Suma Kan Gi Yu Markitiki Di Yu Kan Frutrow?

Wan sma di ben go na Afrika fu a fosi leisi, ben si wan man di ben e tanapu leti-opo na sei fu a strati èn a ben wani sabi fu san ede a ben du dati. A ben si taki ibri leisi baka wan tu miniti, a man ben skoifi go pikinso na wan sei ala di a ben tan tanapu leti-opo. Baka wan pisi ten nomo a sma ben frustan fu san ede a man ben skoifi go na wan tra presi ibri leisi. Fu taki en leti, a ben pruberi fu tan na ini a skaduw fu wan telefonpostu. Safrisafri a skaduw ben skoifi go na wan tra presi ibri leisi te son ben saka gowe pikinso.

ALA sani di sma e du èn so srefi den markitiki na ini a libisma libimakandra e kenki ibritron baka, neleki a skaduw dati di a son e meki. Kontrari fu dati, Yehovah Gado, „a Tata fu den hemel leti”, no e kenki. „Na en”, na so a disipel Yakobus ben skrifi, „no wan kenki no de ini a drai fu a skaduw” (Yakobus 1:17). A Hebrew profeiti Maleaki ben skrifi san Gado srefi ben fruklari: „Mi na Yehovah; mi no kenki” (Maleaki 3:6). Gado ben taigi a nâsi Israèl na ini den dei fu Yesaya: „Srefi te wan sma kon grani, mi na a Srefiwan; èn srefi te wan sma en wiwiri kon weti, mi sa tan tyari en. Misrefi sa handri trutru” (Yesaya 46:4). So bun, awinsi ten e pasa, toku wi no e lasi a frutrow di wi kan abi na ini den pramisi fu na Almaktiwan.

Wan Sani Di Wi Kan Leri fu a Wet

Soleki fa den pramisi fu Yehovah de fu frutrow èn den no e kenki, na so den markitiki fu en fu san bun èn san ogri, de fu frutrow èn den no e kenki tu. Yu ben o frutrow wan seriman  di e gebroiki tu difrenti wegiston ala di wan fu den nomo de soifri? Kwetikweti. Na a srefi fasi, „wan wegi di no soifri na wan tegu sani gi Yehovah, ma wan soifri wegiston na wan prisiri gi en” (Odo 11:1; 20:10). Na ini a Wet di Yehovah ben gi den Israèlsma, a ben gi den a komando disi tu: „Unu no musu handri na wan onregtfardiki fasi te unu e krutu sma, te unu e marki sani, te unu e wegi sani, noso te unu e marki watra noso tra sani. Unu musu abi soifri wegi, soifri wegiston, wan soifri efa nanga wan soifri hin. Mi na Yehovah, un Gado, di tyari unu komoto fu a kondre Egipti.”—Lefitikus 19:35, 36.

Te den Israèlsma ben gi yesi na a komando dati, dan den ben kisi a bun-ati fu Gado èn a ben gi den furu materia sani tu. Na a srefi fasi, sani sa waka bun gi wan anbegiman di e frutrow tapu Yehovah te a e hori ensrefi na den markitiki fu Gado di no e kenki. A musu du dati ini a tori fu wegi èn fu marki sani èn so srefi na ini ala afersi fu en libi te a wani kisi blesi. Gado e fruklari: „Mi, Yehovah, na yu Gado, a Sma di e leri yu fu gi yusrefi wini, a Sma di e meki yu waka na tapu a pasi di yu musu waka.”—Yesaya 48:17.

Fu San Ede Sma No E Hori Densrefi na Markitiki Moro na ini a Ten Disi?

