Tan Stanfaste Neleki Yu E Si a Sma Di Wi No Man Si!
Tan Stanfaste Neleki Yu E Si a Sma Di Wi No Man Si!
„[Moses] ben tan stanfaste neleki a ben e si a Sma di wi no man si.”—Hebrewsma 11:27.
1. Sortu tumusi aparti sani Yesus ben taki fu Gado di a ben hori a Bergitaki fu en?
YEHOVAH na a Gado di wi no man si nanga ai. Di Moses ben aksi efu a ben kan si a glori fu Yehovah, dan A ben piki en taki: „Yu no man si mi fesi, bika no wan libisma kan si mi èn toku tan na libi” (Exodus 33:20). Na apostel Yohanes ben skrifi: „Noiti wan sma si Gado” (Yohanes 1:18). Di Yesus Krestes ben de wan man na grontapu, dan en srefi no ben man si Gado. Na ini a Bergitaki fu en, Yesus ben taki: „Koloku fu den wan di soifri na ini ati, bika den sa si Gado” (Mateus 5:8). San Yesus ben wani taki nanga den wortu disi?
2. Fu san ede wi no man si Gado nanga den trutru ai fu wi?
2 Den Buku fu Bijbel e taki dati Yehovah na wan Yeye di wi no man si (Yohanes 4:24; Kolosesma 1:15; 1 Timoteus 1:17). Fu dati ede, Yesus no ben taki dati wi trutru ben kan si Yehovah nanga den trutru ai fu wi. A tru taki salfu Kresten sa si Yehovah Gado na ini hemel baka te den kisi wan opobaka leki yeye mekisani. Ma libisma di de „soifri na ini ati” èn di abi a howpu fu libi fu têgo na grontapu, man „si” Gado tu. Fa den man du dati?
3. Fa libisma man si wan tu fu den eigifasi fu Gado?
3 Wi e kon sabi wan tu sani fu Yehovah te wi e luku den sani finifini di a meki. Wi e fruwondru srefisrefi te wi e si omeni krakti a abi, so taki wi musu erken taki en na Gado a Mekiman (Hebrewsma 11:3; Openbaring 4:11). Ini a tori disi, na apostel Paulus ben skrifi: „Den eigifasi fu [Gado] di sma no kan si nanga ai, de krin fu si sensi di grontapu meki, bika den de fu si na ini den sani di a meki, iya, en têgo krakti nanga en makti leki Gado” (Romesma 1:20). So bun, di Yesus ben taki dati libisma kan si Gado, dan dati wani taki dati den ben sa man si wan tu eigifasi fu Yehovah na ini den sani di a meki. Te wi wani si den eigifasi fu Gado, dan wi musu abi soifri sabi. Wi no kan si den eigifasi nanga den trutru ai fu wi, ma nanga ’den ai fu na ati’ (Efeisesma 1:18). Den sani di Yesus ben taki èn den sani di a ben du, e sori tu fa Gado de. Fu dati ede Yesus ben taki: „A sma di si mi, si a Tata tu” (Yohanes 14:9). A fasi fa Yesus ben de èn a fasi fa a ben tyari ensrefi, ben sori krin fa Yehovah srefi de. Fu dati ede, te wi sabi a libi fu Yesus nanga den sani di a ben leri sma, dan dati kan yepi wi fu si, noso fu frustan, wan tu eigifasi fu Gado.
A Prenspari Srefisrefi Taki Wi E Frustan èn E Warderi Yeye Sani
4. Fa furu sma e sori taki den no e warderi yeye sani?
4 Na ini a ten disi, a no furu sma abi bribi èn e warderi yeye sani. „A no ala sma abi bribi”, na so Paulus ben taki (2 Tesalonikasma 3:2). Furu sma e gebroiki ala a ten di den abi, fu du den eigi sani èn den no abi bribi na ini Gado. A sondu fasi fa den e tyari densrefi èn na abi di den no abi warderi gi yeye sani, e meki taki den no man si Gado nanga den ai fu a frustan fu den. Na apostel Yohanes ben skrifi fu dati: „A sma di e du ogri, no si Gado” (3 Yohanes 11). Fu di den sma disi no e si Gado nanga den trutru ai fu den, meki den e du neleki Gado no e si san den e du (Esekièl 9:9). Den e wisiwasi yeye sani. Fu dati ede den no man kisi „a sabi fu Gado srefi” (Odo 2:5). So bun, a fiti taki Paulus ben skrifi: „Wan man di no e poti prakseri kwetikweti na yeye afersi, no e kisi den sani fu a yeye fu Gado, fu di a e feni taki den sani dati na don sani; èn a no man kon sabi den sani dati, bika sma di abi yeyefasi kan ondrosuku den.”—1 Korentesma 2:14.
