Luku den Pikin Di No Abi Papa Nanga Mama èn So Srefi den Weduwe, na ini a Banawtu fu Den

Wi kan si krin taki wi e libi na ini wan grontapu pe sma no lobi makandra. Na apostel Paulus ben sori fa sma ben sa de na ini „den lasti dei”, di a ben skrifi: „Muilek ten sa kon, di tranga fu pasa. Bika sma sa lobi densrefi nomo, . . . den no sa abi natuurlijk firi fu lobi” (2 Timoteus 3:1-3). Den wortu disi tru srefisrefi!

A LIBI di sma no e libi akruderi bun gwenti nanga gronprakseri moro na ini a ten disi, na wan fu den sani di e meki taki furu sma no abi sari-ati. Moro nanga moro a de so, taki sma no e poti prakseri na a tanbun fu trawan. Son sma no e prakseri a tanbun fu den sma na ini den eigi osofamiri srefi.

Disi abi krakti srefisrefi na tapu furu sma di e kon na ini nowtu fu difrenti situwâsi ede. Orloku, naturu rampu, so srefi a lowe di sma musu lowe go na tra presi fu kisi kibri, e meki taki moro nanga moro sma e tron weduwe èn taki moro nanga moro pikin-nengre musu tan sondro papa nanga mama (Preikiman 3:19). „Orloku meki taki moro leki wan milyun [pikin-nengre] lasi a papa nanga mama fu den, noso taki den prati fu a famiri fu den”, na so wan raportu fu UNICEF e taki. Yu sabi tu taki bun furu mama musu du ala sani den wawan, kande fu di den masra gowe libi den, noso fu di den broko trow. Den mama disi abi a hebi frantwortu fu wroko, so taki den kan sorgu èn kweki den pikin fu den sondro taki den abi wan masra fu yepi den. A situwâsi disi e kon moro takru fu di wan tu kondre abi bun furu problema na ekonomia sei, èn dati e meki taki furu sma na ini den kondre dati pôti srefisrefi.

Te wi e prakseri a tori disi, dan howpu de gi den sma di de na ini nowtu? Fa den weduwe èn pikin-nengre di no abi papa nanga mama, kan kisi frulekti fu a pina di den e pina? Oiti a problema disi o lusu?

A Lobi-ati Fasi fa Sma Ben Sorgu Trawan na ini Bijbel Ten

Na ini Bijbel ten, sma ben sorgu taki weduwe èn pikin-nengre di no abi papa nanga mama, ben kisi san den ben abi fanowdu na skin sei èn so srefi na yeye fasi. Ala ten disi ben de wan prenspari sani di sma ben du na ini na anbegi fu Gado. Te den Israèlsma ben koti siri-nyanyan noso froktu, dan den no ben musu tyari ala sani kon na wan di tan abra na a pranigron. Den ben musu libi den sani dati di tan abra, „gi a doroseisma di e tan na  ini yu kondre, gi a boi di no abi papa èn gi a weduwe” (Deuteronomium 24:19-21). A Wet fu Moses ben taki spesrutu: „Unu no musu kwinsi no wan weduwe noso boi di no abi papa” (Exodus 22:22, 23). A fiti fu taki dati den weduwe di kari na ini Bijbel èn den pikin di no abi papa nanga mama, ben de den moro pôti sma fu a pipel. Dati de so, bika te a masra, a papa, noso srefi a mama dede, dan kande den sma fu na osofamiri di e tan abra no abi wan sma fu sorgu den. Fu dati ede den e pina. A famiri-edeman Yob ben taki: „Mi ben frulusu den mofinawan di ben e bari fu kisi yepi, èn a boi di no abi papa èn ala sma di no ben abi yepiman.”—Yob 29:12.

