Ondrofenitori

Wi Tesi Yehovah

SOLEKI FA PAUL SCRIBNER FRUTERI

„Kumorgu, Misi Stackhouse. Mi e luku suma wani bai wan kuku gi Pasen, èn mi de seiker taki yu ben sa wani wán gi yu osofamiri.” A ben de na a bigin fu a lente fu 1938, èn mi ben de na ini a foto Atco di de na ini a distrikt New Jersey na Amerkankondre. Mi ben e taki nanga wan fu den moro bun klanti fu mi di ben e bai den sani di mi ben seri gi a General Baking Company. Mi skreki di Misi Stackhouse taigi mi taki a no ben wani bai wan kuku.

„MI NO wani wan kuku”, a taki. „Wi no e hori Pasen.”

Now mi no ben sabi san mi ben musu prakseri. Fa a kan taki den no e hori Pasen? A no de fu taki, dati sma di e seri sani musu hori na prakseri taki ala ten den musu lespeki a wani fu wan klanti. Ma san mi ben musu du now? „We”, mi bigin taki, „a kuku switi srefisrefi, èn mi sabi taki yu lobi den sani di wi e seri. Yu no denki taki yu osofamiri ben o breiti nanga a kuku disi, srefi te yu, ehm, no e hori Pasen?”

„Mi no denki so”, a piki, „ma mi ben wani taki fu wan sani nanga yu, Masra Scribner, èn kande a ben o bun efu mi e taki nanga yu now.” A takimakandra dati ben o kenki mi heri libi! Misi Stackhouse ben de wan memre fu a gemeente fu Yehovah Kotoigi na ini a foto Berlin di de na ini a distrikt New Jersey. Na uma disi fruteri mi fa Pasen ben bigin èn a gi mi dri pikin buku. Den ben nen Veiligheid, Blootgelegd, nanga Bescherming. Mi tyari den buku go na oso, èn ala di mi ben wani sabi san ben skrifi na ini den, mi ben frede pikinso. Wan sani di Misi Stackhouse ben taki, ben meki mi prakseri a ten di mi ben yongu.

Mi Ben Abi Kontakti Kaba Nanga den Bijbel Ondrosukuman

Mi gebore tapu 31 yanuari 1907, èn na ini 1915 di mi ben abi aiti yari, kanker kiri mi papa. Fu dati ede mi nanga mi mama gowe go libi nanga  mi granpapa nanga granmama na mama sei. Den ben tan na ini wan bigi oso na ini a foto Malden di de na ini a distrikt Massachusetts. Benjamin Ransom, mi omu fu mi mama sei, ben libi drape tu nanga en wefi. Den ben tan na ini a di fu dri sodro fu na oso. Sensi bifo a di fu 20 yarihondro ben bigin, Omu Ben ben de wan fu den Internationaal Bijbel Ondrosukuman, soleki fa sma ben sabi Yehovah Kotoigi na a ten dati. Mi ben lobi Omu Ben, ma den tra memre fu mi mama en famiri, di ben de Methodist, ben feni taki a ben e du law. Yari baka dati, bifo en wefi ben prati nanga en, a bribi di Omu Ben ben abi, meki taki en wefi poti en na wan lawman-oso gi wan syatu pisi ten! Fu di heri esi den datra na ini na ati-oso kon si taki noti no ben mankeri Omu Ben en frustan, meki den seni en gowe èn den aksi en pardon.

Omu Ben ben tyari mi go na den konmakandra fu den Internationaal Bijbel Ondrosukuman na ini a foto Boston. A ben du so spesrutu te sma ben o kon drape fu hori wan lezing, noso te wan tra spesrutu sani ben o pasa. Wan leisi, a sma di ben kon fu hori wan lezing, ben de Charles Taze Russell srefi, di ben tiri a preikiwroko na a ten dati. Wan tra leisi, den ben sori a felem „Photo-Drama der Schepping”. Ala di a ben de na ini 1915, toku te na a dei fu tide, mi e memre krinkrin fa a felem ben sori fa Abraham ben teki Isak tyari go na tapu a bergi fu gi en leki ofrandi (Genesis, kapitel 22). Mi e si ete fa Abraham nanga Isak e waka go na tapu a bergi nanga wan lai udu, ala di Abraham ben frutrow dorodoro tapu Yehovah. Fu di mi no ben abi papa, dan a sani dati trutru naki mi ati.

