Meki Wi Prisiri fu di Wi Kon Sabi Yehovah
Meki Wi Prisiri fu di Wi Kon Sabi Yehovah
„Koloku fu den sma di e yere a wortu fu Gado èn e du en!”—LUKAS 11:28.
1. O ten Yehovah ben bigin fruteri libisma san den musu sabi?
YEHOVAH lobi libisma èn a trutru wani taki sani e waka bun gi den. Fu dati ede, a no de fu fruwondru taki a e fruteri den san den musu sabi. A tyari di Gado ben tyari sani kon na krin gi libisma, ben bigin na ini a dyari fu Eden. Soleki fa Genesis 3:8 e taki, dan wan leisi „na ini a pisi ten fu a dei di wan switi kowru winti ben bigin fu wai”, Adam nanga Efa „ben yere a sten fu Yehovah Gado”. Son sma e denki taki disi e sori krin, taki Yehovah ben gwenti fu taki nanga Adam na ini a pisi ten disi fu a dei, kande ibri dei. Awinsi fa a no fa, Bijbel e sori krin taki Gado ben teki a ten fu gi a fosi libisma rai. A ben leri en so srefi san a ben musu sabi, so taki a ben o man tyari den frantwortu fu en.—Genesis 1:28-30.
2. Fa a fosi man nanga uma ben hari densrefi puru fu a tiri fu Yehovah? San ben de a bakapisi fu dati?
2 Yehovah ben gi Adam nanga Efa libi. A ben gi den makti tapu den meti èn a ben gi den a frantwortu fu sorgu taki sani waka bun na heri grontapu. Wan enkri sani nomo den no ben musu du — den no ben musu nyan fu a bon fu sabi bun nanga ogri. Adam nanga Efa gi pasi taki Satan ben abi krakti na den tapu, dati meki den ben trangayesi a komando fu Gado (Genesis 2:16, 17; 3:1-6). Den ben wani du san den srefi ben feni bun. Dati wani taki dati den ben wani teki den eigi bosroiti fu san bun èn san ogri. Fu di den ben du dati, meki den ben handri na wan don fasi èn ben hari densrefi puru fu a tiri di a lobi-ati Mekiman fu den ben gi den. Den bakapisi ben takru srefisrefi gi den èn gi den bakapikin fu den di no ben gebore ete. Adam nanga Efa ben kon owru èn te fu kaba den dede. Den no abi a howpu tu fu kisi wan opobaka. Den bakapikin fu den kisi sondu nanga a bakapisi di sondu tyari kon — èn dati na dede.—Romesma 5:12.
3. Fu san ede Yehovah ben gi Kain rai, èn san Kain ben du nanga a rai dati?
3 Den fosi sma na ini Eden no ben wani gi yesi na Yehovah kwetikweti. Toku Yehovah ben tan fruteri den libisma di a meki, san den musu sabi. Kain, a fosi gebore manpikin fu Adam nanga Efa, ben handri na wan fasi di ben kan meki en du sondu te fu kaba. Yehovah ben warskow en taki a fasi fa a ben tyari ensrefi, ben o tyari problema kon. Gado ben gi en a rai fu „go du baka san bun”. Kain no ben wani arki a lobi-ati rai disi èn te fu kaba a kiri en brada (Genesis 4:3-8). Na so fasi, den fosi dri libisma na grontapu ben weigri fu teki a bun tiri fu a Sma di ben gi den libi. Den no ben wani gi yesi na den rai di Gado e gi a pipel fu en, so taki den kan gi densrefi wini (Yesaya 48:17). A sani disi ben musu meki Yehovah sari srefisrefi!
Yehovah E Meki Getrow Man fu Owruten Kon Sabi En
4. San Yehovah ben sabi seiker fu den bakapikin fu Adam? Sortu boskopu fu howpu a ben meki bekènti, fu di a ben sabi san den bakapikin fu Adam ben o du?
4 Ala di Yehovah ben abi a reti fu no fruteri libisma no wan sani moro, toku a no ben du dati. A ben de seiker taki wan tu fu den bakapikin fu Adam ben o handri na wan koni fasi, fu di den ben o poti prakseri na a tiri fu En. Fu eksempre, di Yehovah ben leisi strafu gi Adam nanga Efa, dan Yehovah ben taki na fesi taki wan „siri” ben o kon. A ben taki tu dati a „siri” ben o kakafutu gi a Sneki, Satan Didibri. Te fu kaba, a ben o masi Satan na a ede (Genesis 3:15). A profeititori disi ben de wan prisiri boskopu fu howpu gi „den sma di e yere a wortu fu Gado èn e du en”.—Lukas 11:28.
