Frutrow Tapu Yehovah Moro Nanga Moro

Den span anu makandra fu si fa den o kiri a man. Ala den hei tiriman fu a kondre kon makandra. Den prakseri fu poti wan nyun wet. A wet dati ben musu taki dati te wan sma e anbegi wan gado di a Tirimakti no feni bun, dan a sma dati musu kisi dede leki strafu.

UNU sabi a tori disi? Fositen tori e gi furu eksempre fu sma di ben meki wet fu suku fu du ogri noso krutu tra sma di no abi fowtu srefi. A tori di skrifi na a bigin fu na artikel, ben feni presi na ini a Gran Kownukondre Persia na ini a ten fu a profeiti Danièl. A wet, di Kownu Darius ben meki, ben taki krin: „A sma di dritenti dei langa e begi na iniwan gado noso libisma, boiti na yu wawan, o kownu, den musu trowe en go na ini a lew-olo.”—Danièl 6:7-9.

San Danièl ben o du di a sabi taki a ben kan lasi en libi? A ben o tan frutrow tapu a Gado fu en, Yehovah, fu di a e hori ensrefi tranga na den gronprakseri fu Gado, na presi fu du san a kownu ben komanderi? A tori e fruteri wi: „Ma so esi leki Danièl ben kon sabi taki a kownu ben poti en nen na ondro san ben skrifi, a ben go na ini en oso, èn ala di den fensre fu en daki-kamra ben opo gi en na a sei pe Yerusalem de, a ben saka kindi srefi dri tron wan dei èn ben e begi èn ben e prèise en Gado, soleki fa a ben gwenti du disi na fesi kaba” (Danièl 6:10). Wi sabi heri bun fa a tori ben go moro fara. Den sma ben trowe Danièl na ini a lew-olo fu en bribi ede, ma Yehovah „ben tapu den mofo fu lew” èn ben frulusu a loyaal futuboi fu en.—Hebrewsma 11:33; Danièl 6:16-22.

 Wi Musu Ondrosuku Wisrefi

Na ini a ten disi, den futuboi fu Yehovah e libi na ini wan grontapu pe sma abi feantifasi. Den e miti someni sani di kan du den ogri na skin sei èn di kan pori a yeyefasi fu den. Fu eksempre, fu di ogri-ati feti broko na ini wan tu kondre bika sma abi bita-ati gi sma fu tra ras, meki furu Kotoigi lasi den libi. Na tra presi, den futuboi fu Yehovah no ben abi nofo nyanyan, den ben kisi fu du nanga problema na ekonomia sei, naturu rampu, hebi siki, nanga tra situwâsi di ben kan meki den lasi den libi. Boiti dati, den ben kisi frufolgu, problema na wrokope, èn difrenti tesi fu du sani di no bun. Ala den sani disi ben sa kan pori a yeyefasi fu den. Iya, a bigi Gensman, Satan, abi a fasti bosroiti fu pori den futuboi fu Yehovah èn a e du ala san a man fu du dati.—1 Petrus 5:8.

San wi kan du te wi e kisi fu du nanga den situwâsi disi? Leki libisma wi e kon frede te wi sabi taki wi ben kan lasi wi libi, ma wi kan hori den wortu fu na apostel Paulus na prakseri di e gi deki-ati: „[Yehovah] taki: ’Mi no sa gowe libi yu kwetikweti, èn noiti mi no sa drai mi baka gi yu.’ So taki wi kan abi deki-ati èn taki: ’Yehovah na mi yepiman; mi no sa frede. San wan sma kan du mi?’” (Hebrewsma 13:5, 6) Wi kan abi a frutrow taki Yehovah e firi na a srefi fasi tu gi den futuboi fu en na ini a ten disi. Kande wi sabi san Yehovah pramisi, ma dati no wani taki ete dati wi e bribi trutru taki a sa yepi wi. Fu dati ede, a prenspari srefisrefi taki wi e ondrosuku san e meki wi frutrow tapu Yehovah. A prenspari srefisrefi tu taki wi e du ala san wi man fu meki a frutrow dati kon moro tranga èn fu tan abi a frutrow dati. Te wi e du dati, dan „a vrede fu Gado, di pasa ala suma frustan, sa kibri [wi] ati nanga [wi] prakseri na ini Krestes Yesus” (Filipisma 4:7). Te wi sa kisi tesi, dan wi sa man denki krin èn dati sa yepi wi fu handri na wan koni fasi.

