Wi E Kisi Tiri fu Gado te Wi E Teki wan Trowpatna
Wi E Kisi Tiri fu Gado te Wi E Teki wan Trowpatna
„Mi sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu.”—PSALM 32:8.
1. Sortu sani prenspari fu abi wan trowlibi di e waka bun?
DEN dronman e bigin naki na tapu den dron fu den. Dan na a yoisti momenti wan uma e bigin singi nanga wan heri moi sten. A bakapisi de taki yu e yere poku di moi srefisrefi. Tu mansma e puru hebi karton dosu fu wan bigi truck. A wan man e fringi dosu go gi a tra man di e yepi en. A tra man e fanga wan dosu sondro muiti, èn a e wakti fu fanga wan trawan. Ala den tu sani disi gersi leki den de makriki fu du. Ma no wan sma ben o pruberi fu du den sani dati sondro taki a ben oefen bun, sondro taki a abi wan bun patna, èn moro prenspari srefi, sondro bun tirilin. Na so a de tu nanga wan bun trowlibi. A kan gersi leki a e go bun sondro taki den trowpatna abi fu du furu muiti. Ma efu den wani taki a trowlibi waka bun, dan den musu de bun patna, den musu wroko makandra na wan bun fasi, èn moro prenspari srefi, den musu arki koni rai. A no de fu taki, dati a de prenspari fu abi den yoisti tirilin.
2. (a) Suma seti a trowlibi, èn nanga sortu marki? (b) Fa sma ben seti sani son leisi, so taki tu sma ben kan trow nanga makandra?
2 A de wan aladei sani, taki wan yonkuman noso wan yongu uma di no trow, e prakseri taki a wani wan sma di a kan trow nanga en. Sensi a ten di Yehovah Gado seti a trowlibi, dan a tron wan aladei sani taki wan man nanga wan uma e trow nanga makandra. Ma a fosi man Adam, no ben teki en wefi ensrefi. Na wan lobi-ati fasi Yehovah ben gi en wan wefi (Genesis 2:18-24). A ben abi na prakseri taki a fosi trowpaar ben musu meki pikin, so taki baka ten grontapu ben o kon furu nanga libisma. Baka a fosi trow dati, dan furutron a papa nanga a mama fu a trowmisi nanga a trowmasra ben e suku wan trowpatna gi den. Son leisi den ben du dati, baka di ala sma di ben abi fu du nanga a tori ben agri nanga makandra (Genesis 21:21; 24:2-4, 58; 38:6; Yosua 15:16, 17). Ala di a e pasa furu ete na ini son kondre èn na ini son kulturu, taki sma e suku trowpatna gi trawan, toku na ini a ten disi furu sma de di e teki wan trowpatna densrefi.
3. Fa wan sma musu teki wan trowpatna?
3 Fa wan sma musu teki wan trowpatna? Son sma e luku a moi fesi nomo fu wan tra sma. Den e luku san e fiti ai. Trawan e luku san den kan kisi na moni sei. Den e suku wan sma di sa sorgu den bun èn di sa gi den ala san den abi fanowdu èn san den wani. Ma iniwan fu den fasi disi fu suku wan trowpatna, sa meki taki wan sma sa abi wan koloku trowlibi di sa gi en satisfaksi? „Moifasi kan de wan bedrigi sani, èn moi skin kan de wan soso sani”, na so Odo 31:30 e taki, „ma na uma di e frede Yehovah, na a wan di e kisi prèise gi ensrefi.” A tekst disi e taki wan prenspari sani: Aksi Yehovah rai te yu wani teki wan trowpatna.
Lobi-ati Tirilin fu Gado
4. Sortu yepi Gado e gi te wi wani teki wan trowpatna?
4 Wi lobi-ati hemel Tata, Yehovah, gi wi en Wortu di skrifi so taki a kan tiri wi na ini ala sani. A e taki: „Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka” (Yesaya 48:17). Fu dati ede a no musu fruwondru wi, te wi e feni tirilin na ini Bijbel di e wroko bun ala ten èn di e sori wi fa fu teki wan trowpatna. Yehovah wani taki a trowlibi fu wi musu tan wan langa pisi ten èn taki a musu de wan koloku trowlibi. Fu dati ede, a gi wi yepi fu frustan den tirilin disi èn fu fiti den na ini wi libi. A no dati wi ben sa fruwakti fu wi lobi-ati Mekiman?—Psalm 19:8.