5, 6. San Yehovah ben du fu meki en pipel kon sabi en wani, bifo a fosi yarihondro G.T.? Fa disi ben gi den winimarki?
5 Yehovah ben meki den getrow famiri-edeman fu owruten, soleki Noa, Abraham, Isak, Yakob nanga Yob, kon sabi a wani fu en (Genesis 6:13; Exodus 33:1; Yob 38:1-3). Baka ten, a ben gebroiki Moses fu seti wan sistema fu wet nanga gronprakseri gi a nâsi Israèl. A Wet fu Moses ben gi den winimarki na furu fasi. Fu di Israèl ben gi yesi na a Wet, meki Gado ben poti den aparti fu ala den tra nâsi fu de a pipel fu en. Gado ben gi den Israèlsma a dyaranti taki te den ben gi yesi na a Wet, dan a ben o blesi den. A no ben o blesi den na materia sei wawan, ma so srefi na yeye fasi, fu di a ben o meki den tron wan kownukondre fu priester, wan santa nâsi. A Wet ben sori srefi sortu sani den ben kan nyan, san den no ben musu nyan èn san den ben musu du fu tan krin, so taki den ben man abi wan bun gosontu. Ma Yehovah ben warskow den tu gi den takru bakapisi di ben o kon efu den ben trangayesi.—Exodus 19:5, 6; Deuteronomium 28:1-68.
6 Baka wan pisi ten, Gado ben meki sma skrifi tra buku èn den buku dati ben tron wan pisi fu Bijbel tu. Historia tori ben fruteri fa Yehovah ben handri nanga nâsi èn folku. Wan tu buku di skrifi leki puwema, ben fruteri na wan tumusi moi fasi fu den eigifasi fu En. Profeiti buku ben taki na fesi fa a wani fu Yehovah ben sa kon tru te fu kaba. Getrow man fu owruten ben ondrosuku den buku disi finifini èn ben fiti den sani disi di Gado meki sma skrifi, na ini a libi. Wan fu den man dati ben skrifi: „Yu wortu na wan lampu gi mi futu, èn wan leti na tapu mi pasi” (Psalm 119:105). Te sma ben de klariklari fu arki, dan Yehovah ben gi den leri èn ben meki den kon frustan sani krin.
A Leti E Kon Krin Moro Nanga Moro
7. Fa sma ben sabi Yesus moro furu, ala di a ben du wondru, èn fu san ede?
7 Na ini a fosi yarihondro, Dyu kerki grupu ben meki libisma gwenti tron wan pisi fu a Wet. Den no ben gebroiki a Wet na a fasi fa Gado ben wani. So bun, na presi taki a Wet ben de wan sani di e gi sma frulekti, dan den libisma gwenti meki a tron wan hebi gi den (Mateus 23:2-4). Ma na ini 29 G.T., Yesus ben sori ensrefi leki a Mesias. A ben kon fu gi en libi gi a libisma famiri. Ma a ben kon so srefi fu „gi kotoigi fu a waarheid”. Ala di a ben du wondru, toku sma ben sabi en moro furu leki „a Leriman”. Den sani di a ben leri sma, ben de neleki wan leti di ben e skèin go na ini a dungru na yeye fasi di ben tapu a prakseri fu sma krinkrin. Yesus ben abi leti di a ben taki: „Mi na a leti fu grontapu.”—Yohanes 8:12; 11:28; 18:37.