Den Sani Di E Meki Wi Frutrow Tapu Yehovah

A tru taki someni sani e meki wi frutrow tapu wi Mekiman, Yehovah. A fosi sani di e meki wi frutrow tapu Yehovah, na taki a de wan lobi-ati Gado di trutru e sorgu gi den futuboi fu en. Bijbel e taki fu someni kefal pe Yehovah sorgu gi den futuboi fu en na wan lobi-ati fasi. Di Moses ben taki fa Yehovah ben handri na ini afersi di abi fu du nanga Israèl, a pipel di a ben teki, dan a ben skrifi: „A ben feni en na ini wan gran sabana èn na ini wan drei sabana di e bari krei èn pe no wan sma man libi. A ben bigin lontu en, fu sorgu gi en, fu kibri en neleki a ben de a popki fu en ai” (Deuteronomium 32:10). Na ini a ten fu wi, Yehovah e tan sorgu bun gi den futuboi fu en, gi ibriwan fu den aparti èn so srefi leki wan grupu. Fu eksempre, di son Kotoigi no ben abi nofo nyanyan srefisrefi na a ten di wan borgrufeti ben e feti na ini Bosnia, dan Yehovah ben sorgu taki den ben kisi ala san den ben abi tranga fanowdu. Yehovah ben du dati nanga yepi fu den brada fu den na ini Krowâsia nanga Oostenrijk. Den brada disi ben abi furu deki-ati srefisrefi fu go yepi den. Den ben sabi taki den ben kan lasi den libi. Toku den go na ini a kontren pe furu kefar ben de, fu tyari sani gi den brada fu den fu frulekti a nowtu fu den. *

Fu di Yehovah Gado de na Almaktiwan, meki a trutru abi a makti fu kibri den futuboi fu en na ini ala sortu situwâsi (Yesaya 33:22; Openbaring 4:8). Ma srefi te Yehovah e gi pasi meki wan tu fu den futuboi fu en sori getrowfasi te na dede, toku a e tan horibaka gi den èn a e yepi den fu hori a soifri retifasi fu den. Na so fasi den man tan getrow, tan abi prisiri nanga vrede na ini den ati te na a kaba. Fu dati ede, wi kan abi frutrow neleki a psalm skrifiman di ben taki: „Gado de wan kibripresi nanga wan krakti gi wi, wan yepi di de fu feni makriki na ini ten fu banawtu. Fu dati ede wi no sa frede, awinsi grontapu ben o kenki, èn awinsi den bergi ben o seki èn ben o sungu gowe na ini a bigi se.”—Psalm 46:1, 2.

Bijbel e tyari kon na krin tu taki Yehovah na wan Gado fu waarheid. Disi wani taki dati ala ten a e du soleki fa a pramisi. Fu taki en leti, Bijbel e sori taki en na wan Gado „di no man lei” (Titus 1:2). Yehovah ben taki ibritron baka taki a de klariklari fu kibri den futuboi fu en èn taki a wani frulusu den. Dati meki wi kan de seiker srefisrefi taki a no wawan abi a makti fu meki den pramisi fu en kon tru, ma so srefi taki a de klariklari fu du dati.—Yob 42:2.

 Fa Wi Kan Frutrow Tapu Yehovah Moro Nanga Moro

Furu sani de di e meki wi frutrow tapu Yehovah, ma wi no musu denki taki wi sa abi a frutrow dati ala ten. Disi de so bika moro furu sma na grontapu no e bribi na ini Gado, èn so wan denki kan meki wi lasi a frutrow di wi e frutrow tapu Yehovah. Fu dati ede wi musu meki furu muiti srefisrefi fu meki a frutrow dati kon moro tranga èn fu tan abi a frutrow dati. Yehovah sabi heri bun omeni muiti wi musu du, èn a e gi wi san wi abi fanowdu fu man du dati.

Na a fosi presi, a gi wi en Wortu, Bijbel, di e fruteri fu den furu makti sani di a ben du gi den futuboi fu en. Prakseri fu disi: yu kan frutrow wan sma trutru te yu sabi soso a nen fu en? Kande yu no ben sa abi furu frutrow na ini a sma dati, noso yu no ben sa frutrow en kwetikweti. Yu musu sabi a fasi fa a e du sani èn den wroko fu en fu man frutrow en, a no so? Te wi e leisi den Bijbel tori dati èn e denki dipi fu den, dan wi e kon sabi moro furu fu Yehovah èn fu den wondruwroko fu en. Moro nanga moro wi e kon frustan tu taki Yehovah na wan Gado di wi kan frutrow trutru. Na so fasi wi e kon frutrow en moro nanga moro. A psalm skrifiman ben gi wan tumusi moi eksempre di a ben taigi Gado na ini wan seryusu begi: „Mi sa memre den wroko fu Yah; bika mi sa memre den tumusi moi wroko di yu du sensi owruten. Èn seiker mi sa prakseri dipi fu ala yu wroko, èn mi sa prakseri furu fu a fasi fa yu e handri.”—Psalm 77:11, 12.

