Yusrefi Kan Prisiri te Yu E Gi Sani!
Yusrefi Kan Prisiri te Yu E Gi Sani!
„A moro koloku fu gi sani, leki fu kisi sani.”—TORI FU DEN APOSTEL 20:35.
1. Fa Yehovah e sori taki a e prisiri te a e gi sani?
A SABI di wi sabi a waarheid, èn den blesi di wi kisi fu di wi sabi a waarheid, e gi wi prisiri srefisrefi. Den sani dati na trutru warti kado fu Gado. Den sma di kon sabi Yehovah, kan prisiri fu someni sani ede. Ma ala di a de wan prisiri fu kisi wan kado, a de wan prisiri tu fu gi wan kado na wan sma. Yehovah na a Sma di e gi „ibri bun presenti nanga ibri volmaakti kado”. A de „a koloku Gado” (Yakobus 1:17; 1 Timoteus 1:11). Gado e gi bun leri na ala sma di e arki en. A e prisiri srefisrefi te den sma di a e gi leri e gi yesi na en, soleki fa den papa nanga mama e prisiri te den pikin fu den e handri akruderi den leri di den e gi den na wan lobi-ati fasi.—Odo 27:11.
2. (a) San Yesus ben taki fu a gi di wi e gi sani? (b) Fa wi e prisiri te wi e leri trawan Bijbel waarheid?
2 Na a srefi fasi, di Yesus ben de na grontapu, dan a ben prisiri fu si taki sma ben wani sabi moro fu den sani di a ben leri den. Na apostel Paulus ben gebroiki den wortu fu Yesus di a ben taki: „A moro koloku fu gi sani, leki fu kisi sani” (Tori fu den Apostel 20:35). Wi e prisiri te wi e leri tra sma Bijbel waarheid. A prisiri disi no e kon soso fu di wan sma e agri nanga wi te wi e leri en den sani di wi e bribi. Moro leki dati srefi, wi e prisiri fu di wi sabi taki wi e gi wan sani di warti èn di no e lasi gowe srefisrefi. Te wi e gi sani di warti na yeye fasi, dan wi kan yepi sma fu gi densrefi wini nownow, ma so srefi fu têgo.—1 Timoteus 4:8.
Wi E Prisiri te Wi E Gi Sani
3. (a) Fa den apostel Paulus nanga Yohanes ben sori taki den ben kisi prisiri fu yepi trawan na yeye fasi? (b) Fu san ede wi kan taki dati a leri di wi e leri den pikin fu wi a Bijbel waarheid, e sori taki wi lobi den?
3 Iya, soleki fa Yehovah nanga Yesus e prisiri fu gi sani di warti na yeye fasi, na so Kresten e prisiri tu fu du dati. Na apostel Paulus ben prisiri fu di a ben sabi taki a ben yepi trawan fu leri a waarheid fu Gado Wortu. A ben skrifi gi a gemeente na Tesalonika: San na wi howpu, noso wi prisiri, noso a kroon di e meki wi kisi glori — iya, a no unu de dati? — na fesi wi Masra Yesus na a denoya fu en? Unu na wi glori nanga wi prisiri trutru” (1 Tesalonikasma 2:19, 20). Na a srefi fasi, na apostel Yohanes ben taki fu den sma di ben de pikin fu en na yeye fasi, di a ben skrifi: „No wan tra sani e meki mi de nanga tangi srefisrefi, leki te mi yere den sani disi taki den pikin fu mi e tan waka na ini waarheid” (3 Yohanes 4). Prakseri tu fu a prisiri di wi e kisi te wi e yepi wi eigi pikin fu tron pikin fu wi na yeye fasi. Te papa nanga mama e kweki den pikin fu den na ini „a trangaleri èn a seryusu frumane fu Yehovah”, dan den e sori taki den lobi den pikin fu den (Efeisesma 6:4). Na so fasi, papa nanga mama e sori taki den trutru e broko den ede nanga a têgo tanbun fu den yonguwan fu den. Te den pikin fu den e handri akruderi san den e leri, dan dati e gi papa nanga mama prisiri srefisrefi èn a e meki den koloku.