8. Sortu buku Gado ben meki sma skrifi na ini a fosi yarihondro G.T.? Fa dati ben gi den fosi Kresten winimarki?
8 Baka ten, den fo Evangelie tori di e fruteri fu a libi fu Yesus, ben tron wan pisi fu Bijbel. Dati ben de so tu nanga a buku Tori fu den Apostel di e fruteri fa Krestendom panya go na ala sei baka di Yesus dede. Den brifi di Gado ben meki den disipel fu Yesus skrifi, ben de na ini tu èn so srefi a profeiti buku Openbaring. Den buku disi, makandra nanga den Hebrew Buku fu Bijbel, kon tron a heri Bijbel. Nanga yepi fu ala den buku disi di Gado meki sma skrifi, Kresten ben kan „frustan krinkrin nanga ala den santawan san na a bradi nanga a langa nanga a hei nanga a dipi” fu a waarheid (Efeisesma 3:14-18). Den ben kan abi „a denki fu Krestes” (1 Korentesma 2:16). Ma toku, den fosi Kresten no ben frustan ala sani bun di abi fu du nanga den prakseri fu Yehovah. Na apostel Paulus ben skrifi gi tra bribiman: „Nownowde wi no e si sani so krin nanga wan isri spigri” (1 Korentesma 13:12). Te wi e luku na ini so wan spigri, dan wi e si sani na ini, ma wi no man si den so soifri. Den ben sa kon frustan Gado Wortu moro krin, na ini a ten di e kon.
9. San Kresten kon frustan moro krin na ini „den lasti dei”?
9 Nownowde, wi e libi na ini wan pisi ten di Bijbel e kari „den lasti dei”. A de wan pisi ten „di tranga fu pasa” (2 Timoteus 3:1). A profeiti Danièl ben taki na fesi taki na ini a ten disi, „a tru sabi [ben] sa kon de pasa marki” (Danièl 12:4). Fu dati ede, Yehovah, a Sma di e fruteri libisma ala san den musu sabi, yepi opregti sma fu frustan a Wortu fu en. Ipi-ipi sma e frustan now taki Krestes Yesus ben poti leki Kownu na hemel na ini 1914. Den sabi tu taki dyonsro a sa tyari ala godelowsufasi kon na wan kaba èn taki a sa meki heri grontapu kon tron wan paradijs. A prenspari pisi tori disi fu a bun nyunsu fu a Kownukondre, e preiki now na heri grontapu.—Mateus 24:14.
10. Fa sma handri na ini den hondrohondro yari di pasa, te Yehovah gi den rai?
10 Iya, na ini a heri historia, Yehovah meki sma na grontapu kon sabi a wani nanga a prakseri fu en. Bijbel e taki fu someni sma di ben arki, di ben libi akruderi a koni fu Gado, èn di ben kisi blesi fu di den ben du dati. A e taki fu trawan di no ben wani arki a lobi-ati rai fu Gado, so taki den handri neleki Adam nanga Efa èn ben ondrofeni den takru bakapisi fu dati srefisrefi. Yesus ben fruklari a situwâsi disi di a ben taki fu tu agersi pasi. Wan pasi e tyari sma go na pori. A pasi dati bradi, a bigi, èn furu sma di no wani gi yesi na Gado Wortu e waka na en tapu. A tra pasi e tyari sma go na têgo libi. Ala di a pasi dati smara, toku wan tu sma de di e waka na en tapu. Dati na den sma di e erken a Bijbel leki san a de trutru, namku a Wortu fu Gado èn di e libi akruderi a Wortu dati.—Mateus 7:13, 14.
Wi Musu Warderi San Wi Abi
11. San a sabi di wi sabi Bijbel èn a bribi di wi e bribi na ini en, e sori krin?
11 Yu de wan fu den sma di teki a pasi di e tyari sma go na libi? Efu dati de so, dan sondro tweifri yu ben sa wani tan na tapu a pasi dati. Fa yu kan du dati? Prakseri dipi èn nanga tangi na ati, fu den blesi di yu kisi na ini yu libi, fu di yu kon sabi den waarheid fu Bijbel. A gi di yu gi yesi na a bun nyunsu, e sori taki Gado feni yu bun èn taki a blesi yu. Yesus ben sori disi krin di a ben begi en Tata nanga den wortu disi: „Mi e prèise yu na publiki, Tata, Masra fu hemel nanga grontapu, bika yu kibri den sani disi gi den koniwan èn gi den wan di tya-ede èn tyari den kon na krin gi nyofi pikin” (Mateus 11:25). Fisiman nanga belastingman ben frustan den sani di Yesus ben leri, ma den kerki fesiman di ben kisi furu skoroleri, no ben man frustan den sani dati srefisrefi. Yesus ben taki moro fara: „No wan sma kan kon na mi, boiti efu a Tata, di ben seni mi kon, e hari en kon” (Yohanes 6:44). Efu yu kon sabi Bijbel, èn yu e bribi èn e libi akruderi den sani di Bijbel e leri, dan disi e sori krin taki Yehovah hari yu. Dati na wan sani di e gi prisiri srefisrefi.