5. San sma di e poti prakseri na yeye afersi, e hori na prakseri?
5 Ma te wi de sma di e poti prakseri na yeye afersi, dan wi sa hori na prakseri ala ten taki ala di Yehovah a no wan Gado di nomonomo e suku fowtu na sma, toku a sabi te wi abi takru prakseri noso takru lostu di e meki wi du ogri. Fu tru, „den pasi fu wan man, de na fesi den ai fu Yehovah, èn a e luku ala fasi fa a e waka” (Odo 5:21). Efu sondu ben sa basi wi, dan wi ben sa sori berow èn ben sa suku fu kisi pardon fu Yehovah bika wi lobi en èn bika wi no wani du sani di e hati en.—Psalm 78:41; 130:3.
San E Meki Wi Stanfaste?
6. San a wani taki fu de stanfaste?
6 Ala di wi no man si Yehovah, meki wi no frigiti noiti taki Yehovah kan si wi. Wi musu hori na prakseri taki a de èn taki a de krosibei fu ala den wan di e kari en. Te wi e du dati, dan dati sa meki wi de stanfaste. Dati wani taki dati wi sa man tanapu kánkan, èn wi sa man tan getrow na Gado, awinsi san e pasa (Psalm 145:18). Wi kan de neleki Moses. Paulus ben skrifi fu en: „Nanga bribi a ben gowe libi Egipti, ma a no ben frede na atibron fu a kownu, bika a ben tan stanfaste neleki a ben e si a Sma di wi no man si.”—Hebrewsma 11:27.
7, 8. San meki taki Moses ben abi deki-ati fu taki nanga Farao?
7 Moses ben kisi a komando fu Gado fu tyari den Israèlsma komoto fu a katibo na ini Egipti. Dati meki nofotron a ben musu go na a ogri-ati Farao na ini a kownu-oso pe furu kerki fesiman nanga legre fesiman ben de tu. A kan de so taki den skotu fu a paleisi ben lai nanga kruktu gado. Ma Yehovah ben de wan trutru sma gi Moses, ala di a no ben man si en. Moses ben sabi taki den popki disi di ben prenki den gado fu Egipti, no ben abi libi. Fu dati ede a no de fu fruwondru, taki Moses no ben frede Farao kwetikweti!
8 San ben gi Moses deki-ati fu go na Farao ibritron baka? Den Buku fu Bijbel e fruteri wi taki „a man Moses ben de a moro safri-atisma fu ala libisma di ben de na grontapu” (Numeri 12:3). A de krin fu si, taki Moses ben abi a krakti fu go na a ogri-ati kownu fu Egipti fu teki presi gi ’a Sma di wi no man si’, fu di a ben abi furu warderi gi yeye sani èn ben bribi trutru taki Gado ben de nanga en. Na ini a ten disi, sma de di e „si” a Gado di wi no man si, èn den e sori taki den e bribi na ini en. San na wan tu fasi fa den e du dati?
9. San na wan fasi fa wi kan tan stanfaste?
9 Wan fasi fa wan sma kan sori taki a abi bribi èn taki a e tan stanfaste neleki a e si a Sma di wi no man si, na te a e preiki nanga deki-ati awinsi sma e frufolgu en. Yesus ben warskow den disipel fu en: „No wan sma sa wani si unu na ai, fu mi nen ede” (Lukas 21:17). A ben taigi den tu: „Wan srafu no bigi moro en masra. Efu den frufolgu mi, dan den sa frufolgu unu tu” (Yohanes 15:20). Soleki fa Yesus taki, dan syatu baka di a dede, den bakaman fu en ben kisi frufolgu, fu di sma ben tapu skreki gi den, ben poti den na strafu-oso èn ben fon den (Tori fu den Apostel 4:1-3, 18-21; 5:17, 18, 40). Ala di den apostel fu Yesus nanga tra disipel ben kisi hebi frufolgu, toku den ben go doro fu preiki a bun nyunsu nanga deki-ati.—Tori fu den Apostel 4:29-31.
