Yu Sa Kon Tranga Baka na Yeye Fasi te Yu Taki fu a Sondu Di Yu Du

„DI MI ben tan tiri, den bonyo fu mi ben pori gowe fu di mi ben geme heri dei. Bika dei nanga neti yu anu ben de hebi na mi tapu. A watra na ini mi skin kon drei neleki a drei fu dreiten” (Psalm 32:3, 4). Den wortu disi di Kownu David fu na Israèl fu owruten ben taki fu di a ben sari srefisrefi, kan meki wi frustan a hebi pen di a ben firi na ini en ati. Ensrefi suku fu tyari a pen disi kon na en tapu, bika na presi fu taki fu a seryusu sondu di a du, dan a ben tan tiri.

David ben man du difrenti sani heri bun. A ben de wan deki-ati fetiman, wan koni tiriman, wan puwema skrifiman nanga wan pokuman. Ma a no ben frutrow tapu den sani disi di a ben man du, ma tapu a Gado fu en (1 Samuèl 17:45, 46). Bijbel e taki dati en ben de wan man di ben „de nanga Yehovah” nanga en „heri” ati (1 Kownu 11:4). Ma a ben du wan sondu di ben seryusu srefisrefi, èn a kan taki a ben sori go na dati na ini Psalm 32. Te wi e go luku a tori fu si san ben meki en du a sondu, dan wi kan leri furu fu dati. Wi sa man si krin sortu trapu wi musu wai pasi gi, èn so srefi dati wi musu taki fu den sondu di wi du, te wi wani kon bun baka nanga Gado.

Wan Loyaal Kownu Ben Du Sondu

A nâsi Israèl ben de na ini wan srudatifeti nanga den Amonsma, ma David ben tan na ini Yerusalem. Wan neti di a ben e waka na tapu a daki fu en paleisi, dan a ben si wan moi uma e wasi ensrefi na wan oso krosibei fu en. David no ben du noti fu dwengi ensrefi, ma a ben bigin kisi wan tranga lostu gi na uma. Na uma dati ben de Batseiba, a wefi fu Uria di ben de wan srudati na ini a legre fu David. Di David kon sabi dati, dan a seni kari Batseiba èn a ben du sutadu nanga en. Baka wan pisi ten, Batseiba ben seni wan boskopu gi David taki a ben de nanga bere.—2 Samuèl 11:1-5.

David kon abi wan bigi problema srefisrefi. Efu sma ben o sabi fu a sondu fu den, dan a strafu di den ala tu ben o kisi, na dede (Lefitikus 20:10). So bun, a ben seti sani fu man lusu a problema. A ben kari Uria, a masra fu Batseiba, fu kon baka fu a feti. Baka di David ben aksi Uria finifini fa a feti ben waka, dan David ben komanderi Uria fu drai go baka na en oso. David ben wani taki a musu gersi taki Uria ben de a papa fu a pikin fu Batseiba.—2 Samuèl 11:6-9.

Ma sani no ben waka srefisrefi soleki fa David ben wani. Uria no ben go na oso fu de nanga en wefi. Uria ben taki dati a no ben kan drai go baka na oso kwetikweti, ala di a legre ben de na ini wan hebi feti. Te wan legre fu Israèl ben de na ini wan srudatifeti, dan den man no ben abi seks demakandra; den no ben du dati srefi nanga den eigi wefi fu den. Den ben musu tan krin akruderi wet (1 Samuèl 21:5). Baka dati, David ben gi Uria wan kari fu kon nyan na en oso, èn a ben meki Uria kon drungu, ma toku a no ben go na oso fu de nanga en wefi. A getrow fasi fa Uria ben tyari ensrefi, ben sori krin taki a bigi sondu fu David trutru ben de wan bigi ogri.—2 Samuèl 11:10-13.

Den takru bakapisi fu den sondu di David ben du, ben kon hebi moro nanga moro na en tapu. Fu di a no ben sabi moro san a ben musu du, meki a prakseri taki wan fasi nomo ben tan abra fu man lusu a problema. A ben seni Uria go baka na ini a feti. A ben seni wan brifi tu gi Yoab, na edeman fu a legre. A syatu brifi ben sori krin san ben musu pasa: „Poti Uria na fesisei pe a feti de moro hebi, èn unu musu wai komopo na en baka, so taki den sa naki en kiri.” A gersi leki a makti kownu kibri san a ben du, nanga a syatu brifi dati di a ben seni go nanga Uria so taki sma kan kiri en.—2 Samuèl 11:14-17.

Wantewante baka di Batseiba ben kaba nanga a  low di a ben low gi en masra, dan David trow nanga en. Wan pisi ten ben pasa, èn a pikin fu den ben gebore. Na ini a heri pisi ten di den sani disi ben pasa, David no ben fruteri no wan sma fu den sondu fu en. Kande a ben pruberi fu taigi ensrefi taki a ben abi leti fu handri na so wan fasi. A no de so taki Uria dede nanga grani na ini a feti, neleki tra fetiman? Boiti dati, Uria ben kisi a komando fu go na oso fu de nanga en wefi. A no de so taki a ben trangayesi a kownu fu en fu di a no ben wani go? A ’feradelek ati’ sa meki wan sma taki ala sortu sani, soso fu pruberi fu krin ensrefi fu den sondu fu en.—Yeremia 17:9; 2 Samuèl 11:25.