12. Na sortu fasi Bijbel e meki sma frustan sani moro krin?
12 Gado Wortu abi waarheid na ini di e meki sma kon fri, èn a e meki den frustan sani moro krin. Den wan di e libi akruderi a sabi fu Bijbel, e kon fri fu sani di e basi a libi fu milyunmilyun sma, soleki kruktu bribi, falsi kerkileri, èn a sabi di den no ben sabi noti fu waarheid. Fu eksempre, fu di wi sabi a waarheid di abi fu du nanga a sili, meki wi no frede moro taki den dedewan kan du wi ogri, noso taki den lobiwan fu wi di dede, e pina (Esekièl 18:4). A sabi di wi sabi a waarheid ini a tori fu ogri yeye, e yepi wi fu wai pasi gi den takru bakapisi fu afkodrei. A leri fu na opobaka e trowstu den wan di lasi wan lobiwan na ini dede (Yohanes 11:25). Bijbel profeititori e sori wi pe wi de now na ini a ten di e gowe doronomo, èn den e meki wi abi wan tranga bribi na ini den sani di Gado pramisi gi a ten di e kon. Den e meki tu taki a howpu di wi e howpu fu libi fu têgo, e kon moro tranga.
13. Fa wi e kisi winimarki na skin sei te wi e gi yesi na Gado Wortu?
13 Den gronprakseri di Gado gi wi na ini Bijbel, e leri wi fu tyari wisrefi na so wan fasi, taki sani kan waka bun gi wi na skin sei. Fu eksempre, wi e leri taki wi no musu du sani di e doti a skin fu wi, soleki fu no gebroiki tabaka nanga tra drugs na wan fowtu fasi. Wi no e dringi sopi pasa marki (2 Korentesma 7:1). Te wi e gi yesi na den wet fu Gado di e sori fa wi musu tyari wisrefi na wan krin fasi, dan dati e kibri wi gi den siki di sma e gi trawan nanga yepi fu seks (1 Korentesma 6:18). Te wi e hori wisrefi na a rai fu Gado fu no lobi moni, dan wi no e pori a korostu firi di wi abi na ini wi ati, soleki fa furu sma du di e feti na baka gudu nomo (1 Timoteus 6:10). Na sortu fasi yu kisi winimarki na skin sei fu di yu teki a tiri fu Gado Wortu na ini yu libi?
14. Fa a santa yeye abi krakti na tapu wi libi?
14 Te wi e libi akruderi Gado Wortu, dan wi e kisi a santa yeye fu Yehovah. Wi e kon abi eigifasi leki di fu Krestes, di ben sori tumusi moi eigifasi soleki sari-ati (Efeisesma 4:24, 32). A yeye fu Gado e meki wi tyari den froktu fu a yeye tu — lobi, prisiri, vrede, langa pasensi, switifasi, bun-ati, bribi, safri-atifasi, èn a dwengi di wan sma e dwengi ensrefi (Galasiasma 5:22, 23). Den eigifasi disi e meki wi de koloku fu di wi e kon abi tumusi bun matifasi nanga tra sma, so srefi nanga den sma na ini wi osofamiri. Wi e kisi krakti na ini wi di e yepi wi fu kakafutu gi problema nanga deki-ati. Yu e si krin fa santa yeye abi krakti na yu tapu, so taki a meki yu libi kon moro bun?
15. Fa wi e kisi winimarki te wi e libi akruderi a wani fu Gado?
15 Te wi e tyari wi libi akruderi a wani fu Yehovah, dan wi e meki a matifasi di wi abi nanga en, kon moro tranga. Wi e kon bribi moro nanga moro taki a e frustan wi èn taki a lobi wi. Den sani di wi e ondrofeni na ini a libi, e meki wi si taki a e horibaka gi wi na ini muilek ten (Psalm 18:18). Wi e frustan taki a trutru e arki den begi fu wi (Psalm 65:2). Wi e kon frutrow tapu a tiri fu en, èn wi sabi taki a tiri fu en sa gi wi winimarki trutru. Èn wi abi a tumusi moi howpu taki na a reti ten, Gado sa meki den getrow sma kon de volmaakti èn taki a sa gi den a presenti fu têgo libi (Romesma 6:23). „Kon krosibei na Gado, èn en sa kon krosibei na unu”, na so a disipel Yakobus ben skrifi (Yakobus 4:8). Yu feni taki a matifasi fu yu nanga Yehovah kon moro tranga, fu di yu kon krosibei na en?