Ne Omu Ben nanga en wefi froisi go tan na ini a distrikt Maine, èn mi mama trow baka èn wi froisi go tan na ini a distrikt New Jersey. A sani disi meki taki mi no si Omu Ben wan heri pisi ten. Di mi ben de wan tini na ini New Jersey, dan mi miti Marion Neff, wan fu den aiti pikin na ini wan Presbyter osofamiri pe mi ben lobi fu go. Mi ben de someni sonde neti na a famiri dati èn nanga den yongu sma na ini a kerki, taki te fu kaba, misrefi tron wan Presbytersma. Ma mi no ben frigiti wan tu fu den sani di mi ben leri na den konmakandra fu den Bijbel Ondrosukuman. Mi nanga Marion trow na ini 1928, èn den umapikin fu wi, Doris nanga Louise, gebore na ini 1935 nanga 1938. Fu di wi ben abi wan yongu pikin èn so srefi wan beibi, dan wi ala tu kon si taki wi ben abi tiri na yeye fasi fanowdu fu kweki den pikin disi.

Wi E Feni Waarheid na ini den Pikin Buku Di Mi Ben Kisi

Mi nanga Marion ben suku wan kerki fu go na ini èn wi teki wan bosroiti. Ibri sonde, mi noso Marion ben o tan na oso nanga den pikin, ala di a trawan ben o go na wan spesrutu kerki fu si fa sani ben e waka drape. Wan spesrutu sonde Marion ben musu tan na oso now, ma mi aksi en efu mi ben kan tan na oso fu luku den pikin. Na so fasi mi ben kan leisi a pikin buku Veiligheid, a fosiwan fu den dri pikin buku di Misi Stackhouse ben gi mi. Di mi bigin leisi a buku, mi no ben man tapu! Moro nanga moro mi ben bribi taki mi ben feni wan sani di no wan tra kerki ben kan gi sma. A wiki na baka, a srefi sani pasa, èn mi ben wani fu tan na oso fu luku den pikin, ala di mi ben leisi a di fu tu pikin buku, Blootgelegd. A ben gersi leki mi ben sabi den sani di mi ben leisi. Na disi Omu Ben ben bribi? Den famiri fu mi ben  feni taki a bribi fu en no ben bun. San Marion ben o feni fu a sani disi? Mi no ben abi fu broko mi ede. Wan tu dei baka di mi ben leisi a buku Blootgelegd, mi doro oso fu wroko èn Marion fruwondru mi di a taki: „Mi leisi den pikin buku di yu tyari kon. Den moi trutru.” Mi ati ben sidon now!

Na bakasei fu den buku wan sani ben skrifi fu a nyun buku Enemies (Feanti) di ben tyari kon na doro, èn a buku disi ben krutu falsi bribi fayafaya. Wi teki a bosroiti fu feni a buku disi. Ma bifo wi ben man seni wan brifi gowe, wan Kotoigi kon na wi oso èn a gi wi a srefi buku dati. A buku dati yepi wi fu teki wan bosroiti! Wi no go na den kerki moro èn wi bigin go na den konmakandra na ini a gemeente fu Yehovah Kotoigi na ini a foto Camden di de na ini a distrikt New Jersey. Wan tu mun nomo baka dati, tapu sonde, 31 yuli 1938, wan grupu fu sowan 50 sma kon makandra na a dyari fu Sisa Stackhouse, na oso pe mi ben pruberi fu seri kuku gi Pasen. Wi arki wan dopu lezing tapu cassette, di Krutuman Rutherford ben hori. Baka dati wi kenki krosi na ini na oso, èn 19 sma fu a grupu teki dopu na ini wan kriki di ben de krosibei.