10. Fa a frutrow di wi abi taki Yehovah e kibri wi, e yepi wi na ini wi diniwroko?
10 Soleki fa Moses no ben frede den feanti fu en, na so den fosi bakaman fu Yesus no ben frede den furu feanti fu den tu. Den disipel fu Yesus ben abi bribi na ini Gado, èn dati ben yepi den fu horidoro na ini a hebi frufolgu di den ben kisi. Iya, den ben tan stanfaste neleki den ben e si a Sma di wi no man si. Na ini a ten disi, a sabi di wi sabi taki Yehovah e kibri wi ala ten, e gi wi krakti nanga deki-ati fu du a Kownukondre preikiwroko sondro frede. Gado Wortu e taki dati „a frede gi libisma, na dati e seti wan trapu, ma a sma di e frutrow tapu Yehovah, sa kisi kibri” (Odo 29:25). Fu dati ede, wi no e hari wisrefi puru fu di wi frede frufolgu; wi no e syen tu gi a diniwroko fu wi. A bribi fu wi e gi wi deki-ati fu gi kotoigi na birtisma, sma na wrokope, skoromati, èn na tra sma.—Romesma 1:14-16.
A Sma Di Wi No Man Si, E Tiri a Pipel fu En
11. Fa son sma di ben abi demakandra nanga a Kresten gemeente, ben sori taki den no ben abi warderi gi yeye sani, soleki fa Petrus nanga Yudas ben taki?
11 A bribi fu wi e yepi wi fu si taki Yehovah na a Sma di e tiri na organisâsi fu en na grontapu. Fu dati ede, wi no wani krutu den wan di abi frantwortu na ini a gemeente. Na apostel Petrus èn so srefi Yesus en afu-brada Yudas, ben warskow taki son sma ben de di no ben abi warderi kwetikweti gi yeye sani. Dati meki den ben taki na wan skempi fasi fu den man di ben teki fesi na mindri Kresten (2 Petrus 2:9-12; Yudas 8). Den sma disi ben suku fowtu nomo na trawan. Den ben o taki na so wan fasi na Yehovah fesi efu den ben man si en trutru? Kwetikweti! Ma fu di den man dati di ben prakseri sani na skin fasi nomo, no ben man si Gado, meki den ben denki taki den no abi fu gi En frantwortu.
12. Fa wi musu denki fu den wan di e teki fesi na ini a gemeente?
12 A no de fu taki, dati den sma na ini a Kresten gemeente no de volmaakti. Son leisi a kan de so taki den wan di e dini leki owruman, e meki fowtu di kande abi krakti na wi tapu. Ma toku, Yehovah e gebroiki den man disi fu de skapuman gi na ipi fu en (1 Petrus 5:1, 2). Man nanga uma di e poti prakseri na yeye afersi, e frustan taki disi na wan fasi fa Yehovah e tiri a pipel fu en. Fu dati ede, leki Kresten wi no wani krutukrutu èn wi no wani kragi; wi e lespeki den sani di Gado seti fu tiri a pipel fu en. Te wi e gi yesi na den wan di e teki fesi na wi mindri, dan wi e sori taki wi e si a Sma di wi no man si.—Hebrewsma 13:17.
Wi Musu Si Gado Leki Wi Gran Leriman
13, 14. San a wani taki gi yu fu si Yehovah leki a Gran Leriman?
13 Wan tra sani de, di e sori taki wi musu man frustan sani na yeye fasi. Yesaya ben taki na fesi: „Un eigi ai musu tron ai di sa si un Gran Leriman” (Yesaya 30:20). Te wi abi bribi, dan dati e meki wi frustan taki Yehovah na a Sma di e gi wi leri nanga yepi fu en organisâsi na grontapu (Mateus 24:45-47). Te wi e si Gado leki wi Gran Leriman, dan dati wani taki moro gi wi leki fu abi bun gwenti fu studeri Bijbel, èn fu go na Kresten konmakandra doronomo. A wani taki dati wi musu gebroiki ala sani di Gado seti fu meki sani waka bun gi wi na yeye fasi. Fu eksempre, wi musu poti moro prakseri leki san wi gwenti na a tiri di Yehovah e gi wi nanga yepi fu Yesus, so taki wi no e drifi gowe na yeye fasi.—Hebrewsma 2:1.
14 Son leisi wi musu du spesrutu muiti fu nyan bun dorodoro fu yeye nyanyan. Fu eksempre, kande wi e leisi frafra te wi e leisi Bijbel tori di muilek fu frustan. Te wi e leisi A Waktitoren nanga Ontwaakt!, dan kande wi no e leisi wan tu fu den artikel na ini, bika wi e feni taki na artikel no abi fu du nanga wi. A kan de so tu, taki wi e sidon prakseri tra sani te wi de na den Kresten konmakandra. Ma wi kan tan na ai, te wi e prakseri dipi fu den sani di tyari kon na fesi. Te wi trutru e warderi a leri di wi e kisi na yeye fasi, dan wi e sori taki wi e erken Yehovah leki wi Gran Leriman.