4. Sortu ondrofenitori e sori taki a e gi prisiri te wi e gi sani di warti na yeye fasi?
4 Dell na wan furuten pionier. A abi feifi pikin. A e taki: „Mi e agri srefisrefi nanga den wortu fu na apostel Yohanes, bika mi de nanga tangi na ati trutru taki fo pikin fu mi e ’waka na ini a waarheid’. Mi sabi taki Yehovah e kisi grani nanga glori, te a heri osofamiri de na ini a tru anbegi. Fu dati ede mi e prisiri srefisrefi taki Yehovah blesi den muiti di mi du, fu meki a waarheid doro na ati fu den pikin fu mi. A tumusi moi fruwakti taki mi kan libi fu têgo makandra nanga mi osofamiri na ini Paradijs, e meki mi howpu kon moro tranga. A e gi mi deki-ati fu horidoro awinsi sortu problema e miti mi.” A de wan sari sani, taki wan fu den umapikin fu Dell ben puru fu a gemeente fu di a e tyari ensrefi na wan fasi di no fiti Kresten. Toku, Dell e wroko tranga fu si sani na wan bun fasi. „Mi e howpu taki wan dei mi pikin sa saka ensrefi na wan opregti fasi èn sa drai kon baka na Yehovah”, na so a e taki. „Ma mi e taki Gado tangi dati moro furu fu den pikin fu mi e tan dini en na wan getrow fasi. A prisiri dati di mi abi, trutru gi mi krakti.”—Nehemia 8:10.
Feni Mati Di E Tan Yu Mati fu Têgo
5. San e gi wi prisiri, ala di wi e gi wisrefi fayafaya na ini a wroko fu meki disipel?
5 Yesus ben gi den bakaman fu en a komando fu meki Kresten disipel. Den ben musu leri den fu Yehovah èn fu den sani di a e aksi fu libisma (Mateus 28:19, 20). Yehovah, so srefi Yesus, yepi sma na wan lobi-ati fasi fu kon sabi a pasi fu waarheid. Fu dati ede, te wi e gi wisrefi na ini a wroko fu meki disipel, dan wi e prisiri fu di wi sabi taki wi e waka baka na eksempre fu Yehovah nanga di fu Yesus, èn taki wi e du san den fosi Kresten ben du (1 Korentesma 11:1). Te wi e wroko makandra nanga na Almakti Gado èn a lobi Manpikin fu en, dan a libi fu wi e kon abi wan trutru marki. A de wan prisiri sani srefisrefi taki wi kan „wroko makandra” nanga Gado! (1 Korentesma 3:9). Srefi den engel abi wan prati na a wroko disi fu preiki a bun nyunsu. A prakseri dati no e naki wi ati srefisrefi?—Openbaring 14:6, 7.
6. Suma e tron wi mati te wi e teki prati na a wroko fu gi sani di warti na yeye fasi?
6 Fu taki en leti, fu di wi e teki prati na a wroko disi pe wi e gi sani di warti na yeye fasi, meki wi e tron sma di e wroko makandra nanga Gado. Ma wi kan tron têgo mati fu en tu. Fu di Abraham ben abi bribi, meki den kari en a mati fu Yehovah (Yakobus 2:23). Te wi meki muiti fu du a wani fu Gado, dan wi srefi kan tron mati fu Gado. Te wi e du dati, dan wi kan tron mati fu Yesus tu. A ben taigi den disipel fu en: „Mi kari unu mati, bika ala den sani di mi yere fu mi Tata, mi meki unu kon sabi dati” (Yohanes 15:15). Furu sma e prisiri srefisrefi te den de wan mati fu hei-hei sma noso sma di abi barinen, ma wi kan tron mati fu den tu moro prenspari sma fu a heri universum!