Mi Abi a Fasti Bosroiti fu Tron wan Pionier

Syatu baka di mi dopu, wan fu den sisa fu a gemeente fruteri mi fu sma di ben de pionier, èn di  ben teki a preikiwroko leki a moro prenspari wroko na ini den libi. Mi ben wani sabi moro wantronwantron èn heri esi mi kon sabi wan heri famiri di ben de pionier. Wan owruman, Brada Konig, en wefi, nanga en bigi umapikin ben de pionier na ini wan krosibei gemeente. A bigi prisiri di a Konig osofamiri ben kisi fu a diniwroko ben naki na ati fu mi leki papa fu wan yongu osofamiri. Furutron mi ben go na den, mi ben parkeer a truck fu a bakri-oso, èn mi ben go nanga den na ini na oso-fu-oso diniwroko. Heri esi misrefi ben wani du pionierwroko. Ma fa dan? Mi nanga Marion ben abi tu yongu pikin, èn a wroko fu mi ben teki furu fu mi ten. A ben de so srefi taki a di fu Tu Grontapufeti ben bigin na ini Europa èn moro nanga moro yonkuman ben tron srudati na ini a legre fu Amerkankondre. Disi ben abi leki bakapisi taki a wroko fu den wan di no ben du srudati wroko, ben kon moro hebi. Mi wrokobasi ben dwengi mi fu teki moro wroko, èn mi ben sabi taki noiti mi ben o man pionier nanga so wan schema.

Di mi taigi Brada Konig taki mi ben wani pionier, dan a taki: „Tan wroko tranga na ini a diniwroko fu Yehovah, èn tan begi en fu yepi yu nanga a marki di yu abi. A sa yepi yu fu doro en.” Mi tan du dati moro leki wán yari langa. Furutron mi ben prakseri bijbeltekst soleki Mateus 6:8, di e gi wi a dyaranti taki Yehovah sabi san wi abi fanowdu bifo wi e aksi en srefi. Èn mi tan pruberi fu du san Mateus 6:33 e gi leki rai, fu tan suku fosi Gado Kownukondre nanga en regtfardikifasi. Brada Melvin Winchester, wan kringopziener, ben gi mi deki-ati tu.

Mi taigi Marion sortu marki mi ben abi. Wi taki fu den wortu fu Maleaki 3:10, di e gi wi deki-ati fu tesi Yehovah èn si efu a no sa kanti blesi kon na wi tapu. A fasi fa a piki ben gi mi deki-ati: „Efu yu wani pionier, no broko yu ede nanga mi. Mi kan luku den pikin ala di yu e pionier. Èn fu taki en leti, wi no abi furu materia sani fanowdu.” Na ini den 12 yari di wi ben trow kaba, mi ben kon sabi taki Marion ben de wan wefi di no ben frumorsu sani èn a no ben du sani bruyabruya. Na ini den yari di pasa, a wroko makandra nanga mi leki wan tumusi bun pionier patna. Wan sani di meki taki wi ben abi bun bakapisi na ini pikinmoro 60 yari di wi wroko na ini a furuten diniwroko, na fu di a de tevrede nanga pikinso èn fu di a e meki a gersi leki wi abi furu.

