Origenes—Fa a Leri fu En Ben Abi Krakti Tapu a Kerki?

„A moro bigi leriman fu a Kerki baka den Apostel.” Na so Hièronimus ben prèise Origenes. Hièronimus ben de wan sabiman fu kerki tori fu a di fu dri yarihondro, èn a ben de a man di vertaal a Vulgaat Bijbel na ini Latijn. Ma a no ala sma ben si Origenes leki so wan kefalek bun sma. Wan tu sma ben si en leki wan takru rutu di ben meki sma denki tra fasi fu san a kerki ben bribi. Soleki fa wan skrifiman fu a di fu 17 yarihondro e taki, dan den wan di ben krutu Origenes ben fruklari: „Furu fu a leri fu en na lawlaw sani èn a e du sma ogri. A de leki wan Sneki en vergif di e kiri sma, di a e spoiti go na ini grontapu.” Fu taki en leti, moro leki fo hondro yari baka en dede, den ben fruklari taki Origenes ben de wan ketter.

FA A du kon taki sma ben gi Origenes furu grani, ma na a srefi ten trawan ben hori en na ati? Sortu krakti a ben abi tapu kerki leri di ben kon baka ten?

De Nanga Faya gi a Kerki

Origenes ben gebore na ini a pisi ten fu 185 G.T. na ini Aleksandria, wan foto fu Egipti. A ben kisi finifini leri fu Griki buku tori, ma en papa, Leonides, ben dwengi en fu du muiti tu fu studeri den Buku fu Bijbel. Di Origenes ben abi 17 yari, a kèiser fu Rome ben gi wan ordru di ben taki dati ibri sma di ben o kenki en bribi, ben o kisi strafu. Den ben trowe a papa fu Origenes na ini dungru-oso, fu di a ben tron wan Kresten. Origenes ben furu nanga faya leki wan yonkuman, èn a ben teki a fasti bosroiti fu go na ini dungru-oso neleki en papa, fu pina drape tu fu den sani di a ben bribi. Di Origenes en mama ben si disi, dan a ben kibri den krosi fu en so taki Origenes no ben man gowe libi oso. Nanga wan brifi, Origenes ben begi en papa: „Luku bun taki yu no go denki wan tra sani, fu wi ede.” Leonides ben tan kánkan, den ben kiri en fu dati ede, èn a ben libi en osofamiri na baka sondro wan sani. Ma Origenes ben doro moi fara kaba nanga en studie so taki a ben kan gi leri fu Griki buku tori; na so fasi a ben man sorgu en mama nanga den siksi moro yongu brada fu en.

A kèiser ben wani tapu a Kresten bribi so taki a bribi disi no panya go moro fara. Fu di na ordru fu a kèiser no ben de gi studenti wawan ma so srefi gi leriman, dati meki ala den Kresten leriman ben lowe go fu Aleksandria. Di sma di no ben de Kresten, ben suku fu leri Bijbel èn ben go na a yonkuman Origenes fu yepi den nanga dati, dan a ben de klariklari fu teki a wroko disi; Origenes ben si dati leki wan wroko di Gado ben gi en. Furu fu den studenti fu en ben pina èn lasi den libi fu dati ede, son wan srefi fosi den ben kaba nanga den studie fu den. Origenes ben poti en libi na ini kefar, di a ben gi den studenti fu en deki-ati pe ala sma ben kan si dati, awansi den studenti ben de na fesi wan krutuman, noso den ben de na ini dungru-oso, noso trawan ben de fu lasi den libi fu a bribi ede. Wan historia skrifiman fu a di fu fo yarihondro, Eusebius, e fruteri taki di den ben tyari den studenti go fu kiri den, dan Origenes, „nanga furu deki-ati, ben taigi den adyosi nanga wan bosi”.