7. (a) Fa wan uma ben kon abi wan tru mati? (b) Yu ben abi so wan ondrofeni tu?
7 Moro fara, te wi e yepi sma fu kon sabi Gado, dan den e tron wi mati tu èn dati e meki wi de koloku na wan spesrutu fasi. Joan, di e libi na Amerkankondre, ben bigin studeri Bijbel nanga wan uma di nen Thelma. Ala di a famiri fu Thelma ben gens a studie fu en, toku a ben horidoro èn wan yari baka dati a teki dopu. Joan ben skrifi: „Wi ben tan abi demakandra baka di a teki dopu. Wi ben tron mati fu makandra, èn now wi de mati 35 yari kaba. Nofotron wi ben go makandra na ini a preikiwroko èn so srefi na kongres. Te fu kaba, mi froisi go na wan nyun oso. Dati de 800 kilometer farawe. Ma Thelma e tan seni tumusi moi brifi gi mi. A skrifi den na wan lobi-ati fasi èn den e prisiri mi ati srefisrefi. Na ini den brifi dati, a e fruteri mi taki a prakseri mi nanga lobi-ati èn taki a wani taigi mi tangi dati mi de a mati fu en, taki mi de wan eksempre gi en, èn taki mi leri en a waarheid fu Bijbel. En na wan tumusi bun mati fu mi, èn dati na wan kefalek moi kado gi den muiti di mi ben du fu yepi en kon sabi Yehovah.”
8. Sortu yoisti fasi fu denki sa yepi wi na ini wi diniwroko?
8 Te wi e tan prakseri taki wan dei wi sa feni wan sma di wani kon sabi a waarheid, dan dati kan yepi wi fu horidoro. Awinsi furu fu den sma di wi e miti no wani arki a Wortu fu Yehovah, noso no wani kon sabi en kwetikweti, toku wi sa horidoro. A sori di sma e sori so wan mi-no-ke fasi, kan de wan tyalensi tapu a bribi nanga a horidoro fu wi. Ma toku, te wi e si sani na wan bun fasi, dan dati sa de wan yepi gi wi. Fausto, di komoto fu Gwatemala, ben taki: „Te mi e gi kotoigi na trawan, dan mi e prakseri taki a sa de wan moi sani srefisrefi efu a sma di mi e preiki gi, ben o tron wan brada noso wan sisa. Mi e prakseri taki wan fu den sma di mi miti, kande sa teki a waarheid fu Gado Wortu nanga en heri ati te fu kaba. A prakseri dati e yepi mi fu go doro fu preiki èn dati e gi mi trutru prisiri.”
Tyari Gudu Kon na Wan na Hemel
9. San Yesus ben taki fu gudu na hemel, èn san wi kan leri fu disi?
9 A no de wan makriki sani ala ten fu meki disipel, awansi den sma dati de wi eigi pikin noso tra sma. A kan de so taki wi musu teki furu ten fu du dati, èn taki wi musu abi pasensi nanga horidoro. Ma hori na prakseri, taki furu sma de klariklari fu wroko tranga so taki den kan abi furu materia sani. Den e wroko tranga gi sani di nofotron no e gi den prisiri èn di e lasi gowe te fu kaba. Yesus ben taigi den sma di ben arki en, taki a moro bun fu wroko gi yeye gudu. A ben taki: „Unu no musu tyari gudu kon na wan gi unsrefi na grontapu moro, pe motu nanga frustu e pori sani, pe fufuruman e broko kon na inisei fu fufuru sani. Na presi fu dati, tyari gudu kon na wan gi unsrefi na hemel, pe motu nanga frustu no e pori sani, èn pe fufuruman no e broko kon na inisei fu fufuru sani” (Mateus 6:19, 20). Te wi e suku fu doro marki na yeye fasi — wan fu den marki dati na fu teki prati na a prenspari wroko fu meki disipel — dan wi kan prisiri trutru. Dati de so, fu di wi sabi taki wi e du a wani fu Gado èn taki a sa pai wi. Na apostel Paulus ben skrifi: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en.”—Hebrewsma 6:10.