Na a ten fu a zomer fu 1941, baka di wi ben sreka sani furu mun langa nanga yepi fu begi, dan mi nanga Marion ben poti pikinso moni na wan sei, èn wi bai wan wagi pe wi osofamiri ben kan libi na ini. A ben langa 5,5 meter. Mi gowe libi mi wroko èn mi tron wan gewoon pionier na ini yuli 1941, èn sensi a ten dati mi de na ini a furuten diniwroko. A fosi toewijzing di mi kisi fu du ben de taki mi ben musu go preiki na tin difrenti presi pe bus nanga loko e stop na a pasi fu Route 50. A pasi disi ben waka fu a distrikt New Jersey go na a foto St. Louis di de na ini a distrikt Missouri, pe wi kongres ben o hori na a bigin fu augustus. Mi kisi den nen nanga den adres fu brada nanga sisa di ben libi na tapu pasi go drape, èn mi skrifi den fu taigi den o ten mi ben o kon na den. Di wi doro na a kongres, dan mi ben musu feni a pionier afdeling fu kisi wan tra toewijzing.

„Mi O Tesi Yehovah”

Wi lai a pikin wagi fu wi nanga publikâsi, èn wi go na wi lasti konmakandra na ini a foto Camden fu taigi den brada drape adyosi. Boiti a kongres wi no ben abi no wan tra presi fu go èn wi ben abi tu yongu meisje di wi ben musu sorgu. Sonwan fu den brada kande ben denki taki wi no ben teki wan bun bosroiti, èn wan tu fu den ben taki: „A no sa teki langa bifo unu sa drai baka.” Mi e memre taki mi taigi den: „We, mi no e taki dati mi no sa drai kon baka. Yehovah taki dati a ben o sorgu mi, èn mi o tesi Yehovah.”

Baka di mi pionier 60 yari na ini 20 foto, fu a distrikt Massachusetts te go miti a distrikt Mississippi, dan wi kan taki dati Yehovah du moro leki san a pramisi. Den blesi di a kanti na tapu mi, Marion, nanga den tu umapikin fu wi na moro leki iniwan sani di wi ben kan howpu fu kisi na ini 1941. Wi kisi a blesi taki wi umapikin e dini leki getrow pionier na ini gemeente di de krosibei, èn nownowde (soleki fa wi ben teri a lasti leisi) wi abi pikinmoro wán hondro yeye manpikin nanga umapikin na ala sei fu a Owstusei Syoro fu Amerkankondre. Mi studeri nanga 52 sma di gi den libi abra na Yehovah Gado èn Marion studeri nanga 48 sma.

Na ini augustus 1941, wi go na St. Louis, èn  drape mi miti Brada T. J. Sullivan di ben de fu Bethel. A ben abi a brifi fu mi di ben taki dati mi ben de wan kerki dinari, èn mi ben abi a brifi dati fanowdu fu di orloku ben kan broko wantronso èn fu di lanti ben fruplekti sma fu go feti na ini a legre. Mi taigi Brada Sullivan taki mi wefi ben preiki den srefi yuru leki mi èn taki a ben sa wani pionier nanga mi. Ala di a pionier kantoro no ben seti ete na a kongres, toku Brada Sullivan poti Marion leki pionier wantron èn a aksi wi: „Pe unu e go pionier baka a kongres?” Wi no ben sabi. „We, unu no musu broko un ede”, a taki: „Na a kongres unu sa miti wan sma fu wan kontren di abi pionier fanowdu, èn ala sani sa waka bun. Unu musu skrifi wan brifi kon gi wi nomo fu taigi wi pe unu de, èn wi sa poti unu leki pionier.” Na dati pasa. A sori taki Brada Jack DeWitt, di ben de wan kringopziener fosi, ben sabi wan tu sma na ini a foto New Market di de na ini a distrikt Virginia. Den sma disi ben abi wan pionier-oso di ben abi wan tu pionier fanowdu ete. So bun, baka a kongres, wi go na New Market.

Na ini New Market wan kefalek moi sani miti wi. Suma ben komoto fu a foto Philadelphia fu kon pionier makandra nanga wi? Benjamin Ransom! Iya, Omu Ben. A ben de trutru wan prisiri fu wroko makandra nanga en na ini a oso-fu-oso preikiwroko, moro leki 25 yari baka di a ben prani den siri fu waarheid ini mi ati na ini Boston! Ala di furu yari langa a ben abi fu du nanga a mi-no-ke fasi fu sma, nanga spotu, èn so srefi nanga frufolgu fu den famiriman fu en, toku Omu Ben noiti lasi en lobi gi Yehovah èn gi a diniwroko.