Boiti a Bijbel, wi e kisi furu nyanyan na yeye fasi tu na ini den Bijbel publikâsi di na organisâsi fu Yehovah e tyari kon na doro. Boiti tra sani, den publikâsi disi abi ondrofenitori na ini di e gi wi deki-ati. Den ondrofenitori disi e sori fa Gado sorgu taki den disiten futuboi fu en ben kisi yepi nanga frulekti, te tumusi muilek situwâsi ben miti den. Teki fu eksempre Martin Poetzinger, di ben tron wan memre fu a Tiri Skin fu Yehovah Kotoigi baka ten. A ben kon siki hebi di a ben dini leki pionier na ini kontren fu Europa di ben de farawe fu a kondre pe a komoto. A no ben abi moni èn no wan enkri datra ben wani yepi en. Ma Yehovah no ben gowe libi en. Te fu kaba, a ben meki kontakti nanga a moro prenspari datra na ini na ati-oso fu a presi pe a ben de. A man disi ben abi switifasi, èn a ben abi wan tranga bribi na ini Bijbel. A ben sorgu gi Brada Poetzinger neleki fa a ben o sorgu wan manpikin fu en èn a no ben aksi moni srefi. Te wi e leisi den ondrofenitori disi fu sma, dan dati trutru kan meki wi frutrow tapu wi hemel Tata moro nanga moro.

Wan tra prenspari yepisani di Yehovah e gi fu meki wi frutrow moro na en tapu, na a warti grani fu begi. Na apostel Paulus e fruteri wi na wan lobi-ati fasi: „No broko un ede nanga no wan sani, ma na ini ibriwan sani, meki Gado kon sabi san unu wani fu di unu e begi èn e aksi en tangitangi ala di unu e taigi en grantangi tu” (Filipisma 4:6). „Ibriwan sani” kan de den firi fu wi, den nowtu fu wi, den sani di e frede wi, èn so srefi sani di e gi wi broko-ede. Te wi e begi doronomo èn e du dati nanga wi heri ati, dan a frutrow di wi e frutrow tapu Yehovah sa kon moro tranga.

Di Yesus Krestes ben de na grontapu, dan son leisi en wawan ben go na wan presi pe no wan tra sma ben de, so taki a ben kan begi (Mateus 14:23; Markus 1:35). A ben begi en Tata wan heri neti srefi, bifo a ben teki prenspari bosroiti (Lukas 6:12, 13). A no de fu fruwondru taki Yesus ben frutrow so tranga tapu Yehovah, taki a ben man horidoro ondro den moro takru tesi di oiti wan sma kisi. Den lasti wortu san a taki di a ben de na a pina-udu, ben de: „Tata, na ini yu anu mi e poti mi yeye.” Den wortu dati ben sori taki te na a kaba a ben tan poti frutrow tapu en Tata, ala di Yehovah no du noti fu frulusu en fu a pina di a ben pina.—Lukas 23:46.

Ete wan tra sani di sa yepi wi fu frutrow tapu Yehovah moro nanga moro, na te wi e kon makandra doronomo nanga den wan di e frutrow na en  tapu nanga den heri ati. Yehovah ben gi en pipel a komando fu kon makandra doronomo, fu leri moro fu en èn fu gi makandra deki-ati (Deuteronomium 31:12; Hebrewsma 10:24, 25). Fu di den abi demakandra na so wan fasi, meki den tranga a frutrow di den e frutrow tapu Yehovah, èn dati ben yepi den fu horidoro ondro kefalek bigi tesi di den kisi fu a bribi ede. Na ini wan kondre na Afrika pe den ben tapu a preikiwroko, Yehovah Kotoigi no ben man kisi yepi fu skowtu te den ben abi dati fanowdu; efu den ben wani go na wan tra presi, dan den no ben man kisi papira fu gowe, den no ben man kisi trowpapira, datrayepi na ati-oso, èn den no ben man kisi wroko tu. Di wan borgrufeti broko na ini wan fu den kontren drape, dan 39 sma, so srefi pikin-nengre, fu wan gemeente di de krosibei, ben libi fo mun langa na ondro wan lagi broki na ini a drei sabana, bika sma ben trowe bom na ini a foto fu den. Na ini a tumusi muilek situwâsi disi, a taki di den ben taki ibri dei fu wan bijbeltekst èn so srefi tra konmakandra, ben gi den furu krakti srefisrefi. Na so fasi den ben man horidoro ondro a kefalek takru situwâsi disi èn ben man tan tranga na yeye fasi tu. Na ondrofenitori disi e sori krin o prenspari a de fu kon makandra doronomo nanga a pipel fu Yehovah.