Furu sma di no ben de Kresten, ben atibron nanga Origenes, fu di den ben feni taki na en ben meki den mati fu den kenki den libi noso ben meki den lasi den libi srefi. Furutron, na a lasti momenti a ben man lowe gi den ipi-ipi ogri-ati sma, fu den no kiri en. Ala di Origenes ben musu froisi go fu a wan presi go na wan tra presi fu wai pasi gi den  sma di ben suku en, toku a ben tan go doro nanga a leri fu en. Origenes no ben frede, a ben gi ensrefi na a leri; dati ben naki na ati fu Demetrius, a beskopu fu Aleksandria. Fu dati ede, di Origenes ben abi 18 yari nomo, dan Demetrius ben poti en leki edeman fu a skoro fu kerki leri na ini Aleksandria.

Te fu kaba, Origenes ben tron wan sabiman di furu sma ben sabi, èn wan man di ben skrifi furu buku. Wan tu sma ben taki dati Origenes ben skrifi 6000 buku, ma soleki fa a sori dan a nomru dati furu tumusi. A sani di meki Origenes kisi barinen, na en Hexapla, dati na wan bigi wroko fu 50 buku fu den Hebrew Buku fu Bijbel. Origenes ben seti a Hexapla na so wan fasi taki yu ben abi siksi faki sei makandra; na ini den siksi faki disi yu ben kan leisi: (1) a tekst na ini Hebrewtongo nanga Arameisi, (2) wan tekst pe a ben poti ibri marki fu a Hebrewtongo abra na ini letter fu a Grikitongo, (3) a Griki vertaling fu Aquila, (4) a Griki vertaling fu Symmachus, (5) a Griki Septuaginta, di Origenes ben meki moro bun so taki a ben kan kruderi moro soifri nanga a tekst na ini Hebrewtongo, nanga (6) a Griki vertaling fu Theodotion. „Nanga a fasi disi fu seti den tekst,” na so a Bijbel sabiman John Hort ben skrifi, „dan Origenes ben howpu fu fruklari furu tekst, di kande ben sa bruya wan sma noso no ben sa makriki fu frustan te a sma e leisi Grikitongo, efu a sma dati ben o leisi soso a Septuaginta.”

’A E Go Moro Fara Leki den Sani Di Skrifi’

Ma toku, a bruya na ini den sani di pasa na ini a kerki na ini a di fu dri yarihondro, ben abi furu krakti tapu a fasi fa Origenes ben gi leri komoto fu den Buku fu Bijbel. Ala di Krestenhèit ben bigin paspas, toku a ben pori kaba nanga leri di no komoto fu Bijbel, èn den kerki fu en di panya na ala sei ben leri sma difrenti sortu kerki leri.

Origenes ben teki wan tu fu den leri disi abra di no komoto fu Bijbel, èn a ben taki dati den leri disi na leri fu den apostel. Ma tapu tra aksi baka, a ben firi ensrefi fri fu taki fa ensrefi ben denki fu a tori. Na a ten dati, furu fu den studenti fu en ben feti nanga tra filosofia tori. Origenes ben wani yepi den, èn dati meki a ben go studeri den difrenti filosofia leri di ben srapu a frustan fu den yongu studenti fu en. A ben seti ensrefi fu yepi den studenti fu en so taki den ben sa kan firi bun nanga den piki di a ben o gi den tapu den filosofia aksi fu den.

Origenes ben pruberi fu meki Bijbel kruderi nanga filosofia, èn dati meki a ben frutrow hebihebi tapu wan spesrutu fasi fu fruklari Bijbel; a spesrutu fasi dati na taki a ben sori taki den wortu fu wan tori, ala ten e prenki wan tra sani. Origenes ben taki dati den tori fu den Buku fu Bijbel ala ten e prenki wan sani na yeye fasi, ma taki a no abi fu de so taki ala ten den tori dati pasa trutru. Soleki fa wan sabiman ben sori, dan disi ben gi Origenes pasi „fu meki san a ben leisi ini Bijbel, fiti nanga ala den prakseri di no komoto fu Bijbel ma di ben fiti moi na ini en eigi sistema fu bribi; èn disi a ben du ala di a ben taki dati en ben de wan fayafaya sma èn wan getrow sma di ben wani fruklari san skrifi na ini Bijbel (èn sondro tweifri na wan opregti fasi a ben denki taki trutru a ben de so wan sma)”.