Wi tan aiti mun langa na a pionier-oso na ini New Market. Na a ten dati, wi leri so srefi fa fu kisi fowru nanga eksi gi den publikâsi di wi ben gi sma. Baka dati, mi, Omu Ben, Marion, nanga dri trawan ben musu go wroko leki spesrutu pionier na ini a foto Hanover di de na ini a distrikt Pennsylvania. Disi ben de a fosiwan fu den siksi toewijzing di wi kisi na ini Pennsylvania fu 1942 te go miti 1945.

Spesrutu Pionier na a Ten fu a Di fu Tu Grontapufeti

Son leisi, na a ten fu a di fu Tu Grontapufeti, wi ben miti sma di ben abi feantifasi gi wi, fu di wi no ben teki partèi na ini grontapu afersi. Ma ala ten Yehovah ben horibaka gi wi. Wan leisi di wi ben de na ini a foto Provincetown di de na ini a distrikt Massachusetts, dan wi owru Buick oto ben broko. Fu dati ede mi ben musu waka wan tu kilometer pasa wan Lomsu birti fu go na wan gobaka. Den sma fu a birti dati no ben lobi wi srefisrefi. Mi pasa wan grupu fu ogri boi di ben kon sabi suma na mi èn den bigin meki babari. Mi hasti misrefi komopo fu drape ala di mi ben firi fa ston ben frei pasa mi yesi, èn mi ben howpu taki den boi no ben o lon baka mi. Mi ben man doro na a oso fu a sma di ben wani sabi moro, sondro taki mi ben kisi mankeri. Ma a sma fu na oso di ben de wan lespeki memre fu na Amerikaanse Oudstrijderbond (Wan grupu fu owru srudati di ben de nanga pensyun), aksi mi pardon èn a taki: „Mi no man taki nanga yu tide neti, bika mi ben frigiti taki wi ben o go luku wan kino na foto.” Mi bigin frede di mi ben prakseri a grupu fu boi na tapu na uku di ben fringi ston na mi tapu, èn di ben wakti fu mi pasa drape baka. Ma mi ben breiti di a man taki moro fara: „Yu no wani waka nanga wi? Wi kan taki na pasi.” Na so fasi mi ben man gi en kotoigi, èn mi pasa den boi sondro taki wan sani ben pasa nanga mi.

Mi E Gi Ten na Mi Osofamiri èn na a Diniwroko

Baka na orloku, wi ben abi wan tu toewijzing na ini Virginia, èn wi tan aiti yari na ini a foto Charlottesville leki spesrutu nanga gewoon pionier. Na a ten fu 1956 den meisje ben kon bigi kaba èn den ben trow. Mi nanga Marion ben e reis baka fu a wan presi go na a trawan, ala di wi ben e dini leki pionier na ini a foto Harrisonburg na ini Virginia, èn leki spesrutu pionier na ini a foto Lincolnton di de na ini a distrikt North Carolina.

Na ini 1966 mi ben musu go du kringwroko, èn mi ben musu go fu a wán gemeente go na a trawan fu gi den brada deki-ati, na a srefi fasi fa Brada Winchester ben gi mi deki-ati na ini New Jersey ini den yari di de na mindri 1930-1940. Tu yari langa mi dini wan kring fu gemeente na ini a distrikt Tennessee. Baka dati a Genootschap aksi mi nanga Marion fu go du baka san wi ben lobi moro furu èn dati na a spesrutu pionierwroko. Fu 1968 te go miti 1977, wi dini leki spesrutu pionier  na a Zuidsei fu Amerkankondre, na ala sei fu den distrikt Georgia nanga Mississipi.