10. (a) Fu san ede Yesus ben abi yeye gudu? (b) Fa Yesus ben gi ensrefi, èn fa dati sa gi tra sma furu winimarki?
10 Te wi e wroko fayafaya fu meki disipel, dan wi e tyari „gudu” kon na wan „na hemel”, soleki fa Yesus ben taki. Dati e gi wi prisiri fu di wi e kisi sani. Te wi e gi sani sondro fu suku wi eigi wini nomo, dan wi srefi e kon gudu te fu kaba. Yesus srefi ben dini Yehovah na wan getrow fasi, bun furu yari langa. Prakseri omeni gudu a ben tyari kon na wan na hemel! Ma toku Yesus no ben suku fu kisi wini gi ensrefi. Na apostel Paulus ben skrifi: „[Yesus] ben gi ensrefi gi den sondu fu wi, so taki a ben sa kan frulusu wi fu a disiten godelowsu seti fu sani, akruderi a wani fu wi Gado èn Tata” (Galasiasma 1:4). Yesus no ben de klariklari nomo fu gi ensrefi na ini en diniwroko. A ben gi en eigi libi tu leki wan lusu-paiman, so taki trawan ben sa kan abi na okasi fu tyari gudu kon na wan na hemel.
11. Fu san ede yeye gudu moro bun leki materia gudu?
11 Te wi e leri sma fu Gado, dan wi e yepi den fu si fa den srefi ben kan tyari yeye gudu kon na wan di no e pori. Sortu moro bun kado yu ben sa kan gi wan sma? Te yu e gi wan mati fu yu wan diri oloisi, wan wagi, noso wan oso srefi, dan a mati dati sa de nanga tangi na ati trutru. A sa de koloku, èn yu sa prisiri fu di yu ben gi en wan sani. Ma a kado dati sa de ete, baka 20 yari? Baka 200 yari? Baka 2000 yari? Na a tra sei, te yu e gi yusrefi fu yepi wan sma fu dini Yehovah, dan a sma kan kisi wini fu a kado dati fu têgo.
Suku Den Wan Di Wani a Waarheid
12. Fa furu sma gi densrefi fu yepi trawan na yeye fasi?
12 Fu di a pipel fu Yehovah e prisiri fu gi sani di warti na yeye fasi, meki den go te na den moro farawe presi na grontapu. Dusundusun sma gowe libi den oso nanga den famiri fu du zendelingwroko na ini kondre pe den ben abi fu leri tra tongo èn ben musu leri fu libi na mindri sma fu tra kulturu. Trawan froisi go na kontren na ini den eigi kondre pe moro Kownukondre preikiman de fanowdu. Trawan ete, leri wan tongo fu wan tra kondre. Na so fasi den man preiki gi tra-kondresma di e tan na ini a kondre fu den. Teki fu eksempre, wan trowpaar na ini New Jersey, Amerkankondre. Den tu pikin fu den e dini now na a edekantoro fu Yehovah Kotoigi di e tiri a wroko na heri grontapu. Baka di den tu pikin fu den ben kon bigi, dan a trowpaar disi ben bigin du pionierwroko èn den ben leri fu taki Sneisi. Na ini wan pisi ten fu dri yari, den ben hori bijbelstudie nanga 74 sma di ben go na wan heiskoro krosibei èn di e taki Sneisi. Yu man du moro na ini yu diniwroko na iniwan sortu fasi, so taki yu kan abi moro prisiri na ini a wroko fu meki disipel?