Te fu kaba, efu wi wani frutrow moro nanga moro tapu Yehovah, dan wi musu wroko fayafaya na ini a Kownukondre preikiwroko. Ala ten wi musu de klariklari fu prati a bun nyunsu nanga tra sma. A tumusi moi ondrofenitori fu wan yongu sisa na Kanada di lobi preiki, ben sori disi krin. A ben abi leukemie, wan brudu-siki di e kiri sma. Ala di a ben siki srefisrefi, toku a ben wani tron wan gewoon pionier, dati wani taki wan furuten dinari. Na ini wan syatu pisi ten di a no ben siki so furu, dan a ben firi bun nofo fu wroko wan mun langa na ini a diniwroko leki yepipionier. Baka dati a ben kon siki moro nanga moro, èn a dede wan tu mun baka dati. Ma a ben tan tranga na yeye fasi te na a kaba; no wan enkri momenti a ben lasi a frutrow di a ben frutrow tapu Yehovah. A mama fu en e memre: „Te leki a dede, a ben broko en ede moro furu nanga tra sma na presi fu ensrefi. A ben gi sma deki-ati fu studeri Bijbel, fu di a ben taigi den: ’Wi o de makandra na ini Paradijs.’”

Wi Musu Sori Taki Wi E Frutrow Tapu Yehovah

„Neleki fa a skin sondro yeye, dede, na so a bribi sondro wroko, dede tu” (Yakobus 2:26). A sani di Yakobus ben taki fu bribi na ini Gado, wi kan taki so srefi fu a frutrow di wi musu frutrow tapu Gado. Wi kan taki omeni wi wani dati wi e frutrow tapu Gado, ma te wi no e sori a frutrow dati nanga den sani di wi e du, dan dati no sa abi waarde srefi. Abraham ben frutrow krinkrin tapu Yehovah. A ben sori a frutrow dati, fu di sondro draidrai a ben gi yesi na den komando fu Gado. A ben de klariklari srefi fu òfer en manpikin, Isak. Fu di Abraham ben frutrow tapu Gado na so wan fasi èn ben gi yesi na en, meki sma ben kon sabi en leki a mati fu Yehovah.—Hebrewsma 11:8-10, 17-19; Yakobus 2:23.

Wi no abi fu wakti te wan ogri tesi miti wi, fosi wi sori taki wi e frutrow tapu Yehovah. Yesus ben taigi den disipel fu en: „A sma di de getrow ini a moro pikin sani, de getrow tu ini furu sani, èn a sma di de onregtfardiki ini a moro pikin sani, de onregtfardiki tu ini furu sani” (Lukas 16:10). Wi musu leri fu frutrow tapu Yehovah na ini den sani di wi e du ibri dei, srefi na ini afersi di kande no gersi so prenspari. Te wi e luku den wini di wan sma e kisi fu di a e gi yesi, dan dati e meki a frutrow de wi e frutrow tapu wi hemel Tata kon moro tranga; èn dati sa yepi wi fu man kakafutu gi moro bigi tesi.

Fu di a takru kaba fu grontapu e kon krosibei, meki a pipel fu Yehovah ben sa kan ondrofeni moro tesi nanga kefar (Tori fu den Apostel 14:22; 2 Timoteus 3:12). Te wi e meki a frutrow di wi e frutrow tapu Yehovah kon moro tranga now, èn te wi e frutrow krinkrin na en tapu, dan wi kan fruwakti taki wi sa kisi frulusu fu go na ini a nyun grontapu di a pramisi — kande fu di wi sa pasa a bigi banawtu libilibi, noso fu di wi sa kisi wan opobaka (2 Petrus 3:13). Meki a de so taki wi noiti e meki na abi di wi no abi nofo frutrow, pori a warti matifasi fu wi nanga Yehovah. Te wi e du dati, dan sma kan taki a srefi fu wi neleki san den taki fu Danièl di sma ben hari en komoto na ini a lew-olo: „Den no ben feni no wan mankeri na en, bika a ben frutrow tapu a Gado fu en.”—Danièl 6:23.

[Futuwortu]

[Prenki na tapu bladzijde 9]

Te wi e leisi ondrofenitori fu getrow futuboi fu Yehovah, soleki Martin Poetzinger, dan dati e tranga a bribi fu wi