Na ini a foto Eastman di de na ini a distrikt Georgia, mi kisi a wroko fu fesiman opziener. Mi ben musu teki a presi fu Powell Kirkland, wan lobi owru brada di ben dini furu yari langa leki kringopziener, ma di ben kon swaki now. A brada disi ben de nanga tangi na ati srefisrefi èn a ben horibaka gi mi. A ben de fanowdu srefisrefi taki a ben horibaka gi mi, bika wan tu kesekese ben de na ini a gemeente èn wan tu heihei sma ben de ini a tori. A tori ben kon faya, èn mi begi Yehovah furu. Mi ben prakseri bijbeltekst soleki Odo 3:5, 6: „Frutrow tapu Yehovah nanga yu heri ati èn no frutrow tapu yu eigi frustan. Poti prakseri na en na ini ala yu pasi, èn ensrefi sa meki yu pasi kon reti.” Fu di mi ben e du muiti fu taki fri nanga ala sma, dati meki wi ben man tyari wánfasi kon baka na ini a gemeente èn dati ben abi bun bakapisi gi ala sma.

Na a ten fu 1977 wi ben bigin firi kaba taki wi ben kon owru, èn wi ben musu go wroko now na ini a gebied fu a foto Charlottesville, pe ala den tu umapikin fu wi ben libi nanga den osofamiri. Na ini den 23 yari di pasa, wi prisiri fu wroko na ini a kontren disi, èn wi yepi fu opo a gemeente Ruckersville na ini a distrikt Virginia. Wi si so srefi fa den pikin nanga den granpikin fu den fosi bijbelstudie fu wi gro kon tron gemeente owruman, pionier, nanga Bethel wrokoman. Mi  nanga Marion man teki prati doronomo ete na a preikiwroko, èn mi abi a grani fu dini leki wan owruman na ini a gemeente Oost fu a foto Charlottesville. Mi e hori so srefi wan bukustudie èn mi e hori publikitaki.

Na ini den yari di pasa, furu problema miti wi, soleki fa a de nanga ala sma. Fu gi wan eksempre, ala di wi ben meki muiti nanga en, Doris ben kon swaki na yeye fasi wan pisi ten di a ben abi krosibei fu 20 yari, èn a trow nanga wan man di no ben de wan Kotoigi. Ma noiti a lasi en lobi gi Yehovah dorodoro, èn a manpikin fu en, Bill, e dini 15 yari kaba na Bethel na ini Wallkill, New York. Doris nanga Louise, den ala tu na weduwe now, ma den e dini nanga prisiri leki gewoon pionier krosibei fu wi.

Sani Di Wi Leri na ini den Yari Di Pasa

Mi leri wan tu sempel sani di e tyari bun bakapisi kon te wi e dini Yehovah: Hori yu libi sempel. De wan eksempre na ini ala den sani di yu e du, so srefi na ini yu eigi libi. Gebroiki a rai fu a „getrow èn koni srafu” na ini ala afersi.—Mateus 24:45.

Marion meki wan syatu lijst nanga bun rai di e sori fa fu pionier nanga bun bakapisi ala di yu e kweki pikin: Meki wan bun schema èn hori yusrefi na a schema dati. Meki a pionier diniwroko fu yu de leki wan trutru libiwroko. Nyan gosontu nyanyan. Teki nofo rostu. No teki tumusi furu ontspanning. Meki a waarheid, so srefi ala den sani di abi fu du nanga a diniwroko, de wan switi ondrofeni na ini a libi fu yu pikin. Meki a diniwroko de wan moi ondrofeni gi den ala ten.