Wan brifi di Origenes ben skrifi gi wan fu den studenti fu en, e meki wi frustan moro bun fa a ben denki. Origenes ben sori taki den Israèlsma ben meki gowtu sani gi Yehovah en tempel; den ben meki den sani disi fu a gowtu di komoto na Egipti. Nanga a tori disi a ben feni wan sani di ben horibaka gi a gebroiki di a ben gebroiki Griki filosofia, fu leri sma fu Krestendom. Origenes ben skrifi: „Den pikin fu Israèl ben kan meki bun gebroiki fu den sani di den ben tyari kon fu Egipti; den sani di den Egiptisma no ben gebroiki na wan yoisti fasi, ma di den Hebrewsma ben gebroiki gi a diniwroko fu Gado nanga yepi fu a koni fu Gado.” Na so fasi, Origenes ben gi den studenti fu en deki-ati fu „teki fu a filosofia fu den Grikisma, den sani di den kan gebroiki te den e studeri noso sani di kan yepi den fu sreka densrefi gi Krestendom.”

Na a fasi disi ibri sma ben kan fruklari Bijbel leki fa a wani, èn dati ben meki en muilek fu si a difrenti na mindri Kresten leri nanga Griki filosofia. Fu eksempre, na ini a buku fu en di abi leki nen On First Principles, Origenes ben taki fu Yesus dati a ben de ’a wan-enkri Manpikin di ben gebore, ma di ben de sondro bigin’. Origenes ben taki moro fara: ’A geslakti fu Yesus de fu têgo èn e tan fu ala ten. A no ben tron wan Manpikin fu di a ben kisi a libibro, nanga yepi fu wan sani fu dorosei, ma fu di a ben abi a fasi fu Gado, meki a tron wan Manpikin.’

Origenes no ben feni a sani disi na ini Bijbel, bika den Buku fu Bijbel e leri wi taki a wan-enkri Manpikin fu Yehovah na „a fosi geborewan fu ala den sani di [Gado] meki” èn „a bigin fu den sani di  Gado meki” (Kolosesma 1:15; Openbaring 3:14). Augustus Neander na wan historia skrifiman fu kerki tori; a ben taki dati Origenes ben kisi a prakseri „têgo geslakti” fu di a ben „teki leri na ini filosofia na den skoro fu Plato”. So bun, Origenes ben pasa wan gronprakseri fu den Buku fu Bijbel; a gronprakseri dati na: „No go moro fara leki den sani di skrifi.”—1 Korentesma 4:6.

Den Krutu En Leki wan Ketter

Na ini den fosi yari fu Origenes leki wan leriman, dan wan kerki konmakandra na Aleksandria ben teki a bosroiti fu no meki a wroko moro leki priester. Kande disi ben pasa, fu di Beskopu Demetrius ben dyarusu tapu Origenes fu di Origenes ben kon kisi barinen moro nanga moro. Origenes ben froisi go na Palestina, pe sma ben tan gi en grani leki wan bun fetiman gi a Kresten leri; drape a ben go doro nanga en wroko leki priester. Fu taki en leti, di „ketterij” ben panya na Owstusei, dan sma ben suku Origenes fu meki a go overtoigi den beskopu di ben fowtu, meki den drai kon baka na a kerki leri di de kaba. Baka di Origenes dede na ini 254 G.T., dan sma ben bigin lasi lespeki gi en nen na wan seryusu fasi. Fu san ede?

Di san sma ben kari Krestendom ben tron wan prenspari kerki, dan a kerki ben sori moro soifri san na a leri fu a kerki srefi. Fu dati ede, den sabiman fu kerki tori di ben kon baka Origenes, no ben teki furu fu den denki fu en abra; den denki disi sontron no ben de soifri filosofia denki tu. Fu dati ede, den leri fu Origenes ben meki taki den ben e-hari-e-trusu na wan bita-ati fasi na ini a kerki. A kerki ben meki muiti fu tapu a yu-o-hari-yu-o-trusu disi na ini a kerki so taki wánfasi kan de, èn dati meki den ben teki a bosroiti fu leisi strafu gi Origenes taki a ben de wan ketter.