5. San de prenspari srefisrefi efu wan sma wani tan de koloku na ini a trowlibi?
5 Di Yehovah ben seti a trowlibi, dan a ben abi na prakseri taki a ben musu de wan sani di musu tan fu ala ten (Markus 10:6-12; 1 Korentesma 7:10, 11). Fu dati ede „a no wani si brokotrow na ai”. A e gi pasi fu sma brokotrow, soso te den du „hurudu” (Maleaki 2:13-16; Mateus 19:9). Fu dati ede, a teki di wi e teki wan trowpatna, na wan fu den moro seryusu sani di wi kan du, èn wi no musu abi wan mi-no-ke fasi ini a tori disi. Furu tra bosroiti no de di wi kan teki na ini a libi di abi so wan bigi krakti na wi tapu; a bosroiti disi kan meki wi kon de koloku noso a kan meki wi sari. Te wan sma e teki wan bun trowpatna, dan a kan meki en libi kon moro koloku èn a kan kisi satisfaksi. Ma na a tra sei, te wan sma no e gebroiki koni te a e teki wan trowpatna, dan a bosroiti dati kan meki en sari en heri libi langa (Odo 21:19; 26:21). Efu wi wani tan de koloku, dan a prenspari srefisrefi fu handri nanga koni te wi e teki wan trowpatna. Wi musu de klariklari fu du wan pramisi tu di sa tan wi heri libi langa, bika Gado ben seti a trowlibi gi tu patna di ben o de ini wánfasi nanga makandra èn di ben o wroko makandra.—Mateus 19:6.
6. Fu san ede yonkuman nanga yongu uma spesrutu musu luku bun te den e teki wan trowpatna, èn fa den kan teki a moro koni bosroiti?
6 Yonkuman nanga yongu uma musu luku bun spesrutu taki a moi fesi fu wan sma èn tranga lostu, no e breni den te den o teki wan trowpatna. A tru taki wan trowlibi di sma e bow tapu so wan fondamenti, kan meki taki heri esi den tu sma disi sa wisiwasi makandra noso den no sa wani si makandra na ai moro (2 Samuèl 13:15). Na a tra sei, a lobi fu wi gi a tra sma e tan gro te wi kon sabi wi trowpatna moro bun èn te wi kon sabi wisrefi moro bun tu. Wi musu kon frustan tu taki, a sani di moro bun gi wi, no abi fu de san wi ati wani na ini a bigin kande (Yeremia 17:9). Fu dati ede a tiri di e kon fu Gado èn di wi e feni na ini Bijbel, prenspari srefisrefi. A e gi wi a koni fu man si krin fa wi kan teki den moro bun bosroiti na ini a libi. A psalm skrifiman ben taki gi Yehovah, di a ben taki: „Mi sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu” (Psalm 32:8; Hebrewsma 4:12). Ala di a trowlibi kan satisferi a wani di wi wani taki tra sma lobi wi èn a wani di wi wani abi mati, toku a kan tyari problema kon tu. Fu lusu den problema dati, wi musu de lepi èn wi musu abi a koni fu man si sani krin.
7. Fu san ede son sma no e teki a rai di e kon fu Bijbel ini a tori fu a teki di sma e teki wan trowpatna, èn san kan de a bakapisi fu disi?
7 A de wan koni sani fu poti prakseri na san a Sma di seti a trowlibi, abi fu taki ini a tori fu a teki di wan sma e teki wan trowpatna. Ma kande wi no wani arki srefisrefi te wi papa nanga mama noso den Kresten owruman, e gi wi rai di e kon fu Bijbel. Kande wi feni taki den no e frustan wi krinkrin. Èn den tranga firi di wi abi inisei fu wi kan meki wi fu du san wi ati wani. Ma baka wan pisi ten, te wi e ondrofeni fa sani e waka na ini a libi trutru, dan kande wi sa sari srefisrefi taki wi no ben arki a koni rai di sma gi wi so taki sani kan go bun nanga wi (Odo 23:19; 28:26). Dati meki wi kan kon de na ini wan trowlibi pe lobi no de moro, nanga pikin di wi no man sorgu, èn kande nanga wan trowpatna srefi di no de na bribi. A trutru ben o de wan sari sani efu a seti fu a trowlibi, di ben sa kan gi wi furu koloku, o tron wan sani di e gi wi furu broko-ede!