13. San yu ben kan du efu yu wani abi moro bun bakapisi na ini yu diniwroko?
13 A kan de so taki trutru yu wani fu hori wan bijbelstudie, ma taki yu no ben man du dati. Na ini wan tu kondre, a muilek fu feni sma di wani sabi moro fu Bijbel. Kande den sma di yu e miti no wani kon sabi Bijbel. Efu dati de so, dan kande yu kan fruteri Gado furutron na ini begi taki yu wani hori wan bijbelstudie. Yehovah, èn so srefi Yesus Krestes, trutru wani taki a preikiwroko musu waka bun. A kan de so taki den sa tiri yu, so taki yu kan miti wan opregti sma di wani arki. Aksi rai fu den wan na ini yu gemeente di abi moro ondrofeni, noso di abi bun bakapisi na ini a diniwroko fu den. Gebroiki den sani di wi e leri na den Kresten konmakandra èn den rai di wi e kisi drape. Kisi wini tu fu a rai di den opziener di e reis nanga den wefi fu den e gi. Ma a moro prenspari sani, na taki noiti yu no musu tapu fu meki muiti. A koniman ben skrifi: „Sai yu siri na mamanten èn no meki yu anu rostu te leki neti doro; bika yu no sabi pe disi sa abi bun bakapisi” (Preikiman 11:6). Na a srefi ten, hori den getrow man leki Noa nanga Yeremia na prakseri. Awinsi a no furu sma ben arki san den ben e preiki, toku a preikiwroko fu den ben abi bun bakapisi. A moro prenspari sani de, taki a diniwroko fu den ben plisi Yehovah.
Du Ala San Yu Man
14. Fa Yehovah e si den sma di kon grani na ini a diniwroko fu en?
14 A kan de so taki a situwâsi fu yu e meki taki yu no man du someni leki yu ben sa wani du na ini a diniwroko. Fu eksempre, kande yu kon grani kaba so taki yu no man du ala san yu wani du na ini a diniwroko fu Yehovah. Toku, hori na prakseri san a koniman ben skrifi: „Weti wiwiri na wan tumusi moi kownu-ati, te den feni en na tapu a pasi fu regtfardikifasi” (Odo 16:31). Te wan sma e gebroiki en libi fu dini Yehovah, dan dati e plisi Yehovah trutru. Boiti dati, den Buku fu Bijbel e taki: „Srefi te wan sma kon grani, mi na a Srefiwan; èn srefi te wan sma en wiwiri kon weti, mi sa tan tyari en. Misrefi sa handri trutru, so taki misrefi kan opo en èn so taki misrefi kan tyari en èn kan gi frulusu” (Yesaya 46:4). Wi lobi hemel Tata e pramisi taki a sa horibaka gi den loyaalwan fu en èn taki a sa yepi den.
15. Yu e bribi taki Yehovah e frustan a situwâsi fu yu? Fu san ede yu e bribi dati?
15 Kande yu siki, kande yu e kisi gens fu yu trowpatna di no de na bribi, kande yu abi hebi frantwortu na ini na osofamiri, noso wan tra muilek problema. Yehovah sabi taki wi no man du ala san wi wani. A sabi a situwâsi fu wi, èn a lobi wi fu di wi e du muiti trutru fu dini en. Dati de so, awinsi a diniwroko di wi e du de moro mendri kande leki san trawan e du (Galasiasma 6:4). Yehovah sabi taki wi no de volmaakti. A no e fruwakti moro fu wi leki san wi man tyari (Psalm 147:11). Te wi e du ala san wi man, dan wi kan de seiker trutru taki wi warti na Gado ai. A no sa frigiti den sani di wi e du fu di wi abi bribi.—Lukas 21:1-4.