Bijbel e sori fu san ede sma no e hori densrefi na markitiki moro na ini a ten disi. A lasti buku fu Bijbel, Openbaring, e fruteri fu wan orloku na ini hemel. A bakapisi fu na orloku disi abi krakti na tapu ala libisma te leki tide. Na apostel Yohanes ben skrifi: „Feti ben broko na hemel: Mikaèl nanga den engel fu en ben feti nanga a draak, èn a draak nanga den engel fu en ben feti, ma a no ben wini, so srefi no wan presi no ben feni moro gi den na ini hemel. Fu dati ede den ben fringi a bigi draak go na ondro, a fosi sneki, a wan di den e kari Didibri nanga Satan, di e kori heri grontapu pe sma e libi; den ben fringi en go na grontapu, èn den engel fu en den ben fringi go na ondro makandra nanga en.”—Openbaring 12:7-9.

San ben pasa wantewante baka na orloku dati? Yohanes ben taki moro fara: „Fu dati ede, un prisiri, un hemel nanga unu di e libi drape! Helu fu grontapu nanga se, bika Didibri saka kon na unu, èn a abi bigi atibron, fu di a sabi taki a abi wan syatu pisi ten nomo.”—Openbaring 12:12.

„Helu fu grontapu” ben kon di a Fosi Grontapufeti bigin na ini 1914. Dati meki taki wan kaba ben kon na wan pisi ten pe sma ben hori densrefi na markitiki di ben difrenti srefisrefi fu den markitiki di de nownowde. „A Bigi Orloku fu 1914-1918 de neleki wan pisi gron di bron krinkrin èn di e prati a ten bifo dati fu a ten fu wi”, na so a historia skrifiman Barbara Tuchman e taki. „Na orloku ben kiri someni libisma di ben man du bun wroko na ini den yari baka dati, a pori a bribi fu sma, a kenki a prakseri fu den, èn sma e pina ete fu den tumusi hati sani di pasa nanga den. Baka na orloku, sma bigin denki èn bigin handri heri tra fasi leki bifo na orloku.” Wan tra historia skrifiman, namku Eric Hobsbawm, e agri nanga disi. A e taki: „Sensi 1914, a de krin fu si taki moro nanga moro sma no e hori densrefi kwetikweti na den markitiki di sma na ini den gudu kondre ben feni bun na a ten dati . . . Fu dati ede, den afo fu wi fu a di fu tinaneigi yarihondro ben o taki dati libisma drai go baka na wan ten pe sma no ben hori densrefi kwetikweti na wet noso markitiki.”

 A skrifiman Jonathan Glover ben taki na ini a buku fu en di nen Humanity—A Moral History of the Twentieth Century: „Wan sani di wi kan si krin na ini a ten disi, na a lasi di bun gwenti nanga gronprakseri e lasi gowe.” Ala di a skrifiman disi no e bribi taki bun gwenti nanga gronprakseri di komoto fu Gado trutru sa yepi — bika moro nanga moro sma na ini Westsei kondre e lasi bribi na ini kerki — toku a e warskow: „Awinsi son wan fu wi no e bribi taki bun gwenti nanga gronprakseri fu kerki e meki sma tyari densrefi na wan bun fasi, toku wi musu broko wi ede nanga a lasi di den markitiki disi e lasi gowe.”

Awinsi efu a de na ini bisnis afersi, politiek afersi noso kerki afersi, sma no e frutrow makandra moro. Srefi sma di de mati fu makandra no e du dati moro èn na ini na osofamiri libi den no e du dati tu. Den bakapisi di dati e tyari, takru srefisrefi. A sani disi na wan fasi fa Didibri e meki taki helu e kon na tapu den sma di e libi na grontapu. Satan abi a fasti bosroiti fu feti a feti fu en te na a kaba. A wani tyari ala den sma di e meki muiti fu libi akruderi den markitiki fu Gado, go pori makandra nanga en.—Openbaring 12:17.