Biginbigin na ini a ten fu a Kresten gemeente, wan prenspari marki fu a tru anbegi ben de taki den ben sorgu gi den mofinawan èn den wan di de na ini nowtu trutru, fu di den lasi a papa nanga mama fu den, noso wan masra, na ini dede. A disipel Yakobus di trutru ben wani dati sani ben waka bun gi den sma disi, ben skrifi: „A fasi fu anbegi di krin èn di no pori, leki fa wi Gado nanga Tata e si en, na disi: fu luku den pikin di no abi papa nanga mama èn so srefi den weduwe, na ini a banawtu fu den, èn fu no meki grontapu flaka yu.”—Yakobus 1:27.

Boiti taki Yakobus ben taki fu weduwe èn fu pikin-nengre di no abi papa nanga mama, a ben poti prakseri tu na trawan di ben pôti èn di ben de na ini nowtu srefisrefi (Yakobus 2:5, 6, 15, 16). Na apostel Paulus ben sori tu taki a ben hori den sma disi na prakseri. Di Paulus nanga Barnabas ben kisi a toewijzing fu den, dan wan fu den rai di den kisi, ben de fu ’tan hori den pôtiwan na prakseri’. „So bun, mi ben du furu muiti tu fu du a sani disi”, na so Paulus ben man taki nanga wan krin konsensi (Galasiasma 2:9, 10). A tori di e taki fu den sani di a Kresten gemeente ben du syatu baka di den seti en, ben sori taki: „No wan enkri sma na den mindri ben mankeri wan sani . . . Baka dati dan den sani  ben e prati gi ibri sma akruderi san a ben abi fanowdu” (Tori fu den Apostel 4:34, 35). Iya, a Kresten gemeente ben go doro nanga a sani disi di ben seti na ini Israèl fu owruten. Dati wani taki dati den ben sorgu tu gi pikin-nengre di no abi papa nanga mama, so srefi gi weduwe, èn sma di de na ini nowtu.

A no de fu taki, dati a yepi di den ben gi no ben de so furu, èn den ben gi someni leki ibri gemeente ben man gi den sma dati. Den ben luku bun fa den ben prati a moni, èn den wan di ben kisi yepi ben de na ini nowtu trutru. No wan Kresten ben musu mesbroiki a seti disi, èn den no ben musu poti wan hebi tapu a gemeente fu sorgu sma, te dati no ben de fanowdu. Disi ben kon na krin na ini den rai di Paulus ben gi na 1 Timoteus 5:3-16. Drape wi e si taki te den famiriman fu den sma di de na ini nowtu ben man yepi den, dan den famiriman ben musu teki a frantwortu dati na den tapu. Weduwe di ben abi yepi fanowdu ben musu doro wan tu markitiki, bifo den ben man kisi yepi. Ala den sani disi e sori taki Yehovah abi wan tumusi bun fasi fu sorgu den wan di de na ini nowtu. Ma disi e sori tu taki wan sma musu abi a yoisti fasi fu si sani, so taki a no sa suku fu kisi sani fu trawan te a no abi yepi trutru fanowdu.—2 Tesalonikasma 3:10-12.

Sorgu den Pikin Di No Abi Papa Nanga Mama èn So Srefi den Weduwe na ini a Ten Disi

Te den gemeente fu Yehovah Kotoigi musu luku den wan di de na ini banawtu èn musu yepi den, dan den e hori densrefi na den srefi gronprakseri leki den futuboi fu Gado fu fosi. Brada lobi na wan prenspari eigifasi di den abi, soleki fa Yesus ben taki: „Nanga disi ala sma sa sabi taki unu na mi disipel, efu unu abi lobi na un mindri” (Yohanes 13:35). Te son sma de na ini nowtu, noso te den e pina fu wan rampu ede, noso fu den bakapisi di orloku noso borgrufeti e tyari, dan den tra brada nanga sisa fu a bradafasi na heri grontapu, de fayafaya fu luku fa den kan gi yepi na yeye fasi èn na materia sei. Meki wi luku wan tu disiten ondrofenitori di e sori san den e du ini a tori disi.