Wi Musu Gi Frantwortu
15. Fa son sma handri neleki Yehovah no kan si den?
15 Spesrutu fu di ogridu de so furu na ini ’a ten disi fu a kaba’, meki a de prenspari srefisrefi taki wi abi bribi na ini a Sma di wi no kan si (Danièl 12:4). Na ala sei, sma de di no eerlijk èn di e du hurudu. A no de fu taki, a de wan koni sani fu hori na prakseri taki Yehovah e luku san wi e du, srefi te libisma no man si wi. Son sma frigiti taki Yehovah kan du dati. Te tra sma no e si den, dan den e tyari densrefi na wan fasi di no de akruderi Bijbel. Fu eksempre, son sma no kakafutu gi a tesi fu luku takru felem èn fu luku seks tapu Internet, tapu telefisi, èn tapu tra nyunmodo sani di sma meki. Fu di sma kan du den sani disi te den de den wawan, meki son sma handri neleki Yehovah no e si fa den e tyari densrefi.
16. San musu yepi wi fu hori wisrefi na den hei markitiki fu Yehovah?
16 A de wan bun sani fu hori den wortu fu na apostel Paulus na prakseri: „Ibriwan fu wi sa gi Gado frantwortu fu ensrefi” (Romesma 14:12). Wi musu hori na prakseri taki ibri leisi te wi e sondu, dan wi e sondu teige Yehovah. A sabi di wi sabi disi, musu yepi wi fu hori wisrefi na den hei markitiki fu Gado, èn fu luku bun taki wi no e tyari wisrefi na wan fasi di no krin. Bijbel e memre wi: „No wan sani de di Gado meki di a no man si, ma no wan sani kibri gi den ai fu a sma di wi musu gi frantwortu èn den ai fu en man si ala sani krin” (Hebrewsma 4:13). A tru taki wi musu gi frantwortu na Gado. Ma a no de fu taki, na a lobi di wi lobi Yehovah trutru, e meki taki wi e du a wani fu en èn e hori wisrefi na den regtfardiki markitiki fu en. Fu dati ede, meki wi handri nanga koni te wi e teki bosroiti ini a tori fu sortu poku wi e arki, sortu felem wi e luku, èn so srefi ini a fasi fa wi e tyari wisrefi nanga wan umasma noso wan mansma.
17. Fu san ede Yehovah wani sabi fa a e go nanga wi?
17 Yehovah trutru wani sabi fa a e go nanga wi, ma dati no wani taki dati a e winsi taki wi e meki fowtu so taki a kan strafu wi. Na presi fu dati, na wan lobi-ati fasi a e luku san wi e du, neleki wan papa di wani gi presenti na den pikin fu en di e gi yesi na en. A sabi di wi sabi taki a bribi fu wi e plisi wi hemel Tata èn taki a de „a sma di e pai den wan di e suku en seryusu”, dan dati e gi wi trowstu trutru! (Hebrewsma 11:6) Meki wi bribi dorodoro na ini Yehovah, èn meki wi ’dini en nanga wi heri ati’.—1 Kroniki 28:9.
18. Sortu dyaranti wi e kisi fu den Buku fu Bijbel fu di Yehovah e luku wi èn e si a getrowfasi fu wi?
18 Odo 15:3 e taki: „Den ai fu Yehovah de na ibri presi, ala di den e luku den takruwan èn den bunwan.” Iya, Gado e luku san den ogri sma e du èn a e handri nanga den akruderi san den e du. Ma efu wi na wan fu „den bunwan”, dan wi kan de seiker taki Yehovah e poti prakseri na den sani di wi e du na ini getrowfasi. A bribi fu wi e kon tranga trutru fu di wi sabi taki ’a wroko fu wi no de fu soso ini a tori fu Masra’, èn taki a Sma di wi no man si no sa ’frigiti a wroko fu wi èn a lobi di wi ben sori gi a nen fu en’.—1 Korentesma 15:58; Hebrewsma 6:10.