Fowtu Di E Meki wan Sma Du Sondu

David ben de wan sma di lobi regtfardikifasi. Fa a pasa dan, taki a ben gi ensrefi abra na sutadu èn taki a ben kiri wan sma srefi? Soleki fa a sori, dan a no wantronso David ben sondu. Wi ben sa kan aksi wisrefi fu san ede David no ben de nanga den fetiman fu en, fu horibaka gi den na ini a srudatifeti di den ben feti nanga den feanti fu Yehovah. Na presi fu dati, David ben teki en safrisafri na a paleisi fu en. Drape a no ben abi fu broko en ede tumusi nanga a feti fu di dati ben farawe. Dati meki a ben kisi a tranga lostu makriki fu teki a wefi fu wan getrow srudati. Na ini a ten disi, tru Kresten kan kibri densrefi gi ogri te den e wroko fayafaya nanga a gemeente fu den fu doro marki na yeye fasi, èn te den e teki prati na a preikiwroko doronomo.—1 Timoteus 6:12.

A kownu fu Israèl ben kisi a komando fu meki wan kopi fu a Wet èn fu leisi en ibri dei. Bijbel e fruteri fu san ede a ben musu du disi: „So taki a kan leri fu frede Yehovah, en Gado, fu kan hori ensrefi na ala den wortu fu a wet disi èn den ordru disi, te a e du den; taki en ati no meki a firi moro hei leki den brada fu en èn taki a no drai gowe libi a komando go na reti-anusei noso go na kruktu-anusei” (Deuteronomium 17:18-20). A kan de so taki David no ben hori ensrefi na a komando dati na a ten di a du den seryusu sondu disi. Te wi e studeri Gado Wortu doronomo èn e denki dipi fu san skrifi na ini, dan dati sa yepi wi fu wai pasi gi ogridu na ini den muilek ten disi.—Odo 2:10-12.

Boiti dati, a lastiwan fu den Tin Komando e taki spesrutu: „Yu no musu abi tranga lostu gi a wefi fu wan tra sma” (Exodus 20:17). Na a ten dati, David ben abi furu wefi nanga tra uma (2 Samuèl 3:2-5). Ma dati no ben hori en fu kisi tranga lostu gi wan tra moi uma. A tori disi e meki wi prakseri o seryusu den wortu fu Yesus de: „Ibriwan sma di e tan luku wan uma fu kan abi tranga lostu gi en, na ini en ati a du sutadu kaba nanga en” (Mateus 5:28). Na presi fu tan prakseri den tranga lostu disi di no bun, meki wi puru den wantewante na ini a prakseri nanga na ati fu wi.

Berow Nanga Sari-ati

A Bijbel tori di e fruteri krin fu a sondu fu David, no skrifi fu satisferi a tranga lostu fu wan sma fu abi seks demakandra. A tori e gi wi na okasi fu si fa Yehovah e sori wan fu den tumusi moi eigifasi fu en. Na eigifasi dati na en sari-ati. A e naki wi ati trutru fu si fa Yehovah e handri te a e sori dati.—Exodus 34:6, 7.

Baka di Batseiba ben kisi wan manpikin, dan Yehovah ben seni a profeiti Natan go na David fu taki nanga en. Na so fasi, Gado ben sori sari-ati. Efu Natan no ben go na David èn efu David ben tan tiri, dan David kande ben o tan du sondu (Hebrewsma 3:13). Koloku taki David piki bun tapu Gado en sari-ati. Fu di Natan ben gebroiki den yoisti wortu fu tyari a tori kon na fesi, meki David en konsensi ben bigin fon en, èn a ben erken nanga sakafasi taki a ben sondu teige Gado. Fu taki en leti, Psalm 51, di e sori go na a sondu fu David nanga Batseiba, ben skrifi baka di David ben abi berow èn ben taki fu a bigi sondu di a du. Meki a de so, taki noiti wi e tranga na ati fu wi efu wi ben sa du wan seryusu sondu.—2 Samuèl 12:1-13.

David ben kisi pardon, ma a ben abi fu teki a piri-ai di a ben kisi èn a ben abi fu tyari den bakapisi tu fu a sondu fu en (Odo 6:27). David ben musu fruwakti taki a ben o kisi piri-ai, a no so? Efu Gado no ben poti prakseri na den fowtu fu David, dan dati ben o gersi leki sma no abi fu hori densrefi na den markitiki fu Gado. Efu Gado no ben du noti, dan a ben o de neleki a Granpriester Eli di no ben handri na a yoisti fasi. Eli no ben gi den godelowsu manpikin fu en nofo piri-ai, èn fu dati ede a ben gi den pasi fu go doro nanga na ogridu fu den (1 Samuèl 2:22-25). Ma a no de so kwetikweti, taki Yehovah no wani sori lobi bun-ati na a sma di abi berow fu en sondu. A sari-ati di a e sori de leki switi kowru watra; dati sa yepi a  sma di meki wan fowtu, fu man tyari den bakapisi fu sondu. A pardon di a lobi-ati Gado e gi a sma di abi berow, èn a demakandra di a abi nanga tra bribiman di e gi deki-ati, kan yepi a sma di meki wan fowtu fu kon tranga baka na yeye fasi. Iya, nanga yepi fu a lusu-paiman fu Krestes, a sma di abi berow kan ondrofeni „a gudu fu a no-frudini bun-ati fu [Gado]”.—Efeisesma 1:7.