A De Tumusi Prenspari Taki Sma E Gi Densrefi fu Dini Gado
8. Fa a gi di wi e gi wisrefi fu dini Gado, kan yepi fu meki a trowlibi tan èn fu tyari koloku kon?
8 A tru taki, te tu sma lobi makandra, dan dati e yepi fu meki a trowlibi kon moro tranga. Ma te den tu sma abi den srefi markitiki, dan dati de moro prenspari srefi fu a wánfasi na ini a trowlibi kan tan èn fu den kan feni koloku. A gi di den ala tu e gi densrefi fu dini Yehovah Gado, e meki taki den o abi wan matifasi di e tan. Dati o meki taki den o de wán, èn no wan tra sani de, di o meki den abi so wan banti nanga makandra (Preikiman 4:12). Te wan Kresten trowpaar e meki a tru anbegi fu Yehovah de a moro prenspari sani na ini den libi, dan den kon de wán na yeye fasi, na frustan sei, èn na a sei fu bun gwenti nanga gronprakseri. Den e studeri Gado Wortu makandra. Den e begi makandra, èn dati e meki den kon de wán. Makandra den e go na den Kresten konmakandra èn den e wroko makandra na ini a preikiwroko. Ala den sani disi e yepi den fu de wán na ini bribi, èn den e tron moro bun mati fu makandra. Ma a moro prenspari sani de, taki den sa kisi a blesi fu Yehovah.
9. San Abraham ben du di a ben musu suku wan wefi gi Isak, èn san ben de a bakapisi?
9 Abraham ben de wan getrow famiri-edeman. Fu di a ben gi ensrefi fu dini Gado, meki a ben suku fu du san Gado wani, di a ben musu teki wan wefi gi en manpikin Isak. Abraham ben taigi en futuboi di a ben frutrow: „Mi musu meki yu sweri na Yehovah, a Gado fu hemel èn a Gado fu grontapu, taki yu no sa teki wan wefi gi mi manpikin komopo fu den umapikin fu den Kanansma, di mi e libi na den mindri, ma yu sa go na mi kondre èn na den famiri fu mi, èn yu sa musu teki wan wefi gi mi manpikin, gi Isak. . . . [Yehovah] sa seni en engel go na yu fesi, èn fu tru yu sa teki wan wefi fu drape gi mi manpikin.” A ben kon na krin taki Rebeka ben de wan heri bun uma, èn Isak ben lobi en trutru.—Genesis 24:3, 4, 7, 14-21, 67.
10. Soleki fa Bijbel e sori, dan sortu plekti masra nanga wefi abi?
10 Efu wi na Kresten di no trow, dan a gi di wi e gi wisrefi fu dini Gado sa yepi wi fu kisi eigifasi di sa meki taki wi man doro den markitiki di Bijbel e gi ini a tori fu trowlibi. Na apostel Paulus e kari wan tu plekti di masra nanga wefi abi: „Meki den wefi saka densrefi na den masra fu den ondro neleki na Masra . . . Masra, tan lobi a wefi fu unu, neleki fa Krestes ben lobi a gemeente tu èn ben gi ensrefi abra gi en . . . Den masra musu lobi den wefi fu den leki den eigi skin . . . Meki so srefi ibriwan fu unu aparti lobi en wefi soleki fa a lobi ensrefi; na a tra sei, a wefi musu abi bigi lespeki gi en masra” (Efeisesma 5:22-33). Soleki fa wi kan si, dan den wortu fu Paulus di a ben skrifi na ondro a krakti fu santa yeye, e sori krin taki lobi nanga lespeki de fanowdu. Efu wi wani fiti a rai disi na ini wi libi dan a wani taki, dati wi musu abi lespeki frede gi Yehovah. Wi musu fruplekti wisrefi fu tan nanga makandra, na ini bun ten èn na ini takru ten. Kresten di e prakseri fu trow, musu man teki a frantwortu disi.
Sabi O Ten Yu E Teki a Bosroiti fu Trow
11. (a) Sortu rai den Buku fu Bijbel e gi ini a tori fu o ten wan sma musu trow? (b) Sortu eksempre e sori taki a de wan koni sani fu waka baka a Bijbel rai di skrifi na 1 Korentesma 7:36?
11 A prenspari srefisrefi fu sabi o ten wi de klariklari fu trow. Fu di ibri sma e difrenti fu wan tra sma, meki den Buku fu Bijbel no e poti wan spesrutu libimarki o ten wan sma musu trow. Ma Bijbel e sori taki a moro bun fu wakti te leki wi ’pasa a bromki fu wi yongu yari’. Dati na den yari te tranga seks firi kan meki taki wi no e krutu sani bun (1 Korentesma 7:36). „Di mi ben si taki den mati fu mi ben meki mofo èn taki den ben trow, ala di furu fu den ben de tini ete, dan son leisi a ben muilek gi mi fu fiti a rai disi na ini mi libi”, na so Michelle e taki. „Ma mi kon frustan taki a rai e kon fu Yehovah, èn a e taigi wi soso den sani di de gi a bun fu wi. Ala di mi ben e wakti fu trow, dan mi ben abi na okasi fu poti prakseri na mi matifasi nanga Yehovah èn fu kisi pikinso ondrofeni na ini a libi. Disi na wan sani di yu no kan kisi kwetikweti na ini yu tini yari. Wan tu yari baka dati, mi ben sreka moro bun fu teki den frantwortu èn so srefi den problema di e kon na ini a trowlibi.”
