„Den Hati Sani Di wan Mati Taigi Yu”

NA APOSTEL Paulus ben si taki a ben de fanowdu fu gi den fosi yarihondro Kresten na Galasia piri-ai. Kande fu di a no ben wani taki den ben musu firi brokosaka, meki a ben aksi: „We, mi kon tron unu feanti dan, fu di mi e fruteri unu a waarheid?”—Galasiasma 4:16.

Paulus no ben kon tron a feanti fu den fu di a ben ’fruteri den a waarheid’. Fu taki en leti, a ben du soifri san a Bijbel gronprakseri e taki: „Den hati sani di wan mati taigi yu, bun” (Odo 27:6). A ben sabi taki, a piri-ai ben kan hati den wan di meki wan fowtu. Ma Paulus ben frustan taki, efu a no ben o gi wan sma di meki wan fowtu a piri-ai di a sma dati abi fanowdu, dan dati ben kan de neleki a no gi a sma dati a lobi fu Yehovah Gado (Hebrewsma 12:5-7). Fu dati ede, leki wan getrow mati di e hori a bun fu a gemeente na prakseri, Paulus no ben draidrai fu gi rai di ben kan yepi den.

Na ini a ten disi, Yehovah Kotoigi e du a wroko di den kisi fu „meki disipel fu sma fu ala nâsi, . . . èn leri den fu du ala den sani di [Yesus Krestes] komanderi”. Te den e du dati, dan den getrow Kresten disi no e draidrai fu taki Bijbel waarheid di e sori èn e krutu fowtu kerki leri èn so srefi fasi fu libi di no de akruderi a Bijbel leri (Mateus 15:9; 23:9; 28:19, 20; 1 Korentesma 6:9, 10). Na presi taki sma musu si den leki feanti, den e sori taki den na opregti mati di e broko den ede trutru nanga sma.

Nanga a koni di Gado gi, a psalm skrifiman ben skrifi: „Efu a regtfardikiwan ben sa naki mi, a ben sa de wan lobi bun-ati; èn efu a ben sa piri-ai gi mi, a ben sa de oli na tapu na ede, san mi ede no ben sa wani weigri.”—Psalm 141:5.