„Wan Soifri Ati” Nanga „wan Nyun Yeye”

Baka di David ben taki fu a sondu di a du, dan a no ben kisi a firi taki a no warti srefisrefi. Den sani di a ben skrifi na ini den psalm fu a taki di a ben taki fu a sondu di a du, e sori taki wan hebi ben puru na en tapu, èn taki a ben abi a fasti bosroiti fu dini Gado na wan getrow fasi. Fu eksempre, luku Psalm 32. Na ini vers 1 wi e leisi: „Koloku a sma de di kisi pardon fu na ogri di a du, èn di a sondu fu en tapu krinkrin.” Awinsi o seryusu a sondu de, toku sani kan waka bun gi wan sma te fu kaba, efu a abi trutru berow. Wan fasi fa a sma dati kan sori taki a abi trutru berow, na te a de klariklari fu tyari a frantwortu fu den sondu fu en, soleki fa David ben du dati (2 Samuèl 12:13). David no ben pruberi fu krin ensrefi fu den sondu fu en na fesi Yehovah èn a no ben pruberi fu gi trawan a fowtu fu san a ben du. Vers 5 e taki: „Te fu kaba mi ben taigi yu mi sondu, èn mi no ben tapu mi fowtu. Mi ben taki: ’Mi sa taigi Yehovah den fowtu fu mi.’ Èn yusrefi gi mi pardon fu a fowtu fu den sondu fu mi.” Te wan sma e taki fu den sondu fu en èn e sori trutru berow, dan dati sa tyari frulekti kon, so taki a no sa kisi konsensi fonfon moro fu den sondu di a ben du.

Baka di David begi Yehovah fu gi en pardon, a ben aksi: „Meki na ini mi, srefi wan soifri ati, o Gado, èn poti na ini mi wan nyun yeye, wan di de stanfaste” (Psalm 51:10) David ben aksi Gado fu gi en „wan soifri ati” nanga „wan nyun yeye”. Dati e sori taki David ben sabi taki a ben abi a firi fu du sondu, èn taki a ben abi yepi fu Gado fanowdu fu krin en ati èn fu bigin nyunyun baka. Na presi fu sari ensrefi pasa marki fu den fowtu di a ben meki, a ben abi a fasti bosroiti fu go doro nanga en diniwroko gi Gado. A ben begi: „O Yehovah, opo mi mofobuba, so taki mi mofo kan prèise yu.”—Psalm 51:15.

San Yehovah ben du di David ben abi trutru berow èn ben du furu muiti srefisrefi fu dini en? A ben gi David a dyaranti disi di ben gi en deki-ati: „Mi sa meki yu kisi a koni fu man si sani krin èn mi sa leri yu a pasi di yu musu waka. Mi sa gi yu rai nanga mi ai na yu tapu” (Psalm 32:8). Dyaso a dyaranti e gi taki Yehovah srefi sa poti prakseri na  den firi èn den nowtu fu a sma di abi berow. Yehovah ben meki David kisi a koni fu man si sani krin. Dati wani taki dati David ben o abi a koni fu frustan sani dorodoro. Efu a ben sa kisi tesi baka ten, dan a ben o abi a koni fu man si den bakapisi fu den sani di a ben o du, èn fa dati ben o abi krakti na tapu tra sma. A ben o abi a koni tu fu handri na a yoisti fasi.

A sani disi di David ben ondrofeni na ini en libi, na wan ondrofenitori di e gi deki-ati na ala den sma di du wan seryusu sondu. Te wi e taki fu a sondu fu wi èn te wi abi trutru berow, dan wi kan kisi a moro warti gudu fu wi baka, namku a matifasi di wi ben abi nanga Yehovah Gado. A pen noso a syen di wi ben sa kan firi fu wan syatu pisi ten, moro bun leki a pina di wi e pina te wi e tan tiri; a moro bun tu leki den takru bakapisi di e kon te wi e tan du sondu sondro fu sori berow (Psalm 32:9). Na presi fu dati, wi kan kisi pardon fu wan lobi-ati Gado di abi sari-ati, „a Tata fu safu sari-atifasi èn a Gado fu ala trowstu”.—2 Korentesma 1:3.

[Prenki na tapu bladzijde 31]

David ben denki taki a ben man wai pasi gi den bakapisi fu a sondu fu en efu a ben o seni Uria go, fu sma kiri en