12. Fu san ede a de wan koni sani fu no trow esi-esi te yu yongu ete?
12 Den wan di e trow esi-esi ala di den yongu tumusi, furutron e si taki den sani di den abi fanowdu èn den sani di den wani, e kenki te den e kon moro lepi. Dan den e kon si taki den sani di den ben wani fosi, no de so prenspari moro. Wan yongu Kresten sisa ben wani trow nomonomo di a ben abi 16 yari. En granmama ben trow di a ben abi a yari dati, èn so srefi en mama ben du dati. Di wan yonkuman di a ben lobi, no ben wani trow nanga en na a ten dati, dan a sisa teki wan tra sma di ben wani du dati. Ma baka ten, a ben sari srefisrefi fu a bosroiti di a ben teki tumusi esi.
13. Sortu sani den wan di e trow tumusi fruku, no abi?
13 Te yu e prakseri fu trow, dan a de prenspari taki yu e frustan heri bun san na ala den sani di abi fu du nanga a trowlibi. Te sma e trow fosi den lepi fu teki a frantwortu dati, dan den kan kisi furu problema. Kande wan yongu trowpaar no de srekasreka ete fu lusu den problema disi. Kande den no abi ondrofeni ete èn den no de lepi nofo fu lusu den problema na ini a trowlibi èn fu sorgu pikin. Wi musu trow soso te wi de klariklari na skin sei, na frustan sei, èn na yeye fasi fu man bigin nanga wan trowlibi di o tan wan langa ten.
14. San de fanowdu fu lusu problema na ini a trowlibi?
14 Paulus ben skrifi taki den wan di e trow „sa ondrofeni kwinsi ini a skin” (1 Korentesma 7:28). Den sa kisi problema fu di den na tu difrenti sma, èn a fasi fa den e si sani, sa difrenti tu. Fu di wi no de volmaakti, meki a kan de wan muilek sani fu du san Bijbel e taki, te wi de na ini a seti fu a trowlibi (1 Korentesma 11:3; Kolosesma 3:18, 19; Titus 2:4, 5; 1 Petrus 3:1, 2, 7). Wan sma musu de lepi èn a musu de tranga na yeye fasi te a wani suku a rai fu Gado èn waka baka dati. Na so fasi a sa man lusu problema na wan lobi-ati fasi.
15. Fa papa nanga mama kan sreka den pikin fu den gi a trowlibi? Gi wan eksempre.
15 Papa nanga mama kan sreka den pikin fu den gi a trowlibi te den e yepi den fu frustan o prenspari a de fu waka baka a rai fu Gado. Te papa nanga mama e gebroiki den Buku fu Bijbel nanga den Kresten publikâsi na wan bun fasi, dan den kan yepi den pikin fu den fu bosroiti efu den, noso den sma di o tron a trowpatna fu den, de klariklari fu meki a pramisi fu trow. * Blossom, di abi tina-aiti yari, ben denki taki a ben lobi wan yonkuman na ini a gemeente fu en. A yonkuman ben de wan furuten pionier dinari, èn den ben wani trow. Ma a papa nanga mama fu Blossom ben aksi en fu wakti wán yari, bika den ben feni taki a ben yongu ete. Baka ten Blossom ben skrifi: „Mi de nanga tangi na ati srefisrefi taki mi arki a koni rai dati. Na ini a pisi ten fu wan yari, mi ben kon lepi pikinso èn mi kon si taki a yonkuman disi no ben abi den eigifasi di sa meki en de wan bun trowpatna gi mi. Te fu kaba, a libi na organisâsi èn mi ben wai pasi gi wan sani di ben o de wan rampu na ini mi libi. A de wan tumusi moi sani fu abi papa nanga mama di kan teki koni bosroiti èn di yu kan frutrow!”
’Trow Soso na ini Masra’
16. (a) Fa a kan de wan tesi gi Kresten te a abi fu du nanga ’a trow di den musu trow na ini Masra’? (b) Te Kresten wani trow nanga wan sma di no de na bribi, dan sortu sani den musu prakseri?
