Fu San Ede Wi Musu Studeri Bijbel?

BILL ben yongu, a ben bow leki wan sportman, a ben kisi bun skoro, èn a no ben mankeri noti na moni sei. Toku a no ben de tevrede. A no ben abi wan marki na ini en libi, èn a sani dati ben gi en furu broko-ede. Fu di a ben suku fu feni wan marki na ini a libi, meki a ondrosuku difrenti bribi, ma a no feni san a ben e suku. Na ini 1991 a miti wan Kotoigi fu Yehovah, di gi en wan buku di ben e taki fu a marki fu libi, soleki fa Bijbel e sori. Di Bill bigin studeri Bijbel nanga a Kotoigi, dan a ben man taki fu a tori disi èn so srefi fu tra tori.

Bill e memre: „Di mi studeri Bijbel nanga a Kotoigi fu a fosi leisi, èn fu di wi ben gebroiki a Bijbel so furu, dan mi ben sabi taki na disi mi ben e suku. Mi ben lobi den piki di Bijbel ben gi srefisrefi. Baka a bijbelstudie dati, mi rei go na den bergi, mi komoto na ini mi truck, èn mi bari bun tranga soso fu di mi ben firi prisiri. Mi ben breiti srefisrefi taki te fu kaba, mi ben e kisi piki tapu den aksi di mi ben abi.”

 A no de fu taki, dati a no ala sma di kon sabi Bijbel waarheid trutru e bari fu prisiri. Toku, furu sma e kisi prisiri te den e kon sabi den piki tapu den prenspari aksi di abi fu du nanga a libi fu wi. Den e firi neleki a man na ini na agersitori fu Yesus di ben feni wan gudu di sma ben kibri na ini wan gron. Yesus ben taki: „Fu di a de nanga prisiri a e go èn a e seri den sani di a abi èn a e bai a gron dati.”—Mateus 13:44.

Fa fu Kisi wan Marki na ini a Libi

Bill ben broko en ede nanga wan prenspari aksi: San na a marki fu a libi? Filosofiaman, sabiman fu kerki tori, nanga sabidensiman du muiti dusundusun yari kaba fu feni piki tapu na aksi dati. Sma skrifi bun furu buku soso fu pruberi fu piki na aksi dati. Ma den no ben abi bun bakapisi, èn furu sma e denki taki wan piki no de tapu na aksi disi. Toku, wan piki de. Ala di a piki disi na wan seryusu piki, toku a no de wan dangra piki. Bijbel e fruklari a piki disi. A sani di e meki taki wi e libi wan koloku libi di abi wan marki, na disi: Wi musu abi wan bun matifasi nanga Yehovah, wi Mekiman nanga hemel Tata. Fa wi kan kisi dati?

Tu fasi de fa wi kan kon krosibei fu Gado, ma a gersi leki den tu fasi disi de kontrari fu makandra. Den sma di e kon krosibei fu Gado e frede en, èn den lobi en so srefi. Meki wi poti prakseri na tu bijbeltekst di e horibaka gi a fruklari disi. Dusundusun yari bifo, a koni Kownu Salomo ben studeri libisma finifini èn a skrifi den sani di a kon sabi na ini a Bijbel buku Preikiman. Ala di a ben taki fu ala den sani di a ben kon sabi, dan a skrifi: „A bosroiti fu a tori, now di sma yere ala sani, de: Frede a tru Gado èn hori den komando fu en. Bika disi na a heri plekti fu libisma” (Preikiman 12:13). Hondrohondro yari baka dati, di sma ben aksi Yesus san ben de a moro prenspari komando na ini a Wet di Gado ben gi Moses, dan a piki: „Yu musu lobi Yehovah, yu Gado, nanga yu heri ati èn nanga yu heri sili èn nanga yu heri frustan” (Mateus 22:37). Yu feni en wan freimde sani taki wi musu frede Gado èn lobi en so srefi? Meki wi ondrosuku o prenspari a de fu frede èn fu lobi Gado so srefi, èn fa den tu sani disi de fanowdu fu kan abi wan bun matifasi nanga en.

San a Wani Taki fu Frede Gado

Te wi wani anbegi Gado na a fasi di a e feni bun, dan a de prenspari taki wi e frede en na wan lespeki fasi. Bijbel e taki: „A frede gi Yehovah na a bigin fu koni” (Psalm 111:10). Na apostel Paulus ben skrifi: „Meki wi tan abi no-frudini bun-ati, so taki wi kan du santa diniwroko gi Gado na wan fasi di a feni bun, nanga frede èn lespeki gi Gado” (Hebrewsma 12:28). Na a srefi fasi, na apostel Yohanes ben si wan engel na mindrisei fu hemel di ben bigin meki bun nyunsu bekènti nanga den wortu: „Frede Gado èn gi en glori.”—Openbaring 14:6, 7.