Now wi abi pasa 90 yari. Siksitenti nanga tu yari pasa sensi wi ben yere wi dopu lezing na tapu a dyari fu na oso fu a famiri Stackhouse, èn wi de 60 yari na ini a furuten diniwroko. Mi nanga Marion kan taki eerlijk taki wi de trutru tevrede nanga a fasi fa wi libi waka. Mi de nanga bigi tangi na ati gi a deki-ati di mi kisi leki wan yongu papa fu poti yeye sani na a fosi presi na ini mi libi èn fu tan wroko fu doro den marki disi. Mi de nanga tangi na ati so srefi fu di mi lobi wefi, Marion, nanga den umapikin fu mi horibaka gi mi na ini den yari di pasa. Ala di wi no abi materia gudu, toku furutron mi e gebroiki Preikiman 2:25 gi misrefi. Drape skrifi: „Bika suma e nyan èn e dringi moro bun leki mi?”

Fu tru, Yehovah du bogobogo gi wi san a pramisi na Maleaki 3:10. Iya, a ’kanti blesi na wi tapu teleki no wan sani e mankeri moro’!

[Faki/Prenki na tapu bladzijde 29]

SANI DI WI E MEMRE FU DEN YARI DI ORLOKU BEN DE

Pikinmoro 60 yari baka na orloku, a heri famiri kan memre krin fa a ben de na a ten dati.

„Son leisi a ben kowru srefisrefi na ini Pennsylvania”, Doris e memre. „Wan neti a ben de 35°C ondro noti.” Louise e taki moro fara: „Fu sorgu taki wi futu no ben kowru, dan mi nanga Doris ben gwenti fu sidon na tapu makandra futu na tapu a bakasei sturu fu wi owru Buick oto.”

„Ma noiti wi ben firi taki wi ben pôti noso taki wi ben mankeri wan sani”, Doris e taki. „Wi ben sabi taki wi ben froisi moro furu leki furu tra sma, ma ala ten wi ben nyan bun, èn wi ben abi bun krosi. Wi ben kisi den krosi disi di ben bun ete fu wan tu mati di ben tan na ini a distrikt Ohio, èn den ben abi umapikin di ben owru pikinso moro leki wi.”

„Mi papa nanga mi mama ala ten ben sori taki den ben lobi èn warderi wi”, Louise e taki, „èn wi ben wroko furu makandra nanga den na ini a preikiwroko. A sani disi ben meki wi firi taki den lobi wi èn taki wi ben abi wan tranga banti nanga den.”

„Mi ben abi wan oto di ben de wan Buick Special fu 1936”, Paul e memre, „èn den as fu den oto dati ben gwenti fu broko. Mi denki taki a masyin ben krakti tumusi gi a oto. A ben gersi leki a sani disi ben pasa na den moro kowru neti fu a mun, èn dan mi ben musu go na wan presi pe broko oto ben de, fu feni wan tra as. Te fu kaba, mi ben sabi bun fa fu kenki den as.”

„No frigiti den karta di wi ben musu kisi fu man bai den sani di wi ben abi fanowdu”, Marion e taki. „Sma ben musu bai ala sani nanga karta — meti, oli, oto banti, ala sani. Ibri leisi te wi ben musu go wroko na wan tra presi, wi ben musu go na wan lanti kantoro fu aksi wan karta. Son leisi wi ben musu wakti wan tu mun langa bifo wi ben kisi wan. Èn a ben gersi leki ibri leisi te wi ben kisi wi karta te fu kaba, dan a Genootschap ben seni wi go wroko na wan tra presi, èn wi ben musu bigin meki muiti baka fu kisi wan tra karta. Ma ala ten Yehovah ben sorgu wi.”

[Prenki]

Mi nanga Marion nanga Doris (na a kruktu-anusei) nanga Louise na ini 2000

[Prenki na tapu bladzijde 25]

Mi nanga mi mama na ini 1918, di mi ben abi 11 yari

Prenki na tapu bladzijde 26]

Mi nanga Louise, Marion, nanga Doris na ini 1948 di den umapikin fu mi ben teki dopu

[Prenki na tapu bladzijde 26]

Wi trow fowtow, oktober 1928

[Prenki na tapu bladzijde 26]

Mi nanga den umapikin fu mi (te na a kruktu-anusei èn a leti-anusei) na a Yankee Stadion na ini 1955