16 A rai di Yehovah e gi Kresten, de krin fu frustan: ’Trow soso na ini Masra’ (1 Korentesma 7:39). Disi kan de wan tesi gi Kresten papa nanga mama, nanga den pikin fu den. Fa so? Kande yongu sma wani trow, ma kande sma no de fu feni na ini a gemeente di den kan trow nanga den. Ma dati no de so; a gersi nomo leki sma no de. Kande furu mansma no de, ma moro umasma de na ini wan spesrutu presi, noso kande den no e si no wan sma di den feni bun na ini a kontren fu den. Wan yonkuman di no de wan dopu memre fu a gemeente kande e sori taki a lobi wan yongu Kresten uma (noso wan yongu uma e sori taki a lobi wan yongu Kresten man), èn kande a yongu Kresten uma nanga a papa nanga a mama fu en, kan firi taki a no de so prenspari fu hori densrefi na den markitiki di Yehovah poti. Te so wan sani pasa, dan a bun fu luku na eksempre fu Abraham. Wan sani di ben meki a tan hori a bun matifasi di a ben abi nanga Gado, ben de fu di a ben sorgu taki en manpikin Isak ben trow nanga wan sma di trutru ben anbegi Yehovah. Isak ben du a srefi sani gi en manpikin Yakob. Ala sma di ben abi fu du nanga a tori ben meki muiti, ma den ben plisi Gado èn a bakapisi ben de, taki a ben blesi den.—Genesis 28:1-4.
17. Fu san ede a trow di sma e trow nanga trawan di no de na bribi, kan abi takru bakapisi, èn san na a moro prenspari reide fu ’trow soso na ini Masra’?
17 Sontron a sma di no ben de na bribi, tron wan Kresten te fu kaba. Ma a trow di sma trow nanga trawan di no de na bribi, ben abi takru bakapisi furutron. Sma di no de na ondro a srefi tyatyari no e bribi den srefi sani, den no e hori densrefi na den srefi gronprakseri, noso den no abi den srefi marki na ini a libi (2 Korentesma 6:14). Disi kan pori a komunikâsi di den tu sma musu abi na ini a trowlibi èn a kan meki taki den no sa de koloku. Fu eksempre, wan Kresten uma ben firi sari srefisrefi taki, baka wan konmakandra di ben gi en deki-ati, a no ben kan go na oso fu taki fu yeye afersi nanga en trowpatna di no ben de na bribi. Ma moro prenspari srefi, a ’trow di wi e trow na ini Masra’ abi fu du nanga a tan di wi musu tan loyaal na Yehovah. Te wi e du san a Wortu fu Gado e taki, dan na ati fu wi no e krutu wi, bika wi e du den sani ’di bun na ini Gado ai’.—1 Yohanes 3:21, 22.
18. Te wan sma e prakseri fu trow, dan na sortu prenspari sani a musu poti prakseri èn fu san ede?
18 Te wi e prakseri fu trow, dan a bunfasi nanga a yeyefasi fu a sma di wi o trow nanga en, musu de a moro prenspari sani gi wi. Kresten eigifasi, lobi gi Gado èn a gi di wan sma e gi ensrefi nanga en heri ati fu dini Gado, na sani di warti moro leki a moi fesi fu wan sma. Trowpatna abi a plekti fu de tranga na yeye fasi. Den wan di e frustan disi èn e du en tu, e kisi a bun-ati fu Gado. Èn wan trowlibi kan kon moro tranga te ala tu sma e gi densrefi fu dini a Mekiman, èn te den e teki a tiri fu en na ini ala sani. Na so fasi Yehovah e kisi grani, èn a trowlibi e bigin na tapu wan steifi fondamenti na yeye fasi. Disi sa yepi taki a trowlibi fu den sma dati sa tan go doro.
[Futuwortu]
^ paragraaf 15 Luku A Waktitoren fu 15 februari 1999, bladzijde 4-8.
San Yu Ben Sa Piki?
• Fu san ede wi abi a tiri fu Gado fanowdu fu teki wan bun trowpatna?
• Fa a gi di wi e gi wisrefi fu dini Gado, sa yepi fu meki a banti na ini a trowlibi kon moro tranga?
• Fa papa nanga mama kan sreka den pikin fu den gi a trowlibi?
• Fu san ede a prenspari fu ’trow soso na ini Masra’?
[Aksi fu a tori disi]
[Prenki na tapu bladzijde 17]
Te yu e waka baka a rai fu Gado te yu e suku wan trowpatna, dan yu kan kon de koloku srefisrefi
[Prenki na tapu bladzijde 18]
Yu sa kisi furu blesi te yu e ’trow soso na ini Masra’