16. Na sortu fasi wan heri gemeente e yepi fu meki wan disipel?
16 Hori na prakseri tu taki a wroko fu meki disipel, na wan wroko di furu sma e du makandra. Soleki fa wan enkri dropu alen no kan meki wan prani gro, na so wan sma nomo no e meki wan disipel. A tru taki wan Kotoigi kan feni wan sma di wani sabi moro, èn taki a kan hori wan bijbelstudie nanga en. Ma te a nyun sma dati e kon na a Kownukondre zaal, dan a heri gemeente e yepi a sma fu frustan taki a feni a waarheid. A switifasi di den brada nanga sisa abi gi tra sma, e sori taki a yeye fu Gado abi krakti na den tapu (1 Korentesma 14:24, 25). Pikin-nengre nanga tini e gi komentaar di e gi deki-ati. Dati e sori a nyun sma taki den yonguwan fu wi e difrenti fu den yongusma fu grontapu. Den sikisma, den sma di swaki na skin sei nanga den owrusma na ini a gemeente, e leri den nyunwan san a wani taki fu horidoro. Awinsi omeni yari wi abi, awinsi wi no man du ala san wi wani, toku wi alamala e du furu fu yepi nyun sma. Wi e meki a lobi di den abi gi Bijbel waarheid kon moro tranga èn wi e yepi den fu go na fesi fu teki dopu. Ibri yuru di wi e gebroiki na ini a diniwroko, ibri gobaka di wi e meki, ibri takimakandra di wi abi nanga wan nyun sma na ini a Kownukondre zaal, kan gersi taki a no de prenspari srefisrefi, ma den sani disi na wan pisi fu wan kefalek bigi wroko di Yehovah e du.
17, 18. (a) Fa wi kan prisiri na ini a gi di wi e gi sani, boiti taki wi e du a wroko fu meki disipel? (b) Na suma baka wi e waka te wi e prisiri fu gi sani?
17 A no de fu taki, boiti taki wi e teki prati na a prenspari wroko fu meki disipel, wi leki Kresten abi tra fasi fa wi kan prisiri te wi e gi sani. Wi kan poti moni na wan sei fu yepi meki a soifri anbegi go na fesi, èn fu yepi den wan di de na ini nowtu (Lukas 16:9; 1 Korentesma 16:1, 2). Wi kan prakseri fu gi sma wan kari fu kon na wi oso (Romesma 12:13). Wi kan meki muiti fu „du bun gi ala sma, ma spesrutu gi den wan di de na ini a srefi bribi leki wi” (Galasiasma 6:10). Awansi na pikin sani wi e gi wan sma, toku den sani dati de prenspari tu. Wi kan skrifi en wan brifi, bel en, gi en wan kado, yepi en nanga wan sani te a abi dati fanowdu, noso taki nanga en fu gi en deki-ati.
18 Te wi lobi fu gi sani, dan wi e sori taki wi e waka baka wi hemel Tata. Wi e sori tu taki wi abi brada lobi. Dati na a marki di e sori taki wi na tru Kresten (Yohanes 13:35). Te wi e hori den sani disi na prakseri, dan dati kan yepi wi fu prisiri tu te wi e gi sani.
Yu Kan Tyari Disi Kon na Krin?
• Fa Yehovah nanga Yesus ben gi na eksempre fu gi sani di warti na yeye fasi?
• Fa wi ben sa kan feni mati di e tan wi mati fu têgo?
• Sortu sani wi kan du fu abi moro bun bakapisi na ini wi diniwroko?
• Fa ala sma na ini a gemeente kan prisiri te den e gi sani?
[Aksi fu a tori disi]
[Prenki na tapu bladzijde 13]
Te pikin-nengre e handri akruderi san den e leri, dan papa nanga mama de koloku èn e prisiri srefisrefi
[Prenki na tapu bladzijde 15]
Te wi e meki disipel, dan wi kan feni tru mati
[Prenki na tapu bladzijde 16]
Yehovah e tyari wi te wi kon grani
[Prenki na tapu bladzijde 17]
Awansi na pikin sani wi e gi, toku den de prenspari sani di e gi wi prisiri