Suma kan lusu a problema di e meki taki sma no e frutrow makandra moro? Na apostel Petrus e piki: „Nyun hemel nanga wan nyun grontapu de di wi e fruwakti akruderi [Gado en] pramisi, èn na ini den disi, regtfardikifasi sa de” (2 Petrus 3:13). Wi kan frutrow tapu a pramisi dati, no wawan fu di Gado abi a makti fu du san a abi na prakseri, ma so srefi fu di a gi wi a dyaranti taki a sa kon tru. Ini a tori fu iniwan ’wortu di e komoto na en mofo’, dan Yehovah e fruklari: „A no sa drai kon baka na mi sondro bakapisi, ma seiker a sa du a sani dati di mi abi prisiri na ini, èn fu tru, a sa abi bun bakapisi na ini san mi ben seni en go.” Fu tru, dati na wan pramisi di wi kan frutrow srefisrefi!—Yesaya 55:11; Openbaring 21:4, 5.

Libi Akruderi den Markitiki fu Gado

Ala di Yehovah Kotoigi e libi na ini wan grontapu pe markitiki e kenki èn pe sma no e hori densrefi na markitiki moro, toku den e du muiti fu libi akruderi den markitiki fu Bijbel di e sori den fa den musu tyari densrefi. Dati meki den e difrenti krinkrin fu moro furu sma na grontapu. Nofotron disi ben hari a prakseri fu sma, ma trawan ben spotu nanga den tu.

Na wan kongres fu Yehovah Kotoigi na ini Londen, wan nyunsuman fu wan telefisi-station ben aksi wan brada di abi a frantwortu fu taki gi Yehovah Kotoigi, efu den na Kresten trutru. A brada ben piki en taki: „Iya, dati de so bika Yesus na wi eksempre. Furu sma na ini a grontapu disi e prakseri densrefi nomo, èn wi e poti prakseri na Yesus Krestes leki a pasi, a waarheid, nanga a libi. Wi e bribi taki en na a Manpikin fu Gado, taki a no wan pisi fu wan Dri-wánfasi; so bun, a fasi fa wi e frustan Bijbel e difrenti fu san moro furu sma e bribi.”

Di na interview ben kon tapu BBC telefisi, dan a nyunsuman di ben poti aksi, ben taki na a kaba fu a programa: „Mi kon sabi moro bun fu san ede Yehovah Kotoigi e kon na wi oso. Èn mi no denki taki oiti mi si 25.000 sma kon makandra na ini wán presi, e weri moi krosi èn e tyari densrefi na so wan bun fasi na a srefi ten.” Dati na trutru wan bun kotoigi fu wan sma di no de wan Kotoigi fu Yehovah! Disi e sori taki a de wan koni sani srefisrefi fu hori wisrefi na den markitiki fu Gado di no e kenki.

Son sma kande e tegu gi a prakseri taki den musu libi akruderi den markitiki di densrefi no ben poti. Toku wi e gi yu deki-ati fu luku na ini yu Bijbel èn kon sabi san na den markitiki fu Gado. Ma yu no musu leri sabi den frafra nomo. Du soleki fa na apostel Paulus ben gi leki rai: „No meki a seti fu sani disi abi krakti na un tapu moro, ma kenki un fasi fu denki, so taki unu kan drai un libi fu kan kon sabi gi unsrefi san na a bun, yoisti èn volmaakti wani fu Gado” (Romesma 12:2). Go na a Kownukondre zaal na ini yu birti, èn kon sabi den Kotoigi fu drape. Yu sa kon si taki den de gewoon sma di e frutrow tapu den pramisi fu Bijbel èn di e sori taki den e frutrow tapu Gado fu di den e libi akruderi den markitiki fu en.

Te yu e hori yusrefi na den markitiki fu Gado di no e kenki èn di de fu frutrow trutru, dan dati sa tyari blesi kon gi yu sondro misi. Poti prakseri na a kari di Gado srefi e gi: „O efu yu trutru ben sa poti prakseri nomo na den komando fu mi! Dan a vrede fu yu ben sa tron leki wan liba, èn a regtfardikifasi fu yu leki den skwala fu se.”—Yesaya 48:18.

[Prenki na tapu bladzijde 5]

Na ini a ten disi, sma no e frutrow makandra moro na ini bisnis, politiek, nanga kerki afersi, so srefi na ini na osofamiri