Pedro no sabi en mama so bun. En mama dede di a ben abi wan nanga afu yari nomo. Di Pedro tapu feifi yari, dan en papa dede tu. So bun, Pedro ben tan sondro papa nanga mama makandra nanga den brada fu en. Yehovah Kotoigi ben e kon na a papa fu den kaba. So bun, Pedro nanga den bigi brada fu en ben bigin nanga wan oso-bijbelstudie.

Pedro e fruteri: „A wiki baka dati, wi ben bigin go na den konmakandra. Fu di wi ben abi demakandra nanga den brada nanga sisa, meki wi ben kan si taki den lobi wi èn wi ben firi dati tu. A gemeente ben de wan kibripresi gi mi, bika den brada nanga sisa ben lobi mi trutru, neleki den ben de mi papa nanga mama.” Pedro e memre taki wan fu den Kresten owruman ben abi a gwenti fu aksi en fu kon na en oso. Drape Pedro ben abi switi takimakandra nanga a heri osofamiri èn a ben du prisiri sani makandra nanga den tu di ben gi en kowru-ati. „Den sani disi noiti mi sa frigiti”, na so Pedro e taki. A ben bigin taki nanga sma fu a bribi fu en di a ben abi 11 yari èn a teki dopu di a ben abi 15 yari. Den bigi brada fu en ben kisi yepi tu fu den wan na ini a gemeente. Na so fasi den ben go na fesi na yeye fasi tu.

Meki wi luku a tori fu David. Di a papa nanga mama fu David prati libi, dan den no ben wani David nanga en twelengi sisa moro. A granpapa nanga granmama fu den, so srefi wan tanta, ben kweki den. „Di wi gro kon bigi èn ben kon frustan a situwâsi fu wi, dan wi ben kon abi a firi taki sma no lobi wi trutru èn wi ben sari srefisrefi. Wi ben abi wan sani fanowdu fu yepi wi. A tanta fu mi ben tron wan Kotoigi fu Yehovah, èn fu dati ede meki wi leri Bijbel waarheid. Den brada nanga sisa ben sori taki den lobi wi trutru èn taki den ben wani de wi mati. Den ben lobi wi srefisrefi, èn den ben gi wi deki-ati fu suku fu doro marki, èn fu tan wroko gi Yehovah. Di mi ben abi pikinmoro tin yari, dan wan dinari ini a diniwroko ben gwenti fu kon teki  mi fu tyari mi go preiki. Wan tra brada ben pai moni gi mi èn ben sorgu gi tra sani di mi ben abi fanowdu te mi ben musu go na kongres. Wan brada ben yepi mi srefi, so taki mi ben kan poti bijdrage na a Kownukondre zaal.”

David dopu di a ben abi 17 yari, èn baka ten a bigin dini na a bijkantoro fu Yehovah Kotoigi na Meksikow. Srefi now a e erken: „Wan tu owruman de, di e leri mi furu sani èn di e gi mi bun rai so srefi. Na so fasi mi e leri taki mi man du sani bun, èn taki sma lobi mi trutru; èn mi no e firi moro taki mi de sondro mati.”

Abel na wan owruman. A de na ini wan gemeente na Meksikow pe wan tu weduwe de di abi yepi fanowdu. A e fruteri: „Mi e bribi taki a moro prenspari sani di weduwe abi fanowdu na taki wi e hori den firi fu den na prakseri. Ten na ten a de so taki den brokosaka; den e firi taki den no abi no wan mati. Fu dati ede a prenspari srefisrefi taki wi e yepi den, fu di wi e arki den. Nofotron, wi [den gemeente owruman] e go luku den. A prenspari taki wi e poti ten na wan sei fu poti prakseri na den problema fu den. Disi na wan bun fasi fu gi den trowstu na yeye fasi.” Ma son leisi a de fanowdu tu fu yepi den na materia sei. „Nownow wi e bow wan oso gi wan sisa di de wan weduwe”, na so Abel ben fruteri wan pisi ten na fesi. „Wan tu satra nanga wan tu bakadina na ini a wiki wi e go fu yepi bow na oso fu en.”

