Sani Di Sma E Tan Memre

IBRI yari Yehovah Kotoigi e kon makandra na bigi Kresten konmakandra èn kongres na ini a kondre pe den e tan. Den e du disi fu kan kisi leri di e bow sma èn so srefi fu abi bun demakandra. Ma tra sani di abi fu du nanga a kon di den e kon makandra kan meki fisitiman tan memre san den ben si.

Na ini yuli 1999, fu eksempre, dusundusun Kotoigi fu Mosambik ben kon makandra na den dri dei „Profeiti Wortu fu Gado” Distrikt Kongres di gi den furu leri. Furu fu den wan di ben de drape ben kon fositron na wan kongres. San ben naki den ati no ben de den wortu nomo di den ben yere na a podium, ma so srefi den sani di den ben si drape.

Wan fu den sani di sma ben taki na a konmakandra presi na Maputo ben de: „Noiti ete mi si so wan moi presi leki a disi! A wasi-oso ben abi sopo nanga spikri, èn yu ben kan smeri srefi taki a krin. Dyugudyugu no ben de èn yu no ben e yere a babari fu pikin di e feti. Sma no ben e pusu trawan fu kan du san den wani! Mi ben si yongu sma di koloku èn di ben abi moi takimakandra nanga trawan. San ben naki mi ati tu ben de a fasi fa ibriwan sma ben weri krosi di fiti na okasi. Wan tra leisi mi o tyari den pikin fu mi èn mi o taigi mi masra taki wi osofamiri musu kon na a kongres.”

Iya, sma e si taki Yehovah Kotoigi de eerlijk, opregti èn krin. Fu san ede den no de leki tra sma? Bika den e pruberi fu du trutru san den e leri fu Bijbel. Fu san ede yu no e kon makandra nanga den a yari disi na a kongres di o hori na ini yu kondre noso na den alawiki konmakandra na a Kownukondre zaal na ini a birti fu yu, so taki yusrefi kan si efu a tru?

[Prenki na tapu bladzijde 32]

SAMBIA

[Prenki na tapu bladzijde 32]

KENIA

[Prenki na tapu bladzijde 32]

MOSAMBIK