A frede disi di wi musu abi gi Gado, èn di de so tranga fanowdu efu wi wani abi wan marki na ini a libi, no de a srefi leki wan takru sortu frede. Kande wi e frede te wan ogri-ati èn kefalek ogriman wani du wi wan ogri. Ma a frede di wi musu abi gi Gado na wan bigi lespeki di wi musu abi gi a Mekiman. A abi fu du so srefi nanga wan gosontu frede di wi abi taki wi e du wan sani di Gado no sa feni bun, fu di en na a Moro Hei Krutuman èn na Almaktiwan, a Gado di abi a makti fu strafu den sma di no e gi yesi na en.

Wi Musu Abi Frede Nanga Lobi

Toku, Yehovah no wani taki sma e dini en soso fu di den e lespeki en. Moro leki iniwan tra gado, Yehovah na wan Gado fu lobi. Na apostel Yohanes ben kisi deki-ati fu skrifi: „Gado na lobi” (1 Yohanes 4:8). Yehovah Gado handri na wan tumusi lobi-ati fasi nanga libisma, èn fu dati ede a wani taki sma lobi en tu. Ma fa so wan lobi e kruderi nanga frede di wi musu abi gi en?  Fu taki en leti, a lobi èn a frede di wi musu abi gi Gado abi furu fu du nanga makandra. A psalm skrifiman ben skrifi: „A krosibei banti nanga Yehovah de gi den wan di e frede en.”—Psalm 25:14.

Poti prakseri nomo na a lespeki èn a frede di wan pikin abi gi wan papa di tranga èn di koni. Na a srefi ten, a lobi fu a papa sa abi krakti tapu so wan pikin. A pikin sa frutrow a papa èn a sa suku tiri na en, fu di a de seiker taki a tiri fu en sa tyari winimarki kon. Na a srefi fasi, efu wi lobi Yehovah èn e frede en so srefi, dan wi sa gi yesi na a rai di a e gi wi, èn disi sa tyari winimarki kon gi wi. Luku san Yehovah ben taki fu den Israèlsma: „Efu den ben o sreka na ati disi fu den nomo fu frede mi èn fu hori ala den komando fu mi ala ten, so taki a ben sa kan go bun nanga den èn nanga den manpikin fu den te ten di no skotu!”—Deuteronomium 5:29.

Iya, a bakapisi fu frede gi Gado no de katibo, ma fri, a no de sari, ma prisiri. Yesaya ben taki na fesi fu Yesus: „A frede fu Yehovah sa prisiri en” (Yesaya 11:3). Èn a psalm skrifiman ben skrifi: „Koloku fu a man di e frede Yehovah, di na ini den komando fu en a abi prisiri srefisrefi.”—Psalm 112:1.

A krin fu si taki wi no kan frede noso lobi Gado efu wi no sabi en. Fu dati ede a de prenspari taki wi e studeri Bijbel. So wan studie e yepi wi fu frustan suma na Gado èn wi sa kisi warderi te wi e kon si a koni fu a rai di a e gi wi. Te wi e kon krosibei na Gado, dan wi wani plisi en èn wi wani gi yesi na den komando fu en, fu di wi sabi taki den sa tyari winimarki kon gi wi.—1 Yohanes 5:3.

Wi e kisi prisiri te wi sabi taki wi e tyari wi libi na a yoisti fasi. Na so a de nanga Bill, di kari na a bigin fu na artikel disi. No so langa pasa a taki: „Na ini den neigi yari di pasa sensi mi bigin studeri Bijbel, dan a matifasi di mi abi nanga Yehovah kon moro krakti. A bigi koloku di mi ben firi, now kon tron wan trutru koloku fasi fu libi. Mi e denki bun fu a libi doronomo. Ala dei mi e du sani di warti, èn mi no e du den soso fu di mi e suku prisiri. Yehovah tron wan trutru sma gi mi, èn mi sabi taki a abi a bun fu mi na prakseri.”

Na ini na artikel di e kon, wi sa poti prakseri moro fara na fa sabi fu Yehovah e tyari prisiri nanga winimarki kon gi den sma di e gebroiki en na ini den libi.

[Prenspari pisi na tapu bladzijde 5]

Te wi e kon krosibei fu Gado dan dati wani taki dati wi lobi en èn taki wi e frede en so srefi

[Prenki na tapu bladzijde 6]

Yesus ben de nanga prisiri fu di a ben frede Yehovah