Origenes no ben de a wan-enkri sma di ben fowtu. Fu taki en leti, dan Bijbel ben taki na fesi taki furu sma ben o gowe libi a soifri leri fu Krestes. A fadon di sma ben fadon komoto na bribi na so wan fasi, ben bigin pasa furu na a kaba fu a di fu fosi yarihondro, baka di den apostel fu Yesus dede (2 Tesalonikasma 2:6, 7). Te fu kaba, dan wan tu sma di ben kari densrefi Kresten, ben seti densrefi leki „orthodox”, èn den ben meki bekènti taki ala tra sma ben de „ketter”. Ma efu wi luku san pasa trutru, dan na Krestenhèit ben gowe libi tru Krestendom.

„Sani Di na wan Falsi Fasi den E Kari ’Sabi’”

Ala di Origenes ben taki furu sani akruderi en eigi denki, toku den wroko fu en abi sani di kan gi winimarki. Fu eksempre, a Hexapla abi a nen fu Gado na a soifri fasi fa a ben skrifi nanga fo letter na ini a Hebrewtongo, soleki fa sma e kari dati a Tetragrammaton. Disi e gi prenspari buweisi taki den fosi Kresten ben sabi èn den ben gebroiki Gado en eigi nen — Yehovah. Ma toku, Theophilus, wan kerki edeman fu a di fu feifi yarihondro, ben warskow wan leisi: „Den wroko fu Origenes de leki wan dyari nanga ibri sortu bromki. Efu mi feni wan moi bromki na ini a dyari dati, dan mi e piki en; ma efu a gersi taki wan bromki drape abi maka, dan mi e wai pasi gi en, neleki fa mi ben o wai pasi gi wan srapu sani di kan koti mi.”

Fu di Origenes ben moksi Bijbel leri nanga Griki filosofia, dan a kerki leri fu en ben kon lai nanga fowtu, èn dati baka ben de wan bigi rampu gi Krestenhèit. Fu eksempre, ala di den no ben teki furu fu den sani abra di Origenes ben denki, toku a fasi fa a ben denki fu a „têgo geslakti” fu Krestes ben yepi fu poti a fondamenti gi a leri fu a Dri-wánfasi; wan leri di no de na ini Bijbel. A buku The Church of the First Three Centuries e taki: „A switi di filosofia ben switi gi sma [a filosofia di ben abi en rutu na Origenes], ben de wan sani di ben o tan wan langa ten ete.” San ben de a bakapisi fu dati? „A makrikifasi fu a Kresten bribi ben pori, èn bun furu fowtu leri ben kon na ini a Kerki.”

Origenes fu en sei, ben kan gi yesi na a frumane fu na apostel Paulus, èn a ben kan sorgu taki a no yepi sma fadon komoto na bribi. Disi a ben kan du efu a ben „drai [en] baka gi soso takitaki di e pori santa sani” èn drai en baka „gi den sani di na wan lei fasi den e kari ’sabi’, ma di no e kruderi nanga makandra”. Na presi fu dati, fu di Origenes ben puru furu fu den leri fu en fu a sortu „sabi” disi, dati meki a ben „drifi komoto na a bribi”.—1 Timoteus 6:20, 21; Kolosesma 2:8.

[Prenki na tapu bladzijde 31]

A „Hexapla” fu Origenes ben sori taki sma ben gebroiki Gado nen na ini den Kresten Griki Buku fu Bijbel

[Sma di abi a reti fu a prenki]

A tyari kon na doro nanga a primisi fu the Syndics of Cambridge University Library, T-S 12.182

[Sma di abi a reti fu a prenki na tapu bladzijde 29]

Culver Pictures