Wan tra gemeente owruman ben fruteri san ensrefi ondrofeni di a ben yepi pikin-nengre di no abi papa nanga mama èn weduwe: „Mi e bribi taki pikin-nengre di no abi papa nanga mama, musu kisi moro furu Kresten lobi leki sma di de weduwe. Mi kon si taki den pikin disi, moro esi e kisi a firi taki sma no lobi den, leki pikin-nengre nanga tini di abi a papa èn so srefi a mama fu den. Na ala sortu fasi, sma musu sori den taki den lobi den. A bun fu suku den baka den konmakandra, fu aksi den efu sani e go bun nanga den. Wan brada di trow kaba, no ben abi papa nanga mama di a ben de wan pikin. Ala ten mi e taki en wan switi odi na a konmakandra, èn a e brasa mi te a e si mi. Disi e tranga a banti fu tru brada lobi.”

Yehovah „Sa Frulusu a Pôtiwan”

A prenspari srefisrefi taki weduwe nanga pikin-nengre di no abi papa nanga mama, e frutrow tapu Yehovah. Te den e du dati, dan den man kakafutu gi a situwâsi di den de na ini. Bijbel e taki fu Yehovah: „Yehovah e kibri den doroseisma di e tan na ini a kondre; a e horibaka gi a boi di no abi papa èn a weduwe” (Psalm 146:9). A wan-enkri sani di sa man lusu den sortu problema disi, na a Kownukondre fu Gado di abi Yesus Krestes leki tiriman. A psalm skrifiman ben taki na wan profeiti fasi fu a tiri fu a Mesias, di a ben taki: „Bika a sa frulusu a pôtiwan di e bari fu kisi yepi, so srefi a sma di e kisi kwinsi èn ibri sma di no abi yepiman. A sa firi sari gi a mofinawan èn gi a pôtiwan, èn a sa frulusu den sili fu den pôtiwan.”—Psalm 72:12, 13.

Fu di a kaba fu a disiten seti fu sani e kon krosibei, meki den problema di e miti moro furu Kresten, e kon hebi moro nanga moro (Mateus 24:9-13). Ibri dei a de fanowdu taki Kresten e poti prakseri na makandra moro nanga moro, èn taki den „abi tranga lobi gi makandra” (1 Petrus 4:7-10). Kresten man, spesrutu owruman, musu poti prakseri na den pikin di no abi papa nanga mama èn musu abi sari-ati gi den. So srefi, lepi uma na ini a gemeente kan du furu fu yepi den weduwe, èn den kan gi den trowstu (Titus 2:3-5). Fu taki en leti, wi alamala kan yepi fu di wi e sori taki wi e broko wi ede trutru nanga trawan di de na ini nowtu.

Tru Kresten no e ’tapu fu sori safu sari-ati gi a brada fu den te den e si taki a brada fu den e mankeri sani’. Den sabi a frumane fu na apostel Yohanes heri bun: „Mi pikin, no meki wi lobi nanga wortu noso nanga tongo nomo, ma na ini du èn na ini waarheid” (1 Yohanes 3:17, 18). Fu dati ede, meki wi „luku den pikin di no abi papa nanga mama èn so srefi den weduwe, na ini a banawtu fu den”.—Yakobus 1:27.

[Prenspari pisi na tapu bladzijde 11]

„No meki wi lobi nanga wortu noso nanga tongo nomo, ma na ini du èn na ini waarheid.”—1 Yohanes 3:18

[Prenki na tapu bladzijde 10]

Tru Kresten e luku den pikin di no abi papa nanga mama èn so srefi den weduwe, fu di den e yepi den na materia sei, na yeye fasi èn so srefi fu di den e hori den firi fu den na prakseri