Bijbel Waarheid Warti Moro Ala Tra Sani
16. Sortu kenki wan tu fosi yarihondro Kresten ben tyari kon?
16 Paulus ben memre den salfu Kresten fu a fosi yarihondro taki son wan fu den ben de anbegiman fu kruktu gado wan ten, so srefi sutaman, mansma di lobi mansma, fufuruman, sma di ben abi bigi-ai, drunguman, skempiman, nanga bedrigiman (1 Korentesma 6:9-11). Bijbel waarheid meki taki den ben tyari bigi kenki kon; den ben „wasi kon krin”. Prakseri fa yu libi ben sa de, efu yu no ben leri den waarheid fu Bijbel di e meki sma kon fri. Fu tru, Bijbel waarheid warti moro ala tra sani srefisrefi. Wi e prisiri trutru taki Yehovah e fruteri wi ala san wi musu sabi!
17. Fa Yehovah Kotoigi ben kisi nyanyan na yeye fasi na den Kresten konmakandra?
17 Moro fara, prakseri fu den blesi di wi abi na ini a bradafasi fu wi pe sma fu ala sortu ras de fu si! „A getrow èn koni srafu” e gi wi nyanyan na yeye fasi na a yoisti ten, soleki Bijbel, tijdschrift, nanga tra publikâsi na ini furu tongo (Mateus 24:45-47). Na den gemeente konmakandra na ini a yari 2000, Yehovah Kotoigi na ini furu kondre ben taki fu prenspari sani di teki puru fu aiti prenspari buku fu den Hebrew Buku fu Bijbel. Den ben prakseri dipi fu a libi fu 40 sma fu Bijbel, di a buku Inzicht in de Schrift e taki fu den. Den ben luku wan pisi fu a buku di nen A moro bigi man di oiti ben libi èn pikinmoro a heri buku di abi leki nen ¡Poti Prakseri na a Profeititori fu Danièl! Boiti taki den ben studeri 52 studie artikel, den ben poti prakseri tu na 36 tra artikel na ini a Waktitoren tijdschrift. Boiti dati, a pipel fu Yehovah ben kisi 12 uitgave fu Wi Kownukondre Diniwroko di den ben nyan bun fu den, èn ibri wiki den ben kisi publikitaki so srefi di e taki fu difrenti tori fu Bijbel. Bun furu sabi na yeye fasi de fu kisi trutru!
18. Na sortu fasi wi e kisi yepi na ini a Kresten gemeente?
18 Na heri grontapu, moro leki 91.000 gemeente de. Na ini den gemeente disi, sma e kisi yepi nanga deki-ati te den e go na den konmakandra. Wi e prisiri tu taki tra Kresten di lepi na yeye fasi, e horibaka gi wi èn taki den de klariklari fu yepi wi na yeye fasi (Efeisesma 4:11-13). Iya, wi kisi winimarki trutru fu di wi kisi sabi fu a waarheid. A de wan prisiri fu sabi Yehovah èn fu dini en. Den wortu fu a psalm skrifiman tru srefisrefi, di ben skrifi: „Koloku fu a pipel di en Gado na Yehovah!”—Psalm 144:15.
Yu E Memre Disi Ete?
• Suma Yehovah ben meki kon sabi a wani fu en, bifo a ten fu den Kresten?
• Fa a leti na yeye fasi ben skèin moro nanga moro na ini a fosi yarihondro? Fa a leti disi skèin moro nanga moro na ini a ten disi?
• Sortu winimarki wi e kisi te wi e libi akruderi a sabi fu Yehovah?
• Fu san ede wi e prisiri nanga a sabi di wi kon sabi Gado?
[Aksi fu a tori disi]
[Prenki na tapu bladzijde 8, 9]
Yehovah ben meki Moses, Noa nanga Abraham, kon sabi a wani fu en
[Prenki na tapu bladzijde 9]
Na ini a ten fu wi, Yehovah skèin leti tapu a Wortu fu en
[Prenki na tapu bladzijde 10]
Prakseri fu den blesi di wi abi na ini a bradafasi fu wi, pe sma fu ala sortu ras de fu si!