Meki Wi Aksi Yehovah fu Ondrosuku Wi
19. San na wan tu winimarki di wi kan kisi, te wi bribi na ini Yehovah de tranga?
19 Leki getrow futuboi fu Yehovah, wi de warti gi en (Mateus 10:29-31). Ala di wi no man si en, toku a kan de wan trutru sma gi wi, èn wi trutru kan warderi a warti matifasi di wi abi nanga en. Te wi e denki na so wan fasi fu wi hemel Tata, dan dati sa meki wi kisi furu wini. A tranga bribi fu wi sa yepi wi fu abi wan krin ati èn wan bun konsensi na fesi Yehovah. Te a bribi fu wi de sondro hoigrifasi, dan dati sa meki tu taki wi no sa libi wan dobru libi (1 Timoteus 1:5, 18, 19). Te wi e bribi na ini Gado sondro fu degedege, dan wi e poti wan bun eksempre, èn dati kan gi trawan deki-ati (1 Timoteus 4:12). Boiti dati, so wan bribi sa meki wi tyari wisrefi na wan fasi di Yehovah feni bun, èn dati sa meki En ati prisiri.—Odo 27:11.
20, 21. (a) Fu san ede wi musu wani srefisrefi taki Yehovah e luku san wi e du? (b) Fa wi kan fiti Psalm 139:23, 24 na ini wi eigi libi?
20 Efu wi koni trutru, dan wi sa breiti taki Yehovah e luku wi. Wi no wani taki a musu si wi nomo, ma taki a musu ondrosuku den prakseri fu wi finifini tu, èn so srefi den sani di wi e du. Te wi e begi Yehovah, dan a bun fu aksi en fu ondrosuku wi so taki a kan si efu wi abi lostu na ini wi di no bun. A trutru kan yepi wi fu basi den problema fu wi, èn fu kenki den sani di wi musu kenki. A fiti taki a psalm skrifiman David ben singi: „Ondrosuku mi, o Gado, èn sabi mi ati. Ondrosuku mi, èn sabi den prakseri fu mi di e trobi mi, èn luku efu wan sari pasi de na ini mi, èn tyari mi na tapu a pasi fu ten di no skotu” (Psalm 139:23, 24).
21 David ben begi Yehovah fu ondrosuku en, fu si efu iniwan „sari pasi” ben de na ini en. A no de so taki wi e angri neleki a psalm skrifiman, fu Gado ondrosuku na ati fu wi, so taki a kan si efu wi abi takru prakseri? Fu dati ede, meki wi aksi Yehovah nanga bribi, fu ondrosuku wi. Ma san wi musu du te wan fowtu di wi meki e trobi wi, noso te wan sani de di e hati wi? We, meki wi tan begi wi lobi-ati Gado, Yehovah, nanga wi heri ati. Meki wi saka wisrefi tu na a tiri di wi e kisi fu a santa yeye fu Gado èn na a rai fu en Wortu. Wi kan de seiker taki a sa horibaka gi wi, èn taki a sa yepi wi fu tyari wisrefi na so wan fasi taki wi sa man kisi têgo libi.—Psalm 40:11-13.
22. San musu de wi fasti bosroiti ini a tori fu a Sma di wi no man si?
22 Iya, Yehovah sa blesi wi nanga têgo libi efu wi e doro den markitiki fu en. A no de fu taki dati wi musu erken a krakti nanga a makti fu en, soleki fa na apostel Paulus ben du dati di a ben skrifi: „Meki a Kownu fu têgo ten, di no man kisi pori, di sma ai no man si, a wan-enkri Gado, kisi grani nanga glori fu têgo èn fu ala ten. Amen” (1 Timoteus 1:17). Meki wi sori ala ten, taki nanga wi heri ati wi e gi Yehovah grani nanga lespeki tu. Èn awinsi san e pasa, meki a de so taki wi abi a fasti bosroiti ala ten fu tan stanfaste neleki wi e si a Sma di wi no man si.
San Yu Ben Sa Piki?
• Fa libisma man si Gado?
• Fa wi sa handri te wi e kisi frufolgu, efu Yehovah de wan trutru sma gi wi?
• San a wani taki fu si Yehovah leki wi Gran Leriman?
• Fu san ede wi musu wani srefisrefi taki Yehovah ondrosuku wi?
[Aksi fu a tori disi]
[Prenki na tapu bladzijde 18]
Moses di no ben frede Farao kwetikweti, ben handri neleki a ben kan si Yehovah, a Gado di wi no man si
[Prenki na tapu bladzijde 21]
Meki a de so taki noiti wi e handri neleki Yehovah no kan si san wi e du
[Prenki na tapu bladzijde 23]
Nanga wi heri ati wi e suku a sabi fu Gado, bika wi e si en leki wi Gran Leriman