Libi De, Baka te wan Sma Dede?

„EFU wan man di gosontu èn tranga na skin fasi dede, a kan libi baka?”, na so a famiri-edeman Yob ben aksi so wan 3500 yari pasa (Yob 14:14). Dusundusun yari langa, libisma ben broko den ede nanga na aksi dati. Na ini ala den yarihondro di pasa, sma fu ala libimakandra prakseri dipi fu a tori disi, èn den kon bribi difrenti sani.

Furu so-kari Kresten e bribi na ini hemel èn na ini hel. Hindusma, na a tra sei, e bribi taki sma e nasi. Emir (tiriman) Muawiyah, wan man di e yepi fu tiri wan presi fu na Islam bribi, e taki fu a fasi fa Moslimsma e si a tori: „Wi e bribi taki wan krutudei sa de baka te wi dede, te wi e go na fesi Gado, Allah, san o de neleki te wi e waka go na fesi krutubangi.” Soleki fa a bribi fu na Islam e taki, dan na a ten dati Allah sa luku a waka nanga libi fu ibri sma èn sa seni a sma go na paradijs noso na a helfaya.

Na Sri Lanka, Budasma nanga Katoliksma e libi den doro nanga den fensre bradi fu den opo te wan sma na ini den osofamiri fu den dede. Den e leti wan kokolampu, dan den e poti a dedekisi nanga den futu fu a dedesma go na a sei fu a fesisei doro. Den e bribi taki den sani disi e meki taki a de makriki gi a yeye, noso sili, fu a dedesma fu komoto na ini na oso.

Ronald M. Berndt fu na Universiteit fu West-Australia, e taki dati den Aborigine fu Australia e bribi taki „libisma abi wan yeye di no man pori”. Son lo fu Afrika e bribi taki gewoon sma e tron yorka te den dede. Ma den e bribi taki prenspari sma e tron yeye fu den afo, di sma sa gi grani. Den e bribi taki den dedesma dati de leki fesiman fu a libimakandra di sma no man si, èn di den kan aksi yepi na ini begi.

Na ini wan tu kondre, a bribi di sma abi fu a situwâsi di den dedewan de na ini, de wan moksipatu fu den gwenti fu a kondre nanga den leri fu a so-kari Krestendom. Fu eksempre, furu Katoliksma nanga Protestantsma na West-Afrika abi a gwenti fu tapu den spigri te wan sma dede, so taki no wan sma ben sa kan luku ini a spigri èn si a yeye fu a dede sma.

Fu tru, sma e gi someni difrenti piki tapu na aksi, ’San e pasa nanga wi te wi dede?’ Ma toku, ala den sma disi e agri nanga wán sani: Den e bribi taki wan sma abi wan sani na ini en di no man dede èn di e libi go doro baka te a sma dede. Son sma e bribi taki a „sani” dati, musu fu de wan yeye. Fu eksempre, na wan tu presi fu Afrika nanga Asia, so srefi na a grupu èilanti na ini a kontren fu Polinesia, Melanesia, nanga Mikronesia, furu sma e bribi taki wan yeye — no wan sili — no man dede. Fu taki en leti, son tongo no abi a wortu „sili” srefi.

Wan yeye de na ini wan sma di de na libi? A yeye dati trutru e gowe libi a skin te a sma dede? Efu dati de so, dan san e pasa nanga a yeye? Sortu howpu de gi den dedewan? Wi no musu poti den aksi disi na wan sei. Awinsi sortu kulturu noso bribi yu abi, toku a dede di sma e dede na wan sani di ala sma abi fu du nanga dati. Fu dati ede den tori disi abi furu fu du nanga yu srefi tu. Wi e gi yu deki-ati fu ondrosuku a tori.