handri na wan fruwondru fasi fu tyari den lasti salfu Kresten kon na wan. A ben hori den winti di sa tyari pori kon, fu meki a fikapisi fu den 144.000 di sa tiri nanga Krestes na ini hemel, kisi wan lakstampu (Openbaring 7:1-4; 20:6). Gado sorgu taki den salfu Kresten ben kon fri fu katibo na yeye fasi na „Babilon a Bigiwan”, a grontapumakti fu falsi bribi (Openbaring 17:1-5). Den salfuwan ben kon fri na ini 1919, èn sensi a ten dati den ben kisi kibri fu Gado. San den ben man du fu dati ede? Den ben man skèin leki sma di e gi wan lasti kotoigi, bifo Yehovah e tyari wan kaba kon na a ogri seti fu sani fu Satan, na ini a „bigi banawtu” di sa kon heri esi.—Mateus 24:21; Danièl 12:3; Openbaring 7:14.
16. San e pasa leki bakapisi fu a Kownukondre preikiwroko di e du na ini a ten disi èn di e du na heri grontapu?
16 Den salfu Kotoigi fu Yehovah teki fesi fayafaya na ini a Kownukondre preikiwroko di e du na heri grontapu. Leki bakapisi fu dati, moro nanga moro „tra skapu” e tron anbegiman fu Yehovah now (Yohanes 10:16). Wi e prisiri fu di den safri-atiwan fu grontapu abi na okasi ete fu moksi densrefi nanga wi fu prèise Yehovah. Den wan di e teki a kari fu „kon”, kan kisi frulusu te a bigi banawtu e kon, èn den abi a howpu fu prèise Yehovah fu têgo.—Openbaring 22:17.
Dusundusun Sma E Kon na a Tru Anbegi
17. (a) Fa Yehovah e du bigi sani di abi fu du nanga wi preikiwroko? (b) Fa Sakaria 8:23 e kon tru?
17 Yehovah e du bigi sani now di abi fu du nanga wi preikiwroko. Wi trutru musu prèise en gi den sani disi di a e du (Markus 13:10). Na ini den yari di no pasa so langa ete, dan A ’opo bigi doro di e tyari go na aktiviteit’ (1 Korentesma 16:9). Disi meki taki a bun nyunsu ben man preiki na bun furu presi pe feanti fu a waarheid ben tapu a wroko fosi. Furu sma di ben libi ini dungru na yeye fasi fosi, e teki a kari now fu anbegi Yehovah. Den e meki den profeiti wortu disi kon tru: „Disi na san Yehovah fu den legre taki: ’A sa de na ini den dei dati, taki tin man fu ala tongo fu den nâsi sa grabu hori, iya, fu tru den sa grabu hori a mofokanti fu a krosi fu wan man di de wan Dyu, èn taki: „Wi wani go nanga unu, fu di wi yere taki Gado de nanga unu” ’” (Sakaria 8:23). Den sma di den tin man e taki nanga den de Dyu na yeye fasi, èn na ini a ten disi den na a fikapisi fu den salfu Kresten. A nomru tin kan prenki wan sani na grontapu di no e mankeri noti. So bun, dan den „tin man” e prenki a „bigi ipi” di tyari kon makandra nanga „na Israèl fu Gado”. Makandra den e tron „wan ipi” (Openbaring 7:9, 10; Galasiasma 6:16). A de wan prisiri fu si so furu sma e du santa diniwroko makandra leki anbegiman fu Yehovah Gado!
18, 19. Sortu buweisi wi abi taki Yehovah e blesi a preikiwroko?
18 Wi e prisiri trutru taki tin dusundusun sma — iya, srefi hondro dusundusun — e teki a tru anbegi na ini kondre pe falsi bribi ben abi furu krakti wan ten. Fu dati ede, a ben gersi neleki noiti den sma ben o teki a bun nyunsu. Luku na ini a nyun Jaarboek van Jehovah’s Getuigen, pe yu e si den kondre di abi 100.000 preikiman. Yu e si kondre so srefi di abi pikinmoro 1.000.000 Kownukondre preikiman. Disi na wan krakti buweisi taki Yehovah e blesi a Kownukondre preikiwroko.—Odo 10:22.
19 Leki a pipel fu Yehovah, wi e prèise wi hemel Tata èn e taki en tangi taki a gi wi wan trutru marki na ini a libi. A gi wi so srefi en diniwroko di e gi wi prisiri, èn nanga frutrow wi e luku go na fesi na a ten di e kon. Wi e libi nanga a fayafaya fruwakti taki ala den pramisi fu Gado sa kon tru, èn wi abi a fasti bosroiti fu ’tan na ini a lobi fu Gado, nanga têgo libi na prakseri’ (Yudas 20, 21). Wi e prisiri fu si taki, a bigi ipi di e prèise Gado, abi so wan 6.000.000 sma now! A de krin fu si taki Yehovah blesi a salfu fikapisi makandra nanga den tra skapu, fu di den orga now na ini so wan 91.000 gemeente na ini 235 kondre. Wi alamala e kisi bun nyanyan na yeye fasi fu di a „getrow èn koni srafu” e wroko sondro fu kon weri (Mateus 24:45). Wan theokrasia organisâsi di e go na fesi moro nanga moro èn di abi sma di e gi tiri na wan lobi-ati fasi, e teki fesi na ini a Kownukondre diniwroko nanga yepi fu 110 bijkantoro fu Yehovah Kotoigi. Wi de nanga tangi na ati taki Yehovah gi a pipel fu en deki-ati fu ’gi en grani nanga den warti sani fu den’ (Odo 3:9, 10). So bun, wi e tan du wi preikiwroko na heri grontapu, èn te a de fanowdu dan wi e bow presi fu meki publikâsi, Bethel-oso nanga zendeling-oso, Kownukondre zaal, nanga Kongreshal.
20. Fa a prakseri di wi e prakseri fu den bigi sani di Yehovah du èn di wi musu prèise en gi dati, musu abi krakti na wi tapu?
20 Wi no man taki fu ala den bigi sani di wi hemel Tata du èn di wi musu prèise en gi dati. Ma iniwan sma di abi wan opregti ati ben sa kan hori ensrefi fu no prèise Yehovah makandra nanga na ipi-ipi sma di e du dati kaba? Kwetikweti! Fu dati ede, meki ala sma di lobi Gado bari nanga prisiri: „Unu musu prèise Yah! Prèise Yehovah na ini hemel, prèise en na den heipresi. Prèise en, ala den engel fu en . . . , un yonkuman nanga un nyunwenke tu, un owru man makandra nanga den boi. Meki den prèise a nen fu Yehovah, bika en nen wawan hei srefisrefi. A wartifasi fu en hei moro grontapu nanga hemel” (Psalm 148:1, 2, 12, 13). Iya, meki wi prèise Yehovah gi den bigi sani di a du, now èn fu têgo!
Fa Yu Ben Sa Piki?
• San na wan tu sani di Yehovah du di wi musu prèise en gi dati?
• Fu san ede yu wani prèise Yehovah?
• San a howpu fu wi abi fu du nanga den bigi sani di Gado du?
• Fa Yehovah e du sani di wi musu prèise en gi dati èn di abi fu du nanga a Kownukondre preikiwroko?
[Aksi fu a tori disi]
[Prenki na tapu bladzijde 10]
Yu e singi prèisesingi gi Yehovah nanga yu heri ati, makandra nanga trawan?
[Prenki na tapu bladzijde 13]
Wi e prisiri taki na okasi de ete gi den safri-atiwan fu kon makandra nanga wi fu prèise Yehovah